الفصل الثاني..
يوم جديد يأتي علي الجميع يحمل معه الكثير من الأحداث منها المؤلم ومنها السعيد ولكن من يقدر علي مواجهه كل الصعب وتحدي الألام...
تستيقظ حلا من نومها تأخذ حمام دافئ وتخرج ترتدي اسدال الصلاه وتؤدي فرضها ثم تبدل ملابسها الي بنطلون اسود وعليه بلوزه رقيقه من اللون الابيض وعليه حجابها الممزوج بين اللونين الأبيض والأسود وتنزل الدرج لتلتقي بوالدتها ووالدها علي السفره لتناول الفطور.
حلا: صباح الخير يابابا صباحك جنه يا حياه قلبي
حياه: صباحك جنه وسعاده يانور عيني يالا اعقدي افطري والنسكافيه خمس دقايق ويكون جاهز.
حياه والده حلا وماجد سيده طيبه للغايه وذات جمال هادئ في أواخر العقد الرابع من عمرها صاحبه دار للأيتام وتقوم دائما بأعمال الخير ومساعده الجميع.
حلا: تسلميلي ياست الكل وبعدها تنظر لوالدها اخبار صحتك ايه يابابا .
عبدالرحيم بتوتر انا بخير ياحلا ليه بتقولي كده انا لسه في عز شبابي.
حلا: ابدا يابابا انا بس شايفه حضرتك بتجهد نفسك في الشغل فحبيت اطمن من اكتر.
حياه: عندك حق ياحلا مش بيرتاح وكمان كل حمل الشغل عليه لوحده الله يسامحك يا ماجد ضيعت نفسك وهاتضيعنا معاك .
عبدالرحيم: خلاص بقي ياحياه مش هانعيد في الكلام تاني وانا مش لوحدي معايا أكرم ورضوان شايل الشغل أغلب الوقت.
حلا: يابابا ماما معاها حق ماجد لازم يفوق لنفسه انا معرفش تفاصيل عن اللي حصل لكن ده مايمنعش أنه بيضيع .
ومين قالك اني بضيع ياحلا قالها ماجد وعينيه عليها بغضب .
حلا: ماجد انا ....انا اسفه بس بجد مش قادره اشوفك كده واسكت انت اخويا الكبير وطول عمرك مثلي الاعلي وبعدين ايه السبب القوي ده اللي يخليك بقيت كده وانت طول عمرك مابيهمكش حد .
عبدالرحيم: كفايه ياحلا كفايه مهما تتكلمي مافيش فايده ماجد كبير بما فيه الكفايه وهو الوحيد اللي يقدر يحدد هو عايز ايه.
ماجد: فعلا انا اللي هاحدد ياريت بقي توفر علي نفسك الكلام ياعبدالرحيم بيه.
حياه: ماجد انت اتجننت بتتكلم كده ازاي مع باباك انت فعلا لازم تفوق لنفسك مش عشان واحده شمال تضيع كل حاجه .
عبدالرحيم بتعب شديد وبصوت عالي كفايه بقي وبعدها وقع علي الارض فاقد الوعي.
حلا بزعيق بابااااا.... ألحقني ياماجد بسرعه اطلب أكرم
حياه ببكاء يقطع القلب الله يسامحك ياماجد انت السبب لو باباك جراله حاجه ذنبه في رقبتك.
دقايق معدودة وكان أكرم موجود معهم والخارج سياره الاسعاف وتم نقل عبدالرحيم للمشفي وكان في انتظاره عدد كبير من الأطباء للاطمئنان عليه وعمل كل الاسعافات.
