ليلة اكتمال القمر

الحلقة "8".

#ليلة_اكتمال_القمر

زهور جمال الدين (8)

.

انفتح باب غرفة نورى .. وخش معاد مشى بخطوات سريعه لى نورى حضنه وبدى يبكى دموعه حالة .. نورى طول بدى يبكى ..
لازرق وخر الكرسى اللى مقعمز عليه للخلف .. قعد ساكت خلاهم على راحتهم
-معاد/ كمال مات يانورى .. كمال مات
نورى يبكى وساكت
-معاد / ليش باعته ليش .. ماك عارف المكان واعر
-نورى يبكى/ لحظه شيطان وسهينا فيها .. وموتت حمودى ماخلتش فينا عقل نفكرو فيه ..تسرعنا ..
-معاد / الكلاب ناتشين جسمه كله
لازرق من وراه/ ماهمش كلاب يامعاد .. اللى منتشينه ديابة
-معاد يمسح فدموعه وتلفت للخلف / وهوا فى دياب فى ليبيا
-لازرق/ وشنو ليبيا فيها الزايد .. ماهو بلاد وفيها جميع الحيوانات
-نورى/ لكن ان نعرف ان الديب ميخافش من الجان .. بالعكس الجان هوا اللى يخاف منه .. وهدا حوشه تحسه يخوف ومسكون بالجنون ...
-لازرق/ هاك قلتها .. الديب ميخافش من الجنون .. خش لى كمال ودارله اللى شفناه ...
-نورىيمسح فدموعه / ربي يرحمه ويغفرله اوخى
-لازرق/ توة المشكلة مش هنايا .. المشكلة كيف بنأمنولكم جثة بيش تدفنوها
-معاد فاتح عيونه / ااه.. جثة شنو اللى بتأمنهاله .. ناخدو الرفاث متعه وننقلوها لجبانه فى طرابلس
-لازرق/ صار قلتلى رفاث .. وشن بتقول للتحقيق
-معاد / وعلاش التحقيق
-نورى متكى على سريره / غير اسكت يامعاد
-لازرق/ مش بتاخد تصريح دفن ولا .. وشن بتقوللهم لما يلقوه هكى مشرول تشرويل .. والتراب اللى بيلقوه مخلط بدمه .. بالتاكيد بيزبطوه كان مدفون
معاد ساكت ويشبحله وخلاص
-نورى/ معاك حق يالازرق
-لازرق/ منكدبش عليك من هنايا صعب نجيبلك جثة ...
الشهدارة هلبا .. لكن مالحدود ساهلة .. توصل فى نهار
-معاد / باهى لو وافقنا امتى توصلنا
-لازرق شبحله / لو وافقتو!؟... تى انتو موافقين وتجرو وتترجو ويالله اتحصلو جثه
وتلفت لى نورى / شن احوالك يانورى
-نورى / لااااااا تم ... اللى درته ماشى عليا
-لازرق/ خلاص عندى جماعه تو نكلمهم ونقولك هالسعر
خدى تليفونه وباكو الدخان / هيا بسلامتكم توة ..وردو بالك تخبرو بالوفاة لين توصل الجثه
-نورى/ وشن الموضوع الثانى اللى لقيته
-لازرق/ مش وقته توة.. خلى نقمطو الاول .. وبعدها نبدو بالثانى

_________________________________________

_

فى حوش مجيد

صبريه تغسل فى الماعين وامها مقعمزة عالطاولة ..

-فاطمه / يا مالاااك شماته صارت فيهم ..ربي فالوجود ياحنه
-صبريه / لااااا يام .. اللهم لا شماته ...ربي يصبرهم .. واحد فالعيادة والثانى غايب وقالو حالتهم مايعلم بيها حد الا ربي
-فاطمه / امالا رزق الحرام تحسابيه ساهل.. فى يوم وليله طارو للعلالى ولااااحسبو ربي ولا حسبو كلام الناس
-صبريه / توة احنا مالنا بيهم يااام ..بتمشى معاى ولالا
-فاطمه / خلى يجى خوك وبعتالى ساهل
-صبريه/ ان شاءالله