مر اسبوعين وناس نجود ولياو جوني نجود سألتني ما عايزة تعملي حنة قلت ليها والله ما عايزة ما نفسي اعمل حاجة غير حفل الزفاف ماما قالت ليها أنا يومي بحنس فيها وهي حالفة أكان توافق ليان قالت ليهم كلمو ليها فهري ماما قالت أي والله فكرة قلت ليها هو ذاتو لو ما اصحابو قال ما عايز حفلة
يوم حنة العريس كلهم مشو خلوني قاعدة براي حتى مرام خلت غسان معاي قالت لي نص بس وحأجي ما بتأخر لو بكى البزازة هندي جهزتها ليكي قلت ليها ملك عايزة تعيشيني دور ما دوري قالت لي دة إمتحان لو نجحتي فيهو معناها فهري يطمن قلت ليها ولو ما قالت لي ﻻ ﻻ إن شاء الله حتنجحي
تاني يوم طبعا ما مشيت الكوافير الرسامة جاتني في البيت خلصت حنة الساعة 10 وناس أمي من أمس اتحننو وحننت البنات كلهن خلصت بعد الضهر وطوالي بدو لي مكوة الشعر مشيت غرفة جاﻻ عشان البس خالتو نينا جات تمكيجني اتخيلو أم العريس تمكيج عروسة ولدها شيء غريب لكن
نزلت الصالة تحت أنا والشباين طلعو خلوني براي شوية كدة فهري جاني ساقني وكان سائق العربية هو لكن المرة دي سائق بي هدوء واستكانة
يﻻ الحفلة كانت في المزرعة بتاعت جدو سلطان علي طرف البحر كانوا مزينين المكان باللمبات الصغار بتاعت زمان ديك والصفر مجلدة بالسعف والمكان كلو بلدي لﻵخر والكوشة كانت عبارة عن كرسيين برضو مجلدات بالسعف لكن فريدات من نوعهم لمن جينا داخلين زفوني ري دبكة بتاعت ناس الشأم أول ما دخلت الشباين (فرات . ليان . نجود . ريتال . ريناد . مرح ) كانو شايلين أقفاص حمام بس مع دخلتي ديك فكوهم فينا ياخ أنا لمن حسيت نفسي في حلم لمن شفت الحمام طاير وطبيعية المكان
واحنا بنرقص في سلو سألت فهري دي حقيقة وﻻ أنا بحلم ما قادرة اصدق قال لي شفتي البقولو بتنفذ طوالي قال لي ما ناسية حاجة قلت ليهو شنو ما متذكرة قال لي طيب شوفي هناك عاينت لقيت أحمد أمين قال لي وعدتك اجيب ليك أحمد أمين في عرسك قلت ليهو واي حبيبي ما مصدقة كان حلم إن شاء الله ما اصحى منو أول غنية بدا بيها بدر البدور ابدع لينا هو إبراهيم ناجي
آخر حاجة قطعنا الجاتو وبعدو مشينا بدلنا للجرتق وغيرو الحاجات ختو بنابر وعناقريب يعني مكاة جرتق بالجد من هناك طوالي طلعنا المطار ﻷنو خﻻص زمن الطيارة جا سافرنا تركيا
وصلنا مطار أتاتورك الساعة 4 صباحاً استقبلنا صحبو ووصلنا بيت ريفي جميل شديد والمنطقة ذاتها خيال طبيعة جذابة لو ما كنت نعسانة ما ضيعت علي نفسي فرصة التأمل ما مشكلة بكرة في من دخلنا البيت اقرب حاجة جنبي وقعت فيها نمت صحيت علي صوت فهري ما شاء الله استحمى وغير قال لي استحمي عشان تقدري تنومي مرتاحة دخلت استحميت (بالجد الحمام راحة وانت في عز تعبك وعايز بس سرير تنوم فيهو افضل تستحمى عشان تقدر تنوم مرتاح) لبست بجامة تلتربع وطلعت لقيت فهرب قاعد في المصﻻية بتلو قرآن بي صوت رنان قمة في الروعة خلص اﻷية ولفت قال لي تعالي نصلي الصبح جماعة
صحيت زي الساعة 9 كدة لقيت فهري راقد بتأمل فيني طوالي ختيت يدي في وشي وقلت ليهو ما تعاين لي بخجل نزل يدي وجرى لي خدودي بي يدو قلت ليهو فهري ياخ عارفني ما بحب زول يجر لي خدودي قال لي أنا ما زول أنا فهري حبيبك كدي خليني اصبح عليك باسني بالخد اليمين والشمال صباح الخير حبيبي يﻻ استحمي عشان نفطر
طلعت من الحمام لقيت الغرفة فاضية قعدت في التسريحة اسوي شعري لقيت صندوق هدية فتحتها لقيت فيها طقم فضة حلو كان في كرت فتحتو مكتوب فيهو
(دائما ما تجول في خاطري تلك العبارة وكل مرة اتذكرها ﻻ أستطيع المفر سوى اﻹبتسام بعدها .. سأظل أهواك ولو طال الزمان .. الجد الخفي)
اتسمرت في مكاني معقولة فهري هو ذاتو طلعت برة لقيتو قاعد بشرب قهوة ناديتو بالجد الخفي طوالي لفت علي حصلت لحظة صمت دقيقة وأنا بحاول استوعب فهري قام جا علي وقال لي أي أنا هو ذاتو يﻻ نفطر عشان عندنا حتات كتيرة عايزين نمشيها أوﻻ نلف مدينة اسطمبول يوم كامل وجولة مضيق البوسفور ونمشي مدينة سبانجة وشﻻﻻت قرية معشوقية وبرضو مدينة ريزا أكيد حتعجبك و ما ننسى مدينة البورصة الطبيعة الساحرة حنستمتع أكيد حياتي
طبعا نهائي ما اتوقعت يطلع هو الجد الخفي ﻷنو بعاملني بي طريقة جافة وﻻ أنا كنت حاسة بيها جافة اﻷيام القضيتها في تركيا شفت فيها فهري الحقيقي البتكلمو عنو كل الناس الحمد لله الجمعنا مع بعض ومحى الكره الجواي تجاهو
الجد الخفي حاجة موجودة قدامنا ونحنا ما خالين بالنا منها واصﻻ ما متوقعين انها تكون هي يمكن عشان نحنا خاتين مستحيل تكون هي أو ﻷنو مستبعدينها تماما من تفكيرنا زي تالة وفهري
