فهري دخل غرقتو وشال تلفونو هو محتار ما بين يتصل أو يرسل رسالة أو (فهري قال لي نفسو خلي التهور) خت التلفون ورقد نام تاني يوم زمن الفطور أنا فرات قاعدين أول ما جا فهري عايزة اقوم مسكني من يدي وقال لي دقيقة اسمعيني قلت ليهو لي هنا بس أنا تاني ما بسمعك ممكن تبعد من طريقي رجعت غرفتي فرات لحقتني شلت دفتر الرسم وقعدت في البلكونة والجو كان حلو بقيت ارسم وفرات خاتة يدها في حنكها تعاين لي محتارة فهري جا داخل لينا في الغرفة ال لي فرات اطلعي برة دقيقة بس وبدون ما تتلفت طلعت قعد في الكرسي مقابلني قال لي يا توتة والله أنا أسف علي التصرف الاتصرفتو معاك بس لكن أنا كنت عاوز مصلحتك وامرك بهمني وأنا من دون ما أعاين ليهو قلت ليهو بهمك في شنو سكت ما رد لي رفعت رأسي قلت ليهو جاوب بهمك في شنو قال لي أنا بحبك وبحبك كتير ومن زمان حصلت لحظة صمت كدة مرت دقيقة وأنا ساكتة وهو ساكت
قال لي عاوزك شريكة تكوني حياتي وأنا جادي والله وناس أمي وأبوي عارفين بعد كدة إياك تقولي لي بي صفتك منو ﻷنو حاقول ليك بي صفتي حبييك وحأكون زوجك المستقبلي ما عرفت اعمل شنو من الصدمة ما قدرت اتكلم بي صعوبة نطقت وقلت ليهو اطلع برة وهو عاين لي واتنهد وطلع وأنا طوالي قمت قفلت الباب بالمفتاح وقعدت في اﻷرض ببكي
زمن الغداء ما كان عندي نفس بس نزلت عشان فهري حيقول اديت للموضوع إهتمام واني كدة تاني حاسمع كﻻمو عمو أيمن قال أنا بكرة مسافر الشارقة قلت ليهو خير إن شاء الله قال لي ﻻ ﻻ خير بس ماشي اشوف الشركة قالوا فيها شوية مشاكل قلت ليهو اها تمام بعد شوية قلت ليهو ممكن اجي معاك اشتقت لي ناس ماما قال لي تمام فهري قال لي والجامعة عمو قال ليهو إن شاء الله ما حنطول يومين تﻻتة بالكتير (قلت في نفسي تاني تحلم لو اجيك هنا لو اخلي القراية ما مشكلة)
تاني يوم لبست بنطلون وبلوزة قصيرة شوية والطرحة في الكتف شلت حاجات وطلعت ودعت فرات وخالتو نينا وطلعنا فهري كان موصلنا المطار كان بعاين لي وساكت ساي ما قدر يقول لي اي حاجة عمو مشى يعمل الاجراءات خﻻني مع واقفة فهري
فهري جا علي طوالي رجعت خطوة لي وراء شال الطرحة لفاها لي بي طريقة حلوة كدة التقول زول خبير وخت يدو في رأسي اظنو حصني عمو جا قال لي يﻻ فهري ابتسم لي وأنا كشرت في وشو ودخلنا صالة المغادرة بدون ما اقول ليهو مع السﻻمة طلعت تلفوني عايزة اقفلو شفت رسالة من الجد الخفي كاتب فيها تصلي بالسﻻمة احترت في الزول الغريب دة يا ربي عرف كيف اني مسافرة بقيت اتلفت ما شفت زول براقبني قفلت تلفوني وختيتو في شنطتي
في الجانب التاني أمي بتصحي في عدي عشان يستقبل عمي (طبعا ما كلمت زول اني جاية إﻻ أمي بس) عدي يا ولد قوم طيارة عمك قربت تصل صحصح عشان تمشي ليهو قال ليها يا أمي تعبان خليهو يركب تاكسي قالت ليهو تالة جاية أول ما سمع اسمي قام قعد بالجد جاية قام سريع دخل الحمام غسل وشو وطلع حتى مﻻبسو ما غيرها
لمن وصل المطار من شفتو صرخت بي صوت عالي عدي وجريت عليهو وهو ذاتو جرى جا علي حضنا بعض الناس كلها بتعاين لينا البشوف بقول لينا زمن طويل ما اتﻻقينا عمي جا علينا خبت عدي في رأسو عرفت أختك هبلة انت كمان تطلع اكعب منها عاملين لينا فيلم هندي امشي شيل الشنط وارح عدي شال الشنط ركبهم العربية ونحنا كمان ركبنا واتحركنا للبيت
