ⓟⓐⓡⓣ4
يوسف:ابراهيم قولي شكلها شنو بيضا سمرا طويله سمينه ها قول
ابراهيم تلفت شافها وراه:غير اسكت شن دخلك انت
يوسف:نبي نعرف انا ماصدقت انكم شفتوها ها قولي هيا طويله حاق ولا مكلبزه
جميله:هيا مش طويله هلبا ولا قصيرة وبشرتها مش سمرا وعيونها خضرا وشعرها طويل
يوسف:انتي خيرك رجعتي بسرعه
جميله:نصيبي وتلفت مشت وبعدين رجعتله عافكرة هيا مش مكلبزه بكل ولا شنو
ابراهيم:طبعا طبعا
جميله:قوله بالله
يوسف ابتسم:
ملك:مكلبزه رهو
ابراهيم:حرام عليك
يوسف:مش تقولو انها رجعت
ابراهيم:انت خليت فرصه نحكو طول نزلت فينا
يوسف:مش مكلبزه ها
ابراهيم:ابدا والله يازين مااخترت
يوسف يضحك
ملك:يوسف انت خيرك
ابراهيم:خيره تشوفي فيه قدامك
ملك:انت متغير
ابراهيم:لا متغير لا شي
ملك:لا هوا فاهمني ماتستعبطش
ابراهيم:خيره يعني بيكون حبها وشن فيها
ملك:انت مرتاح صح
يوسف:عارفه ياملك لما الضي يقطع ونمشو ندورو شمعه نضو بيها الظلام هيا هكي نورتلي الظلام اللي انا فيه مانعرفش بس احساس اول مره نحسه معاها حلو هلبا
جميله كانت واقفه وتسمع فيه وبعدين كحت باش ينتبهولها:كحيت انا يمكن فقره الاسئلة ماتمتش
ابراهيم:لالا تمينا حتا كان جايب سيرتك بالخير
جميله:ابراهيم شن شرحلك كل شي ولا مزال حاجه
يوسف:ابراهيم هدا ذوقه بايخ جدا
ملك:كثر خيرك
يوسف:انا قصدي مايعرفش يشرح 😅
ملك:ماشي 🙃
يوسف:البيانو خيره وقف انتو تعرفو جميله تعرف تعزف كويس
ابراهيم:ايااه
جميله:ايه نعزف ونعلم في الصغار في الدار
يوسف:عمري ماتخيلت اني نعزف بيانو
ملك:عاد احنا المهندسين ماليناش في الموسيقى
جميله:عادي ممكن نخليك تعزف بيانو
يوسف:ماتقوليش بتعلميني مع الصغار
جميله:ابدا وتعزف توا حالا
يوسف:وكيف
جميله:هي نوض معاي
يوسف:لالا
جميله:ياودي نوض 😅
ابراهيم:ردي بالك منه
نزلاته ومشو
جميله:البيانو قدامنا اهو قعمز هي اسمع انا بنشد ايدك ونعلمك وبعدها بنسيبها وانت بتعزف بروحك
يوسف:تمام
جميله شدت يده:هي وحدا هنا وزوز هنا ثاني ايوا تعرف توا ديرها ولا شنو خليني معاك في الاول وبعدين انت بروحك
يوسف:تمام
وبدو يعزفو مع بعض وكل واحد فيهم قلبه طاير من الفرحه بقربه من الثاني ❤️
بعد كملو عشاهم طلعو وجميله شاده يوسف ويهدرزو وقفو بروحهم وملك خدت ابراهيم بعيد عليهم
جميله:هوا شكلي فارق عندك
يوسف:ابدا موضوع الشكل مايهمنيش بكل
جميله:والله 😏
شدت يده وقامتها لوجها
يوسف قعد يتلمس في وجها وهوا مبتسم
جميله:تخيلت
يوسف:انا بنقولك حاجه هوا انا مفروض نتخيل شنو انا قاعد معمي جديد يعني شن اللي بنتخيله مافهمتش
جميله:تصدق اني غالطه امشي لصاحبك ياابراهيم
ابراهيم:نعم
جميله:تعالا خود صاحبك
ابراهيم:خيركم
جميله:انا خلاص انخنقت منه خلاص مايفهمش بكل
ملك:انخنقتي منا
جميله:لا والله اسفه انا بجديات تشرفت بمعرفتكم يلا تصبحو عاخير
يوسف:باي
ثاني يوم في الدار
ادهم:بس انا ماعجبتنيش قصه اليوم
جميله:علاش بس
ادهم:هكا نحب النهايه الامير يتزوج الاميره
جميله:مش في كل قصه الامير بيتزوج الاميره يا حبيبي
ادهم:بس انا هكي نحبها
جميله:حاضر نوعدك غدوة نحكيلك وحدا كيف تبي بس توا لازم نمشي مستعجله
ادهم جاي بيحضنها سيباته وطلعت بسرعه زعل وقعد يشوف لسبيدروه اللي نست تربطه اليوم
فاتو يوم واثنين وثلاثه واسبوع كامل جميله مختفيه يتصل بيها يوسف بس هاتفها مقفل بعتتله رساله مره وبعدها اختفت ثاني وهوا رجع للظلام ثاني وللكآبه 💔
مساءا في شقه ابراهيم
ملك:قعدا ماتردش انت مش عندك عنوان متع حوشهم
يوسف:شن الهبال هدا نمشيلها لحوشها عاخاطر ماكلمتنيش قداش يوم
ملك:لا عاخاطر انت قالق عليها
يوسف:عندها رقمك انت
ابراهيم:لا مااعتقدش بس لو تبي تكلمها من عندي تفضل
ملك:انت شاك انها ماتردش عليك عمدا ولا زعلتها وماتبيش تقولنا
يوسف:مازعلتهاش ولا حاجه اصلا معاش شفتها من اخر يوم كنا مع بعض عالعشا
ملك:بهي يمكن اضايقت لما حست بيك مهتم بزياده
يوسف:زعما
ملك:انت تعرفها انا مانعرفش
يوسف:لالا حتا بعد العشا بعتتلي فويس وقالتلي انها فرحت بيكم وقضت وقت حلو
ابراهيم:بهي مش ممكن هاتفها راح ولا انخنب
يوسف:كانت اتصرفت وكلمتني من اي هاتف ولا تلاقينا في الكافي ولا جت للحوش
ملك:هيا تجيك حتا للحوش
يوسف:والنبي مش ناقص اسئلة تافهة ايه جت مرتين مره خدت الكلب ومره جابت حد ينظف
ملك:مدام بتقعد متوتر مش حانعرفو نفكرو توا احنا متأكدين انها مش زعلانه ممكن تكون مريضه
يوسف:وشن يخليها تقفل هاتفها
ملك:زي ماقال ابراهيم مرات انخنب
يوسف:بدون مانتعبو روحنا هلبا انا غدوة نمشيلها للدار
ابراهيم:فوتها المشيه مرات تستقبلك بطريقه اخي
يوسف:وعلاش يعني
ابراهيم:مهو زي ماسكرت هاتفها ممكن ماتستقبلش انك تجيها للدار فجأه اسمع مش ممكن امها تكون خدت هاتفها عاخاطر مش موافقه على موضوعكم
يوسف:موضوع شن تي شنو هيا فرخه عمرها 16خيرك
ملك:اسمع
يوسف:ها
ملك:مش يمكن فيه حد ثاني في حياتها
يوسف زي من صب عليه ميه مسقعه سكت وقعد مصدوم لين روح
ابراهيم وصله قدام العماره:انت عرفت انه مشروعنا وقف الممول قال بيزيد يفكر شكله بيفاصل في النسبه وسمعت من برا انه فيه شركة ثانيه مقدمة عروض
رن هاتفه وتكلم"مسج من جميله"
ابراهيم:ماتبيش تفتحه
يوسف:لا اي شي تبعته رح تحرقلي دمي بيه وبعدين مانبيهاش تعرف اني فتحت الواتس اصلا
ابراهيم:مهو مصيرك تفتحها وتسمعها
يوسف:لما نهدا باش نعرف شن نرد عليها انا توا بنرقد
ابراهيم:ماشي تصبح عاخير ياعبدو تعالا ساعده
ركب يوسف لشقته قعمز في الصاله وفتح المسج اللي كان صوتي ومحتواه"يوسف انا اسفه اني خوفتك علياو اني قفلت هاتفي واسفه اني اختفيت فجأه بس والله العظيم انا كانت عندي ظروف ووعد نشرحلك اول مانشوفك"
قعد لحظات يستوعب لين رن هاتفه
يوسف:الو
جميله:ايوا
يوسف اهلين كيف حالك
جميله:اسفه اني خوفتك عليا
يوسف:ابدا ماصار شي
جميله:هوا انت مضايق
يوسف:لا بالعكس
جميله:به انا مضايقه
يوسف:علاش بس
جميله:عاخاطر انا استاحشتك
يوسف ابتسم
جميله:هوا انت ممكن تمشي معاي مشوار غدوة
يوسف:طبعا اكيد جميله:تمام نتلاقو
ثاني يوم خشو لفيلا كبيرة فيها حفله
جميله:ايوه فيه دروج قدامك خلاص
يوسف:كل المشوار هدا عاخاطر حفله ناس مانعرفهاش
جميله:بهي شن بندير نبي نصالحك
يوسف:لا تمام انا مش زعلان المهم انتي مبسوطه
جميله:جدا جدا قعمز هنا اهي الطاوله قدامك والكرسي جنبك
يوسف:باه
جميله:اسمع اني بنمشي نبارك لصاحبتي شويه ونجيك شنطتي جنبك
يوسف:تمام ماتعطليش مانعرفش نتعامل مع الدوشه والزحمه هدي
جميله:حاضر بس رد بالك شنطتي فيها هاتفي
يوسف:تمام اهو شادها
مشت جميله لصاحبتها اللي دايره الحفله باركتلها وقعدت مع قروبها يرقصو ويهدرزو ونست يوسف
هوا اضايق من الدوشه اللي دارتله صداع وقف بيمشي خبط في حد قعد يوخر خطوة،اثنين،ثلاثه وبوووم يطيح وسط المسبح وهوا مايعرفش يعوم فااستسلم وغاص
جميله تسمع في ناس يحكو تلفتت شافاته في قاع المسبح طول حولت كندرتها ونقزت وراه جبداته فوق
جميله:اسفه والله اسفه مش قصدي 😢😢
يوسف:انتي تبكي
جميله:ايه نبكي 😢💔
يوسف:شنطك اهيا
جميله:شنطة شنو بالله اكيد الهاتف فسد
يوسف:انتي تبكي عليا ولا عالهاتف
جميله:عليك انت
يوسف:ماتخافيش انا نعرف نعوم كويس
جميله:واضح انا مطلعاتك غارق عافكره
يوسف:الناس يتفرجو علينا!
جميله:حي عالجو احنا بدينا فرجه 😨
يوسف:فرجه! بهي خلينا نتعامل عادي كأنا فقره من الحفله
جميله:فقره 😅
يوسف:ايه هاتي ايدك
وقعدو يرقصو في المسبح والكل يصفقولهم ❤️😍
بعد وقت طلعو قعمزو عالكورنيش
يوسف:شن ديري
جميله:شي
يوسف:نسمع فيك تخربشي
جميله:لالا
يوسف:بجد
جميله:نلعب نلعب حي 😧
يوسف:شنو
جميله:الهاتف فتح والله فلوسي حلال 😍
يوسف:فلوس شن انا قعدت شاد الشنطه فوق
جميله:والنبي اسكت انت فضحتني تعالا خلي ناخدو اول سلفي بعد مافتح الهاتف
يوسف:باه
جميله:خلاص صورت
يوسف:خاطري نشوف اللي تشوفي فيه انتي
جميله:اعتبر اني عيونك في الدنيا
يوسف:بنقولك عاحاجه
جميله:اها قول
يوسف:انا مسافر ايام
جميله:شنو وعلاش
يوسف:انتي عارفه ليا فتره مانخدمش وهكي حتا اختي يمنى جايه
جميله:باه!
يوسف:عندنا ارض بنبيعوها في منطقه تانيه ولازم نقعدو ايام
جميله:قداش يعني
يوسف:عشرة ايام ولا اسبوعين
جميله:اووف هلبا لا هلبا اسبوعين
يوسف: باه بنقولك حاجه تانيه
جميله:لا اسكت لانك عكننت عليا
يوسف:خليني نقولك
جميله:لا مانبيش نعرف
يوسف:ياجمييييله
تلفتت:ها قول وخلصنا
يوسف:بنقولك اني نحبك
جميله تفاجئت وجت بترد عليه بس اذكرت شي وقفها وخلاها تشوله بألم ووجع وبعدين ابتسمت......يتبع
استنوني في الحلقه الاخيرة
