حكايا العشق - منى سليمان

حكايا العشق - مشهد خاص

حكايا العشق
مشهد خاص بقلمي منى سليمان

استيقظت على صوت المؤذن فتركت فراشها الدافئ واتجهت صوب الحمام لتتوضأ وتُصلي الفجر وما هي إلا دقائق حتى فرغت من أداء الصلاة وجلست تتلو آيات الله حتى السابعة والنصف ثم تركت غرفتها لتذهب إلى المطبخ وتُعد طعام الإفطار لأحفادها لكنها توقفت أمام غرفة حفيدها الغائب فقادها قلبها إلى الداخل ووقفت تتأمل صورته وهو يحتضن زوجته وصغيره

- صباح الخير يا تيتة

سرقها صوت جاسر من غفلتها فالتفتت إليه على الفور وقبل أن تتفوه ولو بكلمة سبقها وطبع على جبينها قبلة وأخرى على ظاهر يدها

- صباح الهنا يا نور عين تيتة
- الواد منير وحشك؟
- البيت ملوش طعم من غيره ولا من غير ولادكم، معرفش كان إيه لازمة السفر والفسح في البرد ده
- كلها كام يوم ويرجعوا وتشبعي منهم ومن جنان منير
- ربنا يرجعهم بالسلامة، تعالى أفطر معايا قبل ما تنزل

حك جاسر ذقنه بإبهامه وردد: أنا مش نازل، أنا لسه راجع

- تاني يا جاسر مأموريات مفاجئة
- غصب عني
- ربنا يقويك ويعينك على حساب الملكين اللي هتاخده من سلمى

نظر جاسر لأعلى ورفع كفيه ثم تمتم بطريقة تمثيلية: قوينا يارب

ضحكت سميرة على جنونه الذي لا يتوقف ثم مضت برفقته إلى الخارج، ذهبت هي إلى المطبخ بينما صعد هو إلى غرفته ودلف على أطراف أصابعه حتى لا يُوقظ سلمى التي ما إن انتبهت إلى وجوده اعتدلت في جلستها وأضاءت المصباح الموضوع إلى جوار الفراش فتمتم جاسر في نفسه

- استر ياللي بتستر

اقترب منها والابتسامة تُزين ثغره ثم جلس على حافة الفراش وتنحنح قائلاً: أتكلم ولا أخدها من قصيرها وأروح أنام على الكنبة ونأجل الخناقة للظهر علشان هموت وأنام يا قمر أنت

- أنت ليك عين تهزر؟!

رفع كتفيه لأعلى وكذلك كفيه ثم ردد: آسفين يا أبو صلاح

تفذ صبر سلمى عند تلك النقطة فضيقت ما بين حاجبيها ورددت بحدة: برضو بتهزر، مليون مرة قولتلك بلاش مأموريات مفاجئة، بحس أني بموت من القلق عليك وقلبي بيتقبض لما تتصل وتقولي مش هقدر أرجع

- غصب عني، ده شغل ومقدرش أقول لا
- يا جاسر انا تعبت، بموت من القلق حرفياً وألف فكرة وحشة بتدور جوايا، على الأقل لما بتقولي قبلها بكام يوم بجهز نفسي لكن المفاجئة دي بتوترني وبخاف يحصلك حاجة و

بترت كلماتها حينما أخذ شفتيها في قبلة لم يفصلها سوى حاجته لاستنشاق الهواء وبمجرد أن ابتعد هتف بجدبة مصطنعة

- حقك عليا، لما يقولوا مأمورية مفاجئة هقولهم مش هطلع وأترفد وكده أفضالك

شاكسها بغمزة وتابع: وساعتها ما تلومش غير نفسك يا شرس