فقيدي

الحلقة الأولى

#فقيدي

الحلقة الأولى
للكاتبه : salma Elshwehdi
_________________________________________

     لم يعد يحزني شيء فكل ما بداخلي قد مات

قصتي أكيد سامعين بيها لأنها انتشرت في وقتها لكن من دون تفاصيل وكل حد يقول في كلام من راسه 💔

نتعرفو علي بطلة الرواية : أسمي رزان وراجلي أسمه خالد عقيد في الجيش وعنده رتبه عاليه طبيعة شغله مايروحش للحوش الا يومين في الأسبوع ومرات يقعد بالشهر مايروحش

متزوجة من سنتين وعندي ولد واحد اسمه سعد عمره 8شهور

صاحب الحوش اللي نسكن فيه قال لمو ملابسكم وياريت تطلعو من الحوش بعد يكمل العقد اللي بينا لأنِ حصلت فيه بيعه

طلع خالد يدور في شقة او حوش للإيجار لأن مزال 4 ايام ونطلعو من الحوش ، وكان  عنده شغل مرات ميروحش الا بعد أسبوعين

بعد ساعتين روح فرحان قالي لقيت حوش كبير ورخيص للإيجار

خفت في البدايه وقتله : مرات الجيران مش كويسين ولاحاجه
قالي : لالا ماشاء الله عليهم معروفين

فرحت وقتله : وين بالضبط وامتي نمشو ؟

قالي : في الماجوري ومنطقة سكنيه والمحلات قريبات ، ودفعت ثلاث شهور ومرات نشريه واهو المفتاح ، صبي وتي روحك أنتِ وسعد نشيلك تتفرجي عليه وتنضفيه لأنه ليه فترة مش مسكون

وكانت منطقة الماجوري في الوقت هذا كيف عامره

صبيت بسرعه خذيت مواد تنظيف ولبست ولبست سعد وقلت لي سعد : والله انك وجه السعد علينا ياسعد وحطيت الساكو متاعه في السيارة وساكو ليا وطلعت

وصلنا للحوش وكان شكله من بره كبير وسمح
نزلت من السيارة  وفتح خالد باب الحوش كان الحوش مأثث وفخم قعدت فاتحه فمي فيه من الصدمه

خشيت جوا لقيته كله غبار كأنه مش ساكن فيه حد من 100 سنة لكن الباين انه الأثاث جديد مش مستعمل واجد ؟

طلع خالد جاب سيارة كبيره لم فيها اثاثي اللي في الشقة كله وجابه للحوش وكان فيه ملابس في الدولاب متاعه والمطبخ فيه ثلاجة مليانه بس اللي فيها كله خارب ومنتهي الصلاحية

الحوش كأنه اصحابه طالعين منه وبيردو لأن حتى ملابسهم قاعدات؟

بديت انظف في الحوش وكل الملابس حطيتهم في باكوات وحطيت سعد في الصالة

قعد يناغي ويلعب ويضحك بروحه ، الحقيقة أستغربت لأن سعد نوعه ديما عياط ومايقعدش في الوطا بكل حتى وانا نطيب في الغداء يقعد في يدي لعند مايرقد

ضحكت وقلت أكيد فرحان لأنه طلع من الشقة وغير جوه

نظفت الحوش كله وسعد ساكت نجي نعطيه رضاعه ويلعب بروحه مادورنيش بكل

كملت حوستي عباره عن تسييق وتنظيف من العجاج وطيبت العشاء تعشينا وخشيت انا وسعد بنرقدو وسعد رقد بروحه عكس العاده كان ديما يتعب فيا

حطيت رضاعة أميه متاعه جنبي بعد ينوض نعطيها له ويرقد

ودخلت في نوم عميق لأنه ثاني يوم في الصبح خالد عنده شغل بنوض نديرله فطور ونسقده

وأنا راقده مره مره نسمع في صوت شرب كأنه فيه حد يشرب جنبي ماعدلتش كنت تاعبه بكل ، وسعد راقد ماناضش

نضت بعد الفجر صليت ودرت فطور خالد لقيت رضاعة الأميه متاع سعد فاضيه انصدمت

رزان : خالد ناض سعد وأنا راقد وشربته أميه
خالد : لا والله مانضت بكل أنا ، بلكي نضتي أنتِ ومش فاطنه
رزان : مرات مش مذكره والله

ماعدلتش علي الموضوع وقلت  مرات نضت ومش متذكر
فطر خالد وخدا الشنطة متاعه وطلع للشغل برمت علي الحوش شويا

و درت سندوتش جبنه وشاهي وفطور لي سعد ، وفتحت التلفزيون وسعد في يدي كليت وكسدت شويا وفطرته بعدها رقد حطيته وصبيت نغسل طاسة الشاهي متاعي لقيت طاجين دحي علي النار ومحرك ومش محروق وانا ليا نص ساعه قدام التلفزيون ؟ وماحطيتش دحي علي النار اصلاً ؟ من وين جاء ؟

رعشت وقلت بديتي اديري في حاجات من دون تركيز حي علي أمك يا رزان

طفيت عليه وغسلت المواعين وطفيت التلفزيون وخشيت رقدت وبعد ساعتين نوم عميقات نضت شفت جنبي مالقيتش سعد !!؟

سسسعد وينك ؟
_________________________________________
#يتبع