အချစ်ဦး (အခ်စ္ဦး) (Completed )

part 1(z+u)

ဟေမာန်ဆောင်းရဲ့ အအေးဓာတ်သည် တောင်ပေါ်ဒေသလေးနဲ့ ပြိုင်တုလို့ အေးခဲလျက်ရှိသည်။ မြူခိုးဝေဝေ မနက်ခင်းပိုင်းတွင် အမှောင်ထုကလည်း တွဲပါလိုက်သေး၏။ ဝေလီဝေလင်းအချိန်မဟုတ်သည့်တိုင်အောင် နေရောင်ပျောက်လို့ ဆောင်းကလည်း ပိုအေးနေသည်။ ခဲလုမတတ်အေးနေသော ရေကို လက်ထိပ်ဖျားဖြင့် တို့ထိလိုက်လျှင်ပဲ တစ်ကိုယ်လုံး အေးခဲထုံကျင်သွားမတတ် ခံစားလိုက်ရသည်။ ထို့ကြောင့် လက်ထဲ၌ ကိုင်ထားသည့် သွားပွတ်တံကို စည်ပိုင်းအဖုံးပေါ် အသာတင်ကာ ရေနွေး အရင်ကျိုရသည်။ သုံးမိနစ်ခန့် စောင့်ပြီးမှ အငွေ့တစ်ထောင်းထောင်းထနေသော ရေနွေးများကို အေးစက်နေသည့် ရေများနှင့် ဇလား တစ်ခုထဲတွင် ထည့်ကာ ခပ်နွေးနွေးအနေအထားရအောင် ရောနှောလိုက်သည်။

ထို့နောက်မှာပင် ရေ၏အနွေးဓာတ်လေးနဲ့ ရေချိုးသန့်စင်ခြင်းကို အစပြုလိုက်သည်။ ပြီးနောက် ကော်ဖီမစ်တစ်ခွက်နှင့် ပါမုန့်ကြမ်းနှစ်ချက်ကိုမနက်စာအဖြစ် ဖြည့်တင်းလိုက်သည်။​ငွေမျှင်ရောင်အငွေ့လေးများတန်းနေသော ကော်ဖီခါးခါးလေးရဲ့ အပူလေးက ခန္ဓာကိုယ်ထဲသို့ အနွေးဓာတ်လေး တစိမ့်စိမ့်ဝင်သွားမှ နေသာထိုင်သာရှိသွားတော့သည်။ထို့နောက် ဆေးခန်းတံခါးလေးဖွင့်လို့ ကျွန်တော့်ရဲ့ တစ်နေ့တာကို ထုံးစံအတိုင်း စတင်လိုက်၏။

" ဗျို့ ဆရာလေး အခုမှနိုးတာလားဗျ "

နွေးထည်ခပ်ပါးပါးသာ ဝတ်ထားသည့် ရွာလူကြီး၏သားဖြစ်သူ အစ်ကိုငြိမ်းအောင်က
ဆေးခန်းရှေ့ ၌ ဆိုင်ကယ်ရပ်ကာ ကျွန်တော့်အား လှမ်းမေးသည်။ အစ်ကိုငြိမ်းအောင်ကို ကြည့်၍ အနွေးအင်္ကျီသုံးထပ်လောက်ဝတ်ထားသည့် ကျွန်တော့်ကိုယ်က ချမ်းစိမ့်စိမ့်တောင်ဖြစ်သွားရသည်။

" ဟုတ်ကဲ့ ကျွန်တော် ဒီနေ့အိပ်ယာထနောက်ကျသွားတယ် အစ်ကိုငြိမ်းအောင် "

" ဒီနေ့ စျေးနေ့လေ ဆရာလေးရဲ့။ အဲ့ဒါ ဆရာလေးဘာမှာအုံးမလဲလို့ ဝင်မေးတာ "

" သြော်.....ဟုတ်သားဗျ ။ ကျွန်တော်မေ့နေတာ ။ ဘာမှမမှာတော့ပါဘူးဗျာ ဟိုးနေ့ကမှ ဆေးကုခအဖြစ်ရထားတဲ့ အသီးအရွက်တွေရယ် အိမ်ကပို့ပေးထားတဲ့ ဟင်းအခြောက်တွေရယ် ရှိပါသေးတယ် "