عاشق الامل في زمن اليأس

الجزء الثاني

ابويه گال يلا نطلع لعد طلعنه ورحنه نمشي ويا بالبساتين جوه الجبال الما وصلنه لنهاية القريه اكو بيت ابن عمي هناك بنهاية القريه بعيد عن القصف والهاونات گلت لأبويه الجو حيل صار بارد والدنيا ضلمت بعد منشوف شي خلينه نخلي النسوان والاطفال هنا واحنه وانت ابقه وياهم واني راح اخذ الولد ونطلع للقريه الثانيه هناك نبات ونشوف وين نروح باجر ابويه گال ميخالف راحو هم ابيت ابن عمي واحنه الشباب رحنه للقريه الثانيه وصلنه هناك گلنه هسه نلاگي العوائل هناك ونبات يمهم للصبح ونرجع ناخذ العوائل ونشوف وين نروح وصلنه القريه الثانيه ملگينه بيهه ولا بشر بس احنه نفتر بيهه وحدنه گلت للولد الوياي خلي نفوت لأي بيت من هاي البيوت نبقه بي لأن الدنيا صارت ليل وبارده وبعد كل شي منشوف نبقه بي للصبح والصبح نشوف شنو نقرر دخلنه لأقرب بيت فتحنا وگعدنه بي احنه تقريبا جان عددنه من 30 الى 40 شخص اني اول مدخلت جنت حيل بردان دخلت للغرفه طلعت بطانيه وختلت بين الثلاجه والحايط وتغطيت وگعدت حتى ادفه المهم بعد ماصار نص ساعه من دخلنه البيت كل واحد طلع موبايله وگمنه نخابر على اهل القريه نريد نشوفهم وين راحو بالاخير حصلنه واحد من اهل القريه مطالع من القريه لأن بيته صاير قريب على قاعده عسكريه والقاعده بيهه جيش المهم اخذت الولد وطلعنه بتجاه البيت الي بي هاي العائله وصلنه البيت ودخلنه بي جان بالبيت 3 عوائل وانوب احنه گعدنه وياهم يعني البيت صار هوسه جابولنه عشه بوقتهه زبد عرب ودبس بس منو جان يشتهي ياكل من التعب والقلق المهم نمنه ناس فوگ ناس مدري شلون طلع الفجر گعدنه صلينه الفجر وگلت للولد يلا نرجع لأهلنه نجيبهم ونشوف وين نروح .رجعنه للقريه لگيت ابويه واگف بره وينتضرنه هاوليدي اجيتو اي يابه اجينه هسه شنو نسوي ووين نروح گال ابويه والله وليدي مادري گتله يابه اكو قريه قريبه ع الجسر ساكنين بيهه بيت خالتي خلي نروح ونشوف يمكن نگدر نعبر للجهه الثانيه ابويه گال اخذ خواتك واخوتك وعوائلهم وروحو واني راح ابقه هنا اني وامك وجدتك امي هم متگدر تمشي مسافات بعيده مريضه جانت المهم لحيت على ابويه مقبل گال اخذ الي گتلك عليهم وروح واذا ماكو شي هناك عود تعال اخذنه اني مكسرت كلامه اخذتهم ورحت مشينه تقريبا بالصحراء ساعتين يلا وصلنه للقريه الثانيه وجان الجو مطر وبارده ثلج المهم وصلنه للقريه دخلنه ابيت خالتي گعدنه نرتاح هستوني گاعد دگ عليه ابويه گالي تعالو الجيش گامو يقفصون علينه للعلم اني هذا الي دا اسوي كله مخاطره عليه لأن اني جنت منهزم من داعش واذا شافوني راح يرجعون ياخذوني ويعدموني المهم گلت للولد روحو تلگو ابويه وامي وجدتي جيبوهم وتعالو اني ماگدر اطلع بعد خاف يشوفوني ويرجعون ياخذوني وهالمره اعدام مابيهه مجال الولد مگالو لا ردو عليه بس يردون واحد شوي سبع وياهم حتى يسويلهم جرئه ويروحون على ابويه وواحدهم يذبهه على واحد اني گمت گلتلهم منو يروح وياي خالتي گالتلي اگعد انت اذا لزموك يعدموك خلي غيرك يروح گلتلهه خاله عادي المهم ارجع اجيبهم واجي روحي مو اغلى من ارواحهم المهم گلت لخالتي انطيني وصله بيضه او اي شي ابيض يفيديه بالصحراء حتى الطيران ميضربنه جابولي جيس مال تمن ابيض فارغ واني لگيت بوري جبت الجيس شديته ع البوري وسويته مثل الرايه وگلت لخالتي جيبيلي شماغ حتى اتلثم بي خاف احد يشوفني جابتلي الشماغ لبسته وطلعت ووياي الولد بنص الطريق لگيت ابويه شايل جدتي الي هي امه على ضهره وبالكوه يمشي لأن هو هم جبير بالعمر لگيته شايلهه ويبجي تلگيته واخذتهه منه ورجعنه لبيت خالتي گعدنه ارتاحينه بعد تعب 3 ايام بدون اكل وشرب ونوم كملنه الغده گلت لأبويه خلي نعبر ع الجهه الثانيه ونخلص ابويه گال شلون نعبر ميخلونه القوات الامنيه يضربونه گتله معليكم بس امشو وراي ابويه گال يلا طلعنه وطلعو ويانه نص اهل القريه تقريبا مايقارب ال150 عائله وصلنه يم الجسر صار علينه رمي من جهة القوات الامنيه گلتلهم ابقو وره البيوت هسه اجيكم اني رجعت ركض لبيت خالتي جبت الرايه مالتي البيضه الي هي بوري وجيس تمن😂 وسويتهه رايه ورجعت گلت لأبويه يابه اني اخذوني داعش ع الاعدام والله نجاني منهم وطلعت بخير وسلامه وهسه اني راح اضحي بروحي واخذ الرايه وانزل امشي ع الجسر اذا ضربوني ومتت افترو وارجعو والكم الله واذا محد ضربني انزلو ورايه اهلي كلهم مقبلو وگالو لا متروح وانت خبل ومن هاي السوالف اني گلت لأهلي ماكو غير حل واني رايح ابويه گام يعيط عليه اني مهتميت نزلت امشي ع الجسر بس شنو خطوه گدام وعشر خطوات وره عبرت ربع الجسر واني رافع الرايه وامشي ماكو شي عبرت نص الجسر وباوعت ورايه واشوف الناس كلهه نزلت ورايه تمشي ورافعين رايات بيض وصلت لنهاية الجسر من الجهه الثانيه وباوعت ورايه واشوف العدد مال الناس الي وراي الجسر بعد ميبين من كثرة الناس الوراي وصلت للجهه الثانيه وتلگوني القوات الامنيه انطوني ماي وگعدت يمهم ارتاحيت وگامت تطلع الناس بقيت انتضرت اهلي الما اجو تلگيتهم واخذتهم ورحت لبيت خالي بالجهه الثانيه وصلنه يم بيت خالي گعدنه ارتاحينه واكلنه وشربنه . ثاني يوم اجرنه بيت بصف بيت خالي وگعدنه بي بقينه 3 اشهر گاعدين بالبيت وبعد هاي الفتره گعدنه الصبح من النوم ماكو شبكه مال موبايل ولا انترنيت ولا كهرباء ومحد يعرف شنو السبب طلعت اني اريد اروح لبيت خالي حتى افتهم شنو السالفه اثناء طلعتي لگيت الدواعش بوجهي والمنطقه الي احنه سكنه بيهه هم مسيطرين عليهه وگاعطين كل شي ومفجرين الابراج والكهرباء ومدمرين كل شي اني رجعت للبيت اركض گلت لأهلي الدواعش مسيطرين ع المنطقه والمنطقه كلهه بيدهم اني هنا رجعت على نفس المربع الاول لأن مطلوب الهم واذا لزموني يعدموني بقيت گاعد بالبيت ما اطلع بره ابد گامو الدواعش من يشوفون اخوتي بالشارع يسألوهم عني واخوتي يگولولهم مو هنا طلع لبغداد من زمان اني من اجو اخوتي گلولي عرفتهم هم نفسهم الي اخذوني وانهزمت منهم المهم بقينه بهاي المنطقه 12 يوم وهي بيد داعش وهم يدورون عليه واني كل يوم ابات ابيت وماخليتهم يلزموني ولا يدرون بيه اصلا اني موجود بهاي المنطقه