فقيدي

الحلقة الثالثة

#فقيدي

الحلقة الثالثة
للكاتبه: Salma Elshwehdi
_________________________________________
حاولت نذكر ؟ بس أنا حتى غداء مانبيش متأكدة ماحطيت شي علي النار ؟ ولا حطيت لروحي

طفيت عليه وغسلته ؛ وقلت الأفضل ليا ولي سعد نخش نرقد ونرقده معايا قبل ماندير كارثة ثانية

خشيت رقدت ورقدت سعد جنبي حلمت بي نفس المكان اللي لقيته وراء الثلاجة كنت طايحه وفجأة جتني المرا اللي في الصورة كانت متغيره

ذابله ووجها أصفر وضعيفة وباين الحزن علي وجها طبست عليا
وقالتلي : هاتي مفتاحي ؟
رزان : منو أنتِ؟
قالت : هاتي مفتاحي وجهزي روحك بابك يبنو فيه

بعدها خداته مني وصبت شافت للصورة وتنهدت وأختفت

نضت خايفة ومصدومة ، من هذي ؟ وشنو أدير في حوشي؟ وشنو قصتها ؟ وأي باب اللي تتكلم عليه؟

صبيت وأنا مش قادرة نشيل روحي دورت المفتاح مالقيتشش ؟ كيييف؟

دورت علي المفتاح في كل مكان أختفى ، وهنا كانت الصدمه الكبرى ، حسيت روحي مزلت نحلم قلت أكيد وسوسة بس

مشيت نوضت سعد كان هادي وساكت ويشوفلي بطريقة غريبة رفعته ومشيت بيه للمطبخ قعد يبكي قعدت نوكل فيه بس هو مايبيش يفتح فمه حاولت معاه أكثر من مره كان يفنص وبس

دق الباب وآخيررراً ليا فتره ماشفتش ناس ، مشيت فتحته وكان خالد ، دخل وكان مستغرب وقالي : كنه شكلك هكي ؟ وليش سعد ضعيف شكلك مكملتيها نوم ومش معدله علي ولدي

رزان : لا والله مهتمه بيه غير شكله مريض رافض الآكل ، وبشويا عليك وأنت من خشتك تهزب غير سلم

بعدها كشخ عليا وخش للحوش

الحق أستغربت بس قلت أكيد من ضغوطات الشغل مشيت نشوف فيه

خالد : من أول ماخشيت للحوش غمت عليا
رزان : أسمع بنقولك علي موضوع مخوفني
خالد : وشنو الموضوع هذا ؟
رزان : من أول ماجيت للحوش ويصيرن معايا حاجات غريبة مره نضت لقيت سعد مش جنبي ولقيته علي فراش ومخده مش ليا ومره لقيت شرابة الأميه متاعه فاضية وحتى رقبتي شوف متورمه ودم حسيت بحد ضربني ودخت لقيتها هكي

خالد : وكيف أنضربتي ؟
رزان : وحكيتله اللي صار معايا كله من اول ما جيت للحوش لعند توا

خالد : هههههههههههههههه مجنونة أنتِ ؟ هذا من كثر قعادك في الحوش جاك التوحد

رزان : أنا مش قادرة نقعد في الحوش هذا أكثر من هكي نبي نحول

خالد : تحوليي ؟ تحسابيها ساهله أنتِ المحواله أنا حصلت الحوش هذا ومش مصدق سعره ومش هنحصل كيفه وبنشريه

رزان : أختار يا أنا وسعد يا الحوش
خالد : بالله أقعدي فيها بكل هي رايحه ضاعفة ومريضة ومنضرك يخوف ، وأنا نبي نتجوز  وأنتِ هتقعدي في الحوش هذا تربي ولدك وبسس قالت عفاريت قالت

وطلع وطبق الباب وراه

قعمزت بكيت علي حظِ قاعدة بعيده علي أهلي هما في البيضاء وأنا في بنغازي وحتى طبعي مش زيهم وكان أطلقت مش هيستقبلوني بولدي

تنهدت وخذيت سعد معايا ومشيت لداري وقفت قدام لمرايا لقيت روحي ذابله ووجهي أصفر وعيوني مرهقات وشعري متبهدل وملابسي مش متناصقة

معقولة هذي أنا ؟ ليش قعدت هكي عنده الحق خالد منضري رايح يخوف ، كيف وصلت أنا للمرحلة هذي

حطيت سعد قدام التلفزيون وقلت هيا سادني كسل نصبي نظف حوشي وأنظف عقلي من الأفكار هذينا أنا أكيد نتخايل وهذا مجرد أفكار غبية لازم نهتم بنفسي وولدي

بديت أنظف وحطيت غلي كله في التنظيف كملت حوستي وكان الوقت متأخر خديت سعد حاولت معاه مرات ياكل بس كان رافض الآكل

دخلت للحمام وغيرت ملابسي وملابس سعد وخشيت لداري لعبت سعد شويل ورقدت

بعد أقل من نص ساعة نضت علي صوت عياط ونديب وحده في وسط الحوش

وتقول  : وووه عليا يانبيل خدوك مني يانبيل قهروني فيك وأنت صغير أقهر اللي قهروني وجربهم مرار الفقد وووووه عليا ووووه

قعمزت في مكاني من الخوف وشفت لي سعد لقيته نايض ويبحت فيا مرعوب بس الصوت مش غريب عليا .........
_________________________________________
#يتبع