حكايتنا سوا

'' الحلقة الرابعة ..💛 "

- حسام : بتقولي نرجع ؟

'' بصت نور لزياد وقالت ..''

= نور : ياريت

'' سكت حسام ثواني وبعدين إتنهد وقال ..''

- حسام : إنتي قيمتك عندي غالية أوي يانور ، لكن نرجع ! ..دا موضوع وإتقفل بالنسبالي

'' إتصدمت نور جدا ..''

= نور : إتقفل ؟ يعني إيه إتقفل ؟
- حسام : يعني إتقفل يانور ، ماينفعش نرجع
= نور : ليه ماينفعش ! ، دا أنا جيالك بنفسي ..جيالك وشارياك
- حسام : وأنا يعني ماكنتش شاريكي ؟

'' بدأت تعيط ..''

= نور : لا ماكنتش ، والدليل أهو ..أنا مش مصدقة اللي إنت بتقوله ، يعني ..يعني خلاص نسيتني ؟
- حسام : أنا مانستكيش تماما ، ولا يوم ولا لحظة ! ، بس قصة نرجع لأ ، حبل الرجوع اللي كان بينا إنتي قطعتيه بموس ، لكن إنتي كنور مقدرش أنساكي ، لان اللي بيني وبينك صداقة وأخوة وكل حاجة حلوة ، لكن حبل الحب إتقطع وإنتي اللي قطعتيه ، سبق وقولتلك أنا ماتسابش ! ، وسيبتيني
= نور : لأني إتوجعت ، وهو أنا مش بحس ؟
- حسام : وراجعة ليه دلوقتي ؟
= نور بإنيهار : ياسيدي بحبك وندمانة ، رجعالك ندمانة إني سيبتك ، جيالك أهو بنفسي وبقولك أنا آسفة ..حقك عليا
- حسام : انتي كسرتي حاجة كبيرة جوايا ، خلاص يانور إنسي وبلاش توجعيني وتوجعي نفسك ..وبعدين أنا خلاص خطبت !
= نور : وبتحبها ؟
- حسام بتنهيدة : مش كل حاجة الحب ، سبق وحبيت ..عملي إيه الحب ؟ ، هي بنت كويسة وبتحبني ! ، ودا بالنسبالي كفاية
= نور : يعني خلاص ياحسام ..قررت تنساني ؟
- حسام : مش هاقدر ، ولا عمري هنساكي ..لحد آخر يوم في عمري ، هتفضلي جوايا يانور
= نور بضعف : يبقي ليه مانرجعش ! ، ليه ياحسام القسوة دي ؟
- حسام : إنتي اللي قسيتي يانور مش أنا ، إنتي اللي بعدتي عشان سبب تافه !
= نور : ورجعت !
- حسام : بعد تسع شهور ؟ بعد ماخلاص وجع الفراق جوايا بدأ يقل ؟
= نور بضعف : إرحمني بقا ياأخي بحبك
- حسام : وأنا كمان بحبك ، بس مابقتش أحبك كواحدة تبقي مراتي

'' زياد إتصدم من الجملة اللي إتقالت دي جدا ، بس مش أكتر من صدمة نور ! ، للدرجادي ؟ ..سكتت ثواني وبطلت عياط ..وعلي عكس ماتوقع زياد ، الجملة دي علي قد ماوجعتها ..علي قد ماخلتها قوية ..''

= نور : تمام ، تمام أوي ..لكن خليك فاكر كلامي دا كويس ، إنت عمرك ماهتنساني ..هفضل دايما جواك ، هبقي لعنة عليك ..هتحاول كتير تخرجني من جواك مش هتقدر ، مش هتقدر تعيش يوم من غيري ..وهتندم ندم عمرك كل ماتفتكر اللحظة دي ، اللحظة اللي أنا جيتلك فيها وإنت رفضتني ، مش هتعرف تبطل تفكير فيا ولا هتقدر تمنع نفسك إنك تعرف أخباري .. وكل ماتشوف بنت هتشوفني فيها ، هتعدي عليك أيام عيونك مش هتبطل دموع علي فراقي ، وليلك هيبقي نهار ونهارك هيبقي ليل ..ومش هتعرف عينك أبدا تطولني ، أما أنا هنساك ..هنساك بسهولة ، وقريب أوي هقابل حد يستاهلني ، حد هيكون أحسن منك بكتير ، حد كل ماأشوفه هقول عليك أنا إزاي بصتلك وحبيتك في يوم ، وخليك فاكر إننا في يوم من الأيام هنتقابل ..ووقتها هاشكرك إنك رفضتني وماكملتش معايا ، وبسببك هقابل اللي طول عمري بتمناه ، واللي من هبلي كنت شايفاه فيك