حياتي وهم 💔

الحلقه 🍓8

#حياتي_وهم💔 8
كاتبه
《👑اليتا Aletta 👑》
_______________________☆
نضال: يا احمد خلاص يا راجل توا اتموت في جرت البنت هذي
احمد:متت من يوم قرو الفاتحه
نضال:مانسحبكش  ضعيف هكي معقوله بنت ادير فيك هكي هضا مش صاحبي اللي نعرفه
احمد:كسرتني لما تزوجت حد  ثاني غيري وخلاته يلمسها
نضال:طزز فيها ماتستاهل اللي ادير فيه في  روحك هكي
احمد:ههههه مش ح نخليها تعدي بالساهل ولا انخليها ترتح ولا تتمنى في حياتها
نضال:شن ناوي ادير
احمد:حتشوف بعينك😏
________________
ميس:وين كنت طالع من الصبح
جواد: نطلع وين مانبي وامتى مانبي وانتي شن علاقتك🤨
ميس:بس
جواد:تنرفز ولصقها في الساس😡وقعد يخبط على ساس بقوها
وميس:خافة ءءء انا بس
جواد:😡مش كان تزوجتك يعني خلاص انتي عارفه انتي هنا عليش
ميس:دموعها بدن ينزلن💔🔥
جواد:زاد ضغط على يدها دموع هذين فكيني منهن  انا متأكد انتي مش مجبوره على اي حاجه وافقتي على زواج هضا بأرادتك عشان خاطر الفلوس عشان انتي وهلك طماعين😡من يوم ما عرفتك ماشفتش يوم كويس اخر مره انقولها خليكي في حالك وخليني في حالي وتأخدي راحتك احسن ما اتشوفي وجه الثاني فااااهمه وطلع وخبط الباب
ميس:يدها توجع فيها وحست بالكلام اللي سمعته كيف الساكين....يعني هوا قاعد يحمل فية مسؤولية اللى صار يعني نحنا في عيونه نجرو في جرت الفلوس.... ليش يا جدي درت فيا هكي🔥💔
.
جواد:ركب سياره وهدا شويه بعدها حس روحه زودها على ميس....قعد يخبط في دومانه ليش تفششت فيها....بعد جاته رساله مكتوبه فيها《حبيبي رد عليا وللهي مش قصدي اندر هكي بس خفت هذكي تخدك مني انحبك انا مستحيل انخلي اي حد يخدك مني》
.
ميس:قعدت في مكنها وتبكي......كلكم زي بعضكم محد يستاهل انا شنو توقعت يعاملني كويس💔 مسحت دمعوها ومشت صقمت ميك اب ابتاعها وطلعت
________________
وسن كانت في سريرها وطول اليل واعيه بعد ما سمعت عزو يحكي في تلفون ناضت ونزلت
وسن:ماءءءء....عزو فيش ادير هنا
عزو:شنو فيش اندير هنا جاي لخالتي
وسن:خشت للمطبخ محوتك ما مسكه روحه حطت كبيت العصير على طول خلاص معش نقدر نمسك روحي عزو امس سمعتك تحكي على تلفون شن قصت سياره المكسوره
عزو:ملكش علاقه في حاجات مزلتي صغيره عليهن
وسن:حطت يدها في وصتها وين صغيره ماتشفش انت ولا اعمى
عزو:اكبر دليل انك مزلتي صغيره حتى عقلك
وسن:امشي حل مافيش حد اعقل مني😌...تبي تحكلي ولا نمشي نحكي لخالتي
عزو:والله تهديدي فيا🤨
وسن قربت منه اها شن رايك....هي احكلي
عزو:بهي تو نحكي بس مش توا
وسن:تعرف لو نعرف انك تضحك عليا هتبئه فضحتك بجلاجل🙃
شادي:خش وسن ديرلنا قهوا
وسن:فيش اتشوف فيه خدامتك انا مالا
شادي:مشي بلا دوا زياده
وسن:😒وعدت
_______________
احمد:درس سيارته قدام حوش جواد ونزل
هيثم:وين معش معش شفنك ولا رنت حتى العرس ما جيت
احمد:غير جاني شغل وطريت انسافر اهو جيت عشان انبرك للعرس مزلنا فيها😏
هيثم:خش علما جا جواد
احمد:شويه بس عندي مكلمه ضروريه انديرها بعد انجي
هيثم:خود راحتك وعدا سيبه
.
ميس:كانت في الحمام سمعت صوت تلفونها خدته لقت احمد يرن قعدت لحضه اتبحت في الاسم💔... بعد سكرت وحطاته في الحظر
.
احمد:مااشي يا ميس توا انوريك مستحيل انخليك لا انتي ولا هوا تتهنو وخش للحوش
جواد:وصل للحوش وخش للمربوعه..اووو
احمد:مبروك
جواد:ألله بارك فيك
احمد:شنجو
جواد:مشي حال وين معش شفتك من يوم اللي تلقينا فيه بصدفه
احمد:كان عندي شغل بس توا فضلك ماتخفش
.
.
.
.
        روآيَـــــآتٌ👑آلَــــيَتٌــآ Aleta👑
               👑آلَــــيَتٌــآ Aleta👑
.
.
.
.
ميس:نزلت
رباب :الف مبروووك يا عروستنا
ميس:الله يبارك فيك
جهاد:وخش ومسك كوره في يده ودنيتا كلها تراب🙂اووو مرات ابو عضلات
ميس:مسكت ضحكتها
رباب:شنو الحاله هذي انت ....طبعن انت تلبز دبشك وامك تغسلك😡
جهاد:كنت نعلب كوره واندير في خطط ونطربق في خطو لوح جابه ليا مهاب
رباب:هضا فيش فالح امشي اكتب واجبك يلاااا قدامي
جهاد:انشالله اتموت ابلة علوم
رباب:جهاااااد قدامي😡
جهاد:بهيي غير نعطي العيال لبرا ميه
رباب:امشي لي مي اتصبلك في المطبخ
جهاد:به وماشه للمطبخ..مي ترا صلبي ميه للعيال شارع
مي:كاس قدامك صب بروحك
جهاد:صبلي انتي شن بتخسري يد ولا كرع🙄
مي:عشان كلام هضا مفيش هي😒
ميس:خشت انا تو انصبلك
جهاد:🙂شكرا
مي:يعني على ادب اللي نزل فجأة هيا اطلع واقلب وجهك
جهاد:ننننننني وطلع
ميس:نحسبك في القهوا معايه
مي:ياريت وشن رايك نشروبها في جنان
ميس:عادي  مفيش اي منع
و درن قهوا وطلعن وهنا يشربن ميس شافت احمد برا معاه جواد خافة يحكيله حاجه ويفهمها غلط اكثر ما هوا وخد عليها فكره غلط💔
احمد بحت فيها وابتسم جواد شاف نضرات احمد في اتجها ميس شعلت فيه نار وميس طلعت لفوق جري من الخوف
احمد:تمام يا برو تبي احاجه
جواد:لا سلامتك وركب عند ميس ونار طالعه من عيونه 🔥وهيا فوق خايفه
جواد:خش دار انتي كيف تطلعي للجنان هكي😡
ميس:اءءء انا مكنتش ن ن نعرف
جواد:انتي انويه تموتي على يدي يعني
ميس:ترعش كلها على بعضها
جواد:اطلعي من قدامي خير ما وخبط الباب بيده
.
امال:كنه خوكي يعيط على البنت مزالت عروس
مي:اصلان معاق هضا كله عشان طلعت للجنان بس
ساحر:تستاهل 😏
هدى:اتفنص فيها
ساحر: تقلب في عيونها
.
ميس:طلعت من دار وهيا ترعش من الخوف  فجأة تتعكف في الدروج  رجلها تلتوه..ااااي
جواد:سمع صوتها وهيا اتعيط
ميس:قمعزت على دروج مسكه رجلها وتبكي..انا شن درت في حياتي ياربي وتتالم💔
جواد:خوف واضح عليه.....شنوفي
ميس:متبش اترد عليه
جواد:قرب يلمس لها فيها معقوله متشوفي قدامك
ميس:كانت تبكي بس مش من الالم كانت تبكي من وجع قلبها....💔🔥
جواد:مسك رجلها وشوف فيها
ميس:مع كل لمسه له اتحس شعور غريب...سحبت رجلها بشويه وجت تبي اتنوض خلاص توا نحاول انوض مافيا شي صبت بلغصب عنها و الالم  باين من عيونها
جواد: كيف تبي تنزلي وانتي هكي ما تنرفزنيش😡
ميس: نقدر نمشي متكبرش الموضوع
جواد:ماتسكريش راسك شوفي حالتك مش قادره تمشي
ميس:نقدر نمشي ااه
جواد:عليك تسكيرت راس شالها بين يديه
ميس:😳
جواد:اشوف لعيونها وهيا بين يديه
ميس:نزلني نقدر نمشي
جواد:مردش عليها ونزل بيها لوطا وحطها على صلون
بشويه وكان قريب منها واجد وجه في وجها وعيونهم في عيون بعضهم🔥❤
ميس:قلبها يدق بقوه وعيونها فيه
جواد:كاين يبحت في منظرها لخلا ينسى كل شي بس مي وساحر قطعوهم
مي:بحتات في ساحر رتي خويه واعر صح بس معمراته حنون
ساحر:حاجه كبيره يعني
مي:قلبت عيونها 😒ومشتلهم كنها سمعت صوتها وهيا اتعيط
جواد:تعكفت من فوق
مي:انتي كويسه
جواد:مي عدي جبيلي ثلج بسرعه
مي:هي وعدت جري ومدتله
جواد:طبس يدلك كراعه بثلج
ميس:غمضت عيونها وخدت نفس...انا توا احسن
جواد:فطن لروحه وبعد من عليها وغطاها رجلها بالقفطان ..افطني لروحك وما تمشيش عليها واجد انا طالع وعده سيبها
ميس:غمضت عيونها كأنها ما تبيش تنسى شكله وريحته وتفاصيله
جواد:طلع وهوا مش فاهم شن صيرله فجأه🔥
_____________
ثاني يوم☀️
وسن قاعده اتراجي في حسام بروحه عشان تمشي للجامعه وقفت جنب باب سياره هضومه جرانه جدد شكلهم
زهر:اتعيط وسسن🙂
وسن:اتنط فجعتيني يا حقيره
زهر:وين كان سرحان الحلو
وسن:انشوف في جران جدد
زهر: منو هضا اللي انزل في الحاجات ولدهم شكله
وسن:ا مش على أساس اتحبي ولد خالتي😉ليش اتبحتي فيه
زهر:شنو يعني اصلان هوا مش معبرني...عينها جت في عينه وهو ابتسملها
زهر:فتحت فمها😲....من هاذا يا هاذا ابتسمه من هو ادبتني
وسن:تضحك عليها😂😂
______________
جواد:احمممم ميس
ميس:قمعزت على سرير وعيونها في تلفون نعم
جواد:شن حاسه رجلك اليوم احسن
ميس:احسن شوي
جواد:هاكي هضا كريم ادهني بيه كويس
ميس:مافيش داعي
جواد:نعرف انها توجع فيكي وانتي اتعاندي
ميس:بصوت واطي انعاند باهي
جواد:قمعز جنبها ورفع قفطان شويه
ميس:فيش ادير انت😳
جواد:بدون مايرد عليها وحط شويه من الكريم في يده وبدا يدهلها
ميس:كل لمسة من ايده تشعل فيها في قلبها نار🔥في سرها...واتبحت فيه كيف نبي نمنع روحي منحبكش وانت طول الوقت قدامي💔وقطعت تفكيرها وتكلمت...خلااص جواد
جواد:مزال شوفي كيف زرقه
ميس:سارحه في كل تفاصيله شعره عيونه ولحيته وريحته🔥
جواد:رفع عيونه لقاها غارقه فيه بعدها هيا فطنت ابتسمت علخفيف وهو سرحه فيها في ابتسمتها بعد فطن روحه وصبه
ميس:شكرا
جواد:ابتسم وحط كريم على كمدينو وطلع
.
.
.
.
        روآيَـــــآتٌ👑آلَــــيَتٌــآ Aleta👑
               👑آلَــــيَتٌــآ Aleta👑
.
.
.
.
مهاب:رن على شادي شنجوك يا نصي ليك غيبه بصغار صغارها😂😂😂
شادي: زي ما تشوف عندي شغل والهانم وسن ديرتني صواقها الخاص
مهاب:اللي يسمع يصدق😏
شادي:اكييييدد😏
مهاب:غير بشويا متشوفش روحك علفاضي😒
شادي:اقعد زي احسن ما انت حسدني في كل شي😉
مهاب:على شنو نحسدك🤓
شادي:بهي شنتبي😂
مهاب:طول عمرك شاطر هضا عليش مسميك نصي لانك اتكملني في كل شي🙂😂
شادي:تعرف توا جوعتني وخطري في نص دحي بتن  شن تبي خلاصني🙂
مهاب:.....
________________
وسن:وهيا سارحه واتفكر فجأه خبطت..وووعلياا
هيثم:كنك
وسن:كله من سيارتك😠
هيثم:رفع حاجبه🤨انتي اللي خبطتي فيها مش هيا خبطت فيك
مي:جت وسن شنوفي
هيثم:تعرفيها مختله هذي
وسن:انت مختل هضا لكاين نقصني في عقاب اليوم
مي:هذي وسن اخت ميس توام
هيثم:ركز شويه انتي اللي خليتي جهاد ادير مقلب في ولد خالتك
وسن:يب انا🙂
هيثم:بحت فيها من جدك انتي اتقولي فيها بدال ما تتحشمي من يلي درته
وسن:معندي ليش نتحشم انا غير خديت حقي منه بس
مي:حست جو بدا يتكهرب بنهم
هيثم:اتخلي عيل صغير اديرها
وسن:يعني انا لنطلع بقفطاني وانديره فيه😒
هيثم:اوزني كلامك
وسن:بميزان كهربائي او ميزان حساس🙂
هيثم:صبر يارب
وسن:اجمعين 🙂هيا باي مانعندش وقت انضيعه معاك باي حبي
مي:باي
هيثم:تنرفز😤
وسن:عدت وبدت اتبعد من عليهم وفي وحدين صبو قدمها قلولها
شب: انتي تعرفي عزو&&
وسن:اها عليش وانتو سن تبو مني
شب:انتي اخته
وسن: عليش الاسئله هذينا
شب:بحت في وسن من فوق لي لوطه وحك لحيته في حساب بينا
وسن:😳
_________________
يتبع
انا توا بديت في الحلقه 9 والاحذاث فيها تبدا توضح عندكم في روايه🙂 ما تنسوش تفاعل رافوعو من معنوياتي
كاتبه
《🔥اليتا Aletta 🔥 》
هيا بسلامه🍓
اي حد يبي نزل روياتي عادي بس ينزلآ باسمي