منطق الحياة

من منطق الحياة

☆منطق الحياة☆

عيوني مفتحة عليه وهو يشرحلي....عمري انتي والله لتنقهرين مايريدني ماريده واصلا ع اساس امه متقبلتج شو اربع وعشرين ساعة شايله خشمها عبالك كاتله ابوها

حجيت بقهر....بس هو يحبني هسه انت اخوية وصديقي وحتى ماما تعرف بس هيه خالة مدري شبيها اصلا من جنت اروح يمهم تكَوللها لجولير لتحجين وياها ختولي

باوعلي وحط ايده على خده ڪَال....حبيبي عمرج 15سنة والطريق طوووويل ڪَدامج وتره هاي امه يعني تاليته يمشي بحجيها

ضحكت وضربته على ايده....يححح تخيل ام مرتك هيج

ضحك وحضني....اكتلها خلاص غير

حاضنته ومااعرف شسوي لخالة حتى تعاملني زين اصلا والله هذاك اليوم من ڪَالت لماما ضلت اسبوع متحاجيني هيه وبابا عائلتنا سبورت كلش رغم هنا عادات وتقاليد معروفة هالمحافظة والمنطقة بالذات رغم هذا بابا ميريد يحرمنا من اي شي

من عرفني احب محمد ضاج لان مڪَلتله بس ماستخدم اسلوب الضرب لان يعرف تربيته متضيع هباء ومستحيل امشي بدرب الغلط

ثواني معدودة وصوت الطلق هرج البيت هرج جامات المطبخ والصالة كلهن تفلشن وصياح ماما خبلني.......يبووووووو

سحبني من ايدي حيل ونزحف زحوف حسيته تماماً مثل اول يوم بسقوط النظام اسوأ يوم بحياتي
دفعني حيل ورا القنفه دموعي تنزل ومااسمع شي من صوته وهو يحاجيني بسبب صوت الطلق والتكسير

راد يروح لزمت ايده حيل وصحت....لتروح وتعوفني فدوة

نزلت دموعه وباسني من راسي صاح بصوت عالي ڪوه سمعته.....ماعوفج والله ارجع

اثناء ماكمل كلامه انرشك بالدم سحبته عليه خايفة ضل هو مصدوم وفاك حلڪه اشر على المكان الكان واڪف بيه همس....ابوية كتلو فيروزة

مسمعته بس من حركة شفافه عرفت قصده حضنته وتمسكت بيه حيل ودموعي تنزل اخاف احجي ويسمعوني رغم الصوت القوي بس خوفي اكبر

بعدني شوية عنه رجع باسني بين حاجبي وراح غمضت عيوني وسديت اذاني احاول ماسمع وانسى الشفته بس هيهات عشت بخوف مو طبيعي الثرية رادت توڪع على راسي ابتعدت بسرعة

شي صعب ينوصف وينشرح حسيت الدنيا افترت بيه ساعتين والصوت ماوڪف واني بين الصاحيه والفاقدة من وڪف الصوت ڪوه حركت نفسي نزعت الحجل خاف يسوي صوت وڪمت مثل وحدة سكرانه مابيه حيل

صارت جثة بابا ڪدامي مزرف من الطول للطول بالرصاص ملامح وجهه متبين متروسه نزلت بست ايده السليمة ودموعي تصب ڪلبي صار يوجعني حيل على ابوية

رحت للمطبخ صارت امي ڪبالي متمدده وتصيح بصوت خافت.....يمه بنيتي

تقربت يمها خليتها بحضني ومتحملت صرت ابجي بصوت....امي فدوة لعينج لتعوفيني مثل بابا

همست بصوت متقطع....فيروزتي يمه يمه روحي راح يكتلونج

هزيت راسي ودموعي تغسل دم وجها اباوعله واصيح.....لا ماما ماڪدر والله ماڪدر

شالت ايدها بالف ياحيل ومسحت خدي انغسل بدمها وڪالت....فيروزة يمه دڪاڪه ذول لاتحرڪيني بموتي

وڪعت ايد امي معلنة عن موتها واني ضميتها لصدري ووجهي دفنته بحضنها روحي راحت بموت جنتي.....يمه لاتعوفيني اااااااااه

تركتها واني اباوع لجثتها الهامده رحت ادور على اخوية وروحي من هالدنيا كلها مثل المخبلة واصيح بصوت ناصي باسمه شفته واڪع بصف الدرج ومتصاوب برجله

ركضت حضنته واڪول.....فدوة ڪوم لاتعوفني مثلهم

لزم كتفي المتصاوب واني مادري بيها من قهري ووجع ڪَلبي همس....سنديني فيروز خل نطلع خل نطلع من الباب الورا البيت

هزيت راسي وسندته بايدي الثانية ڪوه وصلنا للباب الخلفي باوعت ناس واڪفين ولازمين اسلحة دفعني حيل ووڪع عليه وڪعت على كتفي المتصاوب شاغت روحي

همس....فيروزة لتطلعين صوت اششش

☆يتبع☆