ليلة اكتمال القمر

الحلقة "11".

#ليله_اكتمال_القمر

زهور جمال الدين(11)

.

بعد ساعه ونص ..
مع الساعه 8 ونص

خش الاجنف للمدينه اللى ماشييلها ... الحركه خفيفه الناس كيف فايقه والمنطقة نائية شوى ...
لو كان الاجنف شاب صغير راهو زبط ان سيارة معاد معاه من الاول..لكن الاجنف شيبانى ويعافر فالشمس فالطريق منتبهش اصلا لسيارة معاد فالطريق

كمل الاجنف طريق المنطقة للاخير وخدى الطريق عاليمين ..
خش الحوايز ... معاد حس انه بينكشف.. درس على جنب شوى..ويشوف فى الاجنف يكمل فى طريق البيستا ...يمشى فيها بالشوى بيش مايديرش غبرة ... كمل الاجنف وخدى الفتحه اللى عاليسار  ومشى ..انتهز معاد الفرصة وخش طريق البيستا ومشى نفس طريقهم وخدى اليسار يشبح فيهم درسو تحت شجرة ...
نزلت حسناء .. ومعاد يتفرج من بعيد ...

طقت حسناء عالباب .. طلعتلها بنوتة صغيرونه عمرها قيس 6 او 7 سنوات

-حسناء/ شن اسمك ياقمر☺
-البنوتة/ اسمى سرور
-حسناء/ عاشت الاسامى.. خالتى نوارة قاعدة
-سرور بخبث/ مندرى عليها

-حسناء/حبيبتىانا عارفتها قاعدة غير ماحصلتهاش بالتليفون
لانها خارج التغطية...قوليلها خويلة حسناء اللى كلماتك امبارح تبيك
-سرور/ شوية بس خلى نشوفها
وصكرت الباب وخلت حسناء واقفه تراجى ...

لاجنف/ خيرها صكرت الباب
-حسناء/ قالت خلى تقول لامها وتجى تفتح
-ماليكة/ مش قلتى كلمتها بالتليفون
-حسناء/ هداكة امس ..توة الطريق كلها نكلم فيها ماعندهاش  تغطية ..

وشبحت لى صبريه فالخلف/ خيرك ساكته
-صبريه ابتسمت ابتسامه صفراء/ لا لا شى
-لاجنف/ ان شاء الله خير

انفتح الباب طلعت البنيه/ قالتلك امى شن اسم الحالة تبع التحضير
-حسنه / اشش نقصى صوتك يسمعك حد
-سرور🙄/ ومن هناك يسمع بيسمعنا.. تشبحو فينا الجيران بعاد
-حسنه تهمس / قوليلها احنا تبع حالة افراح
-سرور/ باهى
وخشت وصكرت الباب ....

-قربت حسنه من السيارة / شكلها الشيخه عندها اكثر من حالة اليوم ... لانها قالتلى عطينى الاسم
-ماليكه/ صحة ليها تخدم على راسها
-حسنه/ اششش فكينا يمى .. التستور والبركة

طلعت سرور / قالتلكم امى خشو .. نساوين بس كانا معاكم رجالة مايخشوش
-ماليكة / قولى لى امك عمك الحاج شيبانى منقدروش انخلوه هنايا تضربه الشمس
-لاجنف/ لالا منيش خاش ياحاجه ..خشو انتم فيسع واطلعو
-حسناء/ ماتقولناش فيسع يابوى مرات نعطلو

-ماليكة/ خش معانا وخلاص ..تضربك الشمس معش تقد تسوق بينا
-لاجنف تكنطى/ ايه علينا عاد .. بتخشى وبتسكتى ولا كيف
-حسناء تعظ فى شاربها لى امها تحشمت من حماتها صبريه كيف يتعاركو قدامها 😁/ هيا انزلى يااام خليه على راحته