ليلة اكتمال القمر

الحلقة "10".

#ليلة_اكتمال_القمر

زهور جمال الدين (10)

فى حوش عمك الفاتح

عمتك زهرة لداخل صايخة وخواتها والعزايز دايرين بيها ويكبرولها فى ودنها ... المراة عقلها مشى ومعش مستوعبه
يانارى بنيتها عروس تفكرها ربي...
جابو شيخ لى زهرة بيش يقرالها قران ... جابه معاد دخله للمربوعه ... ودخل امه وخالاته الزوز ....
الشيخ بصير مايشبحش ... جايبينه زوز شيوخ صحابه قعدو برة وخش هوا لداخل ... قري القران وبخو عمتك زهرة فاقت من غيبوبتها ...
-زهرة / يابنيتى يلى ماريتى شى مالدنيا .. رفعك ربي قبل نشوف صغارك
-اختها مفيدة/ وحدى الله يازهرة
-الشيخ/ ادكرى الله يا اختى وربي يكون فى عونك
-زهرة / الاسبوع اللى فات وليدى واليوم بنيتى غير كيف تبينى نصبر ياشيخ
-الشيخ/ الصبر مفتاح الفرج .. وربي يفرج عليك ياوخيتى
كمل الشيخ وعطاه معاد ماكتب ربي ... وشده من يده بطلع فيه من الممر بيرفعه للسيارة متع جماعته

-الشيخ/ قتلك
-معاد / اهاا ..نعم يا شيخ
-الشيخ/ ماعندكمش مسكن ثانى
-معاد / كيف مفهمتكش عليك .. انت ادور فى حوش
-الشيخ / لا انا ننصحكم انتو ادورو حوش .. الحوش هدا معش يصلح بيكم ..
-معاد انخلع/ وعلاش معش يصلح بينا
-الشيخ/ريحة الموت بدت تعم على حوشكم..والحبل عالجرار
وقف الشيخ / ننصحكم بدلو المحل ... وربي يحفظكم
-معاد مصدوم / انت تشبح يا شيخ ولا شنو... قصدى مكشوف عليك ولا كيف
-الشيخ/ انا قلبي متعلق بربي ... ولما خشيت لى حوشكم وانا قلبي مقبوض ... لو عندكم كيف غيرو الحوش ... او بيعوه .. يجى الجافل ويمشى الجافل .. وانشاءالله ماينضر فيه حد
-معاد / ان شاء الله خير ... تو نبلغ بوى

وكانت الجنازة فى نفس اليوم ... دفنو جنه جنب قبر خوها كمال ... وكمال جنب قبر حمودة ولد خوه نورى ...
اووووف الناس حالين افامهم ... غير شن فى ياجماعه الخير وفى اللى متشمت وفى قولت ترا شن دايرين ربي سطرهم جنب بعضهم ..بالرغم ان المفروض لاشماته فالموت ... 

_____________________________________________

.

صبريه مشت لى حوش سلفها تعزى ... المرة هادى بكت هلبا .. وجعتها البنيه ... لان افراح كانت تحبها هلبا ..

-حسناء/ مجيد قالنا هيا
-صبريه/ لا انا بنبات هنايا
-حسناء/ على كيفك
ونزلت توشوشلها / المشيه بعد غدوة ماتنسيش .. قال بوى نصلو الفجر ونطلعو مش نلحقو
-صبريه تحكى بالشوى/ باهى باهى .. اصلا انا غدوة منروح
-حسناء/ تمام
وتلفتت للنساوين / هى امالا تصبحو على خير..تو نولو غدوو
النساوين مقعمزين / ليلتك سعيدة

وطلعت حسناء هيا وعمتها فاطمه روحو للحوش

سهرو النساوين فالجنان ... وعقاب الليل خشو لداخل بيرقدو
فرشت صبريه فراشها وخدت غطاء ... حطت راسها شكلها طول خداها النوم .... مع ان نص عيونها مفتوحات ... زى كأنها بين نوم ووقضة
تشبح فى جنه لابسه عبايه سودة وفاردة ايديها الزوز وجايتها
جنة / عمتى صبريه ... عمتى صبريه
صبريه شبحتلها / جنة !!!؟؟... انتى موتى ولا
-جنه تضحك / لااااا انا منموتش
-صبريه/ توووة دفنوك خوتك ... انا رانى بايته فى عزاك
خدت جنه شرشاف عالطاولة وحطاته على راسها زى الطرحة
-جنه تضحك/ هدا عرسى
-صبريه/ لا هادى وفاتك
-جنه وجهها احمر/ قلتلك هدا عرسى
-صبريه تشبحلها / وانا قلتلك لاااا هادى وفاتك
قربت جنه من صبريه وفتحت فمها تعيط / هدا عرسى عرسى عرسى عرسى عرسى
لحد ماطلعت من فمها لفعه وبدت تاكل فى لسانها