#سوالف _ابو _يزن

سالفة ورباط

سلام عليكم اخواني اخورتي

من سوالف اهلنا القديمة وبيهه حسجه
يكولون بذاك الوكت اكو رجال حجي جبير بالعمر يسكن الصحراء هو و اولاده وعايلته
وشغلهم بالصحراء يطلبون العشب لحلالهم
وجان الحجي أبو الولد يوميه يكعد ولده الصبح يروحون يسرحون بالحلال ومايرجعون الى والدنيا غروب
ليش ما يوم من الايام اجوا وجايبين وي الغنم بعير
اهنا ابوهم تلكاهم وكاللهم ها بويه منين جبتوه هذا البعير
الولد كالوله بويه لكيناه تايه بالصحراء وجبناه ويانه
الحجي بويه باجر ترجعونه منين ماجبتوه الولد كالو لبوهم
بويه قابل احنا بايكينه ،مسلبينه احنه لگيناه تايه وجبناه ..مانرجعه
الحجي كاللهم بويه اذا مارديتوه البعير للصحراء وضل عدنا بالبيت راح ياكل البعير واحد من الخرفان
الولد ضحكوا وكالوا الحجي بين عليه الكبر
المهم اجو من السرح بالحلال وهم كاللهم الحجي بويه اذا مارجعتوا البعير ترى راح ياكل اكبر خروف عدنا
الولد كالعاده هم ضلوا يضحكون وكالوا الوالد كبران وضل يخرف
اليوم الثالث هم اجو من السرح بالحلال
وجان يجون ثلث خياله
ويحولون على الحجي اولده
ويكلوله حجي هذا البعير مالنه ومتيهينه وصارلنه ثلث تيام ندور عليه
الحجي كاللهم اي بويه هذا البعير بعيركم
الولد گبل يومين لكوه تايه وجابوه للبيت
هسه تفضلولوا بويه للبيت
بعد ما رحب بيهم وگعد يمهم او وياه اولاده
والا ينادي الحجي لأولاده بويه كوموا اذبحوا اكبر خروف عدنا للضيوف
فكاموا الولد وذبحوا اكبر خروف من الغنم وطبخوه للضيوف
بعد ما كلوا الضيوف الخروف واخذوا البعير ورحلوا
رجع الوالد لابناءه وهو يضحك ها مو كتلكم هذا البعير اذا يضل يمنا ياكل اكبر خروف من غنمنا
وهسه الخروف انوكل والبعير رد لهله

الولد كالوا صدك الجبير بالبيت حكمه وبخت وكاموا وحبو ابوهم بحلكه وبراسه وبيده وهم يرددون كون تبقى ذخر انه يابويه
وما طول عليكم بالسالفه هنا شاهد سالفتنه
ترى الجبير بالبيت بركه وكله حكمه وحسجه وبخت والي عده جد چبير واب چبير ترى عنده كنز
الله يحفظ اباءكم واجدادكم ويرحم الموتاكم وان شاء الله كلكم خير وبركه احبتي

أخوكم أبو يزن /عسا ان تناول رضاكم