حان الآن موعد اطلالتي عليكم حسب توقيت دقات قلوبكم ولاني في مزاج جيد مساء الخير لمن يحبني ولمن لا يحبني ايضا مساء الخير والسعاده
اتمنا تكوني بخير يا رب
اعتذر من جنابكم على النقطاع وعدم تفاعل معكم بسبب بعض الضروف اتمنا تتقبلي اعتذاري
قصتي وية احد الشباب لعراقين قبل فترة شهر تقريبا واني راجع للبيت بالطريق نزلت من الباص بل عامية(كوستر) لأن بوقتها سيارتي عطلانة تنزلك هاذي الكوسترات قبل الأخير وتمشيت عبور الشارع وصولا للباص الأخير اللي يوديني للبيت تحديدا وقوفا على الجسر الرابط بين بغداد الجديدة والمشتل على الجسر يوجد طريق جانبي يؤدي الى الجزرة الوسطية لقناة الجيش هناك غالبا اكو شباب صغار أشوفهم دائما يتختلون تحت الأشجار وبإيديهم اكياس سوداء مملوءة غالبا ! اني اعرف هم شنو عدهم وليش يروحون هناك فكرت احجي وياهم بس ترددت قبل ما يقارب ثلاثة أسابيع رحت للبيت زيارة سريعة واستوقفني شاب لا يتجاوز عمره ١٩ عام وصاحني بإسم (عمو) واني استغربت جدا التفتت صوب هذا الشاب المسكين •تفضل حبيبي •عمو اني بيتنا بفلان منطقة واني سرقوا مني تليفوني ومحفظتي وحتى اجرة ماعندي أوصل للبيت
هذا الكلام كان مع ملامح وجه تائهة وعيون شاردة لا تقوى على المواجهة والابصار بعيني في خط مستقيم !! كانت عيون تحمل مشاعر خجل وخذلان ومقاومة خجولة بمحاولة الإمساك بآخر ما لديه من عزة نفس كان التردد واضحا عليه وصعوبة بإخراج الكلمات من الفم مع إيماءات جسدية ذات اتجاهات غير مفهومة وسرعان ما اكتشفت انه كان شاب (سكران ) •كلت له اني أساعدك مو مشكلة وهو مبلغ بسيط بس عندي سؤال الك جاوبني بصراحة انت ليش تشرب ؟ •عمو اني متعارك وية ابوية وضجت وشربت وهاي اول مرة •كلت له لتكذب هاي مو اول مرة انت واصل مرحلة متعدي تأنيب الضمير ومرحلة المكوث في هذا المكان أمام الناس وللجرأة نصيب من التكرار •صحيح كلامك هاي ثاني مرة بس والله اني متعارك وية ابوية! •كلت له بعد ما انفردنا على طارف سياج الجسر وأمامنا مئات البيوت من سكنة أهالي بغداد الجديدة والمشتل في الطرف المقابل لها
كم بيت ذني تعرف ؟ تقريبا مئات البيوت اذا طلعلتي بيت واحد مابي مشكلة اني خسار الك باللي تريدة وعلى لسانك •كلامك صحيح
يا حبيبي كلنا عدنا مشاكل وية آباءنا واخواننا واصدقاءنا يستحيل ان ندمر نفسنا بسبب مشكلة !! ثم شنو مشكلتك وياه اكيد كلك اشتغل وشوف نفسك وشوف مستقبلك بدل ما تكون تايه ونايم وتسوي مشاكل بالبيت صح لولا !! •تقريبا صحيح أصدقاء السوء اتركهم ذولة ميفيدوك وهاي دا تكولي سرقوا مني تليفوني ومحفظتي وفلوسي. ذولة مو أصدقاء ذولة ناس حرامية ورفاق سوء يستغلوك بأول ضعف الك وانت أصلا متدري منو سرقك !! روح اسبح وصلي واسأل الله يوفقك ، وخلي ببالك الله سبحانه ماعندة شي شخصي وياك نهائيا ولا عندة اي مشكلة وياك انت اللي عندك مشكلة وياه روح صالحة وكولة جيت على طريقك راح تنام مرتاح وتتنفس براحة وتشوف هواي أوقات سعيدة من يومك أوقات سعيدة وهادئة بعيدا عن حياة العدم اللي عايشها حاليا ولتنسى ابوك هو ابوك ويستحيل عليه يكرهك ابد بالعكس هسة تشوفة حزين جدا على وضعك ويتمنى من كل قلبه ان تكون انت مرتاح وتضمن مستقبلك بشغل ترتاح بي وتكوّن نفسك منه
الشاب تقبل الكلام برحابة صدر والدموع في طارف عينه.. اني جدا انقهرت عليه وتأثرت بتصرفاته وسلوكه لان ملامح هذا الشاب ملامح بريئة وحزينة تحجي بصمت عن شاب كان ضحية ظروف قاسية جدا حاله حال مئات الآلاف من الشباب التائه اللي ميعرف مصيره وين في وطن اشبع اجسادهم جروح عميقة جدا
اخواني على كيفكم شوية بالنقاشات والجدل كلنا نشئنا بمجتمع معطوب ومنهار تعرضنا لجرعات تدين مشوهة تدني لفظي وعنف أسري خرافات ودجل وشعوذة انحلال اخلاقي جارف انهيار لمبادئ وقيم اخلاقية كلنا مشوهين فكرياً بدرجات متفاوتة اكو بينا اليحاول يتعافى واكو اليريد يفهم واكو ناس مرتاحة ونايمة على كلمتين حافظتهن احنه ابناء الثقافة المشوهة ندعي الفضيلة ونرفض السلام حتى اشدنا عقلانية وثقافة بعده اسير المذبحة العقائدية رفقاً بأخوك العايش نفس معاناتك ودعوا الزمن يؤدي وظيفته
اكبر انجاز بهذا وكتنا تبقى انسان محترم خير ومتربي وحاط الله بعينك تكدر تميز الصح من الخطأ مسيطر على نفسك وسلوكك ومحافظ على كرامتك وسمعتك متحكم بأفعالك مو الناس متحكمه بيك دائماً عندك مسطرة اخلاقية ماشي عليها مهما تصعب بيك الظروف او شيطانك يبررلك حجج وأعذار وطول الوكت تجاهد تبقى شخص مستقيم رغم ماعايش بزمن بي الأحترام شذوذ وقلة الحياء مفخرة
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
