حبي الاول والاخير

البارت١٦

#حبي_الاول_والخير

الجزء السادس عشر///

محمد مذهول ومصدوم والف فكره جتي بباله :
محمد// جاوبيني
بتول// محمد شبيك ، مو هنا ، نطلع منا .
محمدجرها من زندها حيييل واخذها لغرفة الاستراحه:
محمد// اسمعج ، ليش صارلج كم شهر انتي تستلمين راتب روان ؟ وليش مگلتي؟
بتول // عادي تره ، ليش تكبر الموضوع ، هي طلبت مني استلمه عنها.
محمد والشراره تتطاير من عينه// شوفي بتول ، قسماً بالي خلقج وسواج اذا هسه محجيتي الصدگ ، لا تصبحين باجر مشموره بالارياف ، وخليج تبجين دم ، وتعرفين اني منو كولش زين.
بتول// لا تهددني محمد ، گلتلك طلبت مني انو استلمه عنها.
محمد// ومن يمتى وجاي انتوا اصدقاء او بينكم هيج ميانة وزاد ، عمري ماشفتج تحاجيها .
بتول// مو اله كل شي تشوفه ولا مجبوره انطيك تقرير بعلاقاتي او تحركاتي .
ودارت راسها وحاولت تطلع من الغرفه ، محمد كمشها وجرها وشمرها على القنفه :
محمد// تحجين الصدگ ؟ لوووو..
بتول// هسه اشتكي عليك .
محمد لزمها من حنجها وفركه بيده// اشتكي ليش لا اذا بظهرج روان .
بتول// عسى منو ميكون بظهري ، المهم ابهذلك وافضحك.
محمد// الله الله والله وطلع صوتج وصرتي تخرمشين ، راح تحجين لو اصيح التيم كله وافضحج گدامهم ؟؟ بكيفج بعد، تحجين الي ، لو اصيحهم هسه كلهم واجمعهم ويه رئيس القسم همين .
بتول// شتريد تعرف؟ خلصني .
محمد// صار كم شهر تستلمين راتبها .
بتول// هذا هو الشهر ال٦
محمد// هذا ثمن شنو بتول؟ اريد اعرف ؟
بتول// تساعدني .
محمد// ههههههههههههههه ضحكتيني والله ، رواااان تساعدج ، منين هاي الايمان والتقوى مالتها؟ لج عليمن انتي تقشمرين ، حتى الزمال هسه اذا تجيبيه ميصدگج ، گولي شنو الثمن ؟
بتول// ماكو ثمن گلتلك تساعدني لان وضعنا المادي مو شي واني سبق وحجيتلك .
محمد // وليش مگلتيلي ؟
بتول// خجلت ، استحيت ، نفسي يااخي متسمحلي.
محمد// بس تسمحلج تاخذين فلوس من روان .
بتول// وهذا ميعني اكعد اتباهى بالموضوع .
محمد// زين عجب من ٦ أشهر يعني وليش ، خررررب دينجن اثنينجن ، اني اگولج ليش ( ولزمها من زندها وگومها وگفها) لان زرعتج يمي ، موووو؟ ، لان خلتج قريبه من يمي ، وخلتج تمثلين الطيبه والطهاره والخير براسي ، واني الزوج صدگتج.
بتول// لا ماكو هيج شي .
محمد// تمام لعد اوگفي خلي اصيح التيم ( طلع التلفون) وخاااف همه سكتوا هاي الفتره فخليهم يرجعون يستلموج .
بتول// لا لا راح احجيلك ، بس انطيني كلمة رجال متجيب سيرة لاحد ، ومتفضحني.
محمد// احجي ، فهميني الموضوع من البدايه ( راح على الباب قفله ورجع دفعها على القنفه )  انجبي گعدي هنا وغردي يابلبل .
بتول// راح احجيلك بس احلفلي ( كامت تبجي او تصطنع البكاء) بلا فضايح ، اني مو مثلك ولا مثلها ، اني انسانه على گد حالي وماعندي ظهر مثلكم ، وهي وعدتني اذا صار شي تطلعني منه .
محمد// شنو اذا صار شي (وگعد گبالها على الكرسي) احجيلي من البدايه .
بتول// روان رادت تنتقم منك وره الي سويته بيها ورادت تبعدك عن هدى نهائياً وطبعاً هذا الي صار ، وجتي عليه وهي تعرف كولش زين محد راح يشك بيه اذا تقربت منك ، واتفقنا اكسبك بالبدايه مهما طولت المده ، واخليك تثق بيه ، وهي تظل بعيده ، وجانت تگولي مايهم الوقت ، راتبي طول ماانتي ماشيه صح يكون الج اضافه الى انو تدفعلي فلوس الخط ،  وانطتني خلال هاي الفتره مرتين على ٢٠٠$  حتى اشتري ملابس وعطور وجانت تشدد على عطر معين اشتريه لان جانت هدى تستعمله.
گام لحيله ودنگ عليها يضربها ، وتراجع :
محمد// كملي
بتول// وبالفعل صرنا اصدقاء وگدرت اكسب ثقتك وودك همين ، بس والقران اني حبيتك وشفتك شي جبير وحلو، ومجنت....
محمد// اكلي..... لج اسمعي گلتلج احجيلي ماگلتلج اريد اسمع مشاعرج ، كملي بدون اكلان خره.
بتول// هذا الي صار  واني جنت اتقصد امدح هدى واحثك عليها ، حتى تثق بيه اكثر ، وهاي روان نبهتني على هذا الموضوع ، اريد اشرب مي
محمد// گومي تزقنبي .
احد حاول يفتح الغرفه ومن شاف الباب مقفول دگ الباب ، محمد توجه للباب فتحه شاف سيف المضمد ، سأله شيريد ، سيف گاله يطلبوك بالطواريء ، طلب منه يدور يوسف يحل محله ، لكن سيف المضمد انتبه على وجود بتول وظلت بعينه اسئله وصاح بيه محمد انو يروح يبلغ يوسف بعصبية وهذا انهزم🤭. ورجع قفل الباب:
محمد// كملي
بتول // شكمل محمد وانت تعرف الباقي .
محمد// اريد اسمع منج . يوم عيد ميلادي شصار وشجابج وانتي مجازه؟
بتول // تتذكر گلتلك جتني اوامر ، جنت كولش ضايجه لان روان اتصلت بيه واني امي مريضه ومااگدر اعوفها وگلتلي لازم اكون موجوده لان هدى راح تجي ، جانت سامعه من زينب انو راح يسوولك مفاجئه وهدى راح تكون موجوده وراح تدخل عليك هي وشايله الكيكه .
محمد// شگد شفت ساقطات ، مثلكم مشفت. كملي.
بتول// روان گالت لازم تشوفج هدى ويه محمد وتعرف بينكم شي ، ولازم تدبرين حالج وتخلين عطر وتصرفين بشكل تخلين محمد يميل الج يحضنج يبوسج مايهمني ، من راح تسمعين صوت مسج وصلتج ، اعرفي انو هدى بالباب هي والگروب وراح تدخل عليكم، اذا ضبطتيها الج نص مليون فوگ الراتب هديه ، واني نفذت .. والباقي تعرفه .
محمد لمّا سوه نفسه يهددها يخابر التيم ، هو فتح التلفون مالته وشغل تسجيل صوت وجان اله غايه منه.
محمد// يعني جنت زوج ، واستغليتي ضعفي واحتياجي لجتف او صديق؟
بتول// موووو اني ، روان كله روان ، اني جنت اداة بس مثل مگلتلك والله العظيم حبيتك و..
محمد// انجبي مااريد اسمع صوتج . يفتر بالغرفه وهو   يحس انو هو غبي واثول لان اثنين ساقطات گدروا يلعبون عليه. فتح قفل الباب :
محمد// گومي طلعي منا ومااريد اشوفج وحسابي راح يوصلج .
گامت بتول لحيلها // محمد ابوس ايدك بلا فضايح
محمد تفل بوجهها // ومن فضحتيني وخليتي هدى والكل يشوفون مفكرتي لدقيقه بفضيحتج ، مفكرتي بيوم راح اعرف وتنكشف اللعبه وشراح يصير بيج ؟ طلعيييي قذره ، ( دفعها بره الغرفه) .
ظل يفتر بالغرفه وصاير نار 🔥 وفكر يروح لرئيس القسم ويسمعه التسجيل ، وهو يحيل روان وبتول مجلس تحقيق ويسحب منهم هوية النقابه ، لكن فكر بأبو وام بتول واخوتها ، شنو ذنبهم ، زين روان گرايبه ، يعني فضيحته اله ، هو راح يتأذى لان راح يصير مضحكه ومهزله شلون اثنين بنات لعبوا عليه هيج لعبه وهو اكبر زوج واثول ووگع بالمصيده .
نزل للحسابات وطلب من المحاسب يصور توقيع بتول على استلامها رواتب روان مال ٦ أشهر وگاله انو روان طلبت منه يصورها باعتباره ابن عمته ، واخذ نسخ وهمين صورها بالموبايل واستلم راتبه وراتب سعيد وصعد .
محمد ظل يدخن بره ويفكر شلون راح يتصرف ، واتصل بأخوه علي وسأل عن ابوه ، وبلغه الاخير انو ابوه يمه بالشركه بالمكتب مالته ، وطلب من علي يشغله وميخليه يطلع لما يوصل .
توجه محمد للشركة وهو كتلة غضب وقهر ، وجان ناوي يواجه ابوه وينهي شي اسمه روان واتوقع ابوه راح يعارض وجان يعتبر هاذي المواجهه هي الي راح تحدد موقف ابوه وتخلي النقط على الحروف .
وصل الشركه وفات راساً لمكتب ابوه وعلي جان موجود همين :
علي// نورت الشركه ياب ، بس لازم اكو شي قوي جابك!!
ابو محمد// ابو جاسم انت بخير؟ وجهك معاجبني احجي ابويه محتاج شي .
محمد طلع تلفونه// اسمع حجي ، وراها نحجي
فتح محمد التسجيل ، وابوه وعلي يسمعون وابو محمد عينه بالحق صارت ، وعلي مدهوش من الي ديسمعه وخلص التسجيل وطلع محمد النسخ والصور الي اخذها من المحاسب وشمرها گدام ابوه.
علي// حدسي ببتول جان صحيح يعني .
محمد// انت لگفتها من اول نظره واني الاثول الخبل اشهر يمي ومالگفتها.
ابو محمد// هدى حقها لعد من گالتلي اشكرك لان خلصتني من قذارتكم .
محمد// شوكت؟
ابو محمد// بالمحكمه ، تتذكر؟
هز راسه محمد .
علي// انت مو غبي ولا اثول ، انت انسان مستقيم وصريح وهاي السوالف او هيج نماذج ميلگفها غير الي عنده خبره بالبنات وملعب مثلهم ، سامع بكيد النسا محمد، هو هذا كيد النسا.
ابو محمد// ابني اذا تتخذ اجراء عليهن بالشغل راح تدفع الثمن انت وياهن ، وانت دفعت ثمن هوايه لحد الان ويكفي الي دفعته .
محمد// يعني شنو اسكت ؟
علي// ورحت هسه على روان واجي وياك اني وكسرت راسها ، شراح تستفاد ، وشلون تضمن انو مراح تسوي مصيبه جديده؟
ابو محمد// اي مصيبه بعد وحتى انفصل عن خطيبته ؟
علي// هيج نموذج ميعرف يسكت حجي، هاذي عاميتها الغيره والحقد ، يعني اذا متنكسر رگبتها او رگبة واحد بينا مترتاح .
محمد// تدري ليييييش ، لان تربت بدون واحد يشكمها ويعلمها ويشوفها الله حق ، البنيه من تندلع وتاخذ كل شي تريده تطغى ، وهاي طغت .
ابو محمد// جنت استخطيها واعتبرها بنتي متوقعت بيوم من الايام اول مراح تضر ، راح تضر ابني او تضرني ، لعلمكم هاي الشغله هسه مستني الي قبل ما تمسكم ، لان هذا يعني اني مديت الحبل ، رغم بآخر مشكله ومن كسرت ايدها ، اني نبهت وحذرت من اي موضوع جديد ، لكن مع الاسف.
محمد// افهم من كلامك انت ويايه؟
ابو محمد// اي ابني وياك ، واذا تحب هسه اگوم اروح وياك لبيت خطيبتك واعتذر وابوس راسها همين .
محمد// فات الاوان حجي ، انتهى كل شي ، ودگه بتول الاخيره ، حرگت كل شي ويه بنت الناس ، خلي الله يسعدها وتشوف واحد احسن مني .
ابو محمد// ماادري شگولك ، عسى ان تكرهوا شيئاً ، بس موضوع روان عوفه الي واني راح اتصرف اما بالنسبه للثانيه فهذا راح يبقى يمك ، وكل وسائلي  وجماعتي ومعارفنا متاحين الك بأي تصرف او قرار تريد تنفذه.
محمد ارتاح وزال غضبه من شاف موقف ابوه ، صح بعد فوات الاوان ، بس حس بطمأنينه عجيبه ، خلته بهاي الليلة اول مره ينام مرتاح من زمان.
$$$$$$$$$$$$$$$$$$$$$$$$$$$$$$$$
ام هدى ظلت يوم زينه ويومين مو زينه وظلت هدى بين الدوام وبين تداريها ويومياً تحجي هي وضرغام عن وضعها الصحي والقلق ينهش بيهم ، وراد ضرغام يسويلها دعوة ويخليها تجي يمه ومقبلت وتعاند ، وهدى حاولت بكل الطرق انو تحسسها بالراحة والطمأنينه وجانت تتجاوب وياها ووره يومين ترجع امورها تتأزم .
لانا  عرفت من سعيد موضوع بتول وانطته عاجل بالگروب ، وقرته هدى وجان رأيها انو هذا مايغير من الوضع شي ، لان هو بكل الاحوال تجاوب وياها وانطاها مجال يعني العذر اكبر من الصوج وهذا يأكد انو هو مذنب ولومو هو مجان يريد مجان لا بتول ولا غيرها تگدر تسوي شي ، لكن لمى كان رأيها انو هو مو نبي ، وجان يمر بضغوط قويه وماكو انسان ماتجيه لحظه ضعف وانو ترتيب روان جان داهيه ولازم الكل يعترف بذكائها .هدى طلبت ينسد الموضوع او تغادر الگروب لان هي متفقه وياهم ميفتحون ابد سيرة محمد.
اجى يوم حفلة المهر مالت لانا وسعيد وهدى اصرت انو امها تحضر وياها لان مستحيل تعوفها بالبيت لوحدها ، وراحوا للصالون سويه وبالصالون هدى سوت شعرها ومكياجها ولبست بدلة سوده مكشوفه الصدر وساگ على جسمها وشعرها جان نازل سرح ومرفوع من الجوانب ، جانت طالعه كأنها ملاك 😇 نازل من السما بعتمة الليل ، من لبست الاسود برز بياضها بالزايد . وجانت هي ولمى حييل فرحانيين للانا وطبعاً حضر العرس محمد وعلي ، وعلي من شاف هدى من بعيد واگفات يصفگون ويهلهلون للعرسان راح راساً عليهم وترك محمد واگف مدهوش بجمال هدى ، وجان يتمنى هو وياها بمكان سعيد ولانا ، وشاف هدى شلون جانت ترگص هي ولمى گدام لانا ويغنون ولا كأنو هو موجود ولا انتبهت عليه.
علي// لج هااااااي شنو ؟ مراح يتحمل صدگيني.
هدى// شنو ماسمعتك صوت الاغاني ؟؟
علي// هيج هيج وصار يهز وياها ويتعمد يوگف بينها وبين لمى ويظل يباوع على لمى وهو يرگص
لمى// غثيث😕
علي// سمعتج هالمره😂
لمى // يمه خفت😏
علي// مااخوف اني ، بس اچوي
هدى// جوز منها ولا تداهرها رحمه لاهلك .
هدى رجعت على الطاوله گعدت تحجي ويه امها اخاف ضايقها صوت الاغاني
ام هدى// لا حبيبتي بالعكس ، اشوفج شلون عيونج تضحك عندي بالدنيا ، فدوه قل اعوذب برب الفلق شطالعه خلقه (باستها)
علي// خلووووووده مشتاقيتلي ؟
وگعد يمها يسولف ، ومحمد توجه لسعيد يسلم ويبوسه وسلم على لانا .
محمد مجان مقصر ، الهيبه والقاط وملابس رباط لان يضوج منه ، وشعره وجسمه وطوله ولحيته المحدده وعيونه وحواجبه ، خلى كل البنات بالقاعة عينهم عليه ويسوون حركات گدامه ، لكن هو جانت عينه على وحده بس ، وجان كل شويه يريد يكتل واحد يباوع او يوزع ابتسامات لهدى ويكمشه علي .
هدى جانت تسوي نفسها ولا منتبهه عليه وملتهيه ويه البنات ، لكن جانت تحاول تسرق نظرات بس تشوف محمد مشغول ومامندار عليها ، ومن شافته بالقاط تذكرت يوم خطوبتهم ومهرهم ، وشلون جانت بحضنه ترگص ، وهسه سبحان الله كأنهم اغراب ، وواحد بعيد عن الثاني . گلبها عصرها واخذت جنطتها الصغيره وطلعت بره القاعة بالمكان المخصص للتدخين وورثت جكاره وصفنت ، وتاخذ نفس ورجع الماضي گدامها مثل الفيلم وهي صافنه وبيدها الجگاره وقربتها تاخذ نفس ومتشوف الا وانجرت الجكاره من ايدها ، اندارت لگت محمد ديطفيها بالنفاضه:
هدى // منو سمحلك ؟ وعلى اي اساس تجرها من ايدي؟
محمد// مو زين عليج ، وتعرفين مااحبها.
هدى بعصبيه// وانت شنووو؟ ومنو؟؟ نسيت نفسك ولا شنو ماالك اي حكم عليه تره اصحى ياااحلوو.
محمد// انتي الحلوووه مو اني الحلووو (ورفعلها تك حاجب) ثم انتي منووو سمحلج تدخنين ؟
واجااا صوت من ورا:
" اني سمحتلها ، عندك مانع؟"
وانداروا اثنينهم وجانت المفاجئة.......
&&&&&&&&&&&&&&&&&&&&&&&&&&&&&
نهايه الجزء السادس عشر💋