وجع الحب

جزء ١١

💔   الحلقة الحادية عشر   💔

خرجت مى من منزل سارة بعدما قصت عليها انها عندما عادت من تركيا اخبرها والدها ان والد وليد تقدم لخطبتها وانا والدها وافق فورا فهو يرى ان وليد زوج مناسب جدا لمى

دخلت نادية اليها وجدتها صامتة شاردة لاتتحرك اقتربت منها وجلست بجوارها

نادية: مالك يا سارة فى ايه انتى كنتى كويسة من شوية هى مى قالتلك ايه زعلك كده

كانت عيناها زائغة كانها فى عالم اخر شاردة حزينة افاقت على كلمات نادية

سارة : مى اتخطبت

نادية بفرحة: ايه بجد طيب امتى ومين العريس

احست بغصة فى حلقها وقالت بصوت ضعيف:

وليد

نادية: وليد.......وليد مين

سارة: وليد سليم

شهقت نادية: ايه بتقولى ايه

سارة : اللى سمعتيه يا ماما وليد سليم

كانت سارة قد قصت لوالدتها ما حدث فى تركيا وطلب وليد الزواج منها عندما يعودون الى مصر

نادية: يعنى ايه كان بيتسلى بيكى ......يوعدك بالجواز ويروح يتجوز صحبتك ازاى يعمل كده ليه ليه

وقفت سارة بضعف امام شباكها :عشان هو وليد سليم ابن مددحت بيه الراجل الغنى صاحب الشركات والمصانع وهى مى مكرم مستواهم زيهم بالظبط لكن انا ......انا سارة البنت اليتيمة اللى معندهاش حاجة يتطمع فيها لاانا غنية ولا عندى فلوس تخليه يتجوزنى

امسكتها نادية من كتفها وقالت بقوة وصرامة :

لا يا سارة فوقى انتى مش سارة الضعيفة الفقيرة انتى سارة بنت مراد المنشاوى عين اعيان الصعيد لازم تعرفى كده وتفهميه اوعى تكونى ضعيفة وسلبية كده هتنكسرى هيدهسوكى برجليهم ومحدش هيشوفك اوعى تضعفى ولا ثانية واحدة خليكى عارفة انتى مين وبنت مين

بكت سارة بشدة:يا ماما حرام عليكى اعيان ايه وكلام ايه بتضحكى عليا ولا على نفسك نسيتى احنا فين وعايشين فين نسيتى تعبك وشغلك والمرمطة اللى شوفتيها عشان تربينا نسيتى ........

رفعت راسها : بس انا مش ناسية ولا عمرى هضعف اللى حصل ده اختبار من ربنا ليا ولازم انجح فيه .......

فتحت دولاب ملابسها واختارت ملابس سوداء وارتدتها تحت اعين نادية التى لاتفهم شئ

نادية: انتى بتعملى ايه ........رايحة فين

سارة : رايحة مشوار ومش عايزة حد معايا

نادية: يعنى ايه اوعى هتكونى رايحله

سارة : مش انا اللى اذل نفسى لاى حد بس عشان خاطرى سيبينى لوحدى ومش هتاخر

وقفت نادية امامها: مش قبل مااعرف رايحة فين