انتهي الجزء الثاني حينما ذهبت مريم و صديقاتها سوزي و صافيناز الي الساحل الشمالي بسياره سوزي و كانت سوزي تقود السياره بسرعه عاليه و فجأه قابلتهم شاحنه ضخمه و لم تستطع سوزي ان تهدئ سرعه السياره فاصطدمت سياراتها بعربه الشاحنه
اسرع الناس و التفوا حول السياره و اخذوا يصرخون قائلين:الاسعاف يا خونا لا حول و لا قوه الا بالله دول بينهم ماتوا و لا ايه استر يا رب استر يا رب!!!!
تأتي سياره الاسعاف و تنقل كلا من مريم و سوزي و صافيناز
الي اقرب مشفي .
بيرن جرس الهاتف بفيلا صفوت بك والد مريم و يخبروه بان ابنته مريم بالمشفي هي وصديقتها
-ألو منزل الأستاذ صفوت والد الآنسه مريم؟
-أيوه أنا صفوت والد مريم خير فيه حاجه.
-كنا عايزين نبلغ حضرتك ان بنتك الانسه مريم عملت حادثه بالعربيه علي الطريق الصحراوي و كان معاها بنتين و اتنقلوا للمستشفي هنا.
-ايه بنتي مريم مستحيل!!
-اهدي يا استاذ صفوت خير ان شاء الله
-طيب العنوان بسرعه لو سمحت
بياخد صفوت بك عنوان المستشقي و بالفعل بيروح و يوصل علي المكان بيجري علي موظفه الاستقبال و يسالها علي بنته مريم فبتقوله انها في غرفه العمليات و لسعه ما طلعتش فبيجري و يستناها قدام غرفه العمليات لحد ما تخرج!
و فجأه بتخرج بنت و الممرضين بيجروها علي الترولي و متغطيه كلها بملايه بيضاء فبيحاول و يقرب منها فواحده من الممرضات بتهز راسها انه خلاص مفيش فايده و واحده منهم بتقول له حضرتك والدها؟!
-هي البنت دي مريم بنتي؟!
-لا يا فندم دي سوزي البنت اللي كانت معاها في العربيه الله يرحمها حضرتك ما تعرفش حد من اهلها علشان نبلغه لاننا فضلنا نرن علي نمره اهلها من علي موبايلها محدش كان بيرد للاسف!
-للاسف مش معايا نمرتهم حاليا انا نسيت موبايلي في البيت ارجوكي بنتي مريم اخبارها ايه طمنيني!!
-مريم كويسه الحمد لله بس في شويه كدمات شديده شويه في جسمها و خدوش
-طيب هي فين اقدر اشوفها!
-لا يا فندم هي في العنايه المركزه دلوقتي مش قبل 24 ساعه كده
-ارجوكي انا والدها و مش هقدر استحمل استني كل المده دي!
-طيب يا فندم الاوضه اللي علي ايد حضرتك في اخر الطرقه اللي هناك دي علي اليمين!
-شكرا جدااا
بيدخل صفوت بك علي بنته مريم و هي في العنايه المركزه فبيفاجئ ان وشها مربوط بشاش
-مريم بنتي حبيبتي سلامتك يا قلب بابا
-بابي انت هنا انا شوفت الموت بعيني
-بعد الشر عليكي يا قلبي
-هي مامي و اخواتي فين؟
-مامي ما تعرفش اللي حصل كانت بره لما التليفون رن و انا اللي رديت و عرفت اللي حصل و اخواتك في الكليه
-طيب و سوزي و صافيناز اخبارهم ايه طمني؟!
-سوزي الله يرحمها و صافيناز ما لحقتش اسال عليها لاني اتلخمت فيكي يا حبيبتي ساعتها!
بتبكي مريم بشده لما تعرف ان سوزي ماتت
و والدها بيحاول يهديها ;
بيدخل دكتور العنايه و لما بيشوف صفوت بك قاعد مع بنته بيخرج و يزعق للممرضين اللي بره
-انا مش نبهت ان محدش يدخل العنايه من اهل المريض نبهت و لا ما نبهتش!
-احنا آسفين يا دكتور بس الاستاذ صمم انه يشوف بنته و مقدرناش نمنعه ساعتها
بيخرج صفوت بك و بيقابل الدكتور
-انا والد مريم البنت اللي جوه ارجوك طمني يا دكتور هي مال وشها رابطينه كده ليه؟!
-الحقيقه مش عارفه اقول لحضرتك ايه بس بنت حضرتك كانت قاعده قدام في العربيه فلما الازاز اتكسر دخل في وشها فسبب جروح شديده شويه فكان لازم نربط الجروح دي
-هي الجروح دي في وشها كله؟!
-للأسف أيوه بس هي الحمد لله بالنسبه للبنات اللي كانوا معاها ,الانسه سوزي الله يرحمها اما الانسه صافيناز للاسف الخبطه جات في ظهرها فده اتسبب لها في شلل!
-لا حول و لا قوه الا بالله....انا مستعد اسفر بنتي لاحسن دكاتره بره مصر المهم تبقي زي الاول!
-اطمن يا استاذ صفوت هنا فيه كل الامكانيات المتاحه في المستشفي و بره مش هيعملوا اكتر من اللي احنا هنعمله و فيه دكاتره تجميل علي مستوي عالي من الكفاءه بس احنا بنعالج الجروح دي الاول ده غير الكدمات اللي في جسمها و بعد كده بتتعرض علي دكتور تجميل بس للاسف الموضوع ده هياخد وقت
-مش مهم يا دكتور المهم بنتي تكون كويسه
-ان شاء الله استأذن حضرتك
بيقابل بعد كده صفوت بك والد و والده سوزي و هما منهارين
والد سوزي:انتي السبب آدي آخرتها بنتي ضاعت بسببك و بسبب اهمالك
والده سوزي:بس بقي كفايه...انت اللي رميت بنتك من زمان و روحت اتجوزت جاي دلوقتي تحاسبني انا روح منك لله
بيتدخل صفوت بك و يقول:اهدوا يا جماعه ده قضاء الله ....الله يرحمها و يقوم مريم بنتي و صاحبتها بالسلامه.
والده سوزي:أنا مش مصدقه ان بنتي راحت مني و مش هشوفها تاني!
صفوت بك:ربنا يصبركوا علي فراقها....انا مقدر الحاله اللي انتوا فيها!
والد سوزي:اليوم اللي تموت فيه بنتي هو اليوم الوحيد اللي جمعني
بوالدتها كان نفسها تشوفنا مع بعض قبل ما....
و بينهار والد سوزي من البكاء
صفوت والد مريم:استهدي بالله ده قضاء ربنا و قدره ادعولها بالرحمه ....الله يرحمها .
بيترك صفوت بك والد مريم والد سوزي و بيروح للدكتور اللي بيشرف علي علاج بنته .كان اسم الدكتور دكتور كارم
صفوت بك:من فضلك يا دكتور انا بس عايز اعرف بنتي هتخرجي امتي من المستشفي بالظبط ؟
الدكتور كارم:هو الحقيقيه مش قبل بكره بالكتير و بعد كده بتتعرض علي دكتور علاج طبيعي علشان الكدمات اللي في جسمها و كده؟
صفوت بك:طيب و بالنسبه للخدوش اللي في وشها؟!
الدكتور كارم:الحقيقه مش عارف اقول لحضرتك ايه هي الخدوش شديده شويه و هتاخد وقت علي ما تتعالج و هتحتاج طبعا لدكتور تجميل زي ما قولت لحضرتك قبل كده.
صفوت بك:هل المده ممكن تتطول يعني قد ايه بالظبط.
الدكتور كارم:مش اقل من سنه تقريبا.
صفوت بك:يا خبر !سنه؟! طيب و بنتي هتروح الكليه ازاي كده؟!
الدكتور كرم:والله مش عارفه اقولك ايه بس ده لمصلحتها طبعا و كمان المفروض ما تعرضش وشها كتير للشمس و الا الجرح هيفتح اكتر و يلم ميكروب!
صفوت:قدر الله و ماشاء فعل شكرا لحضرتك يا دكتور
الدكتور كارم:الشكر لله. ربنا يطمنكوا عليها ان شاء الله ....عن اذن حضرتك.
صفوت بك:ياااارب...اتفضل!
بيجري صفوت بك ع الاستقبال و بيستأذن السكرتيره انه يتصل بوالده مريم و اخواتها علشان يعرفهم باللي حصل!
صفوت بك:ألو..أيوه يا سيد الهانم جات من الجمعيه و لا لسه؟
سيد:أيوه يا بيه لسه واصله دلوقتي حالا!
ناريمان:خير يا سيد مين معاك ع التلفون؟!
سيد:ده البيه يا ست هانم.
بتاخد ناريمان سماعه التلفون و ترد:ألو أيوه يا صفوت خير فيه حاجه؟!
.!صفوت:أنا عاوزك تكوني متماسكه يا ناريمان..... مريم عملت حادثه هي وصاحباتها!
.ناريمان:ايه انت بتقول ايه يا صفوت بنتي جرالها حاجه ...انطق؟!
صفوت:اهدي يا ناريمان مش كده تعالي علي عنوان المستشفي انا هبعتهولك في ماسج ع الموبايل!
ناريمان: انا جايه دلوقتي حالا!
بتوصل ناريمان والده مريم المستشفي و تسال علي بنتها فالاستقبال بيوصلها لمكان اوضتها بالمستشفي و بتقابل جوزها و بتلاقيه واقف في طرقه المستشفي فبتجري ناحيته و بتمسك أيده و كانت أيدها بترتعش من شده القلق
ناريمان:بنتي جري لها أيه يا صفوت؟!
صفوت:ناريمان! انتي مؤمنه بالله عاوزك تكوني متماسكه قصاد البنت!
ناريمان:طمني ارجوك يا صفوت ايه اللي حصل لها بالظبط حالتها عامله ايه؟!
صفوت:شويه كدمات بسيطه و هتتعالج ان شاء الله انما وشها نفسه هياخد وقت شويه علي ما يتعالج!
ناريمان:هو وشها ماله فيه ايه؟!
اصفوت:خدوش شديده شويه لان ازاز العربيه دخل في وشها فااتسبب لها في جروح شديده شويه!
ناريمان:يا حبيبتي يا بنتي!وديني لمريم انا عاوزه اشوفها دلوقتي حالا!!
صفوت:حاضر هوديكي ليها!
و بتدخل ناريمان و صفوت علي بنتهم مريم و لما بتشوفها ناريمان بالشكل ده بتحط ايدها علي بوقها من الصدمه و بتحاول تكون متماسكه قصاد بنتها
مريم:انتي جيتي يا مامي؟!
بتجري ناريمان علي بنتها و بتاخودها في حضنها و بتفضل تعيط بحرقه و تقولها:أيوه يا روح قلب مامي !
مريم:أنا مخنوقه من المكان ده انا عاوزه امشي من هنا!
صفوت:استحملي يا قلبي كلها بكره بالكتير و تخرجي من هنا و ترجعي البيت معانا!
مريم:هي صافنياز حصل لها ايه يا بابي عاوزه اطمن عليها؟!
صفوت:الخبطه كانت شديده شويه فجات في ظهرها و عملت لها شلل؟!
مريم:يا خبر!انا عاوزه اشوفها !
صفوت:حبيبتي انتي لسه تعبانه مش هتقدري تتحركي دلوقتي ما تقلقيش انا هطمن من الدكتور عليها و هقولك اول باول ما تقلقيش!
مريم و هي منهاره من البكاء:مش كفايه سوزي ماتت ....اقرب صديقتين ليا !
فبتبص ناريمان لصفوت بنظرات عتاب و تقول له بصوت منخفض شويه عشان مريم ما تسمعهاش
-ايه يا صفوت هي بنتك ناقصه بتصدمها ليه دلوقتي بحاجه زي دي انت مش عارف هي كانت بتحب سوزي و صافيناز قد ايه؟!
-الله ما هي كده كده كانت هتعرف.... هي حاجه زي دي هتستخبي يعني؟!
-خلاص خلاص اسكت بقي مش عاوزين نصدم البنت و نضغط علي أعصابها اكتر من كده كفايه اللي هي فيه!
-خلاص اديني سكت اهو!
و بعدها بيلتفت صفوت لمريم و يبص لناريمان و ناريمان بتبص له بنظرات فيها ضيق من تصرفاته
صفوت:ربنا يرحم سوزي و يقومك بالسلامه يا حبيبتي انتي و صافيناز و تبقوا احسن من الاول ان شاء الله!.
و بعدها بيقرب من بنته و يبوسها من خدها!
....و بعد مرور يومين تقريبا بترجع مريم بيتها و الشاش محطوط علي وشها و معاها باباها و مامتها و بيستقبلها اخوتها
علي:ألف سلامه عليكي يا مريومه تعالي اقعدي معانا في الجنينه
مريم:لا انا عاوزه اطلع اوضتي ارتاح شويه...عن اذنكوا
حسين:كفاره يا دودو وحشاني والله الواد الرخم اخوكي علي طول الوقت بيذاكر و مش لاقي حد اضايقه و انتي مش موجوده!
ناريمان:مش وقته يا حسين وفر رخامتك دي لبعدين اختك تعبانه!
حسين:ألف سلامه عليكي يا مريومه انشالله الواد الاصفراوي اللي ما بطقش اسمع سيرته ده!
ناريمان بصوت عالي:و بعدين معاك بقي مش وقته الكلام ده!
مريم:فيه ايه يا مامي ايه اللي حصل...هو هاشم ماجاش ليه يسال عليا هو ما يعرفش اللي حصل لي!
ناريمان بشئ من الارتباك :هاشم اه...لا يا حبيبتي ما يعرفش خوفنا نزعجه و نقلقه عليكي اطلعي انتي اوضتك و استريحي علي مااجهز لك بايدي الاكل اللي انتي بتحبيه!
مريم:لا يا مامي مش قادره بجد ماليش نفس لاي حاجه!
ناريمان:يا حبيبتي انتي ماكلتيش حاجه خالص ما ينفعش كده و علشان تاخدي الدواء بتاعك يا قلبي!
صفوت:دودو بتسمع كلامي مش كده يا دودو!
مريم:حاضر هاكل!
ناريمان:أيوه كده يا قلب ماما من جوه!
بتطلع مريم اوضتها و بتبص علي الشاش اللي ملفوف حوالين وشها
و بعدين بتقعد علي السرير و بترن علي موبايل هاشم و بتتفاجئ بانه غير موجود بالخدمه!!!
بتنصدم مريم و تقول:هو فيه ايه؟!!!!
...يتبع
الي اللقاء في الجزء الرابع
أنت تقرأ
الرجال لا يتزوجون الجميلات (مكتمله)
Romance*رومانسي* هل يمكن أن يزول الحب مع زوال جمال من نحب؟!....ام أنه لم يكن حبا علي الاطلاق لأن الحب الذي يبني علي شهوه الجسد زائل لا محاله إنما حب الروح أبدي لا يزول مطلقا مهما واجهته العديد من الصعوبات و عرقلت طريقه....كل هذا و أكثر تعرضه روايتنا التي ب...
