الضياع
............................
بفراقك يا امي فارقني الامان
احسست بغربه في الزمان والمكان
ذهبت وذهب معك كل الحنان
*****************************************
عمار:
ابو نوره عيني اخذها يمكم باجر اجي عليها اني لازم اكمل اجراءات الدفن اليوم وباچر
وماريدها تبقه وحدها بلبيت
دخت وتخربطت وراها ما حسيت بأي شي
من صحيت لگيت خاله ندى تغسل وجهي بالمي واحنه بسيارة
رغد:
ابچي واگلها خالة عفية گليلهم يخلوني اشوف امي اخر مره
خالة فدوة بس ابوس ايدها
بقيت اتوسل بخاله ندى بس بدون فائده
لان اصلاً امي مو بالمستشفى چانت منقولة للطب العدلي
...............
رجعنا لبيت ابو نوره واني چنت كلش تعبانة
نوره فتحت الباب وگالت
نوره:
هاي شكو شبيكم شصاير؟
ندى:
بچت.....خالتچ سناء توفت
نوره هم بچت وحضنتني
وره شويه خاله ندى انتبهت اكو شي واگع على ملابسي اخذتني للحمام سبحت وبدلت جابتلي غراض من نوره ارتاحيت شويه بس كل شويه افكر بماما وابچي
طلعت ابچي وگلت لخاله ندى
رغد:
خاله اريد انام اني كلش تعبانه
ندى:
اي حبيبتي اكليلج شي ونامي
ما گدرت اكل شي لان ما اشتهي
رحت بغرفة نوره تمددت
البيت چان كلش هوسه
لان محضرين غراضهم حتى يسافرون عكب باچر
سولفنه بليل هواي اني ونوره
ز
چنت كلش مخنوگة بس مع ذلك ما گدرت
احچيلها على الي شفته ابيت عمي بقينه نسولف على ماما
رغد:
شگد چنت اتمنى اشوف ماما قبل لا تموت
چنت كلش محتاجة احضنها
نوره:
كافي حبيبتي لا تبقين تفكرين انتي مالج ذنب ب الي صار .. الله يرحمها
نمت واني اسولف ويه نوره
بالليل واني نايمه شفت بالحلم
واحد ديكتل بطفل بس بعيد علية
اتقربت عليهم هوه حس بيه اندار
من اندار شفته يشبه الرجال الي فتحت علية باب الغرفة وچان نايم هوه وصاحبته
(الي چان يشوخر)
ما عرفت شنو تفسير الحلم بس اني چنت كلش خايفة ارجع يم عمار
ثاني يوم الظهر اجه عمار حتى ياخذني
بس اني حسيت ويه نفسي عبالك مو عمي جاي ياخذني عبالك ملك الموت جاي ياخذ روحي بس كلشي ما اگدر احچي
