معلومة ع السريع

مقابلة مع الكاتبة چولي

بعد غياب وقت طويل عن نشر المقابلات، عدنا بمقابلة فريدة من نوعها، الكاتبة المبدعة چولي ياسر أعطتنا من وقتها الكثير لكي تروق لنا مقابلة كتلك، أرجو منكم دعمها على حسابها namjolie

دعونا نبدأ.

- اليوزرنيم؟
* Namjolie

- شايفة إن واتباد تجربة حلوة للكتاب الهواة؟

* اه، واتباد ابليكيشن جامد لدعم الهواة ومشهور ف دة بيتيح لأكبر عدد ممكن من القراء إنهم يقرأوا أعمالك ككاتب لكنه مش أحسن حاجة.
يعني مفيش وجه مقارنة بين واتباد العرب وواتباد الأجانب، إدارة واتباد مهتمة بالأجانب أكتر بكتير ومدياهم مميزات كتير ومسابقات وحرفيًا دنيا تانية.
الخلاصة واتباد حلو اه، لكن لو خيروني بينه وبين ابليكيشن معمول للعرب ومهتم بالعرب أكتر من كدة أكيد هختار الابليكيشن دة عن واتباد.

- بتكتبي ع واتباد بقالك قد أي؟

* سنة تقريبًا

- اتكلميلنا شوية عن Namjolie.

* اسمي جولي عندي ١٦ سنة رايحة تالتة ثانوي
نمطي ENFP-T، اجتماعية جدًا واللي مساعدني في كدة اني بعرف أندمج مع كل أنواع الناس.
بحب الغناء والكتابة والقراءة، بحب الكيبوب والكيدراما وبتعلم كوري مع نفسي في البيت.
من ناحية الكتابة بقى،
بدايتي كانت مُهينة جدًا الحقيقة😂
كنت بكتب عشان أنا مش أقل من الناس اللي بتكتب في حاجة وحقيقي مكسوفة من تفكيري وقتها، ممكن مكنتش ناضجة كفاية عشان أستوعب الهدف من الكتابة وإنه لازم أوصل رسالة من ورا كتاباتي، واهتمامي بجوهر وموضوع الكتابة ميقللش أبدًا من أهمية الجانب الفني للكتابة زي السرد والوصف وكدة.

- چولي الجامدة.💗

طب ف وجهة نظرك أي هي أكتر الأنواع ال المفروض الضوء يكون متسلط عليها ف الكتابة بس هي مش كده؟

* من الناحية الجوهرية للكتابة، في مواضيع كتير محتاجة تتناقش خصوصًا القضايا الاجتماعية زي مثلًا المشاكل اللي بتواجه المراهقين من تنمر واكتئاب وحب من طرف واحد وعلاقة الأبناء بأهلهم والجو العام للبيت وتأتثيره عليهم ومعايير الجمال وكل الكلام دة.
من الناحية الفنية، أنا شايفة إن الروايات البوليسية وأدب الجريمة مظلوم جدًا في واتباد ومحتاجين نسلط عليه الضوء أكتر لأنه من وجهة نظري أكتر تصنيف بيحتاج مهارة من الكاتب سواء في اختيار ظروف الجريمة والحبكة أو اختيار طريقة سير التحقيق أو اختيار الألفاظ المناسب بحيث انها متبقاش مبهمة بزيادة ولا واضحة بزيادة فتفضح الحبكة.

- جميل جدًا، طب شايفة إن الإنسان ال حابب الحياة الأدبية وعاوز يطلع منها بكارير، محتاج يمشي ع خطوات أي عشان يكون أديب؟

* بصراحة مش برجح إن شغلهم الأساسي يقتصر على الكتابة، لأنها هتتحول من وسيلة ترفيه لوسيلة ضغط عليهم وهيبقوا مرتبطين بمواعيد ولازم أفكار جديدة ولازم نكتب عشان دة هيكون مصدر دخلهم الوحيد.
فأنا شايفة انهم يشوفوا حابين مجال ايه كدراسة وشغل ومعاه ينشروا رواياتهم، يعني مثلًا عمرو عبد الحميد كاتب معروف وكلنا بنحبه، هو متخصصش في الكتابة هو درس طب وشغال طبيب لكن جنب شغله بينشر روايات.
دي وجهة نظري، لكن اللي مصمم إن الكتابة تكون شغله الوحيد فمعتقدش إن في خطوات محددة؛
في ناس بدأت كتابة من صغرها وفي ناس بدأت جديد ومش كل الخبرات زي بعض.
أعتقد كبداية يكتبوا رواية كاملة ويعرضوها على دار نشر ولما تتقبل يكتبوا غيرها وهكذا