#ولدتني_عاهرة
الجزء 5
تاني يوم مشيت دوامي و بمجرد ما خشيت قالي المحامي ح نكلفك بقضيه و أنا واثق فيك و في قدرتك في الترافع عليها .. كانت صدمة لاني من المفترض اني قاعده نتدرب عنده .. و فرحة في الوقت نفسه و لازم نتحدى فيها نفسي و ننجح و نجاحي هو الي ح يوصلني نوصل للقضيه الي مسجون عليها بابا ...
كنت كل يوم يزيد حماسي .. يزيد إصراري ... تزيد قوتي بالرغم ضعفي ......
و في يوم عزمتنا عمتي ع العشاء ... لبست و جهزت نفسي و جت عمتي رفعتنا انا و حناي ... و اول ما وصلنا خشيت معاهم للمطبخ ...
حوش عمتي بريحة الوشق .. بالأثاث الي ليه اكثر من 30 سنه .. فيه كمية حنان منتشره حتى في الجدران ..
فيه حب تحسه يغمرك من اول ما تخش الحوش ... فيه ريحة منبعثه منه من زمان مميزة و كأن الريحه هادي عطاء و حب عمتي لي بيتها و ابناءها ...
________
كالعاده نحس بغربه .. نحس بكسرة خاطر .. دمعتي في عيني ..
وين عيلتي !!
وين خوتي !!
وين بابا !!
ويني أنا ؟؟ وين فرحتي ؟؟ وين طفولتي ؟؟ ويني أنا ويني ؟؟
بنات عمتي يحوسوا في الحوش .. بوهم يناديهم .. شكون الي سقى الغرس اليوم و خلى الجنان هكي ميه ؟؟
ايمان و أمل يبصروا مع بوهم .. مش احنا يا بابا 😀 ياخد طوبوا الميه و يبخهم بالميه .. يهربوا فرحانين و يضحكوا ..
و أنا في داخلي نقول ارجوكم خلاص .. اكرهوا بعضكم ع خاطري شويه .. اخفوا مشاعركم الطبيعيه .. مارسوا بعض الحقد ..
شوية حقد بس يرجعني لي بيئتي الي نشأت فيها .. خلوني نحس بي إن كلنا سواسيه .. ما فيش فرق بيني و بينكم ..
و بجهد مني كبير حاولت نضهر ضحكتي .. و نخلي روحي عاديه
خشينا نجهزوا العشاء .. جى إياد .. جايب حلويات و فواكه ..
جهزنا سفرة العشاء و قعمزنا كلنا مع بعض نتعشوا .. طبعاً عمتي مستحيل تخلي راجلها ياكل بروحه .. لازم في سفرة مع بعضهم ..
كانت ايدي رزينه في الاكل .. متحشمة و متضايقه نفسياً ...
و كلهم يعزموا عليا .. كملنا عشانا و نضنا للمطبخ نضموا فيه و نديروا في شاهي و حلويات و فواكه ... قعمزنا في الجنان المكان المفضل لي راجل عمتي .. كله شجر و ورد .. و كل شجرة فيه يحكيلك قصتها و سنة كم غرسها ....................
روح بينا إياد و طول الطريق نبكي ... لاحظت انه مداير مراية السياره عليا .. لفتت وجهي و مسحت دموعي ..
و لما وصلنا خش معانا إياد و سألني خيرك شن في و من مزعلك ؟؟
قتله مزعلني الوقت ....
مزعلني حظي .........
مزعلتني ظروفي .....
مزعلتني تراكمات في داخلي لا هي تبي تطلع مني و لا انا قادرة نتجاوزها و نعيش حياتي ....
__________
قعد ساكت و كأنه ما اتوقعش اجابتي بكل ...
قتله نستاذنك انا .. قالي خليك شويه .. قرب مني و قالي انا بصراحه كان نلقى ندير أي شي يخليك سعيده .. كان نلقى معاش نشوف نظرة الحزن في عيونك .. كان نلقى الدمعه هادي الي حاصله في عينك معاش نشوفها ....
ارتبكت و قتله بصوت مرتجف لا عادي ما ادورش كل شي ياخد وقته ....
إستاذنت و خشيت .. صكرت داري و غيرت ملابسي .. و خشيت في حالة حزن غريبه .. بكاء متواصل و تنهيدة قلب تحمل اوجاع قديمة جداً ...........
نضت مسحت دموعي و اتصلت بي نزار .. رد عليا .. قتله نزار مش انت وعدتني لما تكبر تجيبلي بابا 😢💔
قالي خيرك شن في ؟ و من كثر بكاي معاش قدرت نرد عليه او نتكلم ... صكر التليفون و جاني في حوش حناي .....
كلمني قالي انا تحت .. فتحتله الباب و ركبنا قعدنا ع السطح فوق ....
نزار مقعمز ساكت و انا جنبه ..
قتله انا ياريتني ما جيت على هالدنيا ...
قالي و لا أنا ......
قتله علاش ما تجيش تقعد هنا معاي ؟
قالي لا خليني مع امك قاعدلها زي الشيطان غادي عضمة في الحلق ...
تعرف نزار ...
زمان كنت نقول في المدرسه ان هادي مش امي و انها تربي فيا بس لان اهلي مسافرين ...
تتفكر لما جانا القمل ؟؟ و كانت الاخصائيه تعاقب فينا و احنا نقولولها راهو أمي مريضه تقدرش تنظفنا ....
______________
كان نزار سرحان في السماء و هدوءها و يهز راسه بضحكة عمقها ألم ..
______________
قتله به تتفكر لما طحت انا من مقعد المدرسه و رجلي تكسرت و انت خنبت الشكلاطه الي جابهالي بابا
قعدنا نضحكوا بعيون كلها دموع و بقلب موجوع و قالي لا مخنبتهاش كليتها بس 😀
حطيت راسي ع كتفه و شديت ايده و قتله قداش ما نتمنى نرجع لهديكا الايام ع الاقل ما كنتش فاهمة فيها شي و ما كنتش حاملة كمية هالوجع في قلبي ...
خداني في حضنه و قالي ليش هذا كله ؟؟؟
قتله تصدق ؟
هذا كله ع خاطر مشيت تعشيت في حوش عمتك ....
انا مش قادرة نتقبل واقعي ... علاش انا مش زي باقي البنات ؟؟
انا فاقدة كل شي .. فاقدة حوشنا .. فاقدة بابا .. فاقداتك انت .. فاقدة داري .. نبي نستقبل صاحباتي .. نبي أم تانيه غير هادي الي ولدتني ...
قعدت نبكي و قالي هذا نصيبنا ... و لا راد لي قضاء الله .. لكن حاولي يكون الجاي اجمل .. و عندي احساس ان احنا ح نجتمعوا في يوم من الايام .. و نكون انا بيناتكم ...
قلت بصوت مليان رجاء لله عز و جل .. بصوت ما عنداش رغبه في الدنيا غير الرغبه هادي
اللــهــــــــــــم آمــيــــــن
رقدنا الليله هديكا فوق السطح و فقنا لما طلع علينا ضي الفجر ...
نضنا توضينا و صلينا و درنا فطورنا ... و حناي استغربت في نزار .. قالتله انت هنا !!
قاللها هنا من مبارح .. قالتله خاطري في سفنزات .. قاللها اهو تو نمشي نجيبلك و نجي .. طلع نزار بيجيب سفنز ..
في داخلي فرحة صغيره لان نزار معاي .. ليه مكانه في قلبي غير عن باقي خوتي ... ♥️♥️
بعد ساعة ممكن جى نزار و جاب سفنز و قعمزنا فطرنا و هدرزنا .. و طلع نزار ...
جهزت نفسي و مشيت للمكتب .. خديت ملف القضيه و قعدت نقرا فيه .. اتصلت بموكلتي و قتلها لو تقدري تجيني للمكتب نكون ممنونه .. قتلي اوك مسافة الطريق مكون عندك ..
و بعد ساعة تقريبا وصلت موكلتي .. سلمت عليها و كانت معاها صديقتها .. قعمزنا و عرفوا بنفسهم ..
قتلها قضيتك تطالبي فيها طليقك بحضانة بنتك صح ؟
قتلي ايه ..
قتلها مبدئياً الامور كلها في صالحك .. انتي أم و حاضنة و الحكم مضمون ليك ..
ضحكت قتلي لا مش مضمون ..
استغربت قتلها كيف !!!
قتلي انا كنت محبوسه ..
و هنا كانت صدمتي لان هيئتها و هندامها ما يدلش على انها مسجونه فيما سبق ...
كملت موكلتي كلامها .. قتلي انا نحبست على قضية ( دعاره ) تم القبض عليا في استراحة و كنت في حالة سُكر
سألتها كنتي مطلقه وقتها ؟ جاوبتني لا كنت على ذمة زوجي ...
كانت علامات الذهول واضحة على ملامح وجهي ... قتلها بس أنا مش هذا توقعي للقضيه .. يعني بصراحة هادي قضية ميته .. زوجك هو الرابح فيها ...
ردت صديقتها .. ما فيش كيف من هنا و لا من هنا حتى زيارة بس لي بنتها ؟؟
تلفتت انا لي موكلتي .. قضيتك تم اذانتك بيها ؟ قتلي ايه ..
قتلها انتي تعرفي ان الي درتيه تبعياته كارثيه ؟؟
قتلي انا الشي هذا فتحت عيوني فيه 🤷🏻♀️
______
شدتني كلمتها و دفعني فضولي نسأل كيف !!!!!
حطت رجل على رجل و قتلي معليشي نولع سيجار .. شاورت بي أيدي ليك مطلق الحريه ..
ولعت سيجار و قتلي انا زمان كانت امي ترفع فيا معاها للاستراحات ..
كانت امي تشجعني ندير علاقات .. و كنت لما نروح بهديه او اي شي تفرح ...
كنت لما نقعد فترة من غير علاقه و من غير ما ندخل شي للحوش نتعامل معاملة الكلاب ..
من لما فتحت عيوني و بوي في دار الجنان .. ما شفتهمش في دار نوم وحدة ...
ديما عراك .... ديما مشاكل ...
انا نعرف روحي حياتي غلط .. لاني انا ما نعرفش الصح ... انا رضعت من ثدي أمي الرذيله ....
توا في رايك يا أستاذة انا نتعاقب و لا امي ؟؟
رديت و انا في حالة صدمة من الي سمعته .. أمك .........
ما كانتش تعرف موكلتي ان حياتها و ماضيها و طفولتها زي طفولتي و ماضيا بالضبط ....
ردت صديقتها .. حتى انا نحبست معاها على نفس القضيه ....
بس انا مش معدله عادي لاني مطلقه و ما عنديش صغار ..
سألتها : شن دخلك للكار هذا ؟؟
قتلي انا حياتي عكسها بالضبط .. فتحت عيوني في أب ظالم سكير يضرب يعيط يكسر كل شي قدامه .. و أم مسكينه خدمت كل شي على خاطر صغارها باش توكلنا لقمة حلال .. تحملت الضرب على خاطرنا و تحملت الاهانه و عاشت مع راجل حياته شرب و نساوين و كان مدايرنا العار في الشارع ... كبرت و انا ندور ع الاهتمام .. نبي نهرب من الوضع المزري في حوشنا .. و مستعدة نرتمي في احضان اي رجل حتى لو كان لغرض ممارسة الجنس .. المهم يهتم بيك حتى نص ساعه ...
______________________
ابتسمت ابتسامة قهر لان واقعنا واحد بأختلاف ظروفنا حالياً ...
ما نعرفش ليش حسيت بشفقه عليهم و حسيت برغبه نحضن كل وحدة فيهم ...
تلفتت لي موكلتي و قتلها نوعدك نخليك تشوفي بنتك ..
و بالرغم من قسوة الحياة الي باينه عليها نزلت دمعتها و قتلي ان شاءالله يارب ..
سلمنا و قتلها ح نقعد على تواصل معاك ... طلعوا من المكتب ...
قعدت سرحانه .. ( احنا ما نعلموش الغيب صح .. لكن لما نختار شخص خطأ لازم نتوقعوا حياتي القدام كيف بتكون )
شن ذنب الاطفال يولدوا في بيئة عفنه !! ليش يجي جيل مليئ بالكره .. بالحقد .. ب ............................................
لملمت اوراقي و اتصل بيا المحامي و قالي في ضابط في جهاز المباحت العامة نبيك تمشيله هو الي ح يساعدك في قضية بوك .. الضابط هذا شاطر و ناجح و انا متعامل معاه اكثر من مرة ..
قتله تمام تو نمشيله توا ..
طلعت من المكتب و مشيت لجهاز المباحث الجنائيه ..
كنت متوترة اول مرة نخش مكان زي هذا ... خشيت و سألت .. لو سمحت نبي الافندي سيف الاسلام ..
قالي تفضلي استني في المكتب .. خشيت المكتب و قعدت نستنى فيه .. ساعه ...... ساعه و نص .............
فجأة الباب نفتح بقوة و خش شخص و استغرب لما شافني .. حط مسدسه ع المكتب .. و قالي تفضلي !!!
ارتبكت و قتله انا المحاميه ماريا ..
قالي و به !!!
قتله جاياتك في موضوع من طرف المحامي سعدالدين ......
جى قعمز في الكرسي الي مقابلني .. و قالي شن موضوعك ؟؟
قتله بصراحه هو موضوع قديم و طويل شويه ...
قاطعني و قالي نزلي رجلك و قعمزي كويس .. و انا في حركة لا اراديا كنت حاطة رجل على رجل نزلتها طول ...
قالي مدام موضوعك قديم و طويل خليه مرة تانيه .. توا عندي تحقيق مهم .. خودي رقمي و كلميني قبل ما تجي ..
و ناض طلع و خلاني مقعمزة ...
نضت و انا نلعن فيه .. التافه المغرور 😡😡
____________________________
No name ♥️🌺
