ماتدخلش في علاقة وانت فاشل.. (في دراستك في شغلك في اي حاجة المفروض تنجزها.. ) ده مش حُب.. ده هروب من واقع صعب تغيره فا بتنساه بعلاقة.
ماتدخلش في علاقة وانت مش عارف تعيش وتنبسط لوحدك، هاتنُط سلِّمة المفروض تعدي عليها وهي انك "تكتشف نفسك وتحبها".
ماتدخلش في علاقة وانت لسا عينك مش عارف تمسكها أو مشاعرك بتفلت منك مع كل شخص بتقابله، المفاجأة بقى الكلام ده مش هايروح بالارتباط (يمكن يختفي مع هوجة المشاعر في الاول) بس هايرجع لأنه طبع مش فترة.. النضوج والتحكم في عينيك ومشاعرك بيبتدي من وانت لوحدك مش لما ترتبط.
ماتدخلش في علاقة وانت مابتشتغلش .. مش عشان الفلوس (ولو انها مهمة)، لكن في جزء في شخصيتك كدة بيكمل لما تشتغل وتقابل المجتمع ده.. في خبرات ودواير واوقات صعبة محتاج تعدّي فيها في الشغل وضغطه عشان "تستوي" وتعرف تحب بواقعية ونُضج أكتر.
برضو ماتدخلش في علاقة وانت مش عارف انك هاتكمل (هاتقولي ومين عارف المستقبل فيه ايه).. هقولك سؤالك ده مؤشر مخيف على توجُّهك من البداية، لو داخل رجل جوه ورجل بره، مع اول خبطة هاتتهد العلاقة دي زي ما بنشوف كتير حوالينا. لكن لو مقرر انك تتعب مع وللشخص ده هاتكمل بشكل كبير.. وصدقني علاقات كتير كانت هاتكمل وتبقى رائعة لو الطرفين كانوا تعبوا شوية زيادة عشان العلاقة دي تكمل ..
ولو داخل ترتبط وانت لسا طالع من علاقة، فا أنت مش بس بتأذي الشخص الجديد أنت بتهربد مشاعرك، ومشاعرك ليها حق عليك تديها وقت تتشفي مش من علاقة لعلاقة. ومحدش بينسى حد بحد.. بالعكس ده بيفضل داخل في دواير علاقات مابتخلصش .. والهدف المفروض مش النسيان.. الهدف هو الشفاء، والشفاء غير النسيان .. الشفاء بياخد وقت ومحتاج فترات لوحدك ترجع تعيد ترتيب اوراقك وتراجع حياتك.. فا لو طالع من علاقة دور ازاي تتشفي مش ازاي تنسى.
حاجة تانية مهمة.. ابذل مجهود اوي انك تكون صداقات وتتعرف على ناس من مجتمعات مختلفة (بهدف غير الحب والارتباط).. في متعة كدة في التواصل لغرض التواصل بس.. مش لازم كل علاقة حلوة تقلب نهاية سعيدة زي الافلام العربي، بالعكس معظم العلاقات متعتها في مكانها وحدودها اللي متعديهاش. ومعظم اللي خسرتهم قبل كدة كان زمانهم موجودين دلوقتي لو مكنتوش قربتوا اوي كدة وقتها.
اخر حاجة بقى .. ماترتبطش عشان المفروض ترتبط، أو عشان كبرت.. او عشان اهلك بيضغطوا عليك.. أو عشان لوحدك.. أو عشان مكبوت .. أو عشان كل دفعتك اتجوزوا ..
كل دي اهداف سطحية خايبة ممكن تعيش مبسوط لو تجاهلتها. ارتبط بس لما تقابل حد يجبرك تطلع بره حياتك -اللي أنت ناجح ومرتاح فيها بالمناسبة- وتقرر تشاركه اللي باقي منها.. ارتبط بحد شبهك ييجي يكمل معاك سكتك مش يبتديهالك من اول وجديد.
الخلاصة .. ماترتبطش وانت لسا معرفتش نفسك ولا شوفت الدنيا.. غالباً هيكون اختيار ساذج من زاوية محدودة هاتندم عليه قدام لما تتفتح اكتر على الدنيا.
فا نصيحتي كدة الاول انجح وعيش واتعلم ترتاح وانت لوحدك.. اشتغل واعرف ناس وكوّن صداقات من كل حتة.. اقرا ونضّج تفكيرك وجرب حاجات كتير تكبّرك وتنشف شخصيتك.. وبعدها أنا واثق ان اختيارك لشريك حياتك المرة دي هيكون صح.
أنت تقرأ
أخذت قلبى برضا منى
Romansaارتطمتُ بها صدفة ؛ وَ بدلاً من أن تسقط أشياؤنا ، وَقعت على الأرض قلوبنا ، وَ من سطو الربكة أخذت هيَّ قلبي ، وأخذتُ أنا قلبها . .
