Unicode
ဝင်လာသည့်အစေခံ၏ အမည်မှာ ချိုးယန်ဖြစ်သည်။ သူမသည် အိမ်တော်ခွဲတွင် အဆင့်မြင့်အစေခံပင် ဖြစ်သည်။ သူမအဆင့်အတန်းသည် ကျန်းလန်လောက် မမြင့်မားသော်ငြား အခြားလူများထံမှ လေးစားမှုကို ရရှိနေဆဲဖြစ်သည်။ ကုန်လွန်ခဲ့သည့်နှစ်တွေတုန်းက နှစ်သစ်ကူးညစာတိုင်းကို ချိုးယန်လာမပို့ခိုင်းပဲ အခုမှ လာပို့စေခြင်းမှာ ကျန်းလန်က ဖျားနာပြီး အိပ်ရာထဲလဲနေသော ကျင်းမိသားစု သမီးကို ဂရုစိုက်ပြပြီး အတင်းအဖျင်းတို့မှ ရှောင်ကြဥ်လို၍ ဖြစ်ပေသည်။
ချိုးယန်က အစားအသောက်ဗန်းကို ချလိုက်ရင်းတစ်ချိန်တည်းမှာပင် အိမ်တော်တစ်ခုလုံးကို စေ့စေ့စပ်စပ် ကြည့်ရှုလိုက်ပေသည်။ သူမအနေဖြင့် ကျင်းယွမ်၏ အိပ်ဆောင်သို့ ပထမဆုံးအကြိမ်ရောက်ဖူးခြင်း ဖြစ်သည်။ သူမက ယိုယွင်းပျက်စီးနေသော ကျဥ်းကျုတ်လှသည့် အိပ်ဆောင်နှင့် တစ်စက်စက်ယိုစိမ့်နေသော ခေါင်းမိုးအပေါက်များကို လိုက်ကြည့်နေလေ၏။ အိပ်ရာပေါ်ရှိအခင်းမှာလည်း အလွန်ပင် ပါးလျလှသည်။ အခြေခံကျသည့် မီးဖိုချောင်အသုံးအဆောင်များပင် ကောင်းမွန်စွာမရှိ။ ထိုကဲ့သို့ စိုထိုင်း မှောင်ပိန်းသော အိမ်မျိုးတွင် နေရမှတော့ ခန္ဓာကိုယ်က အင်အားချိနဲ့နေမည်ပင် ဖြစ်သည်။ တစ်ချက်မျှ ကြည့်လိုက်ရုံနှင့်ပင် ချမ်းသာကြွယ်ဝသည့် အိမ်တော်သခင်မလေး၏ အိပ်ခန်းမျိုးမဟုတ်ဟု ပြော၍ရပေသည်။ အိမ်တော်ရှိ အဆင့်အနိမ့်ဆုံးအစေခံသည်ပင် ထိုကဲ့သို့ နှိမ့်ချစွာ အဆက်ဆံမခံရပေ။
ချိုးယန်က အဓိက အိမ်တော်တွင် အချိန်အကြာကြီး သက်သောင့်သက်သာ နေခဲ့ရတာကြောင့် သူမ စိတ်ထဲမှ အကြောင်းရင်းကို သိရှိနေပြီ ဖြစ်သည်။ ကျန်းလန်မိသားစုက လောဘကြီးပြီး ကြမ်းတမ်းရက်စက်သော်ငြား အဓိကမိသားစု၏ ခိုင်းစေမှုကြောင့်သာမဟုတ်ပါက ဤမျှအထိ မျက်နှာပြောင်တိုက်ကာ မိသားစုသခင်မလေးကို ဆက်ဆံရဲမည်မဟုတ်ပေ။ ထို့ကြောင့် သဘာဝကျစွာပင် သူမကလည်း ဒီကိစ္စကို ဝင်နှောင့်ယှက်မည်မဟုတ်။
"မင်းနာမည်က ချိုးယန်လို့ တို့ ထင်တယ်"
အိပ်ရာပေါ်ရှိလူက နှုတ်ခမ်းကို ဖွင့်ဟလိုက်လေပြီး ဆို၏။ သူမအသံက အနည်းငယ် အက်ကွဲနေဆဲပင်။ ထူးဆန်းစွာပင် သိမ်မွေ့သည့်ဟန်ပန်က ရှိနေပေ၏။
YOU ARE READING
အမုန်းဖွဲ့ ရန်ငြိုးနီနီ...အမုန္းဖြဲ႕ ရန္ၿငိဳးနီနီ...
Historical FictionJust a translation. ကိုယ့်ဟာကို ဖတ်ဖို့ tranတာပါ...မစောင့်နိုင်ရင် E tran ရှိပါတယ်ရှင့်...။ Translation Of Rebirth Of An Ill-Fated Consort
