LOVE POEM (DHOLUO)

Hera Chalo Nanga Yuach

Hera,
Mae e en,
Eee, en ema ne mama wachona cha,
To donge kata dawa bende ne owuoye,
Nyathina, winja kawuono,
Adwa puonji wach moro,
En wach Hera.

Hera mit sidang',
Kendo Hera nyaka tedi maber,
Eka mitne winjore,
Seche michame,
Pachi dek weyi,
Chunyi bende ridore mos,
Kochomo chuny jaherani,
Iyieng' pile seche ma Hera mit to poto,
Eee, en wach Hera.

To ok mano kende,
Nyakwara,
Hera kech kendo lit chalo kuth abondo,
Otin,
To ka ochwowi to oringe remo,
Mi igomb kata ywak,
To in,
Itegno! Kik iywagne Hera,
Depo ka jaherani oweyi.

Hera chalo nanga yuach,
Seche ma onyien,
Odum mitumba kata omboto,
Ogoye pafium ong'ue ng'ar,
Ipime kendo oromi maber,
Irito Mondo piny oruu isungne jii,
Inindo Kode, Dak ilonye nikech ang'o?
Iparo ni ang' jirani ne kwale.

Nanga yuach,
Iruake seche tee,
Kata olil; ochalo wash and ware,
Yaani iluoke to irwake,
Ogoli maber, indisori e iye,
Kaka ndalo medo sudo,
Tik mamit cha rumo,
Ochako dum tik luchi,
To pod nyaka ihere ahera,
Nikech Hera chalo nanga yuach.

Nanga yuach,
Obiro tii,
To kata oyiech to ikwoye akwoya,
Kata obarore to nyaka ibawe,
Kata okidhore to nyaka itweye,
Nikech ihere ahinya.

Jomoko biro nyieri,
Nikech irwako nanga moyiech,
To Mano en nangani,
Chunyi mor Kode,
Mana kaka ne imor kode Ka ne onyien,
Kata odum,
To en Mari, mago luchi,
Inyalo loke dasta,
Nikech idwa nene seche duto.

Wuoda,
Kiyudo jaherani,
Lose maber,
En obed maberni ka uyudoru,
To Kaka seche kalo,
E kaka gombo mar nene nyalo rumo,
Kik ilokne ng'eyi,
Rwake kaka ne irwakega,
Luoke maler pile,
Baw kuma otuch,
Kuma tek,
Kalie uru kanyakla,
Nikech Hera Chalo nanga yuach.