إنتحار طالبه ف الثانويه العامه ع..
رميت تلفوني في الأرض وقومت من علي السرير إتنفضت من مكانى
حطيت إيدي علي وشي وقعدت أعيط
معقوله ممكن حد يموت نفسه عشان 3 ثانوي!
دي لسه صُغيرة إزاي هانت عليها نفسها وإنتحرت عشان مجابتش مجموع كلية كان نفسها فيها ف ستين داهيه تعوض ف غيرها
بصيت علي صورتها وملامحها البريئه الطيبه
انتِ جميله اوي عملتي ف نفسك كده ليه؟ ياريتك كنتِ صاحبتي
ماما دخلت الأوضة وماسكه طبق غسيل عايز يتنشر
_ندي انتِ لسع بتتفرجي علي المسلسل التركي ده وبتعيطي
أخدت نفسي وإتنهدت وورتلها الخبر
=ماما البنت دي انتحرت بسبب نتيجتها ف ثانوي، انا مرعوبه أوي انا زعلانه عليها وخايفة لإني السنادي هكون 3 ثانوي
-ده دلع ماسخ ماهي لو كانت ذاكرت كانت جابت المجموع اللِ نفسها فيه، قومي قومي إنشري الغسيل دة عقبال ماأكمل بقيت الأكل
بصيت علي صورة البنت وسبت الفون وقومت
بدأت رحلتي مع 3 ثانوي وبداية لهدف انا بسعي ليه
مسكت ورق ملون وقعدت أكتب عليه جُمل فيها طاقة إيجابية وتحفيزيه
عشان كل ما يئس أقرأئهم وأفتكر ان مفيش حاجه مستحيله طول ماربنا موجود
مسكت أول ورقه كانت لونها أصفر وكتبت '' سَيستجيب أبشري''
تاني ورقه كانت لونها بينك كتبت الكلية اللِ نفسي أدخلها '' ألسن ''
تالت ورقه لونها فسفوري كتبت '' إن الله مع الصابرين ''
رابع ورقه لونها ابيض كتبت '' كن راضياً وقل الحمدلله ''
قومت لزقتهم ف علي الحيطه اللِ تحتيها المكتب بالظبط عشان كل ما أذاكر أشوفها.
عملت نظام مذاكرة أمشي عليه ونظام للنوم والأكل
بنام الساعه 9 وأصحي 5 أصلي الفجر وأعمل كوباية قهوة أو نسكافيه عشان أركز
بدأت أمشي علي النظام ده بس علي قد ماهو مُريح الأ إن المواد كانت صعبة وتقيله ده غير عيال عمتي اللِ كل مابيجوا يزورونا ويشوفوني بذاكر يقولولي '' بتذاكري ع الفاضي ما ادينا اتجوزنا وخلفنا، ثانوية زفت منفعتش ف حاجه ''
مش هنكر أنا كنت بتأثر بكلامهم وبأحبط، بس جوايا حاجه كانت بتقولي إنتِ قدها
_ماما انا هروح عند ليلي صاحبتي
=مفيش خروج ادخلي أوضتك ذاكري
_منا علي طول بذاكر محتاجه أخد هدنه بس وبعدين انا خلصت مذاكرة
إبتسمت بسخرية
=هو في مذاكرة بتخلص؟ مفيش صح وبعدين هدنه من إيه بقي ما إنتِ بتاكلي وبتشربي وعندك أم واب كل اللِ عليكِ تجيبي مجموع كويس عشان تدخلي اداب زي مني بنت خالتك
بصتلها بصدمه وإستغراب
_أنا هدخل ألسن مش عاوزة هندسه
=حبيبتي مش بمزاجك احنا عارفين اي الأنسب ليكي معقوله مش عاوزة تبقي زي مني ههه عبيطة
بابا طلع من الأوضه
_في ايه ياوداد مالك ومال ندي
=قال اي مش عاوزة تدخل أداب زي مني بنت خالتها وعوزة تدخل كلية ألسن قال
بابا قلب وشه وحسيت إن هيدافع عني ويقولي براحتك زعق وقالها
_وماتدخلش حقوق ليه زي أبوها وتبقي مستشارة قد الدنيا
بصتلة بصدمه
=حتي إنتَ ي بابا!!!
سبتهم بيتخانقوا ودخلت الأوضه وانا سمعاهم
وداد ندي هتدخل حقوق وكلمتي هي ال هتمشي
لا بقولك اي هتدخل اداب هي أقل من بنت خالتها ف اي
