كيفيه اختيار العتريس قصدي العريس و مقالب أهالينا اللي اتعملت فينا

كرامتها من كرامتي

مشاكل كتير بتحصل بسبب ان الزوج أو الخطيب معندوش كرامه
معندوش كرامه ؟
ايوه زي ما بقؤل كده معندوش كرامه
الراجل كرامته مش واقفه عليه هو وشاملاه لوحده
لا دي شامله كرامه اخته وامه واهمها زوجته وخطيبته ايا كانت لان كرامتها من كرامته عارفين المثل اللي بيقؤل

" " اللي يقؤل لمراته يا عورة يلعبوا بيها الكوره ، واللي يقؤل لمراته يا هانم يقفوا لها علي السلالم " "

عارفين المثل ده لخص كل حاجه
باختصار كده مينفعش جوزك او خطيبك يتعزم في مكان من غيرك ويروح خصوصا لو كانوا عارفين ان خاطب او مجوز

الصح انه المفروض يعتذر ويقؤل انا اسف مقدرش اجي من غير خطيبتي او مراتي
كده هو بيحترمك ومقدرك و لو معملش كده يبقي عديم الكرامة ايوه زي ما بقؤلك كده بالظبط ومتكمليش معاه

الحاجه التانيه
مينفعش يعزم حد في البيت عندك وانت متعرفيش او يجيبه علي فجأه ويحدد المعاد بتاع العزومه من غيرك

المفروض يتصل بيكي ويشوف المعاد المناسب ليكي

الحاجه التالته
لو بتأكليه سم مينفعش يقؤل للناس ان طبيخك وحش بالعكس يشكر فيه اودام الناس وميسمحش لحد يهينك او يتريق

الحاجه الرابعه والاهم
لما اخته الحربايه ولا امه السهنه تكون معزومه عندك وانت اللي تطبخي وتتعبي في التحضير وفي الاخر تقؤل لجوزك تسلم ايدك علي العزومه الجامده دي
     هنا جرس الإنذار يشتغل
ركزي في رد جوزك
مينفعش يقؤلها العفو علي ايه والكلام الفاضي ده خالص لانها كده مش مقدراكي
اومال ايه عليه يعمله
اللي عليه انه يقؤل لاخته او لأمه اي كانت مش انا اللي تعبت في الاكل ده ومراتي هي اللي عملته تسلم ايدها علطول بتأكلني احلي اكل ودايما مشرفاني
ومينفعش يعمل نفسه من بنها 

ولو ملكيش كرامه عند جوزك مش هتلاقيها عند اهله ولا جيرانه ولا صحابه وكلها واقفه علي الاختيار