معلومة ع السريع

مقابلة الكاتب محمد فؤاد.

•يوزرنيم واتباد؟
▪︎Healer410

•ايه الحكاية ال ورا اختيار الاسم ده؟

▪︎في سنة 2015 كنت بلعب لعبة اسمها فيفا هي لعبة كورة كان فيه لاعب بنعمله زي الحقيقة كده وبيكون ليه مسيرة احترافية فحبيت بما اني خليت جنسيته اجنبية يكون اسمه اجنبي هو كمان فا افتكرت مسلسل كنت اتفرجت عليه وقتها اسمه هيلر فمع الوقت الاسم ده ارتبط بيا كاسم شخصي

•حلو أوي، بدأت كتابة ازاي وأي ال حببك في الكتابة؟

▪︎هو انا بدات الكتابة في 2019  يوم 8 مارس تحديدا كانت بالخواطر كنت ديما بفكر فيها جوا دماغي وكانت بتضيع  مني فقررت اني اكتب وجربت ومشيت معايا بعد كده كتبت اول رواية

اللي حببني في الكتابة…
الحقيقة محبتهاش بالشكل اللي بشوفه حواليا ان الناس بتحب الكتابة عشان هي ملجىء ليهم انا بشوف نفسي موهوب في ده فبعمله لكن حب اوي فيها فلا

•يعني متحبش في يوم تمتهنها كمهنة؟

▪︎كمهنة جانبية يعني يطلق عليا كاتب او مثلا كاتب محتوى اكتر من كاتب روائي لكن مهنة اولية واساسية فبنسبة كبيرة لا

•عرفت واتباد ازاي وكان هو أول منصة الكترونية تنزل عليه كتاباتك؟

▪︎في يوم لما كتبت روايتي الاولى واحد صاحبي قالي لازم تقرا في تصنيف قريب للي انت بتكتب فيه فانا بكتب رواية دموية فبحثت عن روايات دموية لاقيت الواتباد قدامي فتحت اول رواية معجبتنيش ومكنتش فاهمه في الاول فا قفلت وعملت عليه اكاونت ونسيته فضل الاكاونت ده 7 شهور معمول ومقفول
جت فترة وحبيت اعدل الرواية بس قولت عشان اعدلها ليه مجربش اكتب رواية اتسلى فيها واهو بالمرة اتطور اسلوبي فعملت القلم الاحمر وكانت مجرد رواية بلعب فيها
لكن اول منصة انشر عليها اعمالي كان التويتر بعد كده الفيس بوك وفي الاخير كان الوتباد

•جميل، أي قصة القلم الأحمر؟

▪︎القصة كلها بتتمحور حول هل القتل ليه سبب محدد وهل ممكن الظروف القاسية تحول شخص لقاتل ولا القاتل بيختار يكون قاتل
ففي كذا مسار في الرواية  بنشوف عدة قتلة بعدة ظروف مختلفة

•حلو أوي بجد، ككاتب شايف إنه ايه هي الأركان الأساسية ال تبقى متوفرة في قصة أو في رواية عشان تبقى مقبولة للقراء؟

▪︎كنت بسال السؤال ده لناس كتيرة اول مرة اتسئله بس هجاوب عليه
اول حاجة اختيار الفكرة صح وتكون مقبولة اخلاقيا
تاني حاجة من رأيي محتوى القصة والسرد يكون واضح للكل ومش ركيك
تالت حاجة متكونش مملة ومش طويلة وفيها مط

•هل قبول القراء للرواية ده شرط إن الكاتب يكمل ولا حتى لو محدش حابب يستمر ف النشر؟

▪︎قبول العمل اكيد ليه سبب ان الكاتب يكمل لكن لو كاتب بيكتب عن موضوع زي مثلا افكار موجودة غلط وحاول يوضحها وقابل رفض فيكون الرفض ده دافع اكبر بنسبة ليه انه يكمل وهنا بقول انها افكار غلط وهو بيصححها طبقا لمصادر صحيحة وبحث كبير لكن مينفعش اجيب فكرة مثلا زي ان احنا عشان نعيش لازم نشرب ماية وافضل اجيب في امثلة كثيرة انه لا الماية دي خطر علينا اصلا وهي سبب موتنا فده اكيد لازم نسعى لوقفه لانه ممكن بافكاره دي يؤدي لتدمير بديهيات تتبعها تدمير مجتمعات