وعصفت بنا الاقدار

23

وعصفت بنا الاقدار... البارت الثالث والعشرون
للكاتبه زهراء ( روزايه)...

( بارت مفاجئ لعيونكم .... احبكم)

سواد الليـل يبقى
وتطفي الالوان
واعيد بذكرياتك والمشاهــد
وياك بعشرتي يا ليل خسران
مثل عشره النار وي الكوآغد...
....

لبابه... واكفه بين الزلم وصدى اصواتهم
يرن بأذاني اليگول خطيه عريس!!
واليگول بعده شباب!!

واليگول الله يساعد گلب امه وحيدهه
والي تصيح بصوت عالي اخويه سندي
منو الي بعدك!!

وكفت بركن القصر واباوع بعيني
گلبي يعت بيه ويهزني ويگلي
ليش واكفه اركضي جراحج رااح

روحي واكفه مثل وكفتي واحسهه
تحترك مثل نار والتهمت اليابس
وماظل من عدهه بس الاثر...

كرفصت بالكاع وخليت اديه على
عيوني وكمت ابجي بصوت واصيح
جراح لاتعوفني بس صوتي ضاع
بوسط حرگه گلب عمه وابرار محد جان
يسمعني ..

كومتني وحده تبجي وحضنتني
واخذتني ليجوه وتصيح يمه
هاي لبابه جايه وحدهه جانت نور
التحجي...

بعدني بصدمه بعدني مامستوعبه
كذب الصار واني جاي احلم
انعادت كدامي صورة شهد وهم كلت حلم
وطلع حقيقه..

قبل يومين خابرني حته يودعني
راح يصير اكثر من شهر ماشايفته
اخر مره اجه انطه فلوس لماما
وكال اني مكمل نقل لبابه..

جنت كاعده بالطرمه واباوع بعيوني
الغوشت من الدموع كلشي بيه رافض
يصدگ هاي اني احلم وهسه يخلص
الحلم واخابره...

عمه زينب تركض حافيه من القصر للشارع
وترجع مثل المجنونه بدشداشتهه السوده
وحجابهه المضبوط وتلطم ع راسهه..

ابرار كاعده بين نسوان القصر
وهوايه ناس اجت ع الصوت
ويصبرن بيهه...

مااعرف شكد مر من الوقت اني
بوسط دوامه الكابوس كلبي يعت
بيه ويكول الطمي وعيطي مثلهن
وعقلي رافض يصدك !!

بديت استوعب وبده صوتي يطلع
واني اصرخ بحضن ماما ومااعرف
ارتب الكلمات واكول بس ابجي
بشهكه..

طببوا النسوان كلهه جوه كلهه مفجوعه
الجبير والصغير حته اليجي ع الصوت
يكعد يبجي ع حال عمه زينب...

هاي تسأل وهاي دكول شلون مات؟
هاي دكول شهيد يم ربه
وكلمه عريس بين جمله وجمله اسمعهه

وصل الخبر من الآمر مالته جراح يداوم
ع الحدود السوريه باخر نقطه بالحدود
ع القائم..

وطالعين واجب  لمدينة القائم وهناك
صاير انفجار ع نقطة تفتيش هو جان
الضابط مال هاي النقطه ...

اجه الخبر متوفي هو وكل الموجودين
بالسيطره من جنود ومن مدنيين
ارهابي مفجر نفسه بحزام ناسف..