عاشق الامل في زمن اليأس

الجزء الرابع والاخير

اني هنا الدنيا ضلمت بعيني وبعد ما ادري شنو اسوي فوگ الضيم والتعب والقتال وانوب فراگ اهلي وعملية ابويه. كملت شغلي بالبيت ورجعت للساتر وبقيت بالستار گمت كل 3 اشهر يلا انزل للبيت مره وحده اشوف شكو ماكو وارجع للساتر وبقيت على هاي الحاله سنتين و9 اشهر اني بالساتر وطول هاي الفتره اني ما اعرف كل شي عن اهلي لا اخبارهم ولا وين صارت بيهم الدنيا ولا اكو شبكه او انترنيت حتى اسأل عنهم يعني الاخبار معدومه تماما هم ميدرون بيه واني ما ادري بيهم بس مره وحده اجه الانترنيت يوم واحد وفتحت فيس بوك وراسلني ابن عمي ع الماسنجر يگول ليش فاتح حساب صادق وانت منو گتله حسين شبيك اني صادق جان يگولي صادق استشهد من زمان گتله والله اني صادق گام يغلط عليه وگلي لتجذب انت مو صادق صادق استشهد من زمان اتصلت علي ع الماسنجر وگمت احجي ويا هاحسين شلونك شخبارك سمع صوتي وگام يبجي واني اسكت بي اريد افتهم منه شنو السالفه واريد اسمع اي خبر عن اهلي بعد طول فراگ 3 سنوات اگوله حسين والله اني صادق ومابيه شي اني عايش ميقبل يصدگ المهم گتله منو گالك اني مستشهد گال گلولنه انت مستشهد بمفخخه وهذا الحجي قبل سنه واكثر المهم گتله يول حسين اهلي وين صارت بيهم الدنيا عندك اخبار عنهم شي گلي اهلك موجودين هنا ويانه ومابيهم شي كلهم عايشين ومابيهم شي اني هنا فرحت ونسيت كل شي من سمعت اهلي مابيهم شي وعايشين گتله حسين امانة الله اريدك تصورلي امي اريد اشوفهه تره گلبي ممرود على شوفتهه گالي ميخالف واني سديت الخط ومرتاح سمعت اخبار عن اهلي بعد طول 3 سنوات ووره تقريبا اسبوع اجه النت هم واجتني رساله ع الماسنجر فتحتهه لگيت حسين ابن عمي دازلي صورة امي فتحت الصوره شفت عيون امي مغمضات گتله حسين امي ليش هيج عيونهه ليش مغمضه گام يبجي وگالي مابيهه شي من گام يبجي اني شكيت حسين شبيك احجي شبيهه عيون امي گالي صادق امك عيونهه عمت من گد البجي عليك اني هنا مادري شنو اسوي گمت ابجي والدنيا ضلمت بعيني بالزايد وفقدت كل شي بحياتي وبقيت اسبوع كامل صورة امي مافارگتني ابد طول هاي الفتره اني فاتح صورة امي واباوع عليهه وابجي وبقيت لا اكل ولا اشرب ولا انام انهارت اعصابي تماما وكرهت حتى روحي وجان من يصادف عيد واني بالساتر اگعد وحدي واخلي صورة امي گدامي واگعد اعايد بيهه واسولفلهه شنو صار وياي بهاي الفتره ودموعي تصب وتنزل لا اراديا وصرت كل شي يصير وياي او يصادف عيد او اي مناسبه اخلي صورتهه گدامي واگعد احاجي بصورتهه واسولفلهه شنو صار وياي من مواقف وابجي فقدت جزء كبير من طاقتي وصرت انسان مكسور وضعيف وما اتحمل كل شي بعد گمت من انزل للمعركه انزل بدون وجع گلب واتمنى يصير بيه شي واخلص من حياتي حتى ارتاح المهم صار تحرير المدن وگمنه نطلع معارك ونحرر بالمدن والقرى وكل قريه جنه ندخل الهه نحررهه اروح اركض ع العوائل واسألهم شفتو اهلي اهلي هنا اهلي وين اي واحد اسأله يگولي البارحه جانو هنا موجودين واليوم مدري وين راحو والقريه الثانيه هم نفس الشي اروح للعوائل شفتو اهلي اهلي وين اهلي موجودين هم البارحه جانو هنا واليوم مدري وين راحو حررنه نص المدن واني نفس الشي اسوي بكل مدينه او قريه ادخل بيهه وكلهم نفس الحجي حررنه 90% من المناطق واني اسوي نفس الشي هم اركض للناس واسألهم وكلهم نفس الحجي اني هنا فقدت الامل تماما وتعبت وتعبت نفسيتي واصبت بخيبة امل قويه وگطعت نفسي من اهلي المهم بقت عدنه اخر منطقه بالمناطق والقرى التابعه النه ودنحرر بيهه حررنه القريه كلهه وبقت عدنه بهاي القريه مدرسه والمدرسه صايره جوه جبل ونشوف بيهه حركة ناس ومنگدر نتقرب منهه لأن الدواعش بعدهم موجودين قائد المعركه الي ويانه گال ماكو اي حل غير نقصف المدرسه ونتقدم حتى لا ننطي شهداء وجرحى اكثر من الي راحو المهم قائد المعركه نادى ع الطيران حتى ينفذ الضربه الجويه ع المدرسه حتى نتقدم بتجاهه وننهي تحرير اخر منطقه وتتحرر بشكل عامل من داعش اثناء مدا ينادي ع الطياره طلع طفل فوگ سطح المدرسه وشايل رايه بيضه ورافعهه فوگ وخايف لا نضربه القائد گال اصبرو خاف هذا كمين النه ويردونه نتقدم اني گتله سيدي ما اعتقد كمين لأن هذا طفل واثناء مدا احجي ويا طلعو اطفال انوب هوايه وكلهم شايلين رايات بيض ورافعيهن القائد گال تقدمو بس بحذر وانتبهو تقدمنه بتجاه المدرسه وصلنه يم الباب مال المدرسه ولگينه عوائل هواي بالمدرسه اطفال ونساء وشباب وشياب ناديت عليهم اكو احد من الدواعش وياكم او بيناتكم گلولنه احسن ما تصير مجزره گلهه گامت تصيح لا والله ماكو احد واحنه كلنه مدنيين ولتخافون تقدمت اني وفتحت باب المدرسه واباوع بالطرقه لگيت اثنين گاعدين ورافعين رايات بيض ورافعين ايديهم باوعت عليهم لگيتهم امي وابويه واخوتي وخواتي كلهم ملتمين وراهم وخايفين والنسوان يبجون والاطفال هم اني هنا مادري شسوي صراحه جانت المسافه بين باب المدرسه والطرمه مالتهه تقريبا 10 امتار او اكثر شويه تدرون هاي العشر امتار الي بين الباب والطرمه اني يمكن 3 ايام اركض بيهه بس اريد اوصل يمهم واتأكد منهم وصلت يمهم ووگفت وفوگاهم واني ابجي وحيلي مهدود بس ماعرفوني لأن جنت لابس خوذه وملثم قربت عليهم وامي مثل الي اشتمت ريحتي او حست بيه اني صادق گامت تباوع بالوجوه وتصيح هلا وليدي هلا وگفت فوگاهم وكلتلهم الحمدلله على سلامتكم وحبيت اطمنهم واخليهم يرتاحون شويه وامي تباوع بوجوهنه وحاسه بيه اني موجود وياهم للعلم اني اهلي ميدرون بيه اني عسكري بهاي الفتره لأن هم من طلعو اني جنت مدني بس اقاتل ويا ربعي بعد ما طلعو هم ووراهم بفتره يلا صرت بالحشد المهم گلتلهم انتو مو اهل صادق  لو اني متوهم كلهم صاحو اي اي احنه اهلنه وهاي امه وهذا ابو واحنه اخوته وخواته بس من گلتلهم هيج ابويه وامي گامو يبجون خير يابه خير يمه شبيكم تبجون امي وليدي صادق استشهد وكسر ضهورنه اني هنا بعد ما اتحمل اكثر من اللازم ولازم اخليهم يعرفوني نزعت الخوذه ووخرت اللثام ووگعت على رجلين اني وگمت ابوس بيهه هي وابويه وهم ممصدگين يبوسون بيه وامي تگول وليدي انت عايش يبعد امك عايش وتتلمس بجسمي وتبوس بيه واني اي يمه عايش اني عايش واحضن بيهه هي وابويه وابوس بيهم والناس الي واگفه يمنه كلهه تبجي عاد سملت على اخوتي وخواتي كلهم وتخيلو من اسلم عليهم خواتي يجون بحضنون بيه ويبوسون بيه واني مستحي اريد احضنهم ومتردد اگول خاف مو خواتي لأن كبرانات ومتغيرات المهم گعدت يمهم ونزعت الدرس والخوذه وشمرت سلاحي ونمت على رجلين امي وهي تلعب بشعري وتبوس بيه وممصدگه اني عايش المهم صار الغده خلولنه غده واني ما اشتهي اكل من الفرحه تغدو وكملو واني گاعد بين امي وابويه واثنينهم يطعمون بيه والعائله كلهه ملتمه كملت غده گلت لأهلي اني راح اروح اشوف شلون اگدر اطلعكم منا اليوم ورحت للقائد الي ويانه سيدي اني اريد اطلع اهلي اليوم وما اگدر اخليهم هنا القائد لا صادق ممنوع منگدر نطلع اي شخص من القريه الا بعد 3 ايام ملاحضه القريه او المنطقه الي ندخل الهه نحررهه نبقه بيهه 3 ايام الما تجي الحاسبات ونتأكد من العوائل خاف اكو احد مطلوب للدوله او عنده شي يلا نخلي الناس تطلع عاد المهم گتله سيدي والله اليوم ما اخلي اهلي هنا لو مدري شيصير صارت مشاده كلاميه بيناتنه وتدخلو الولد بيناتنه واجه مدير الناحيه مالت المنقطه الي احنه بيهه شكو خير شبيكم للعلم مدير الناحيه يصير ابن عمي حياك الله استاذ شلونك حياك هلا صادق تحمدلي ع السلامه گتله اريد اطلع اهلي منا وما اخليهم اليوم گلي سهله اصبر شويه واهدء اوك استاذ حجه مدير الناحيه ويا القائد وقنعه وگله اني راح اوديهم بسيارتي واوصلهم واني رحت ويا مدير الناحيه للمدرسه اخذت اهلي كلهم وخليتهم ويا مدير الناحيه بالسياره واخذتهم وطلعت من المنطقه ورحنه للمجمع السكني واول منزلت بالمجمع السكني حرگت الدنيا بالرمي خليتهه تمطر رصاص من الفرحه والحمدلله هسه اهلي موجودين كلهم يمي وعايشين كلهم بخير وسلامه ورجعنه للقريه مالتنه وسكنه ابيتنه ورتبنا ورجعنا احلى من قبل

اخوكم صادق (كاتب عسكري) اسف ع الاطاله واتمنى عجبتكم القصه