الطفلة المنبوذة (مُتوقف)

Part 2

#الطفلة_المنبوذة
البآرت الثاني

اهلاً يا أصدقائي شلونكم ، رُجعت الكم بِـ البآرت الثاني أعتذر علىٰ التأخير لّكن هٰذا البآرت طويل لِعيونكم ، اتمنىٰ لكم قراءة مُمتعة ..
____________________

~ في سنة الـ ٢٠٠٤ يوم ١ مِن شهر التاسِع ~

هناكَ طُفلة صَغيرة فِي مِثل هٰذا اليوم فتحتُ عيناها علىٰ نور الحَياة وصَرخت  بأعلىٰ صِوتُها لّكي تُثبت وجودِها علىٰ هذهِ الدُنيا ..

علياء: فتحت عيوني ولكَيت عمتي شايلة بنتي چنت نايمة وما ادري شني الصاير واسمع بَس ....

{ قبِل ألولادة بِـ ساعات قليلة }

كوثر: چنت نايمة وصافنة وبالي كله يم علياء وعلي شراح يصير بالفرخة وهيَ ما اجت للدنيا وانا صافنة ونايمة وحيدي بالحجرة ( الغرفة ) وشويا ودگ النقال ، انا ما اعرف اقرا رديت بسرعة لان محد يدگ علية بنص الليل ألا وصاير شي وانا من الخوف جاوبت

📞 الووو منو وياي ..
📞 الوو يمة انا علي حظري نفسچ انا جاي عليچ ، علياء عدها ولادة و جاي تصرخ من الوجع ..
📞 هاا يمة وليدي ايي ايي گايمة رايحة اوگف بالباب انتظركم ..
📞 ايي يمة بسرعة انا هل جاي ..

ورا ما دگ علية علي بسرعة لبست شيلتي وعباتي وطلعت بالباب اجوا بالسيارة صعديت يم علياء وهيَ تصرخ وانا اصلي علىٰ محمد واهديها

وصلنا للمستشفىٰ دخلوها الغرفة العمليات وبس انا دخلت وياها وعلي بقىٰ واگف بالمُمر وهايَ علياء خبصت المستشفىٰ بصريخها وهيَ تصرخ بصوت يمة بنتي راح تموت و عمة لحگيني ما تدري بنفسها وتصرخ بنتي وعمتي لحد ما جابت الفرخة ( الطفلة ) بسلامة واخذتها الممرضة تغسلها وتبدلها ..

الممرضة: فدوة لهل جمال والخدود طالعة علىٰ امها كيكة تفضلي حجية هذهِ بنيتكم تتربىٰ بعزكم ان شاء الله ..

كوثر: جابت الفرخة الممرضة وشلتها بحظني واشوفها اية من الجمال ياسبحان الخالقها نسخه من امها وهايَ الممرضة ما صلت علىٰ النبي هسة تطگها بعين يمة اعوذ بالله اللهم صلِ علىٰ محمد وآل محمد ، الله يطرد العيون والحسد والله يحفظچ يا بعد چبدي وحفيدتي الحليوة ، ( وهي تحچي بينها وبين الطفلة وتبوس بيها ) ..

ردت اگعد علياء ترضع الفرخة بَس گلت لا خل عيفها تگعد وحدها مادام نايمة وحفيدتي نايمة من هسة هادئة ما ألها حس ( صوت ) اباوع الها وچان ورا دقايق اسمع عياط علي برا الغرفة بالممر گمت انطيت الفرخة لأمها گعدت وطلعت اشوف شني صاير ..

علي: ورا ما خابرت علىٰ امي و گلت الها علياء عدها ولادة انا بين الفرحان والخايف  فرحان لأن وليدي راح يجي للدنيا وبين الخايف علىٰ علياء لان خبصت الامة بصريخها والحجية منا تهديها وهيَ بس تصرخ وصلنا للمستشفى بسرعة خذوها الغرفة العمليات وانا بقيت انتظر برا وادعي من الله تجيب بالسلامة بقيت اتمشى بالمُمر، يا رايح يا جاي شويا ودگ النقال شفتة عباس اخوي رديت ..