القرار

Part 4

(( حيدر ))
اخبرتها انني عندما عشقتها كان القرار قراري ... ولهذا اهديتها قصيدة نزار قباني .. ولكنني في مرحلة معينة اكتشفت ان القرار ليس بيدي ولا بيدها ... واننا نعيش في مجتمع قرر ان يعيش ويستمر بتخلفه ...
ومن اصعب هذه القرارات هيي عندما واجهت والداي ... كان يوم الجمعة العائلة جميعها مجتمعة ... اعمامي وزوجاتهم والجميع ...
اثناء جلسونا لاحتساء الشاي بعد الغداء .. فكرت ان افتح الموضوع .. قلت لأمي : يمة انتي دائما شتريدين اسوي !.
عقدت امي حاجبيها وقالت : تتزوج .
- هههههه اريد اخطب .
ابتسم الجميع وقالت امي بفرح : الحمد الله والشكر .. عندك وحدة لو تريدني ادورلك .
- لا اني مختار .
ابي : منو حتى من باجر نروح خطابة .
قلت : طالبة عندي بالجامعة .
ابي : وين بيتهم اهلها منو .
بلعت ريقي وقلت : بالاعظمية .
قالت امي بدهشة : سنة !.
- اي شكو بيها .
ابي : شنو الشكو بيها مو شيعية نفسك .
- بس مسلمة .
- تفرق مسلمة بس مو على مذهبك .
- وهو شنو مذهبنا غير النبي !.
امي : هاي ساحرتلك.
- يمة شنو ساحرتلي شنو هالحجي .
قال ابي : ماكو متاخذ هالبنية واذا عالزواج امك تدورلك غيرها .
- بابا احبها .
بدأ صوت ابي يرتفع قائلا : شنو تحبها !!.. انساها مراهق انت شكبرك تصير .
قال عمي : حيدر هالبنية متجوز لك .
- ليش بيا شرع !!.. ترا دينا حلل نتزوج من غير دين انوبة انتوا حرمتوا علينا الي من دينا همين !!!.
ابي بصراخ : متاخذ سنية .
قلت بعناد ولأول مرة اعاند فيها ابي : اتشرف اني اخذ سنية .
ابي : روح اخطبها بس بحدك .
نهضت غاضبا خرجت الى الحديقة ... بدأت ازفر بقوة حتى شعرت بعمي الاصغر خالد يقف بجانبي ...
وضع يده على كتفي قلت له : اسمع لو جاي تنصح وتقول عوفها وفر كلامك .
- جاي اقولك شوكت تروح تخطب لان حجي وياك .
التفت اليه وقلت بدهشة : شنوو!.
- ههههههه بس ترا زعلان عليك .
- ليش ؟.
- لأن عبالي تعرفني رح اوقف وياك .
- عبالي من بعد هذاك الموقف غيرت رأيك .
- ترا بعده حبي الها مامات .. يمكن حقدت ع هالمجتمع اكثر .
- قصتي تشبه قصتك .
- بس ماريد نهاية حبكم مثلنا .
ابتسمت وقلت : لتخاف .
ذهبنا الى منزلهم في منطقة الاعظمية ... يارب وفقنا ياالهي ... ضغط عمي خالد على الجرس ... فتح لنا والدها كان في الخمسينات طويل القامة ومازال محافظا على لياقة بدنه ...
قلت : السلام عليكم .
والدها : عليكم السلام ... تفضلوا .
اشار لنا بالدخول .. ازدادت ضربات قلبي لمجرد احساسي انني في منزلها ...
دخلنا لغرفة الضيوف جلست بجانب عمي وهو امامنا ... اشرت على عمي وقلت : اقدملك عمي خالد .
والد عسل : تشرفنا ... بس وين اهلك ؟.
زفرت وانا احاول ان اجمع كلماتي ولكنه كان اسرع من وقال : اكيد مموافقين مثل ما اني مموافق .
- عمي ميصير نفكر بشي طائفي احنا كلنا مسلمين .
- ابني هالحجي كله نقوله شعارات بس بالواقع ماكو هيج شي .
- صدقني لو كل واحد غير تفكيره المجتمع كل حيتغير احنا نطلب من المجتمع يتغير واحنا مراضيين نغير نفسنا .. وهو من المجتمع ؟.. اني وانت وكلنا ... المجتمع والطائفية مو شخص نقوله منريد ونقعد نلومه ... الطائفية تفكير براسنا احنا مراضيين نشيلها من راسنا .
- متأسف ابني بنتي ماطيها لواحد شيعي .
- اني مويهودي .
- بس انت مو من طائفتنا اعتذر ... بعدين انت تعرف الاصول اذا اهلك مقابلين شلون تريدني اقبل ؟.
نهض وقال لينهي اي نقاش : شرفتونا .
خرجت من منزلها وانا اشعر ان العالم يضيق بي ... وضع خالد يده على كتفي وقال : شفت ان المجتمع عمره مرح يتغير .
- رح يتغير وداعتك ... وبداية تغيره ان عسل تصير حلالي .
- بس هياته ابوها رفضك .
- ههه عبالك رح اعوفه !!.. رح ارجع اخطبها بس من اقنع اهلي .
- انسى اهلك مو همة نفسهم الي وقفوا ضدي من خطبت عائشة .
- اني عندي يقين بربي .
ان تمر الايام بدون ان تحادث من تحب !!.. ان تراه ولكن لا يمكنك محادثته ... قريب منك لدرجة ولكن لا تستطيع ان تمسك بيده ... تقيد يدك قيود ليست بحديد قيود اقوى من الحديد وهو المجتمع المتخلف ... العادات والتقاليد ...
ارى الحزن في عينها ولا استطيع فعل شئ ...
ذات مرة كنت في محاضرة عليهم ... دخلت المحاضرة كانت هي تجلس في اخر صف كي لا تكون امامي وتنهار ...
قلت لهم : البارحة صديق الي شاعر اسمه علي الشيخ الف شعر اريدكم تسمعوه .
ابتسم الطلاب لأنهم يحبونني عندما اخرج عن الدرس وابدأ بالثرثرة معهم ... في الواقع كنت اريدها هي من تسمع هذا الشعر ...
نظرت لها وبدأت القي القصيدة ...
حبيتج ضوة والدنيا جانت ليل .. وشديتج علك من الصعب ينحل ..
جنتي امنيتي الاولة بحضرة العباس .. كون امنيتي تصبح ربي صعبة انذل..
ربيتج لحد ما صبح طولج غيم .. وسكيتج نظرة نظرة وخصرج تبلل ..
اغار بداخلي المحروك اذا تصفنين .. احس بالج لغيري بهاي ما اقبل ..
رغم ادري على قبلج اسمي جان اشراع .. وادري ابالج اسمي الماضي والاول..
حبيتج ولكن ماحسبت حساب .. كلش مو ابالي الدين يتبدل ..
سنية واذا قابل كتلتي حسين ؟.. اهلي شبيهم يخلوني اتبهذل !..
وابوج شسوه بية بيوم سد الباب .. ياخذ بنته شيعي بهاي مايقبل !..
على دين الرسول ثنينهم يمشون .. لكن رأيهم منة اليهودي افضل !...
شمدريني العشق بي طائفية تصير !.. العشق وردة ومحبة شلون يتحول ؟..
الي يعشق هسة لازم يسأل المحبوب .. من اول لقاء بالغصب خل يسأل ..
من شيعة علي من سنة الفاروق ؟.. خاطر يرضى اهله وحتى ماينذل ..
خربتو الاسلام العشق مابي دين .. جم عاشق اكليبه بصوجكم منشل !..
ياربي اليخرب عشق اي ثنين .. ابو فاضل يسطره وكون يتبهذل ..
للشاعر : علي الشيخ
قصيدة : العشق مابي دين
انهيت الالقاء .. رأيت دمعة سقطت من عينها كانت متشبثة تحاول ان لا تسقط ولكنها سقطت ...
قال احد الطلاب : استاذ تتوقع اكو امل .
ابتسمت له وقلت : اكيد .
قالت احداهن : بس هذا حجي شعارات .
- احنا مطالبين شي جبير وممسوين شي غلط .. صدقوني الي يريد احد بالحلال الله مرح يتخلى عنه .. بالعكس يدعي ربه بثقة لأن ماعنده شي يخجل منه .
قال الشاب : زين شنو الحل ؟.
- الحل ان احنا نبقى على رأينا ... بلدنا تعذبت هواية وكافي يومية ديموتون شباب من عدنا ماعدنا وكت نتعارك ع شي طائفي .
قالت فتاة : ياريت الاهل يسمعون حجيك .
- مشكلة الاهالي ان ميحبون يبينون نفسهم غلطانين واذا جينا نحجي وياهم او نتناقس يسدون الموضوع .. ماعندهم حجة للنقاش .. ماكو اخذ وعطا .. يمشون ورا افكار عامية عينهم حتى ميريدون يعرفون هالفكرة صح او غلط .
اتصلت بها بعد ان اخذت هاتفها ... سألتني : ليش اطيت امل لطلاب هواية واحنا نفسنا قصتنا فشلت .
- مافشلت ولا رح تفشل ... اني عندي يقين برب العالمين .
- اني هم جان عندي يقين قبل ماتخطبني قلت الله حيفرحنا .
- هذا مو يقين .
- لعد شنو ؟.
- اليقين انج تكونين فاقدة الامل بكل شي .. والكل قالوا ماكو امل وانسدت الابواب بوجهج بس انتي وثقتي بربج ورغم كل هذا جنتي متاكدة حيفرجها .. هذا هو اليقين .
- حيدر وربي مخنوقة ... احس نفسي بدوامة .
- حروح للزيارة وادعيلنا .
- يارب .
- توصيني بشي حبيبي !.
- اريد سلامتك وبس .
- احبج هواية وحبقى طول عمري احبج .
- واني همين .
- ديربالج تفقدين الامل فاهمة اموتج .
- هههههه اوكي حبيبي .
اتجهنا الى كربلاء مع عائلتي ... عندما وصلت عند الضريحشعرت ان روحي تنشرح ... وكأنني بدأت الان اتنفس .. ريح موجودة تعطر المكان كأنها مسك ...
وقفت امام الضريح ورفعت يداي : ربي بجاه ابو فاضل كفيل زينب اريدها تكون مرتي وخلالي ومن نصيبي .. ناخيك يابو فاضل بجاهك عند رب العالمين ياباب الحوائج والله ماقدر اعيش بدونها وماريدها غيرها .
انتهينا من اداء الزيارة وعدنا بعد ايام ... اثناء عودتنا في الطريق سيرا على الاقدام تحديدا في منطقة المسيب .. حدث مالم نكن متوقعيه .. فجر انتحاري بيننا نفسه !!...