نوفيلا غريب فالحارة

مشهد خاص

الغريب : صباح الخير يا معلم صبحى 

المعلم صبحى : صباح الخير يا غريب يا ابنى .

الغريب : لسه بتقولى غريب ما أنت عرفت إسمى و كل الحكاية .

المعلم صبحى : هو كده اسمك اللى إتحفظت بيه و أنا راجل كبرت و معدتش قادر أحفظ شئ فخلينى كده حافظ اسم غريب .

الغريب : ولا يهمك يا سيد المعلمين غريب غريب . بس أنا كنت جاى و طالب منك طلب و أتمنى تساعدنى فيه .

المعلم صبحى : أنت تؤمر رقبتى سداده 

الغريب : تسلم و تعيش . أنا عايز أعزم ناصح و عبير و البنات اللى إتخطبوا بعدها فى العمارة و صاحبتهم اللى لسه متخطبتش على حفلة كده بسيطة بمناسبة الفلانتين .

المعلم صبحى : إيه بمناسبة ايه !!!

الغريب : عيد الحب يا معلم .

المعلم صبحى : أستغفر الله العظيم . هو إحنا لينا فى الكلام ده .

الغريب : يا معلم أنا عايز أحتفل معاهم و بيهم و متنساش أن حكايتى هى اللى جمعت العشاق اتنين . 

المعلم صبحى : بس يا ابنى أنا حعرض عليهم وربنا يقدم اللى فيه الخير .

وبيوم عيد الحب حضر الجميع . ناصح و عبير . ورحاب وفارس . و نور ومخلص . و أيضا ياسمين . إلى إحدى المراكب النيلية للأحتفال والتى حجزها الغريب بالكامل خصيصا للإحتفال و جهزها من ورد و بالونات و طعام فاخر و فرقة موسيقية . و إستقبلهم على الباب ورحب بهم . و إصطحبهم للداخل .

غريب : يا أهلا وسهلا إتفضلوا . شرفتونا .

ناصح : يزيد فضلك يا أخويا . صدق اللى قال ما محبة إلا بعد عداوة .

فارس بسرور : أهلا وسهلا بحضرتك . أنا أول مرة أشوفك بس أعرف أنك كنت وش الخير علينا . وانك السبب أننا بقينا كده متجمعين .

مخلص : بصراحة لما عرفت حكاية حضرتك كان نفسى أسمعها منك و إستغربت من الدعوة بس الحقيقة قلت فرصة أتعرف عليك و أخرج مع الأستاذة بعد ما وافقت أخيرا ( و أشار بيده الى نور التى تعمدت وغز ذراعه على هذا التلميح ) .

غريب : و أنتى يا ياسمين مش عايزة تقولى حاجة .

ياسمين : بصراحة أنا مش عارفة حضرتك أصريت أنى أجى ليه !!! لا حضرتك تعرفنى ولا أنا مخطوبة مع المخطوبين .

غريب : مش يمكن يكون وشى حلو عليكى أنتى كمان .

ياسمين : مع إحترامى لحضرتك بس أنا مش فاهمة بتتكلم عن أيه ؟!

غريب : حتعرفى بعدين . لسه القاعدة فى أولها و أنتم لسه واصليين .

رحاب : و الله بجد حضرتك كتر خيرك بس أنا عندى سؤال و حموت عليه .