King's Avatar ( Tagalog )

Chapter 9 - Ang Dalawang Kamay ni Ye Xiu

Sa totoo lang ay hindi naman talaga pag-uugali ni Chen Guo ang magdamag na maglaro. Pero sa araw na ito, dahil ngayon magbubukas ang bagong server ng Glory ay nagpuyat siya dahil gusto niyang makita ang kasiyahan ng lahat.

Matapos makita ang pananabik ng mga taong nasa paligid niya ay kaagad siyang nakaramdam ng antok at tumihaya siya sa kaniyang upuan na para bang natutulog.

Sa totoo lang ay tinatamad lang talaga si Chen Guo na tumayo kahit na gustong-gusto na niyang matulog. Hindi mapigilang maakit ang kaniyang isipan sa paulit-ulit na tunog ng keyboard na tinatapik sa tabi niya.

Dahil siya ay isang may-ari ng isang Internet Cafe ay pamilyar na sa kaniya ang mga tunog na ito, pero bakit para bang kakaiba ang mga naririnig niya ngayon kaysa sa mga nakagawian niyang marinig?

Ang mga tunog ng tinatapik na keyboard at mouse na dumadapo sa kaniyang mga tainga ay kakaiba, dahil sila ay mababagal, mararahan, at hindi kalaunan ay nagiging mabigat.

Sa mga sandaling narinig ito ni Chen Guo ay hindi niya inakala na maari palang maihahantulad ang tunog ng mga keyboard at mouse sa tunog ng isang tambol. O baka naman ay nananaginip siya ngayon?

Biglang nagising si Chen Guo at nakinig na naman siyang mabuti. Parang hindi talaga panaginip ang mga naririnig niyang tunog. Dahil ang pinagmulan ng mga tunog na iyon ay ang taong nasa tabi niya, mula sa baguhang nagtratrabaho sa Internet Cafe niya na si Ye Xiu.

Umupo ng maayos si Chen Guo para makita kung ano ba talaga ang nangyayari. Pero nung inayos niya ang kaniyang sarili ay nahulog ang balabal na bumalot sa kaniyang katawan.

Sinalo niya ang balabal bago ito mahulog sa lupa at namalayan niyang si Ye Xiu ang nagmamay-ari ng balabal na iyon. Mukhang maalalahanin yata 'tong taong 'to, bulong ni Chen Guo sa kaniyang sarili. Pero ang tanong ay kung gaano na ba katagal na hindi nilabhan ang balabal na ito? Lubhang mabaho't malagit ito sa pakiramdam kung hawakan.

Pinulot ni Chen Guo ang balabal, at umupo. Sa mga sandaling kakausapin na niya sana si Ye Xiu ay bigla siyang nagulantang sa kaniyang nakita.

Isang pares ng kamay na nakakapagpaluha sa mga taong nakakita nito ang kasalukuyang nakikita niya gamit ang dalawa niyang mga mata: Ang dalawang mga kamay ni Ye Xiu.

Lubhang payat kung tingnan ang mga kamay ni Ye Xiu. Mahaba at manipis ang kaniyang mga daliri at hindi magaspang kung tingnan ang kaniyang palad kagaya ng mga lalakeng bakat sa trabaho.

Ang dulo ng kaniyang mga daliri ay malinis at maayos tingnan, malinaw na inaalagaan niyang mabuti ang kaniyang kamay kaysa sa kaniyang katawan.

Noong una ay hindi naman talaga ganito kung magmasid si Chen Guo. Pero matapos ang mga sandali na nakakita siya ng isang babaeng mayroong napakagandang kamay na pumasok sa Internet Cafe ay pinagtuonan na niya ng pansin ang kamay ng bawat taong nakakatagpo niya.

At ngayon, siya ay nagulantang dahil sa dalawang kamay ni Ye Xiu.

Biniyayaan nga siya ng mga maririkit at magagandang kamay. Pero sayang nga lang dahil lubhang mabagal ang galaw ng kaniyang mga kamay... Naisip ni Chen Guo sa sarili.

Hand speed, ang dami ng mga aksyong maaring magawa ng isang manlalaro sa loob ng isang nakatakdang oras na kadalasang itinatagala bilang bawat minuto ay tinatawag na APM. Ang Glory ay hindi isang laro na nangangailangan lamang ng stratehiya para manalo.