ليلة اكتمال القمر

الحلقة "9".

#ليلة_اكتمال_القمر

زهور جمال الدين(9)

.

فى عزى كمال

معاد مقعمز جنب بوه وينقرز /كيف يعنى يابوى ..كمال يقعد ملوح غادى ولا شنو
-فاتح متأثر/ توة غير نكملو العزى.. ويمشى بلا فضايح  وبعتالى ساهل نتفاهمو مع نورى شن بنديرو
-معاد / وهدا كله كيف صار .. ماهو من راى نورى العاقب
-فاتح / ايووووا عااد .. بدينا فالتنقريز وهوا يقولى معاد قال ودار وانت تقولى نورى قال ودار
-معاد / شنو شكله يتكلم عليا ولدك
-فاتح / ايه شاكى .. وقالى انك اطنش عليه وتكلم فيه من فوق لفوق
-معاد / يعرف روحه هوا شن داير
-فاتح/ مهما يكون هدا خوك واكبر منك
-معاد / خليها للايام تو تبين نية كل واحد فينا .. النية لافيها كبير ولا فيها صغير
-فاتح / لا حول ولا قوة الا بالله .. هدا الكلام اللى مانبوشى احنا
.
.
.
.
.

فى حوش امهم لداخل

عمتك زهرة / مسرع ما قالو مات ومسرع ماسموه المرحوم
-نسيبتها ام سهام / هدا حال الدنيا زهيرة يا وخيتى.. وانا ماعليا ملام هدا كلام تريس .. وبوها هوا اللى قال البنت تروح تربط عندى
-خيريه اخت زهرة / لاااا وانتى شن دخلك يامنيرة.. هدا كلام تريس واللى بيديره بوها ماشى عليك
-زهرة تبكى / تى كيف اللى بيديره بوها ماشى .. امتى بنياتى بوهم مات االى بترفعوهم وبتمشو
-منيرة / غير كانك بتقدريهم نخليهملك ...لكن عارفاتك الجهد هوا هداكة .. وامهم اولى تعانيهم
-خيريه/ والرباط يبي القدو..والقعاد فى حوش واحد ...واحنا كلنا نعرفو هكى.. المراة مدامها صغيرة تكمل رباطها فى حوش بوها
-منيرة / قولينا زينه يا زهيرة يا وخيتى ...والله ماعاطى قلبي نطلع بالصغار وانتى متغششة
-زهرة / ماعندى مامغششنى ...غير وليدى حارقلى قلبي
-منيرة / معاك حق ياوخيتى .. كانا احنا حارقلنا قلوبنا .. امالا انتى كيف صاير فيك ياكبدى

ودارو الصغار وسهام مرت المرحوم وطلعو روحو ...

____________________________________________

_

لازرق فى استراحته ..

يخمم كيف يوصل فالبنيه ويقتلها .. اليوم قبل غدوة

يشبح لى مفتاحةسيارته فى يده ويخمم / المعلومات اللى جمعتها عالبنت ماتساعدش بكل... لانها مش متزوجه معناها مازالت ساكنه مع خوتها ... وحاجه ثانيه ماتشتغلش .. معناها اكثر الاحيان فالحوش ماعنديش كيف بنحصلها برة
كيف بندير وكيف الدبارة ...غير بس كانا نلقى طريقه كيف نوصلها ونطق العشرة فى قراجيمها ونفتك ... 

ناض من مكانه ... خش يدير فى شاهى ويخمم / وعلاش البنت لازم تموت .. انا والله ماستوعبت السبب .. المخاوى هدا شكله عنده هلبا معلومات ولازم نتواصل معاه ونسأله .. عرجون ورضوان لابدة داسين عليا هلباااا مواضيع يعرفوها .. خايفينى نتعلم ونفوتهم ..