معلومة ع السريع

مقابلة الكاتبة أسما♥

قبل القراءة أتمنى تدعموا الكاتبة بعبارات مشجعة يا حلوين♥
«استمتعوا»

•اليوزرنيم بتاعك؟
= HasmaXx

•اتكلميلنا شوية عن HasmaXx
=إسمي الحقيقي أسماء و لكنّي بفضل أسما و في الغالب لما بتعرف على حد جديد بقوله إني أسما لأني بحب الإسم و قريب من إسمي الحقيقي كمان ❤️..
في الحقيقة أنا شخص إنطوائي، بفضّل الإنعزال في أغلب الوقت و بحب الهدوء، و مبعرفش أتكلم عن نفسي الحقيقة عشان بحس إنه مفيش حاجه اقولها 😂😂

•واليوزرنيم؟
=اليوزرنيم كان عبارة عن تجميع إسم أسما و هاري، فخرج هاسما و ساعتها قررت يبقى اليوزنيم بتاعي ❤️

• بدأتي مسيرتك الأدبية امتى؟ وازاي؟
=بدأت في 2016 و لكني مبعتبرهاش بداية فعليّة لأني في الوقت الي دخلت في الواتباد مكنتش قرأت أي رواية قبل كده و عمري ما جربت أكتب بس إنسقت مع التيار و قولت ما أكتب زي ما كل الناس دي بتكتب؟فبعتبر بدايتي الفعليّة لما تيقنت من شغفي و حبي للكتابة في أواخر 2017

•جميل، وع كده عندك هوايات تانية غير الكتابة؟
=بحب التصميم، اعمل إيديتس و كده بس انا مش متمرسة و بعملهم تسلية مش أكتر مفكرتش انشرهم قبل كده.

•جربي انشريهم حقيقي التصميم لطيف وأنا شخصيًا بحبه💙.. ليكِ كام عمل كتابي ع الواتباد؟
=لو وصلت لمرحلة إني راضية عنهم رضا تام مش هتردد إني أنزلهم أكيد 💙
عندي 7 أعمل منشورين

•طب أي أكتر عمل مقرب لقلبك وليه؟
=اختبال أكثر عمل مُقرب لقلبي، حطيت جوا كل شخصية من الشخصيات جُزء مني و حسيت برضا تام عن الفكرة اول ما جتلي و قررت اكتبها مترددتش مع اني في العادي باخد وقت شوية على ما اقرر انزل حاجه جديدة، و راضية عن طريقة كتابتي فيها دونًا عن بقية الأعمال الحقيقة، و لكن ده ميمنعش ان لكل عمل مكانته الخاصة عندي.💙

•بمناسبة إنك قولتي اختبال فممكن الكاتبة المبجلة تتكرم وتقولنا مين البطلة؟ 💔😂
=هتعرفي بس مش دلوقتي 😂😂، ايه يعني لما يبقى فيه اتنين و محدش عارف مين البطلة؟😂

•مخرج ترو بيوتي فخور بيكي أووي👏🏻🙂
=لا ده منه لله ملناش دعوة بيه.

•بتفضّلي الكتب الورقية ولا الإلكترونية؟
=الإتنين عشان اكون صريحة، في كُتب إلكترونية و منشورة هنا على الواتباد أقل وصف تتوصف بيه هو عظمة و كتب كتير إحتلت قلبي، و كذلك الورقيّة، في كتب كتير حلوة و عجبتني جدًا و إستفدت منها.

•طب ترشحي كُتب ورقية أي للقراء يقدروا يطلعوا منها باستفادة لغوية وده للمهتمين بالكتابة طبعًا وكذلك ع الواتباد
=الأسود يليقُ بِكِ، في قلبي أنثى عبرية، مارمنت..  على الواتباد كُل روايات توليب الحقيقة و كذلك مها خالد و رواية كِشّ مَلِك أنا بقرأها حاليًا و الحقيقة حلوة جدًا و أنصح أيّ حد بيها

•أهلك عارفين إنك بتكتبي؟ ولو هما عارفين كانت أي ردة فعلهم لما عرفوا إن بنتهم بتكتب 🥰؟
=ماما عارفه و قرأت بعض الي كتبته و أبدت إعجابها بيه، و بتشجعني إني أخد الخطوة و أنشر كتاب ورقي لما أكون مُستعدة ❤️

• لطيف أوي أوي، أي هي الصعاب ال قابلتك وقت كتابتك لرواية؟ وبتقدري تتخطيها ازاي؟
=فُقدان الشغف، و عدم الرغبة في إكمال ما بدأته، و طبعًا شكرًا للرايتر بلوك منه لله

بحاول أقرأ كتير، غالبًا لما بقرأ بتصيبني رغبة شديدة في إني أكتب، و ساعات بتجه لسماع الأغاني و بحاول أتخيل الأحداث و الكلام الي ممكن أكتبه

•جامد يا جامد، لو معاكِ صلاحية التحكم ف واتباد ل 24 ساعة هتعملي أي فيهم؟
=هحاول أدي القصص الي مش واخدها حقها إنتباه أكتر و ارجع الnews feed الحقيقة

•ياريت😂💞كلمة تشجيعية للكتاب المبتدئين عشان ينشروا كتاباتهم؟
=متخافوش، مش هيحصل حاجه لما تنشر الي كتبته و تتعلم من الاخطاء و تكتسب خبرة و تتطور نفسك، حب الكتابة عشانك أنت، انت بتكتب عشان أنت بتحب ده و بتحط جزء من مشاعرك أو مخيلتك فيه ❤️

•رسالة من كاتبة لمتابعيها ع واتباد؟
=أتمنى يكون كل الي بكتبه بيلمس قلبكوا حتى لو سنة بسيطة، و أتمنى اكون دايمًا عند حُسن ظنكوا و بحب أيّ حد فعلاً أخد من وقته و قرألي ❤️

•رسالة لشخصيات رواياتك ال بتنشريها حاليًا يعني ال مش مكتملة؟
=لتايهيونج:إستفِق.
و يوچين:توقفِي عن التضحيّة.

•إستفق يا عم، چيزيل دي معفنة اسمع مني.. احم احم أظن كده عرفنا مين الأبطال😂
=چيزيل بنتنا قمر يعم 😂😂❤️هل انا قولت مين البطلة؟قولي الحقيقة😂😂

•لا بس موجهتيلهاش رسالة ودي كفاية😂💙
=عشان هي مش محتاجه رسايل 😂😂💙

•رسالة لكتاب واتباد الكرام؟
=أنا معرفش ناس كتير، و لكن أنا متأكدة ان كل حد بيكتب بيبدع و بتمنى لأي حد النجاح و إنه يوصل للي نفسه فيه ❤️

•أمين يارب وأخيرًا رسالة من HasmaXx لغُفران😂
=بحبك 😂😂❤️، حقيقي يواد شكرًا بجد على الدعم الي بتقدمهولي و شكرًا على لُطفك و على المُقابلة اللطيفة دي ❤️❤️

•المقابلة كانت لطيفة بيكِ والله وأخيرًا انتهت ❤️
أتمنى تكونوا استفدتوا من المقابلةدي وقالت استحسانكم♥شكرًا للكاتبة HasmaXx

متنسوش الڤوت الجميل طالما وصلت لهنا ودعوة حلوة من قلبك ليا ♥