حكايتنا سوا

'' الحلقة السادسة ..💛 "

'' الكل كان مصدوم جدا من موقف إسراء الغريب دا ! ، يعني إيه بسهولة كدة تقلع الحجاب ؟ وعشان إيه ..''

- مريم بصدمة : إيه اللي خلاكي تقلعيه ياإسراء ؟
= إسراء : عشان مالبستهوش بمزاجي ، أنا لبسته عشان عُمر
- دينا : بس عُمر ماقالكيش تلبسي الحجاب انتي اللي لبستيه بمزاجك
= إسراء : وخلاص قلعته بمزاجي

'' كان واضح أوي إنها عايزة تضايق عُمر بأي طريقة ، بس مش علي حساب الدين ! ، بدأ الناس والمعازيم كلها تيجي ..وإسراء كانت بتدور علي عُمر بعنيها ، كانت مستنية اللحظة اللي يشوفها فيها وهيتصرف إزاي ..شوية وجه عُمر وأول ماشافها إتصدم ! ، وهي لما شافته عملت نفسها مش واخدة بالها وبتتكلم مع صحابها ..دمه فار أوي ، كان نفسه يروح يجيبها من شعرها ، لكن اللي منعه إن موبايله رن ..كان زياد اللي بيتصل عليه ، فاوقف في مكان بعيد عن دوشة الموسيقي ، ورد عليه ..''

- زياد : إزيك ياأستاذ عُمر عامل إيه ؟
= عُمر : الحمد لله يادكتور
- زياد : أنا بكلمك عشان أبلغك إني إتصلت علي ماجد وهقابله بكرة إن شاء الله
= عُمر : تمام
- زياد بإستغراب : إنت كويس ياأستاذ عُمر ؟
= عُمر : لأ
- زياد : خير حصل حاجة ؟
= عُمر : إنهاردة خطوبة أختي زي ماقولتلك ، وإتفاجئت بمراتي جاية الخطوبة من غير حجاب
- زياد بصدمة : قلعت الحجاب ؟
= عُمر بغضب : أيوة ، أنا لو روحت جبتها من شعرها دلوقتي ماحدش هيلومني !
- زياد : لأ طبعا ماتعملش كدة .. هي قاصدة تضايقك وتخليك محتار تعمل معاها إيه ؟
= عُمر : مانا محتار فعلا ، طب أعمل إيه ؟
- زياد : أنا هاقولك تعمل إيه ؟

'' نقدر نقول إن هشام نِدم علي اللي عمله مع يارا ، وحشته ! ..وحشته جدا ، كبريائه في لحظة عماه إنه يختارها ، مالوش وِش يرجع ، وأكيد لو كلمها مش هترد عليه ، أكيد مش طايقاه ..''
'' خلص عُمر مكالمته مع زياد ، حاول يكون مظهره عادي وفرد وشه وراح لإسراء اللي واقفة مع صحابها ..وبهدوء مسك إيديها من غير أي نقاش وسحبها من وسطهم ومشي بها دخل أوضته اللي في البيت .. صحابها البنات بصوا لبعض والكل متوقع إيه اللي هيعمله عُمر ، حتي إسراء كانت متوقعة نفس توقعهم إنه هيكون غضبان ومتضايق ، لكن ..''

- عُمر بإبتسامة : وحشتيني

'' فتحت بوقها من الصدمة ، دا وقت وحشتيني دا ؟ ..''

- عُمر : مش ناوية تحني عليا بقا وترجعي البيت ؟
= إسراء : ...
- عُمر : إيه مالِك ماتردي عليا
= إسراء : أرد أقولك إيه ؟
- عُمر : قولي إنك هترجعي البيت معايا
= إسراء : عُمر إنت مش واخد بالك من حاجة ؟

'' تصنع عُمر الإستغراب ، وبعدين عمل نفسه إنه أخد باله ..''

- عُمر : شعرك يعني ؟
= إسراء : مثلا !
- عُمر : بصي ياحبيبتي دي حاجة ترجعلك ، دي لبستيه بمزاجك وقلعتيه برده بمزاجك ، يعني إعملي اللي إنتي عايزاه ..أكيد دا مش هيغير من حبي ليكي
= إسراء بصدمة : ....
- عُمر : ها بقا هترجعي معايا البيت ؟
= إسراء بإستغراب : ....