#فقيدي
الحلقة الرابعة
للكاتبه: salma Elshwehdi
_________________________________________
بعد أقل من نص ساعة نضت علي صوت عياط ونديب وحده في وسط الحوش
وتقول : وووه عليا يانبيل خدوك مني يانبيل قهروني فيك وأنت صغير أقهر اللي قهروني وجربهم مرار الفقد وووووه عليا ووووه
قعمزت في مكاني من الخوف وشفت لي سعد لقيته نايض ويبحت فيا مرعوب بس الصوت مش غريب عليا
رفعت سعد وطلعت بشويا وأنا نرعش مالقيتش حدد؟ ولعت ضي الحوش ولفيت عليه مافيش حد معايا
معناها كلام خالد صح أنا بديت ننهبل ، باهي لو أنا أنهبلت ليش سعد ناض وكان خايف معناها فيه صوت صاح ؟
يارب ساعدني شنو اندير
رديت لي داري من الرعب ورقدت سعد ورقدت وأنا كيف المرا الطيبة
بعد نص ساعة
نوضني ولد صغير ويقولي ماما نوضي أنا جعان
رزان وهيا راقده : سعد أرقد
الولد : ماما أنا جعان ليا أيام مش واكل
رزان : ارقد سلم ولدي نعسانه
الولد : ماما نحنا ماعندنش وكال ليش أنا مريض ياماما نوضي ماتخلينيش بروحي
وهنا الصدمة فتحت عيوني لقيت سعد راقد بس سعد صغير مايتكلمش أصلاً؟
عيطت وناض سعد يبكي مفجوع
معش قدرت نتمالك نفسي مالقيتش حد في الدار ، بعدها سمعت صوت من المطبخ
تعال وليدي توا نوكلك أنا ماتنوضهش
مسكت سعد نسكت فيه وأنا نرعش قعدت نسمع في أصوات في المطبخ ووحده تغني وتحرك في الطنجرة
قعدت مقعمزة وسعد راقد في يدي للصبح وأنا نغمض في عيوني ونفتح فيهن ومرعوبة
لعند ماجت الساعة 10 الصبح دق الباب بقوة أنفجعت حطيت سعد بشويا علي السرير وصبيت نجري للباب فتحته وكان خالد
رزان : ليش ماروحتش أمس ؟
خالد : ووه بدينا في القصقصة بالله كولي شي حاجة وجهك رايح منصفر ويخوف
رزان : نديرلك فطور ؟
خالد : مانبي شي وين سعد
رزان : راقد جوا
خالد : وليش مسهره الولد أنا مخليك معاه بيش تهتمي بيه
رزان : أنت كان تعرف ليش مارقدش أمس ....💔
خالد : بالله فوتيني أنتِ وهبالك هتخلي الولد ينهبل كيفك أنا خاش بنرقد شويا بنوض نلقا غدايا واتي فاهمة ! وحاولي ماتكثريش الكلام معايا
رزان : تمام 💔
خشيت للمطبخ وطلعت دجاجة وحطيت الطنجرة علي النار وبرمت فتحت الثلاجة مالقيتش الدجاجة قلت أكيد لأنِ مش راقدة بديت نخرف فتحت الثلاجة ندور فيها مالقيتشهش ؟
لفيت للطنجرة لقيتها مقطعه ومحطوطه فيها انصدمت بس عجبتني اللقطة لأن ماعنديش نيه في الزفرة 😂
حطيت الغداء وولعت عليه ومشيت لسعد نوضته ودرتله دوش ومشيت نفطر فيه بس المشكلة مايبيش يفتح فمه ولا ياكل جربت معاه كلل الحاجات بس الولد رافض الأكل
وأنا مزلت نحاول معاه جاني خالد يجري
خالد : فوتيهم الحركات هذينا خيرلك
رزان : حركات شنو
خالد : علي أساس مش فاهمة !؟
رزان : والله ماني فاهمة حاجة علي شنو تتكلم ؟
خالد : تجي تفتحي في الضي واطفي فيه وتضحكي راكِ كبيرة أعقلي
رزان : والله ماجيتك ولا قربة من الدار خديت سعد وملابسه بس وطلعت
خالد : لو أنك تحاولي أديريلي الحركات هذينا علي أساس تبي تخوفيني ونحولك من الحوش ماتحلميش ولو تموتي ماني مطلعك
رزان : بس والله .......
خالد : أسسسسس ولا كلمة وتيلي دبشي عندي خدمة وحطيلي الغداء
مشيت للدار طلعت شنطة خالد وحطيتله ملابسة وسكرتها ومشيت للمطبخ بجد بديت نكره خالد شنو المعاملة هذي اللي يعامل فيا بيها معش هنعدل عليه هنهتم بنفسي وولدي بس
حطيتله الغذاء وجا يتغدي( عطه سم الحصله😒)
كمل غداه ومشى للدار بياخذ الشنطة متاعه وبيطلع والصدمه كانت مفتوحة وكل الدبش اللي فيها في الوطا ونصه مقصوص بالمقص
كنت نشوف للشنطة بصدمة وهو نفس الشي أصلاً كنت جنبه من البداية ماتحركتش
خالد : تي شنو أنتِ عيلة ؟
رزان : والله ماقربت منها وكنت جنبك من امبدري
خالد : أنتِ مجنونة وكان ماتعقلي نسلمك لمستشفي الأمراض النفسية أقعدي فيها هي أني طالع وماعاد تشوفي وجهي
وطلع وسكر الباب بقوة ، وبعدها سمعت صوت ضحك
عاليي قعدت أندور في مصدر الصوت ......
_________________________________________
#يتبع
أنت تقرأ
فقيدي
رعبرواية غريبة ؟ احداث حقيقة؟ صارت في بنغازي تحديداً منطقة الماجوري شنو المعنى من أسم الرواية؟ وليش تسمت هكي ؟ هذا كله هتعرفوه ركزو في الأحداث .
