ولأنكِ نهد طفولتي

الفصل الثالث: فراق

بعد ما فاروق قال لأدهم إن ندى ماتت ، دخل ف نوبة عياط مميته ..
أدهم بصراخ: لاااااا ندى لاااااا يا جدو متقولش كدة اااااه يا ندى
حياة بدموع وخوف: أهدى يا أدهم يا حبيبي متعملش ف نفسك كدة
فاروق بزعيق: اطلعوا كلكم من الأوضة
انسحبوا كلهم بعد أوامر فاروق .. وقعد جنب أدهم وحضنه ..
فاروق: أدهم حبيبي انت كبير وفاهم أن دة قدر ربنا ، وكلنا ف الاخر هنموت صح
أدهم بعياط: يا ريتني كنت مت معاها
فاروق ضمه أكتر: متقولش كدة بعيد الشر عنك
أدهم: هتوحشني أوي يا جدو ، انا بحبها اوي هي كانت صحبتي وكنا ع طول مع بعض مش مصدق اني مش هشوفها تاني ولا هنلعب مع بعض وازاي هدخل البيت من غيرها تاني ...
فاروق: بكرة تنسى
أدهم بعد عنه شوية: عمري مهنساها أبداً ... هي ماتت ف الحادثة ؟
فاروق بتلعثم: أ.. أيوة
أدهم فضل يبكي بحرقة ع فرقتها لغاية ما تعب ونام ..

_فاروق طلع ليهم وقالهم أنه كويس ونام .. بس هنا هيفضل السؤال عن موت ندى

حياة: عمي.. هي ندى بجد ماتت ؟
فاروق: أيوة
عزت: طاب وحضرتك عرفت منين وأمتى حصل ؟
فاروق بتوتر: انا كمان كنت بدور عليها ، ماتت من فترة بس مرضيتش اقولكم غير لما نطمن ع أدهم
عزت: وازاي ماتت ولقتها فين
فاروق عقد حواجبه بضيق من أسألة ابنه اللي مش بتخلص ولا لاقي ليها إجابة
فاروق بنفاذ صبر: رجالتي لقيوها ف حته مقطوعة ميتة .. أي اسألة تانية ؟
عزت بشك: وليه مقولتليش أنا مهو حضرتك عارف اني بدور عليها ف كل مكان
فاروق: مـ مهو انا قولتلك عشـ عشان أدهم ميحسش بحاجة وكلنا كنا عايزين نطمن عليه الأول
عزت: وحضرتك دفنتها فين ؟ ف المدافن بتاعتنا ؟
فاروق بارتباك: آ.. أيوة
حياة غمضت عيونها بألم وحزن ع موت ندى بالطريقة دي ومتعرفش الايام اللي فاتت عدت عليها ازاي ولا كان بيحصلها ايه دعتلها ف سرها ودعت لإبنها يصبر قلبه

فاروق: بس اسمعوا ادهم ميعرفش اي حاجة غير أنها ماتت ف الحادثة ، بلاش يعرف الحقيقة عشان متحصلوش صدمة وينتكس
عزت: وهو كدة متصدمش يعني !
فاروق: انا قولت للدكتور وهو اللي اداني الاذن .. هو النهاردة هيخرج أن شاء الله ، يا ريت نقفل السيرة دي بقا

_ندى فضلت تشحت وتتسول مع حمو وبتعمل زي مبيقولها وهي مش فاهمة اللي بتعمله دة ايه نظراً أنها لسة طفلة متفهمش قوي ، وكانت دايماً تدعي ربنا أن ادهم يبقى كويس ...
وف يوم خدها حمو وكانت فاكرة أنها هتعمل زي ما حمو علمها .. طلب منها تستناه وشافت حمو بيمد ايده لواحد بس لقته بيحط ايده ف جيبه وبيسرق محفظته .. الراجل قاله مفيش فكه ومشاه ، وراح لندى
حمو: بصي جبت ايه
ندى: انت سرقته
حمو: لأ
ندى: لأ سرقته انا شوفتك ، انت متعرفش أن اللي بياخد حاجة مش بتاعته بيروح النار أدهم قاللي كدة
حمو: لأ
ندى: انت لازم ترجع المحفظة للراجل
حمو: لا مش هرجعها ، الزعيم ممكن يضربني
ندى: لا مش هيضربك شبارا طيب
حمو: لا مش شبارا دة زعيم تاني كبير أوي
ندى: انت لو مرجعتهاش انا مش هكلمك
حمو ببراءة: خلاص خلاص ، بس هرجعها ازاي ممكن يوديني للبوليس
ندى: متخافش هاتها
خدتها وراحت عند الراجل: استناني هنا ... عمو عمو المحفظة بتاعتك وقعت منك
الراجل: ايه !! ... دي فيها مرتب الشهر كله شكراً يا حبيبتي
وطلع من المحفظة شوية فكه واداهم لها
ندى: يلا بينا
حمو: انتي حلوة أوي يا ندى
ندى: وانت حلو وأدهم حلو وسليم حلو وسهى حلوة وكل الناس حلوة
حمو: لا انتي بس اللي حلوة
ندى حطت أيدها ع كتفه وضحكت ومشيو