حياتي وهم 💔

الحلقه🍓16

#حياتي_وهم💔16
الكاتبه
《👑اليتا Aletta 👑》
_______________________☆
هيثم:ماسك اعصابه انتي مصدقه روحك واجد
وسن:وين تيليفوني اييي اكيد طاح مني لما البارد فجعني🤦🏻‍♀️ وعدت تاخده
سحر:انا واثقه انك اعترفتلها بنفس الطريقه ياللي اعترفتلي بيها بس هيا مش كيفي صح
هيثم:قرب وابتسم هيا مش كيفك و ولا يوم حتقعد كيفك
وسن: انصدمت و دموعها نزلو طول💔
وعدت خشت تجري للدار 💔🔥
هيثم:عشان انتي متسويش نصها ولا حتى ظفر واحد منها وعدا و سيبها
سحر:😭😭
_______________
جواد:ميس انتي كويسه
ميس:مصدومه😳من الحادث اللي صار قدامهم
جواد:ميس ردي عليا وحط يده على يدها
ميس:بحتت فيه....جواد السياره خبطت الناس وهربت كيف يقدر يدير هكي
جواد:اهدي انتي توا مش كويس لك و الناس ألتمت على السياره و السياره كاين فيها راجل ومره وبيبي صغير💔 وحالتهم خطيره
جواد:ميس هيا خلينا انعدو
ميس:مش حنتحركو من هنا الا لما نتأكدو شن صار معاهم
جواد:ميس مش عناد هيا شوفي حالتك من صدمه .. أهو جن سيارات الإسعاف
___________
وسن:مسحت دمعوها ومشت للمطبخ وشافت هيثم في المطبخ
هيثم:كنت ندور فيك
وسن:كنت في الحمام عيونها حمر 💔
هيثم:قرب منها كنهن عيونك
وسن:ما كنهم شي جت تبي تطلع
جواد:مسكها....وسن آخر مره نسألك كنك
وسن:صابون خش في عيوني
جواد:قرب منها متأكده
وسن:متأكد وطلعت💔
هيثم:بحت فيها وحس في حاجه غلط
__________
هدى:شن صار معاك طولت ؟!!
مجهول:عرفت من هما العيله بس في مشكله
هدى:شنو هالمشكله
مجهول:البنت هيا وحده من توام كناينكم
هدى:متأكد😳😳
مجهول:متأكد في الموضوع هضا .. بس اي وحده بالزبط مش عارف
هدى:صكرت وهيا مصدومه بنت اختها جنبها طول الوقت وهيا مش عارفه.....قمعزت على السرير وهيا مصدومه.....يارب عطيني الصبر عشان نعرف كيف نتصرف....كيف نبي انقول للفرج ولا للبنات
____________
في اليل🌙
.
الليله هذي مشت على وسن وهيا تبكي بدون ما يحس هيثم واتفكر في الكلام يلي سمعاته💔
.
و مشت على سحر يلي مبطلتش بكي من لما هيثم قاللها أن هوا يحب وسن 💔وخطيبها يلي طول الوقت يرن وهيا م تردش و في النهايه طفت التيلييفون
.
و مشت على هدى وهيا اتفكر ميس و لا وسن بنت اختها و تأنيب الضمير اللي معذبها واتفكر كيف دارت هكي على اسباب ماتستحقش ادير في بنت اختها.......بس الحقد والغيرة سيطرن عليها وقتها بسبب عيلتها عشان باتها اتزوج على امها و بعد جت اختها وخدت اهتمام باتها و امها يلي كانت اتقارن فيها بيها وتعاير فيها من و هيا صغيره ولما حبت شخص هوا حب اختها وتزوجها
.
و في الليله هذي بالذات ... مي كانت فرحانه عشان طلع شادي يحبها ❤واتفكر اذا كان يبي يخطبها او لا
.
و مشت على ميس وهيا اتفكر في الحاذث يلي صار قدامها ومعش عرفت ترقد و جواد حس عليها و خداها في حضنه لين رقدت❤
.
.
.
.
          روآيَـــــآتٌ👑آلَــــيَتٌــآ Aleta👑
               👑آلَــــيَتٌــآ Aleta👑
.
.
.
.
ثاني يوم☀️
وسن:ناضت وراسها قريب ينفجر من الصداع وعيونها حمر من البكي💔....نزلت وهيا اتحس في راسها....مي
مي:نعم
وسن: عندك بنادول راسي صداع بكل
هيثم: كاين مروح من التمرين بحت فيها لقا عيونها حمر
مي:توا تلقيه في اول درج في المطبخ
وسن:خشت للمطبخ و جت عند الدروج وحست بدوخه مسكت فالرخامه
هيثم:قرب منها ومسكها انتي كويسه
وسن:حولت يده وفتحت الدرج وقعدت اتفتش فيه
هيثم:نحكي معاكي انا
وسن:ماتبيش اترد عليه
هيثم:خبط على الرخامه عنجد عنادك
وسن:مش عناد بس مانبيش نرد على خوفك المزيف
هيثم:رفع حاجبه 🤨 مزيف ؟!!
وسن:خدت الدواء وشربت ميه وطلعت
هيثم:صكر يده بقوه
______________
ميس:جواد جواد
جواد:نعم
ميس:هيا انا واتيه خلينا نمشو
جواد:شن يبي يطلع الحلو اللي جاي❤
ميس:انا احساسي ولد
جواد:هي باهي خلينا نمشو ..
وصلو للمستشفى
الممرضه نادت عليهم وخشو و الدكتوره بدت تكشف على ميس وطلبت كشف عام لها وللجنين
جواد:مافيش حاجه
الدكتوره:لا مافيه شي غير للاحتياط و اكيد توا تبو تعرفو شنو جنس البيبي
جواد:بحت في ميس ❤
الدكتوره:تفضلي معايه بعد اذنك استاذ جواد وحطت الجهاز على ميس وعرفت جنس الجنين وطلعت
ميس: مسحت السائل وصقمت روحها ومشت عند جواد
جواد:شنو
ميس:مازالت ما قالت
الدكتوره:خشت عليهم مبروك ولد ..
ميس:فرحت وحطت يدها على بطنها❤
جواد:ابستم وطلعو وركبو السياره وجواد حط يده على بطن ميس❤
_______________
وسن:حطت دبشها في الشنطه وحطتها قدام هيثم
هيثم:وسن عليش الشنطة 😳
وسن:نبي نمشي للحوش هلي انبات كم يوم
هيثم:مسك يدها وسن لازم نحكو وانتي من امس مش تمام
وسن:به وعدت ركبت في السياره
.
نجو باختصار بعد مرور يومين
وسن مازالت ماتبيش اتروح ومش طايقه خلقته و طول الوقت اتفكر في الكلام يلي سمعاته
وهيثم طول هاليومين كاين على اعصابه وغياب وسن اكدله قديش يحبها ويموت فيها ويرجى امتى يروح بيها
سلوى:شن في عشان لكي يومين بايته هنا
وسن:سارحه
سلوى:وسننن
وسن:هاااا
سلوى:مش عاجبتيني في حاجه وانا متأكدة
وسن:صبت وخشت للمطلخ
_____________
شادي: نزل ودق على باب الحوش
مي:كانت حاطه سماعات في وذانها و فتحت الباب انصدمت😳لقت شادي قدامها
شادي:مهاب قاعد
مي: في سرها 《اخ اخ امك فيش كانت متوحمه فيك زف》...ااء أها قاعد وعدت تجري
شادي:ابتسم
مي:خشت دارها وقلبها يدق شنو ه الجمال ونطت على سريرها واتعيط
هيثم:نزل وكاين يلبس في ساعته...بعدها شاف شادي...اووو نسيب
شادي:اهلين
جهيثم:سلم عليه جاي اتشوف مهاب
شادي:اها اكيده راقد المخمج
هيثم:راقد خش نوضه مش غريب انت😂
شادي:باهي امتى تاخذها المصيبه يلي عندنا قريب نرتكب فيها جريمه شكلها راقيتلها منك وتفشش فيا😂
هيثم:توا كنت ماشي عندكم تبي حاجه نبي نمشي انجيبها😂
شادي:خود راحتك باهي عشان حتنشفلك ريقك😂
هيثم:طلع وهوا يضحك
شادي:ركب عند مهاب فتح الباب وزقب عليه نوض يا ولد نوض الظهر اذن
مهاب:ما تخلوش الواحد يعرف يرقد نم
شادي:نوض بلا طروح يلا عندي لك خبر
مهاب:عزق عليه مخده ولابس تشرت  وقعد يسقم في شعره...شنو يلي تبي تحكي فيه
شادي:رغد
مهاب:آخ كبدتي🤤
شادي:نحكي جد أنا
مهاب:اوووف لازم اتخرب ام لحظه
شادي:رغد انخطبت امس و دزو كروت الفرح
مهاب:😳💔
______________
سلوى:راجلك برا يدق
وسن:تاكل واتغمس في البشكوط في شاهي😒...قوليله وسن راقده ولا كلمي بابا يطلعله يوزعه و يقوله خليها تبات كم يوم اخره
سلوى:توا انتي وميس دايراتها بالدور يلي تتعارك مع راجلها ماتابش اتروح
وسن:تبي تمشي اتقولي للبابا ولا لا
سلوى:بابا مش قاعد عدا هوا وجدي
هيثم:يدق دق دق علاء الدين يلبي الطلبات
سلوى:شكله انهبل الباب قريب ينكسر😂اطلعيله
وسن:ينكسرن يديه
هيثم:سلطان حل لان ابوابك جابتلك باكو الوان
سلوى:ميته ضحك عليهم😂
هيثم:افتح يا سمسم ابواااابك
وسن:افتحيله فضحتنا🤦🏻‍♀️
سلوى:افتحيله انتي راجلك
هيثم:يا نمله فيش اديري جبتلك معايه تمرتين
وسن: طلعت وفتحت الباب بالقوه شن تبي فضحتنا
هيثم:نبيك اتروحي معايه
وسن:حطت يدها في وصطها .....عليش نروح شن تبي فيا مش عندك حاجه اهم مني 
هيثم:اي صح🙄عندي حاجات واجد اهم منك بس نبيك تروحي
وسن:وانا ما نبيش انروح
هيثم:عناد هيا😏
وسن:اها عناد😒
سلوى:طلعت معاها حاجات وسن
هيثم:تعبناكي معانه
سلوى:متقولش هكي
وسن:لحظه !! انتي امتي لحقتي اتلميهن حاجاتي
سلوى:هنا كانن ملمومات بروحن🙄
وسن:والله انوريك
هيثم:مسكها من يدها و ركبها السياره وهوا يضحك
وسن:متنرفزه
هيثم:عزق عليها وشاح
وسن:مانبيش انروح معاك
هيثم:يضحك على منظرها وهيا محروقه ... كارهاته و كان تلقى تقتله
وسن: تفتح في الباب...عليش مصكره افتح نبي ننزل نبي انبات في حوش بابا
هيثم:لا لا مافيش بيات
وسن:وانت شن دخلك نبات ولا لا هضا حوش بابا نبات غصب عنك
هيثم:بتي يوم زياده سادك
وسن:نفخت باهي افتح الروشن
هيثم:لا بالك اتنطي و طيحي روحك😂
وسن:مش مستغنيه على روحي كان بنطيح انطيحك انت
هيثم:يسوق ويضحك لا لا يا مجرمه تبي تقتليني
وسن:كان نلقى بس
هيثم:حس الكلام بجديات بس مدورش
وسن:اوووف شوف منظري يلي يشوفني يضحك عليا
هيثم:سياره مظلمه محد حيشوفك😂😂
وسن:في سرها《توا انوريه🔥》
هيثم:طول الطريق يضحك عليها وهيا مش معدله عليه
.
.
.
.
          روآيَـــــآتٌ👑آلَــــيَتٌــآ Aleta👑
               👑آلَــــيَتٌــآ Aleta👑
.
.
.
.
مهاب:بحت في المرايه عادي خليها تعيش حياتها ويبخ في عطر..... آخ شكلي انا مطول عليما نطيح على وجهي اخره...بعدها بحت فيه توا بزمتك تبي تلقى واحد أحسن مني في جمالي
شادي:تي أنت الكناسه احلا منك😂
مهاب:ضربه حتى بالمجامله يا معفن
شادي:انا اقول الحقيقه لا استطيع الكذب😂
مهاب:لا يا شيخ 😂
شادي:هي تبي حاجه نبي نمشي
مهاب:لا ما نبي شي من وجهك المنحوس
شادي:اووو عليك حقد يا ..وجهك هي 😂وطلع
مي:كانت راكبه للدارها شافت شادي شرقت من العصير تحسابه عدا
شادي:ضحك عليها 😂 بالشويه بس راه تنخنقي
مي:فاتاته وتبي تمشي وهيا منحرجه
شادي:اء مي
مي:بصوت واطي آخ اسمي يقول فيه سمح 🤤....نعم يا عيوني
شادي:ضحك سلم عيونك
مي:فيش نخرط انا🤦🏻‍♀️
شادي:ناديلي ميس كان قاعده
مي:هي وعدت تجري
شادي:ابتسم ونزل يرجى في ميس
مي:ميس شادي يرجى فيك قال يبيك
ميس:  هي وصبت طلعتله
شادي:اووو الدبه😂
ميس:ضرباته على كتفه بطل براده
شادي:مازلتي مرخيه😂
________________
هيثم:خشي انتي و أنا توا انخشش السيارة في الكراج وانجي نتفاهمو في اللي اديري فيه
وسن:خشت بدون ما اترد عليه
هيثم:حس ان فيها حاجه من طريقة كلامها وتصرفاتها المتغيره
وسن:خشت ولقت خوتها قدامها
شادي:و أخيرا روحتي يا همي حسيتك هم ونزل من عليا🙂
ميس:شاااادي
شادي:اهدي يا حلوه مش كويس للبيبي توا يطلع عصبي......استني شن كنت نبي انقول🤔...هااا تذكرت .. ميس فيه موضوع هكي نبيكي تحكي عليه للجواد
وسن:ميس لازم تعرفيه مني
شادي:انا اللي لازم نحكي الموضوع شوري مش شورك
وسن:كان ما كحيتش أنا مرات انموت
شادي:تفتحي فمك انكسره لكي
وسن:شاااادي طاح على وجه وحب حي كان تعرفي من😌
شادي:ولله انوريك
وسن:شن تقدر ادير هااا
ميس:اتبحت فيهم وتضحك...بهي شن دخل جواد
شادي:ما نبي
هيثم:خش مازلت هنا ؟! كيف ما عرفتش اتنوضه
شادي:ناض وسيبته يرقص فوق من الفرح 😂عشان شافني في حلمه
هيثم:ضحك 😂باهي تبي حاجه قبل ما نركب
شادي:لا لا طير نبي نحكى مع خواتي
هيثم:خود راحتك 😂وعدا
شادي:بحت في ميس خلينا في موضوعنا المهم نبي نخطب مي
ميس:😳مي سلفتي
_____________
بعد ما شادي حكى مع ميس و قاللها على كل شي روح
وسن:خشت للمطبخ تشرب ميه سمعت صوت في الجنان قربت ... كاين هيثم يحكي و هوا معصب 🤨بحتت لقت سحر .. و قعدت اتبحت فيهم
هيثم:بعصبيه افهمي مافيش شي يربطنا افهمي
سحر:بس انا انحبك ومتأكدة أنك حتى انت اتحبني
هيثم:بعصبيه انا انحب مراااتي ونموت فيها فهمتي ولا لا
سحر:مسكت يده وتبكي حرام عليك اتعذب فيا
وسن:معش قادرة 💔 قربت منهم وفكت يد سحر بقوه وبصوت عالي افهمي مااا يييبكش
______________
يتبع
هيا وروني التفاعل و رأيكم عشان نعرف كيف انقيم روحي و مانبيش ملصقات مزال 4 حلقات و الروايه تكمل🔥
وبعدها ناخد رست طويل مدته شهر أو شهرين و توا انعوضكم بعدها بروايه اقوى من اي روايه ليا ❤

الكاتبه
《🔥اليتا Aletta 🔥》
هيا مع السلامه
انحبكم❤
ممنوع تنزيل رواياتي من دون اسمي ..