حكايتنا سوا

'' الحلقة الخامسة ..💛 "

- يارا : أما أنا لقيت لينا صور أيام الجامعة إنما إيه حكاية ..
= مريم بضحك : يالله أكيد شكلنا كان معفن أوي
- يارا بضحك : معفن بس ؟ إستني لما تشوفي بنفسك

'' خرجت يارا موبايلها من الشنطة وورتها الصور وقعدوا يضحكوا عليها جدا لدرجة إن عيونهم دمعت من الضحك ، لحد مافيه صورة كانوا متصورينها في المدرج ..لفتت نظر مريم أوي ، أخدت الموبايل من يارا وقعدت تعمل زوم علي الولد اللي وراها ..''

- يارا : فيه إيه يابنتي !
= مريم : الولد دا ..شبه اللي جه يستخبي عندنا من كام يوم ، اللي قولتلك عليه

'' بصت يارا علي الصورة وقالت ..''

- يارا : دا علِي
= مريم بدهشة : أيوة ! ، محمد قال إن إسمه علِي فعلا ..إنتي تعرفيه ؟
- يارا : أيوة يابنتي كان مع الشلة اللي كنت بقعد معاها
= مريم بإستغراب : يعني بتاع بنات ! ، غريبة مايبانش عليه
- يارا : كان بتاع بنات ..لانه بعد شوية ساب الشلة دي وبقا لوحده ومع نفسه وإهتدي كدة
= مريم : وإنتي عرفتي منين ؟
- يارا : لاني علي علاقة لسة بناس من الشلة دي وعارفة الأخبار كلها من أيام الكلية

'' سكتت مريم ثواني وقال ..''

= مريم : وهتفضلي علي علاقة بيهم كتير ؟

'' عملت يارا نفسها مش سامعة وماردتش عليها ..وفي نص القاعدة إتصلت دينا بمريم ..''

- دينا : إزيك يامريم عاملة إيه ؟
= مريم : الحمد لله ، إنتي عاملة إيه ؟
- دينا : كويسة !
= مريم : إيه مال صوتك في حاجة حصلت ؟
- دينا : أنا إتخطبت
= مريم بصدمة : إيه ؟؟؟؟

'' كانوا لسة عندهم أمل ترجع لماجد زي ماعُمر رجع إسراء ، لكن ماحصلش ..''

- علِي : سيبتها ؟
= هشام : أيوة
- علِي : من إمتي ؟ وليه ؟
= هشام : من آخر مرة قابلتها فيها ..من شهر تقريبا
- علِي : وليه تسيبها وإنت بتحبها ؟
= هشام : أنا ماكنتش عايز أسيبها هي اللي قررت
- علِي : يعني إيه قررت ؟ وقررت إزاي ؟
= هشام : قولتلها إن أنا مش هتقدملها غير لما تتحجب

'' إتصدم علِي من اللي بيقوله دا ..''

- علِي : إنت مجنون ؟ ، إنت إزاي تعرض عليها عرض زي دا أصلا ؟
= هشام : ليه هو مش من حقي ؟
- علِي : جبته منين حقك دا ؟ ، يعني إيه تقولها تتجحب ! مانت حبيتها وهي مش محجبة ، إنت إخترتها وهي كدة ..جاي ليه تقولها تتحجب ؟
= هشام : لأن أنا إتغيرت وعرفت الصح من الغلط ومش معقول أكون أنا بدقن ومراتي بشعرها
- علِي : إيه يابني التفكير المريض دا ؟
= هشام : لا دا مش تفكير مريض دا الصح ، وإنت عارف إن دا الصح
- علِي : ماشي دا الصح بس بيجي بالإقناع مش بالغضب
= هشام : أنا ماغصبتهاش ، أنا خيّرتها
- علِي : حتي دا مش من حقك
= هشام : لا حقي ، حقي إني أختار اللي هتكمل معايا حياتي تبقي عاملة إزاي ؟
- علِي : وإكتشفت دلوقتي إنها مش يارا ؟ طب لو كنت إتجوزتها وبعدين ربنا هداك ، كنت هتطلقها ؟
= هشام : ماعرفش بقا