جانت البوسه گبل تشفي الغليل
وبيها مفهوم النوايا الصافيه
البوسه جانت گبل توصف للمريض
وكلهم چم ساعه وتردله العافيه
المختر يجيبوله ولفه يصد عليه
النضره عدهم گبل جانت صافيه
جان اكو بشعر الغزل فكره و وفاء
ماكو شي اسمه الوزن والقافيه
گبل جان المشتغل ضوء الغرام
والغرائز كلها جانت طافيه
هسه خربت والجسم صار القياس
واجه موديل الاحظان الدافيه
والجسم والشكل والمرتفعات
والمضاجع والابدان الغافيه
گبل جان الربطه تلبسها النفوس
والرؤس مكشفه ومو خافيه
الستر شغلة فطره مو شغلة حجاب
العباء وحدها ابد مو كافيه
والله لو تلبس الف ربطه وخمار
ما يفيد الحافيه اظل حافيه
ال عالشرف تدنه ما تعنيلي شي
اكو هو الشرف يدنالها
وموش بس عالراس تلبس ربطه كون
كون يلبس ربطه حتى اخيالها
حتى مالتها الگلب لابس عباء
شكد حلو ينبض شرف دلالها
ويجي بنفسه العنب وبكل احترام
ينزل يبوس ايدين اسلالها
وخجل تنگط من يمر طاري الزواج
وما يمر حتى الحلال ابالها
المره الزينه الرصينه البنت اصول
الفخر يرجع تره الرجالها
الكضها زلمه وحوك ويعرف اشيصير
المره توكع من يرخي احبالها
باوع اعلى الاخ تمير اخته زين
الطيور اطيح وفق اشكالها
المره دوله ولازم تحامي الحدود
من ام قصرها الفوك حد اجبالها
