عاشق الامل في زمن اليأس

الجزء الاول

اول شي اعرفكم عن نفسي : اسمي صادق من الانبار عمري 27 سنه عسكري
قصتي عشتهه بسنة 2014 خلال حرب داعش ع العراق وابطال القصه هواي وراح تعرفوهم من خلال الكتابه
طبعا احنه عايشين بقريه صغيره والي بالقريه كلهم اقاربي ماكو غريب كلهم عمامي وخوالي وكلهم متزوجين من نفس القريه يعني ماكو احد من القريه متزوج غريبه ومن خارج هاي القريه بس ابويه. طبعا اهل هاي القريه الي هم عمامي جانو يكرهونه كره مو طبيعي لأن امي غريبه مو من هاي القريه ف جانو يتخبلون من عدنه واحنه هم منعزلين عنهم منختلط بيهم . ف جنت اني طالب ثالث متوسط بذيج الفتره وجنت من اطلع من المدرسه اروح يم اصدقائي الي يداومون بالقوات الامنيه وابقه طول النهار يمهم وحتى جنت الزم واجبات وابقه سهران وياهم للصبح بأيام العطل ف اهل المنطقه جانو يضوجون من القوات الامنيه حيل وبس يردون يخلصون منهم ف اني جنت ابقه وياهم يعني فوك كرههم الي بالسبب الاول الي هو لأن امي غريبه والسبب الثاني لأن جنت ابقه ويا اصدقائي بالقوات الامنيه جنت كل يوم متعارك ويا اهل القريه الي هم عمامي من وره اصدقائي لأن يجون يمي للبيت واني اروح يمهم . ف بيوم من الايام الساعه ب 3:30 الفجر اني نايم بالبيت وفزيت على صوت الانفجارات والرمي والطيران كعدت اتصل على اصدقائي گالو علينه هجوم من داعش ف اني ماجنت عندي سلاح حتى اطلع اقاتل وياهم ف بقيت واگف بالباب مال البيت واباوع عليهم وهم متعاركين متحملت ابقه واكف واباوع ركضت وياهم بدون سلاح واساعدهم بنقل العتاد واساندهم بكل شي جنت اكدر اسوي سويته بقت المعركه من ال3:30 الى ال 8 الصبح هواي انطينه جرحى وهواي كتلنه من داعش بس جان عددهم اكثر من عدنه وعدهم مدرعات هم وياهم المهم بعد مانفذ كل شي عدنه من عتاد واسلحه ودعم انسحبو القوات الامنيه وسيطرو داعش ع القريه بالكامل اني من انسحبو گلولي تعال امشي ويانه لاتبقه هنا لأن اهل القريه يكرهوك وشافوك ويانه دتقاتل ف راح يشتكون عليك ويعدموك المهم لحو عليه حيل واني رفضت الطلعه كلتلهم ما اكدر اطلع واعوف اهلي وحدهم هنا لو نلطع كلنه لو نموت كلنه بعد ما گطعو نفسهم الولد مني ودعوني وراحو عبرو للجهه الثانيه من النهر ف اني دخلت للبيت جانت الدنيا شتاء وبارده حيل المهم خليت بطانيتين وتغطيت وفاتحين البوب وننتضر داعش يدخلون علينه للبيت اني وابويه واخوتي ف اني متحملت ابقه كاعد بالبيت گمت طلعت بالباب باوعت يمنه يسره ماكو احد والوضع هدوووء تماما ولا عبالك اكو شي ف اني شفت شباب واگفين گدام بيت عمي رحت يمهم اريد اشوف شنو السالفه وشصار ماصار المهم اثناء مدا امشي بالطريق رايح بتجاهم طلعو الدواعش من البساتين والبيوت واجو بتجاهي واني صرت بنص الطريق وبعد ما اكدر ارجع للبيت ف بقيت ماشي بطريقي وما اهتميت اجو بتجاهي اربعه منهم واحد عراقي و3 اجانب اجه العراقي كام يحجي وياي شعندك طالع ووين رايح كتله هذا بيت عمي وهذا بيتنه ورايح يم بيت عمي المهم اخذوني وجمعو الشباب الي واكفين كلهم وياي ووگفونه ع الحايط وصارو هم ورانه كلهم عافو كل الي موجودين وجان يگولولي انت تعال ويانه اني محجيت شي بقيت ساكت وماشي وياهم گلولي انت ليش جنت ترمي علينه وتقاتل ويا القوات الامنيه ضدنه گلتلهم اني اصلا ماعندي اسلاح ولا شي واني طالب مدرسه ومالي دخل بكل شي واحد من الواكفين من عمامي گللهم لا جذاب وجان يقاتل وياهم ضدكم اني شفته شوف عيوني اني هنا خرسيت تماما بعد ماعرف شنو احجي جان يگولي الداعشي ها تجذب علينه مو وتگول ماعندي سلاح واني طالب مدرسه گتله اي اني طالب مدرسه واذا متصدگ امشي وياي لبيتنه واشوفك الهويه مالتي مال الطالب هو گال يلا امشي گدامي مشيت گدامه وهم كلهم ماشين وراي دخلت للبيت مالنه وهم وراي بالاثناء اني موبايلي بجيبي وگامو اصدقائي يتصلون عليه لأن وصلهم خبر انو داعش اخذوني وجان بوقتهه موبايلي X2 بس جنت مخلي هزاز وانتو اكثركم تعرفون الهزاز مال الX2 صوته ينسمع المهم دخلت للبيت واني گلبي واگف لايسمعون الموبايل يدگ ولازم ارد واذا رديت راح اروح بيهه رسميا المهم دخلنه للبيت بالطرمه طلعو اهلي كلهم يركضون ويبجون لأن داعش ماخذيني المهم عندب اخويه الاكبر مني بسنتين شويه لسانه ثكيل ومن يحجي يتأخر بالحجي يلا ينطق الكلمه احنه عدنه نسمي( يوتوت ) ابويه عيونه مدمعه وگلي وليدي مو گتلك لاتطلع ليش مارديت عليه وخواتي وامي يبجون واخوتي خايفين المهم كلت لأخويه الاكبر مني بس روح جيب محفضتي ع المعرض يم التلفزيون راح اخويه ورجع گلي صادق المحفضه مالتك دزيته انوب ورجع گال ماكو بس مثل مگلتلكم اخويه( يوتوت ) ف هذا الداعشي من شاف اخويه يحجي هيج عباله اخويه خايف ف گلي هاهيه حل اعدامك والتنفيذ بيك لأن انت جنت تقاتل وياهم ضدنه اني هنا فقدت الامل تماما وبقيت بس ساكت ماعرف شنو احجي ويا او ارد علي هذا الي صار كله وموبايلي بعده يتصلون عليه اصدقائي المهم گتله انت مو راح تعدمني هسه گال اي راح اعدمك گتله قبل لا تعدمني عندي طلب صغير منك
وبعدهه شتريد تسوي سوي گالي شنو  گتله بس اودع اهلي واروح وياك ماعندي شي ثاني گالي عادي ماكو اسهل منهه هدني واني گبل نزلت على رجلين امي بستهه وحضنت امي وخواتي وگمت ابوس بيهم واودعهم بهالاثناء مديت ايدي على جيبي وطلعت موبايلي وشاورت امي گلتلهه هذا موبايلي بجيبج عود طفي او كسري لو ضمي حتى لا تتأذون بسببي وانوب بست رجل ابويه وودعته وودعت اخوتي ورحت وياهم وهنا ماسولفلكم ع التواسيل والبجي من خواتي وامي واخوتي وابويه بيه حتى ماروح وياهم ويلومون بيه لأن طلعت ولزموني المهم جتفوني وشدو عيوني و اخذوني داعش وطلعنه من البيت واني ماشي وياهم بس اشوف من جوه الشداد شي قليل . اخذوني وراحو للبستان حتى ينفذون بيه الاعدام جان عددهم اثنين وصلنه للبستان وفتحو عيوني وفتحو ايدي وجاب السلاح مالته خلا براسي واني گمت اتشاهد وانتضر ينفذ بيه بهالاثناء اجه الطيران العراقي( الهليكوبتر ) وگام يقصف على جماعتهم وهم من گام الطيران يقصف بعد ميدرون شنو يسوون عافوني وركضو للبيوت اني هنا شفتهم عافوني وركضو واني هم ركضت بين البساتين الما وصلت البيت من دخلت للبيت مخليت احد يشوفني