داخل إحدى شقق العمارة
ياسمين : صباح الخير يا بنات . عاملين إجتماع على الصبح ليه ؟
رحاب : صباح الورد و الفل على أحلى ياسمين . أقعدى بس و أنا أقولك على الحوار كله . ولا ايه يا ست نور .
نور : يا بنتى أنتى بتقولى ايه ما تخلصينا جيبانا هنا على الصبح ليه .
رحاب : ماشى يا ذبادى . قوليلى بقى يا نور تعرفى ايه عن الغريب .
نور : غريب مين ؟
رحاب : الغريب اللى بيقولوا بقاله يومين فى الحارة و حاطط على عمارتنا العين .
ياسمين : أنا مش فاهمة حاجة يا رحاب متخلصى فيه ايه .
رحاب : بصى بابا أتصل بماما من شوية و قالها إنه إتكلم مع المعلم صبحى اللى شاف غريب حاطط عينه على عمارتنا بقاله يومين و انه مش حرامى و شكله ابن ناس . و بما إننا أكبر البنات فى العمارة و اللى لسه متجوزوش جمعتكم عشان نعرف هو مين و قاصد مين .
نور : أنتى شوفتيه ؟
رحاب : لا طبعا . أنا زى العادة سمعت ماما و هى بتكلم بابا فى التليفون وفاكرة انها كل ما تعلى صوتها حيوصل ليه و يسمعه أكيد و لا دلوأت كمان بتفتح السماعة عشان تسمعه و ناسية ان اللى فى العمارة كلها حيسمع كلامهم أكيد .
ياسمين : ههههه طنط دى زى السكر بس شايفة ان ده الطريقة الصح انها تتعامل مع الموبيل من وجهة نظرها .
رحاب : مين حتبدأ تحكى . عشان نشوف هو مين .
نور : أبدئى أنتى يا ستى و قولى حكايتك أيه .
رحاب : تمام . أولا أنتم عارفنى مليش كنت فى الحب و الحوار الكبير . كان لينا جروب فى الجامعة و الناس دى أعرفها من سنين إعدادى وثانوى و الجامعة كلنا شلة واحدة بنات بس بميت راجل . لغاية ما فى مرة فى أول السنة اللى فاتت جالنا فى الدفعة طالب جديد بس ايه كان شايف نفسه حبتين و إترسم رسمه إنما ايه . و انتم عارفنى محبش المغرورين . قلت أبعد عنه بس طلعلى فى مرة مش عارفة منين لما قلت فى السكشن انى عاملة بحث عن المادة و اللى عايز يصوره مفيش مشكلة . رخم عليا و قالى انه عايزه قلتله حجيبه تانى يوم معايا . لقيته بكل غرور يقولى متتأخريش بكرة عشان مش فاضى ورايا حاجات كتير . سيبته يتفلق و مردتش عليه بس كنت متغاظة . دخلى على جروب الواتس بتاع الدفعه يقولى مشيتى ليه عملتله بلوك و بعدها فكيته عشان أعرفه انى أنا اللى اقرر إذا كنت أوافق عليه و فضلنا كده ناقر و نقير بس بصراحة لانه استفزنى أحرجته قدام الكل لما دكتور المادة قسمنا مجموعات اجباري عشان مشروع التخرج و طلبت من الدكتور ميكونش في مجموعتي و ضميرى بعدها و جعنى اعتذرتله و من يومها دخل المجموعة اللي انا فيها و مش كده وبس بقينا زمايل و أصحاب و ده خلاني اعرف حاجات كتير عنه يعنى عارفة العك اللى بيعكه كله بس هو شهم و مش بيعمل حاجة غلط كده و أمير . المشكلة بقى انه طلب يتقدملى و أنا مش عارفة أعمل أيه .
ياسمين : يعنى المشكلة فين ؟
رحاب : المشكلة يا ستى أنى عارفة كل بلاويه و أنا و هو ناقر و نقير خايفة لو أتجوزنا غيرتى تاخدنى و تخلي حياتنا مستحيلة . أنا عارفة إنه مش حيخونى فى يوم بس هو ليه حوارات كتير . و بعدين أنا عنيده و هو عصبى يبقى حنتفق منين . و بعدين هو مجنون و يعملها ممكن يجى لغاية هنا . متقدريش تعرفى هو حيعمل ايه .
ياسمين : ماشى الكلام طب ده حكاية سى .... هو أنتى قلتى اسمه أيه ؟
رحاب : هههههه . اسمه فارس بس هو بلطجى حبتين .
ياسمين : و أنتى يا نور حتبتدى الحكاية منين ؟
نور : حكايتى تتلخص فى كلمة واحدة . الخيانة .
رحاب : نور حبيبتى أنتى بتقولى أيه ؟
نور : كان إنسان رومانسى حبتين و عشقته و قلت عنه مفيش زيه . كنت شايفة إنه أحن و أطيب قلب فى الزمن ده . منكرش ان هو كمان حبنى زى ما قال و كان مستعد يعمل كتير يعمل عشانى أى شئ . فتحلى قلبه إنه حب قبلى و انه سابها لما الظروف وقفت ضده بس كان حاسسس ديما ناحيتها بالذنب و نفسه يطمن عليها . لغاية ما بدأت أحس إن فيه حاجات غلط فى كلامه حاجات يقولها و يرجع ينساها . قالى انه قدر يوصلها و انه بيحاول يخليها تسامحه انه بعد عنها و هى كملت حياتها و إرتبطت بإنسان جديد رغم انها منسيتش حبها ليه . بدأت الغيرة تاكلنى ومرة واحدة حسيت انى بشوفه من جديد فجأة حسيت انه لابس قناع مبقتش عارفه حبنى و لا أنا بالنسباله إيه . و عرفت ان فيه واحدة تانية وتانية هو بالنسبالهم أخ كبير بس أنتم عارفين الحكاية بتبدأ كده و تنتهى زى ما انتم عارفين . عملتله بلوك من حياتى و بعدت وهو فضل يدور عليا فى كل مكان . اتهمنى ان حبى ليه كان وهم و كان مزيف لان اللى بيحب بيسامح و بيلاقى ديما بدل العذر اتنين . تعرفوا كان إسمه ايه ! مخلص زين .
رحاب : و أنتى يا ياسمين حكايتك ايه .
ياسمين : حكايتى فى كلمتين شروق و غروب
رحاب : نعم يا حبيبتى و ده اسم فيلم ولا أغنية و كلمتين .
ياسمين : حكايتى معاه زى الشروق و الغروب عمرهم ما يبقوا مجتمعين .
أنت تقرأ
نوفيلا غريب فالحارة
Short Storyقصة قصيرة بالعامية المصرية عن ظهور غريب بأحد الحارات الشعبية المصرية حيث يتسأل الجميع عن سبب تواجده المستمر . و علاقته بإحدى العمارات السكنية المزدحمه بالسكان . قصص حب خفيفة و شيقة لا تخلو من المواقف المضحكة و الحزينة . فمن هم الأبطال و ما هى قصتهم...
