.
.
.
.
.
حبوبة فرح كانت من يوم للتاني بتمشي تشوف حسام كيف.. لحدي ما جاء يوم واتصل فيه محمد زوج فاطمة على حسام
محمد : السلام عليكم حسام كيف حالك يا اخوي
حسام : وعليكم السلام الحمد لله كيف انتو ان شاء الله طيبين
محمد :لا لا نعمة الحمد لله كنت عايز اقول ليك انو وتين تجي تمتحن لانو خلاص ناس البدائل نازلين
حسام : الحمد لله.... تمام ان شاء الله بكلمها ح ينزلو متين
محمد : الاحد الجاي
حسام : خلاص خير يا اخوي الله يديك العافية
محمد : الله يعافيك ان شاء الله يلا ف امان الله مع السلامة
حسام : الله يسلمك.. وتين... وتين
وتين : نعم يا ابوي
حسام : جهزي شنطتك عشان ترجعي القضارف
وتين : ليه ف شنو يا ابوي ؟
حسام : امتحاناتك ولا نسيتيها انت 😂
وتين : الليييييلة متين 😳🙊
حسام : بعد بكرا... قاطعتو
وتين : لا لا يا ابوي ما تقول لي ح انزل بعد بكرا انا ما قريت
حسام : ههههههههههه انت اديني فرصة اتم كلامي ههههههههههه قصدي بعد بكرا تسافري عشان الامتحان الاحد الجاي
وتين : كتمت اسبوع بس 🙊
حسام :ههههههههههه اي يلا جهزي حاجاتك ولو ف شيء ناقص كلمي عمتك امشو سوا
وتين : حااضر يا ابوي + حبوبة ح ترجع معاي ؟
حسام : شوفيها اصلا ما اظن تقعد اكتر من كدا
وتين : طيب تمام اصلا جدو زاتو بكون اشتاق ليها 😉
حسام : يا بت انا ربيتك كدا بلاش قلة ادب ههههههههههه
وتين : قلة ادب برضو يا حسامي 😉
حسام : قومي يا وتين من قدامي قبل ما افلعك بالسبحة دي 😂
وتين : سمح يا حاج بس م تناديني وتقول عايز شاي وما ادري ايش خليك فاكر 😉😂
حسام : امشي من قدامي يا وتين ههههههههههه
وتين قامت جارية عشان لو كترتو عارفة ابوها 😂😂 المهم جهزت حاجاتها والنقصها مشت مع عمتها السوق وتموه....
مرو اليومين والليلة وتين راجعة القضارف مع حبوبة فرح ودعت ابوها وبقت توصي ف عماتها كانو هو ولدها ما ابوها وطلعت هي وحبوبة مع راجل عمتها وصلهم الميناء البري واستنى لحدي ما ركبو البص حتى رجع ( حسام بقى ما بقدر يسوق عربية او كدا وما كان بيتحرك كتير معظم وقتو ف السرير حتى الصلاة بقت بصعوبة وما كان هو الزول اللي بفوت صلاة ف المسجد بس القدر💔)
المهم ديلك ف البص يضحكو ويتونسو لحدي ما وصلو كان الظهر بأذن استقبلوهم مؤمن وجدو عبدو مشو البيت استحمو وصلو الظهر والسراير جاك زول حبوبة صحت العصرية كدا اما وتين لحدي قريب المغرب حتى صحت ( منتهية البت 😂) طبعا تاني ما جاها نوم ففضلت انها تقرأ احسن جابت شيتاتها وقعدت لحدي الساعة 2:30 خلصت اول مادة عاينت للساعة قالت انوم شوية عشان اقدر اقوم اصلي وشخخخ 😴
الساعة 8:00 حبوبة دخلت لوتين تشوفها مالها ما صحت للان لقتها رجل ف الشرق والتانية ف الغرب والايدين واحدة ف السرير والتانية ف الارض مجدوعة جدعة السنين هههههه... حبوبة صلحتها وقعدت جنبها وصحتها ( تخيلوا حبوبة بتصحيها كيف بتقرأ ليها الاخلاص والمعوذتين وآية الكرسي وتمسح على جسمها كلو وبكل الرِقة اللي ف الدنيا بتربت ع ايديها وتذكر اسمها لحدي ما تصحى... مش تقولو لي ليلى 😒)
وتين فتحت عيونها شافت حبوبة جنبها ابتسمت واتمغت كدي وقالت
وتين : صباح الفرح يا احلى فرح ف الدنيا
حبوبة فرح : صباحك رضا يا رُضانا 🥺💝
وتين :الساعة كم م تكون الصلاة فاتتني
حبوبة فرح : ههههههههههه الظهر قرب الساعة 8 😂
وتين قامت جارية ع الحمام ( اكرمكم الله) اتسوكت واتوضت وجري ع السجادة صلت الصبح وصلت الضحى واستغفرت مسافة عملت حاجاتها دي جاتها حنين
حنين : وتييييين 😍
وتين : حنيني اقسم شوووووق لمن غلط
حنين :بالاكتر والله حمدا لله ع السلامة
وتين :الله يسلمك وين امس ما شايفاك
حنين : والله جهزت ليكم الاكل واستنيتكم لمن جيتو سلمت على خالتي فرح لمن جيتك لقيتك نايمة وتاني مشيت ناس امي جيت قبل شوية نمت عندهم امس
وتين : ايوااا عشان كدا اها اخبارك شنو والجامعة
حنين : اقول شنو واخلي شنو تعب شديد هسي دايرة اسوي الفطور وطالعة
وتين : يا زولة ان شاء الله ربنا يعينك
وف قعدتهم دي جات حبوبة شايلة كبايتين شاي ليها و لوتين
حبوبة : يلا ي وتين الشاي عشان تصحصحي وتذاكري... هي حنين جيتي متين انت م شفتك والله يا بتي كيف اصبحتي وناس امك خليتيهم كيف ؟
حنين : هههه صباح النور يا خالتي الحمد كويسين... جيت قبل شوية
حبوبة : ما عارفاك والله كان اعمل ليك معانا شاي اقعدي النمشي اسوي واجيك
حنين : لا لا يا خالتي ما تتعبي روحك انا شربت طالعة اسوي الفطور عشان ماشة الجامعة
حبوبة : اها كان كدي خلاص الله يعينك يا بتي
حنين : اللهم آمين.. ومشت
مر الوقت و وتين بتقرأ وعدت الايام كدا لحدي الليلة اللي هو آخر يوم ف الامتحانات
____________
سند : يا ربي البت دي اعمل ليها شنو عشان تنتبه لي
ثريا : اجي يا ولدي بتتكلم براك ؟
سند : تعالي يا امي احكي ليك
ثريا : اها احكي ما تقلقني
سند : والله يا امي ف بت يومي بتجي مارة بالشارع دا و...
ثريا : ما تقول لي بتحبها
سند : صراحة يا امي اي بحبها 🙈
ثريا : وانا بتعرفها ؟ اتكلمت معاها ؟ بتعرف اهلها ؟
سند : ولا واحد من القلتيهم ديل بس عايني هسي مواعيدها ال بتجي فيها ارح معاي الشارع وشوفيها براك رأيك شنو
ثريا : ارح سمح وطلعو الشارع
__________________
ف نفس اللحظة وتين لفت بشارعها اللي بتمشي بيه كل يوم وهي شايلة الشيت بتاعها وتقرأ وما انتبهت ل سند وامو بعد شوية فتحت الشنطة دخلت الشيت وتابعت طريقها من غير م ترفع راسها
سند : اها يا امي رأيك شنو ؟
ثريا : عاد ما شاء الله يا ولدي البت شكلها مؤدبة ومحترمة بس دي بت ناس منو ؟
سند : والله ف يوم تابعتها ولقيت انها بنت حسام الدين احمد
ثريا : عاد يا ولدي عرفت تختار حسب ونسب ما شاء الله انا موافقة غايتو
سند : الحمد لله باس امو ع راسها وطلع ع شغلو
وتين طلعت من الامتحان رجعت البيت شالت شنطتها وسافرت لابوها تاني قعدو فترة اسبوعين ورجعو عشان رمضان داخل خلاص بس قبل رمضان باسبوع جو صحبات وتين ف البيت ( بالاصح زميلات وما عندهم احتكاك كتير ببعض) المهم هم كانو جيران ناس سند دخلوا لوتين وقالو
البنات : وتين والله نحن جاينك ف خير
وتين : اتفضلو قولو طوالي
البنات : بصراحة كدا سند ولد جيراننا دا قال شافك وعجبتيه وقال عايزك بالحلال
وتين : خير ان شاء الله اكلم امي وابوي واديكم خبر
البنات : امشي هسي كلميهم و تعالي ورينا قولي ليهم ولد ناس فلان الفلاني
وتين : طيب دقائق ومشت لامها كلمتها وهي كلمت حسام
حسام : وتين يا بتي انا موافق الناس ديل ما شاء الله كويسين وانا بعرفهم
وتين : طيب يا ابوي
حسام : اي خليني لو مت اموت وانا مطمئن عليك
وتين : خلاص يا ابوي انا موافقة مدام ناس كويسين وانت بتعرفهم وطلعت للبنات
وتين : خلاص خلوهو يحدد زمن عشان يجي لأبوي
البنات : تمام ان شاء الله وطلعو مشو
مرو كم يوم وجاء سند و معاه اهلو عشان يطلبو يد وتين ويحددو زمن الخطوبة... وتين جات وكانت طالعة قمرررر ما شاء الله عليها سلمت عليهم وسألها ابوها اها يا وتين موافقة سكتت ونزلت راسها تحت
حسام : هههههه السكوت علامة الرضا ان شاء الله ربنا يتم على خير
الكل : اللهم آمين
عمران ( ابو سند) : يا حسام نخلي العرسان يطلعو برا يتكلموا شوية ؟
حسام : ايوا طوالي ماف مشكلة وكلم وتين و عمران كلم سند وطلعو الاتنين برا ودي كانت اول مرة وتين تشوف سند وتتكلم معاه اتكلمو شوية وبعدين دخلوا جوا وعدّت الايام لحدي ما جاء........
يتبع
#اقتباس
قل للرياح تأتي كما تشاء فما عادت سُفننا تشتهي شيئاً 💚🎶
