أعطيت لحبك فرصة فخدعتني

✨الفصل الخامس والعشرون ✨

كنا قفلنا الفصل أللي فات علي أما ياسمينا راحت ورمت الدبلة لأدهم وقولنا ياتري رد فعله هيكون ايه وياسمينا هتعمل ايه !! تعالوا يلا بينا نكمل ونشوف اللي هيحصل !! قراءة ممتعة
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ياسمينا وهي تبحث عنه حتي تراه لتذهب إليه وتفاجئه برمي الدبلة علي الطرابيزة: دبلتك يا أدهم بيه
أدهم بصدمة: ياسمينا !!
ياسمينا: أيوة ياسمينا ياأدهم بيه ياسمينا اللي فاكر إنها نايمة في العسل علي ودانها وبتضحك عليها بكلامك
أدهم: ياسمينا استني انتي فاهمة غلط انا هفهمك كل حاجة
ياسمينا: فاهمة غلط !! وايه هو الصح !! أما الاقي خطيبي قاعد مع واحدة في كافيه وبتمسك ايده ونسي المعاد بتاعي كمان يبقي ايه هو الصح ؟! ماتفهمني يابشمهندس ..هو سؤال واحد بس ليه !! ليه عملت فيا كدة !! ليه علقتني بيك !! ليه خليتني احبك !! ليه فهمتني انك بتحبني !! عملت فيك ايه يخليك توجعني بالشكل دة !!
أدهم: انا بحبك فعلا والله العظيم بحبك ومقدرش استغني عنك وانتي فاهمة غلط ارجوكي تديني فرصة افهمك واشرحلك
ياسمينا وتضع الدبلة بيده: مابقاش ينفع كلام ولا بقي ينفع اصدقك تاني لأن مابقاش في كلام ينفع أنه يتقال ..عن اذنك
أدهم وهو يلحق بها وتمسكه امال: ماتسيبها تمشي ..وبعدين انت رايح فين وسايبني !!
أدهم: رايح للاهم منك ومينفعش اسيبها لأنها حياتي ولو سيبتها تمشي تبقي حياتي انتهت ..وتركها وذهب
آمال واتوجعت من كلامه: معقولة تكون حبيتها بجد ونسيتك حبي !!
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
أدهم وهو يلحق بياسمينا ويمسك بها: استني مش بنده عليكي !!
ياسمينا ببكاء: عاوز مني ايه تاني سيبني في حالي بقي حرام عليك
أدهم بزعيق: لازم تسمعيني وتفهمي وانا حالك ومش هسيبك
ياسمينا ببكاء: حرام عليك ..حرام عليك سيبني حرام عليك
أدهم بهدوء: اهدي ياحبيبتي اهدي عشان خاطري وتعالي نروح المكتب ونتكلم وافهمك الموضوع
ياسمينا: مش عاوزة اروح ولا اسمع حاجة انا خلاص عرفت كل حاجة وانك حنيت لحبيبتك القديمة
أدهم بتحذير: انا مش هقولك تاني تعالي وافهمك عشان ماترجعيش تخسري وتندمي زي ماهي بتندم دلوقتي
ياسمينا سكتت وقررت تسمع كلامه وتروح معاه
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
مريم برقة: كريم ..كريم اصحي بقي
كريم بنوم: سيبيني كمان شوية
مريم: لا كفاية نوم بقي يلا عشان تتغدي
كريم وهو يستيقظ: يالهوي ياجدعان حد يصحي علي القمر دة كدة !!
مريم وهي تضحك: طيب اصحي بقي عشان تقعد مع القمر ..يلا قوم اغسل وشك كدة عشان تفوق وصلي وعلي بال ماتخلص اكون انا جهزت الغدا
كريم وهو ينهض: حاضر
مريم وبدأت في تحضير الغداء وهي سعيدة جدا للغاية باستقرار حياتها دون مشاكل مع حبيب عمرها حتي انتهت من تحضيره وكان انتهي كريم وخرج ليتناول الطعام مع زوجته الحبيبة الذي يعشقها لا يحبها فقط وانتهيا من تناول الطعام وذهبا لمشاهدة التلفاز معًا وكريم يحتضن مريم
مريم بحب: قولي ياكريم نفسك في ولد ولا بنت !!
كريم بحب: كل اللي يجيبه ربنا كويس اهم حاجة انك انتي امهم مش حد تاني
مريم وهي تنهض: ربنا يخليك ليا يارب ..بس نفسك في ايه برضو
كريم: نفسي في بنوتة تكون شبهك زي القمر زيك كدة عشان اشوفك فيها طول الوقت وافضل احبك علطول
مريم بإبتسامة: وانا نفسي في ولد يكون شبهك كدة وأحبه زيك واكون بحبك مرتين
كريم بهزار: خلاص يبقي توأم بقي ولد وبنت عشان نرضي الطرفين
مريم بضحك: أيوة صح دة حل وسط ويرضي جميع الأطراف
"وظلا يضحكون ويمرحون معًا وكل واحد منهم بداخله شعور كبير من السعادة والفرح والحب للطرف الآخر ..فما أجمل أن يعيش الانسان حياة هادئة دون مشاكل ودون خلافات طوال الوقت فهذا هو الحب الصحيح نعم هل هو !! فنحن من نمتلك هذا لو أردنا أن نفعل هذا لفعلنا لكي ننعم بحياة هادئة مليئة بالحب والسعادة لنفعلها لنبتعد عن الخلافات وبعض المشاكل ونري الحب حقًا"
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
أدهم وهو يمسك ياسمينا ويدخل للمكتب: هدير محدش يدخل عليا خالص ..اتفضلي ادخلي قدامي
ياسمينا: انت بتزقني ليه !!
أدهم واغلق باب المكتب وجلس علي أحد الكراسي: فهميني بقي بالظبط ايه اللي حصل دة وعرفتي منين ومين قالك !!
ياسمينا: هو دة كل أللي همك عرفت منين وازاي !! وبعدين انت كمان ليك عين تتكلم انت ايه البرود اللي انت فيه دة !!
أدهم ببرود: مش هكرر سؤالي تاني فهميني ايه اللي حصل خلاكي تجيلي وعرفتي منين مكاني فهميني بدل مااستخدم تصرف تاني مش هيعجبك وهتقولي برضو
ياسمينا: انت بتهددني ياأدهم !!
أدهم ببرود: تؤ تؤ اهددك ليه بس ياحبيبتي وانا اقدر برضو ..انجزي وقولي قبل أما اعصابي تفلت ومش هعرف اتحكم بعد كدة ومش مسئول عن اللي هعمله
ياسمينا بخوف: أما اتأخرت عليا فضلت أرن عليك كتير وتليفونك مقفول ومكنتش عارفة اوصلك فقلقت وجيتلك الشركة هنا عشان اشوفك هدير قالتلي انك مش موجود ونزلت مع واحدة جاتلك اسمها آمال دخلت المكتب ولقيت صورة جاتلي علي الواتس ليك معاها وبعدها حد كلمني من نمرة غريبة قالي انك قاعد مع حب عمرك القديم ولو حابة تتأكدي روحي وشوفي بنفسك واداني العنوان بس كدة وهو دة كل أللي حصل
أدهم: امممم ..وانتي طبعا جيتي زي المجنونة ورميتي الدبلة في وشي وماستنتيش تفهمي
ياسمينا: كنت عاوزني اعمل ايه يعني أما حد يقولي كدة !! استني لحد اما الاقيك داخل عليا بيها !!
أدهم: أللي قالك كدة مش يمكن غرضه يوقع بينا !! ثم كمان ايه عرفه حاجة زي كدة !! ومش يمكن اللي قاعد معاها دي اختي ولا قريبتي ولا في شغل بينا وقاعدين بنتكلم في شغل !!
ياسمينا بإحراج: معرفش بقي انا سمعت كدة وماشوفتش قدامي
أدهم وهو يلبسها الدبلة: ياريت ماتصدقيش اي حاجة تجيلك تاني إلا أما تسمعي مني وتثقي فيا اكتر من كدة والدبلة ماتتقلعش من ايدك كدة تاني مهما كان السبب عشان بعد كدة هزعل وانا زعلي وحش
ياسمينا: طيب قولي مين دي !! وكانت عاوزة ايه !!
أدهم باستفزاز: مالكيش دعوة حاجة ماتخصكيش
ياسمينا وهي تنهض بعصبية: طيب حاسب بقي كدة سيبني امشي
أدهم ويمسكها ويزقها بقوة وبعصبية: ماتقعدي بقي وتهدي مش كفاية استحملت طريقتك أللي زي الزفت في الكافية وخلتيني اطلع اجري وراكي وعديتلك الموقف دة وقولت غصب عنها برضو في ايه مالك !! هتعرفي كل حاجة في الوقت المناسب كل حاجة وليها وقتها تعرفيها فيه
ياسمينا بدموع: انت بتزعقلي ياأدهم !! ماشي شكرا بس طريقتي دي عشان بحبك فكنت خايفة تضيع مني أو تطلع بتحب غيري وترجعلها وتسيبني زي اللي قبلك واكون بعيش قصة وهمية للمرة التانية .. وبدأت تهدأ وتمسح دموعها وتخلع الدبلة: اتفضل دبلتك اهي ياأدهم بيه أما ييجي الوقت المناسب اللي بتقول عليه انت مش تايه عن بيتنا ولو مجاش فكل اللي بينا انتهي وكدة اكون عملت أللي عليا ومظلمتكش ..عن اذنك ..وتركت الدبلة علي مكتبه وذهبت باكية
أدهم وخبط علي المكتب جامد بعصبية
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
وفي المساء
ملك: بقي ينفع كدة بذمتك اكون عندكم وتسيبيني وتقعدي في اوضتك وماتطلعيش تقعدي معايا !!
ياسمينا: معلش ياملك تعبانة شوية بس
ملك: مالك ياسمينا في ايه !!
ياسمينا: مفيش ياملك انا كويسة تعبانة بس
ملك: متخانقة انتي وادهم !!
ياسمينا: لا
ملك: متأكدة إن مفيش حاجة !!
وقاطعهما صوت رنين هاتف ياسمينا
ملك: مش هتشوفي مين بيرن عليكي !!
ياسمينا: مش عاوزة أرد علي حد
ملك وهي تمسك بالهاتف: دة أدهم
ياسمينا: سيبيه
ملك: ماتردي عليه يابنتي في ايه !! مش انتو مش متخانقين !! لو رن تاني ردي عليه
ياسمينا: لو سمحتي ياملك انا مش قادرة اتكلم في حاجة
ملك: بيرن تاني اهو
ياسمينا: قولت مش هتكلم ولا قادرة اتكلم
ملك: خلاص ..خلاص هرد انا ..وردت ملك علي أدهم
أدهم: أيوة ياسمينا مش بتردي عليا ليه !!
ملك: أيوة ياادهم انا مش ياسمينا انا ملك
أدهم: معلش انا آسف ازيك عاملة ايه
ملك: الحمد لله بخير
أدهم: هي ياسمينا مش موجودة ولا ايه !!
ملك بتوتر: لا ياسمينا نايمة ..ليه هو في حاجة ولا ايه !!
أدهم: لا مفيش حاجة هي قالتلك حاجة ولا ايه !!
ملك: لا هي من ساعة أما جت من برة ساكتة وماتكلمتش ونامت بعد كدة وكل أما اسالها تقولي مفيش حاجة فقولت يمكن متخانقين ولا حاجة عشان كدة بسألك
أدهم: لا مفيش حاجة خالص كله تمام ..أما تصحي انا هبقي اكلمها تاني
ملك: خلاص تمام ماشي ..مع السلامة ..وأغلقت الهاتف ونظرت لياسمينا: في ايه !! وخلتيني اكدب عليه
ياسمينا: هو انتي مش قولتيله نايمة !! انا فعلا هنام
ملك: ياسمينا علي فكرة انا بكلمك
ياسمينا: وانا والله العظيم ماقادرة اتكلم ياملك عشان خاطري سيبيني انام ..يلا تصبحي علي خير
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
مصطفي: عاملة ايه دلوقتي ياحبيبتي !!
صافي: الحمد لله
مصطفي: المفروض هتروحي للدكتور امتي !!
صافي: بعد شهر كدة إن شاء الله كنت واخدة علاج لمدة ٣شهور واروح عشان اعرف
مصطفي: خير إن شاء الله ويطلع مفيش حاجة
صافي: انا راضية بأي حاجة ربنا يجيبها مادام من عند ربنا تبقي خير وكل حاجة من عند ربنا خير وربنا ليه حكمة في كل حاجة بتحصل معانا وحوالينا ومحدش بياخد اكتر من نصيبه ولا اكتر من اللي مكتوبله بس لازم يكون في اختبارات في نص طريقك عشان الاختبارات دي هي أللي بتحدد مكانتك عند ربنا وهل تستاهل الخير أللي جايلك ولا لا !! وكل حاجة بتيجي في معادها ووقتها المناسب ولا بدري يوم ولا متأخرة ساعة كل حاجة في معادها ووقتها المناسب ليها ..زي بالظبط لو هتجيب هدية لخطيبتك في عيد ميلادها انت بتحضرها قبلها بكام يوم إنما بتدهالها في عيد ميلادها ولا هدية عيد الام بتكون مجهزها من قبلها ومعاك بس بتيجي تدهالها برضو في اليوم بتاعها لأن مينفعش تدهالها قبل كدة ولا بعد كدة زي مينفعش اجي ادبح مثلا بعد عيد الاضحي ولا قبله ..ولو جايب هدية غالية اوي لخطيبتك مثلا او حد عزيز عليك قبل ماتدهاله ممكن بتحطه في اختبار الاول عشان تشوفه هل يستاهل هدية غالية زي دي ولا لا ولو طلع اد الاختبار هتدهاله ولو طلع مش أده هتسحب هديتك وكانك ماجبتش حاجة وتروح تهادي بيها حد تاني يكون اد الاختبار أللي هتحطه فيه طيب ماهو ربنا برضو بيعمل معانا كدة بيكون بيهيأ لينا حياة جديدة جميلة هادية بس قبل مايدينا دة كله لازم يختبرنا هل نستحق دة كله ولا لا ولو صبرنا علي ابتلائه هيجازينا خير وماابتلاء الله لعبده الا محبة ودة ابتلاء من ربنا وانا راضية بيه وراضية بأي حاجة ربنا يجيبها ويختارها ليا هو عارف الخير ليا فين
مصطفي ولمعان عينيه بالدموع ويمسح دموع صافي: دموعك أغلي من حياتي ومحبش اشوفها .. وفعلاً كل كلمة قولتيها صح ومعاكي حق فيها وخلتيني اخد بالي من حاجات كتير مكنتش واخد بالي منها ربنا يقومك لينا بألف سلامة يارب ياحبيبة الروح والقلب ومشوفش فيكي اي حاجة وحشة يارب
صافي: ربنا يخليك ليا يارب
أيمن وهو يدخل: حبيبة بابا قاعدة في اوضتها واقول البيت ساكت وهادي ليه !!
صافي وهي تنهض وتحتضن والدها: حمد لله على سلامتك يابابا وحشتني اوي
أيمن: عاملة ايه ياحبيبتي
صافي وتنظر لمصطفي وتعيد نظرها لوالدها: الحمد لله ..الحمد لله يابابا
أيمن: مالك مخبية ايه عليا !!
مصطفي: صافي يابابا عندها كانسر مينفعش تخبي عليه حاجة زي كدة
أيمن بصدمة: انتي متأكدة ياصافي !!
صافي بدموع: متأكدة يابابا متأكدة
أيمن ويحتضنها: بس دموعك غالية اوي عندي ..من أمتي دة وليه ماقولتيش !!
صافي: لسة عارفة من شهرين تقريبا والدكتور اداني علاج لمدة ٣ شهور وبعد ال٣ شهور اروح اشوف اذا كان حميدي محتاج عملية ولا خبيث ومحتاج كيماوي ولو نسبة بسيطة تبقي عملية استئصال الجزء المصاب
أيمن بدموع: إن شاء الله يطلع حاجة بسيطة ومفيش حاجة
صافي: ادعيلي يابابا والحمد لله علي كل اللي يجيبه ربنا
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
سوسن بصدمة: ثريا !!
ثريا بضعف: ازيك ياماما
سوسن: وهو انتي خليتي فيها ماما !!
ثريا: طيب ممكن ادخل ونتكلم جوة ولا هتسيبيني واقفة كدة !!
سوسن: اتفضلي ..خير ياثريا راجعة عاوزة ايه تاني !!
ثريا: انا عارفة اني غلطت ياماما وغلط كبير اوي كمان بس ندمت وراجعة طالبة تسامحوني
سوسن: ندمتي !! انتي من يوم أما اتجوزتي ابني وانتي خلتيه مايعرفناش ولا كأنه ليه أهل وأخوه يجيله تطرديه !! انتي شايفة انك هتقدري تعيشي معاه بعد اللي عملتيه دة كله !! ولا هتقدري تبصي في وشه بعد دة كله !! سؤال واحد بس ليه !! ليه عملتي كل دة وكان هدفك ايه من دة كله !! اديكي خربتي بيتك بايدك وخسرتي جوزك وعيالك
ثريا ببكاء: ارجوكي ياماما خلاص انا غلطت وعرفت غلطي وندمانة عليه وكلنا بنغلط مفيش حد مابيغلطش وربنا بيسامح احنا مش هنسامح !!
سوسن: كلنا بنغلط صح وربنا بيسامح بس انتي عارفة يعني ايه ابنك يقعد ٥ سنين ماتشوفهوش !! عارفة يعني تبقي بتتمني وانتي كل يوم شايفاه بيكبر قدام عينيكي وفرحانة بيه وتتمني تشوفيه عريس واول ماتيجي اللحظة دي هي نفسها لحظة بعده عنك يعني فضلتي مستنية اللحظة دي واول ماتيجي ماتلحقيش تفرحي وتلاقيه بقي بعيد عنك احساس صعب لأي ام تحس بيه احساس يكسر اي حد مهما كانت قوته
ثريا: انا عملت كدة غصب عني عشان كنت بحبه ومن كتر حبي فيه عاوزاه ليا لوحدي مش عاوزة حد يشاركني فيه
سوسن بضحك: يشاركك فيه !! انتي يابنتي أللي جيتي شاركتينا فيه مش احنا انتي مش هتعيشي معاه اد ماحنا عيشنا معاه حتي لو عيشتي معاه كتير عمرك ماهتحبيه اد ماحنا بنحبه لانك ماشوفتهوش وهو بيكبر قدامك كل يوم لانك ماسهرتيش جمبه ليالي .. حب الام والاب لعيالهم مايتقارنش بحب أي حد تاني ليهم ومهما عملتي مش هتعرفي تخليه يكره أهله مفيش حد بيقدر يكره أهله مهما حصل لأنهم أهله وأمه وابوه اللي ربوه واول مانطق قال بابا وماما
ثريا: انا آسفة انا غلطانة
سوسن: والأسف هيعملي ايه !! عاوزة بس افهمك علي حاجة ليكي انتي .. مهما حبك عمره مايحبك اكتر من أهله أللي ربوه ولو عمل كدة اتاكدي أنه مش بيحبك لأن اللي مالوش خير في أهله مالوش خير في حد وأللي يفضل اي حد علي أهله اللي عاش معاهم بكرة يفضل عليكي وعلي عيالك حد تاني ومينفعش تخيريه مابينك انتي وعيالك وأهله لأن كل واحد فينا ليه جزء في حياته بيكمله وغياب اي طرف هيأثر فيه هو وعلي الطرف التاني وكل واحد ليه مكانة يعني انتي ليكي مكانة وعيالك ليهم مكانة واحنا لينا مكانة وهكذا وكلها حاجات مكملة لبعضها وانتي اللي ماعرفتيش تحافظي علي جوزك بسبب انانيتك طيب لو بتحبيه فعلا زي مابتقولي ليه انتي كمان ماقاطعتيش اهلك عشان تبقي ليه لوحده !!
ثريا: كلامك كله صح وحقك تقولي اكتر من كدة كمان
سوسن: ربنا يهديكي لنفسك
ثريا: انا آسفة وعرفت غلطي
سوسن: وجاية عاوزة ايه !!
ثريا: عاوزة رامي يرجعني لبيتي وعيالي
رامي من الخلف: انسي ياثريا انك ترجعي وشيلي امل انك ترجعي دة من دماغك خالص وانتي اللي بيعتي عيالك
ثريا بدموع: عشان خاطري يارامي ابوس ايدك سامحني والله هشيل اهلك فوق راسي بس ابوس ايدك ماتحرمنيش من عيالي
رامي: عيالك !! تخيلي عيالك لسة صغيرين يعني لسة مالحقتيش تعيشي معاهم ومش قادرة تستغني عنهم وراجعة تذللي نفسك عشانهم مابالك بقي بأم ربت ابنها ٢٥ سنة وبعد ماكبر وفرحت بيه فجأة بعد عنها ومابقاش معاها الاحساس صعب صح !!
ثريا ببكاء: لو لسة جواك ذرة حب ليا بلاش والنبي تدوقني طعم الوجع فيهم وفي بعدهم عني
رامي: جربي ..جربي أللي عملتيه وحسي بإحساس عيشتي فيه عيلة كاملة حسبي الله ونعم الوكيل فيكي بس اقولك علي حاجة انا الغلطان ..انا الغلطان أما صدقتك ومشيت وراكي غلطان أما بعت الدنيا كلها عشانك وانتي ماتستاهليش روحي ياثريا الله يسهلك حالك وانسي عيالك لانك ماتعرفيش يعني ايه عيال وام وأما تعرفي وتحسي ابقي تعالي اسألي عليهم واطمني عيالك احسن مايكونوا معاكي
ثريا بانهيار: رامي عشان خاطري وحياة عيالك تسامحني ابوس رجلك ورجل امك و ابوك وعيلتك كلها بس تسامحني وماتحرمنيش من عيالي الا عيالي يارامي انا حسيت بغلطي وحسيت بالوجع دلوقتي ابوس رجلك خلاص
رامي: احصدي بقي أللي زرعتيه واشربي من نفس الكأس أللي سقيتي بيه غيرك .. وآسف مش هقدر ارجع ثقتي فيكي من تاني
سوسن بحزن: خلاص يارامي عشان خاطري سامحها وهي عرفت غلطها وخليها في وسط عيالها
رامي: مش هقدر والله ياأمي مش قادر ابص في وشها بعد ماعرفت كل أللي عملته ولا قادر اعيش معاها مش قادر مش قادر
ثريا: رامي خلاص والنبي هعيش خدامة تحت رجلك بس عيالي يارامي عيالي كلميه والنبي ياماما
رامي وهو يخرجها خارج البيت وهي منهارة وتزعق ولكنه لايرد وكأنه لايسمعها حتي أخرجها واغلق الباب وهو يدخل"
سوسن بحزن: دي مهما كان أم يابني حرام تحرمها من عيالها وعرفت غلطها وراجعة ندمانة عليه
رامي: ساعات كتير ياأمي في حاجات بتموت جوانا مبنعرفش نحييها تاني وغلطات كتير ممكن نغلطها تكسر ثقتنا وثقة أللي حوالينا فينا وبيكون ولا الف ندم يصلح دة ولا يرجع الحب أللي جوانا زي الاول تاني
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
أدهم وهو يدخل البيت بضعف ويذهب لغرفته ويأتي حازم بعده بوقت قليل لتخبره سميحة بأنه ذهب إلي غرفته
حازم: ايه ياعم مالك اول مرة تمشي بدري ومن غير ماتقول
أدهم: معلش تعبان ياحازم ومحتاج ارتاح
حازم ويجلس بجانبه: مالك ياادهم الحزن مالي عينيك ليه !!
أدهم بضعف: ياسمينا سابتني ياحازم ورمتلي الدبلة
حازم بصدمة: ايه !! ليه تعمل كدة !!
أدهم: مفكراني بتسلي بيها ومش بحبها وبحب واحدة تانية غيرها وماتعرفش اني ماحبتش ولا هحب غيرها
حازم: طيب اهدي بس وفهمني ايه اللي حصل بالراحة
أدهم: انا هحكيلك علي كل حاجة
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
مختار: تعالي ياحنين عاوز اتكلم معاكي
حنين بإبتسامة: اتفضل يابابا
مختار: انتي يابنتي مبسوطة بالخطوبة دي ومرتاحة ولا لا !!
حنين: ليه بتقول كدة يابابا !!
مختار: عشان انا عارفك يابنتي وعارف اللي في دماغك وخايف يطلع صح
حنين: وايه هو يابابا اللي في دماغي وحضرتك عرفته وخايف منه !!
مختار: خايف يابنتي تكوني وافقتي بس عشان تنسي كمال ولقيتي نفسك مش قادرة تنسيه لوحدك فقولتي توافقي واهو حد يعوضك عنه وينسهولك وتبقي وافقتي عشان تنسيه بس مش اكتر ..بس لو عملتي كدة فأنا بقولك بلاش يابنتي عشان حرام تظلمي حد معاكي كل ذنبه أنه حبك حرام تاخدي منه مشاعر ومايبقاش في تبادل منك ليه هتظلميه معاكي عشان مش هتعرفي تديله المشاعر أللي هو عاوزها إنما هتاخدي عشان تنسي وعشان تحققي دة فلازم هيبقي في ظلم
حنين: تفتكر يابابا بقالي ٣ سنين بحاول أنساه وماقدرتش ومعرفتش تفتكر اني ممكن اقدر أنساه دلوقتي !! واستحالة حد يحل محله عندي وفي قلبي انا وافقت عشان لقيت حبي في عينيه نفس الحب اللي كنت بشوفه في عيون كمال أما ابصله وافقت عشان تعبت من كتر الحزن أللي موت قلبي واكل فيه مخلاش منه حاجة وافقت عشان كان لازم أوافق عشان لازم ارجع اكمل حياتي ومش معني كدة اني نسيت كمال أو هنساه بس الحزن في القلب مش علي الوشوش
مختار: انا خايف عليكي بس يابنتي ومش عاوزك تكوني بتعملي حاجة غصب عنك عشان خاطر حاجة تانية لانك هتبقي انتي الضحية في الآخر وبدل ماهيكون وجع واحد هيبقوا اتنين والاتنين فراق فكري كويس يابنتي وشوفي انتي عاوزة ايه بالظبط وأللي بتعمليه دة ليه وعشان ايه وإن في إنسان مالوش اي ذنب ممكن يتظلم معاكي في حكاية مش حكايته خلي بالك من نفسك
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
حازم: مش عارف اقولك ايه والله بس انتو الاتنين غلط
أدهم: لو هتأنبني يبقي اسكت احسن
حازم: ولا هأنبك ولا بتاع ..انت غلطت أما نزلت مع آمال أصلا ونسيت معاد خطيبتك وهي غلطانة أما استعجلت ومسمعتش منك ومدتكش فرصة تشرحلها الموقف
أدهم: مانزلتش مع آمال عشان غرقان في حبها ولا دايب في غرامها نزلت معاها عشان لجئتلي وقالتلي أنها في مشكلة ومحتاجة اقف جمبها وقبل اي حاجة فهي لسة بنت خالتي بعيدًا عن أي مواضيع تانية بقي
حازم: خير خير ياصاحبي ياسمينا بتحبك وأللي بيحب بيضحي وبيستحمل هي بس محتاجة وقت تهدي
أدهم: خايف ..خايف ياحازم أتوجع للمرة التانية بس المرة دي بقي هيكون الوجع أشد لأني حبيت بجد وعرفت يعني ايه حب معاها عارف وانا معاها بحس اني لأول مرة احب واني محبتش ولا مرة قبل كدة اكتشفت حبي لآمال ماكنش حب وإن حبي لياسمينا هو أللي اقدر اقول عليه حب وعشق كمان ..كنت بشوف في عينيها حبي وخوفها عليا وقلقها لحد آخر لحظة كنت شايف حبي في عينيها مختلط معاه الحزن والصدمة وكأنها بتقولي هونت عليك !! اكتشفت أني محبتش ولا هحب ولا هعرف احب غيرها ولو سابتني مش هعرف اكمل حياتي لاني مش هشوف غيرها في عيني
حازم: اول مرة اشوفك كدة في ايه بس ماتقلقش خير إن شاء الله سيبها بس تهدي شوية وهتلاقيها بتكلمك وتحكيلك كل حاجة وهتسمع منك كل حاجة بس انت روق كدة وثق في ربك
أدهم: يارب إن شاء الله خير
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
شاكر: ايه ياحبيبتي قاعدة ليه كدة !!
سوزان وتنهض وتمسح دموعها: هحضرلك الغدا
شاكر أوقفها ويرفع وجهها بيده: انتي كنتي بتعيطي !! في ايه !!
سوزان: مفيش انا كويسة
شاكر ويجلسها علي السرير: تعالي بس اقعدي واحكيلي مالك
سوزان: خايفة ياشاكر خايفة اوي
شاكر بحنان: خايفة من ايه بس ياحبيبتي
سوزان: خايفة صافي تروح مننا خايفة اصحي في يوم انها مش موجودة وكل أما اتخيل اتعب خايفة يحصلها اي حاجة بعيد الشر حقيقي انا مش هقدر اتحمل اي حاجة تحصلها خايفة اروح البيت مالقهاش ويتبقالي منها شوية ذكريات سايبهالي تعذب فيا
شاكر ويحتضنها: طيب بس بس اهدي بعيد الشر عليها وإن شاء الله تبقي كويسة ومفيش حاجة وحشة تحصل وترجع احسن من الاول كمان مليون مرة بس ثقي في ربنا وادعيلها
سوزان: والله بدعيلها بس مش قادرة اشوفها كدة قدامي مش قادرة اشوفها أنها تعبانة كدة وبتتوجع بس كاتمة الوجع جواها ..عارف !! صافي مش اختي الصغيرة بس صافي كمان بنتي عشان هي اصغر واحدة فينا فكانت دايما متدلعة اكتر واحدة وأما كنت اتضايق من كدة ماما كانت دايما تقولي معلش هي الصغيرة واصغركم لحد مابدأت انا اكبر وكل مابقيت بكبر بقيت بشوف صافي دي بنتي انا أللي كنت بعملها كل حاجة هي عاوزاها ومحبش حد ييجي جمبها ويزعلها ولو كان حد زعلها أو عملها حاجة كانت تيجي تستخبي فيا وتقولي احميني ماكنتش تنام الا معايا وفي حضني شوفتها بتكبر قدامي واحدة واحدة وكأنها بنتي وبقيت فرحانة ومبسوطة بيها وكل ماتكبر تتعلق بيا اكتر وانا روحي بتمسك فيها اكتر وبقيت بشوفها بنتي أللي كبرت قدام عنيا وعلي ايديا لحد اما انت جيت وخدتني منها واول أما اتخطبنا كانت بتغير منك عشان بقت حاسة انك خدتني منها بعد دة كله ويبقي سهل عليا اشوفها كدة !! سهل عليا اشوف أللي كانت شقية وتجري وتلعب قدامي دلوقتي بقت مكسورة ضعيفة مش قادرة حتي تتكلم كل دة مش سهل عليا والله
شاكر وأخذها بين أحضانه: طيب بس خلاص أهدي ..اكيد ربنا ليه حكمة في أللي بيحصل دة واداها الحاجة دي لأمر معين اختبار ليها واحنا لازم نشجعها انها تعدي الاختبار دة مش نضعفها فاهماني !! كل حاجة عند ربنا بترتيب ومعاد وسبب محدش غيره سبحانه يعرفه وبعد كدة بيبينلنا حكمته من أللي حصل وأللي عدينا بيه بس لازم عشان نقدر نعدي الاختبار دة وننجح فيه لازم يبقي عندنا ثقة بربنا وقوة ايمان وحسن ظن بيه ونقرب منه بالدعاء وهو قادر يخفف وجعنا أللي جوانا
سوزان: وانا مش معترضة علي قضاء ربنا وقدره الحمد لله علي كل شيء
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
سوسن: أيوة ياسامية كدة ماتسأليش من يوم كتب الكتاب !!
سامية بدموع: معلش ياسوسن غصب عني والله
سوسن: مال صوتك فيكي ايه !!
سامية بتمثيل: انا كويسة دة شوية برد بس وهيروحوا
سوسن: قلبي وعقلي لأول مرة يتفقوا علي احساس
سامية: واحساسك ايه أللي اتفقوا عليه دة بقي !!
سوسن: شايلة جواكي وساكتة كتير والحمل تقيل عليكي محتاجة تنزلي علي كتاف حد يشيل معاكي
سامية بدموع: انا تعبانة اوي ياسوسن وجوايا كلام كتير نفسي أطلعه ومش عارفة أطلعه ..ولا عارفه أطلعه ليه ولمين كل اللي عارفاه اني مابقتش كويسة
سوسن: طيب اقفلي اقفلي انا جيالك مسافة السكة واكون عندك
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
حازم: بقولك ايه يا أدهم والنبي كنت عاوزك تمضيلي هنا
أدهم: مش وقته ..مش وقته خليها وقت تاني
حازم: مش وقته ايه بس دي صفقة مهمة جدا
أدهم بعصبية ويخبط علي المكتب: قولتلك مش وقته خلاص بقي ياحازم
حازم: مالك يا أدهم في ايه !!
أدهم: معلش ياحازم ماتزعلش مني انا اعصابي بايظة بس
حازم: انا عمري ماازعل منك وانت عارف كدة كويس انا بس زعلان عليك ونفسي اني اطمن عليك
أدهم: ادعيلي ادعيلي ياحازم
حازم: بدعيلك دايما لانك جزء من دعائي ياصاحبي
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭
أمل: ايه يابنتي فينك لازم اجيلك البيت يعني عشان اوصلك
ياسمينا بنوم: أمل ازيك وحشاني والله
أمل: لا دي الهانم البرنسيس لسة نايمة معقولة !!
ياسمينا وهي تنهض: تعالي اقعدي اتنيلي وبطلي تريقة
أمل وهي تجلس بجانبها: طبعا ماهو الكلام مش عاجبك هقولك ايه بس رنيت عليكي ميت مرة وانتي ولا هنا اتاري الهانم نايمة ومش سامعة التليفون دة كله
ياسمينا وتمسك بهاتفها: فين ال١٠٠ دول دة ٥مرات بس
أمل: ماشاء الله انتي كمان بتهزري
ياسمينا: سيبك انتي من دة كله وقوليلي عاملة ايه
أمل: الحمد لله انتي اللي عاملة ايه ومختفية فين كدة !!
ياسمينا: ولا مختفية ولا حاجة اديني موجودة اهو
أمل وتمسك بوجهها: مال عينيكي !!
ياسمينا بتوتر: مالها !!
أمل: عينيكي شبه ماتكون وارمة أنتي كنتي معيطة !! وفيها حزن وكلام كتير وباين مانشفتش من الدموع
ياسمينا: مابقتش تفرق كتير ياامل لأننا لو ركزنا شوية في حياتنا هنكتشف انها كانت كلها حزن ووجع والم ومن أقرب الناس لينا هنكتشف انها ماكنش فيها فرحة فرحنا بيها
أمل: ليه بتقولي كدة !! شوفتي ايه في حياتك عشان تقولي الكلمتين دول !!
ياسمينا: شوفت ايه !! انتي مش عارفة انا شوفت ايه !!
أمل: حبك من مصطفي بنيتي الكلام دة كله علي حاجة واحدة حصلت !! عاوزة تعيشي حياتك كلها في راحة وسعادة وضحك ولعب وهزار !! طيب ليه مثلا ماعممتيش حياتك كلها علي السعادة وتشيلي الموقف دة زي ماعملتي دلوقتي نسيتي كل أللي فات ومسكتي في حاجة واحدة يعني ليه مثلا مانسيتيش الحاجة دي ومسكتي في كل أللي فات زي ماعملتي دلوقتي العكس يعني بمعني أصح.. اومال ياعيني الناس أللي دايما عايشة في مشاكل دي تعمل ايه تروح تموت نفسها بقي ..حياتك كلها عاملة زي الصفحة الكبيرة البيضاء اللي مافيهاش نقطة حبر اسود وجيتي بالغلط عملتي نقطة في اخر الصفحة روحتي سايبة الصفحة كلها ومسكتي في النقطة اللي في الاخر !! ليه مثلا مامسكتيش في الصفحة البيضاء مع انها اكتر واكبر !! ليه مسكتي في النقطة وبنيتي عليها كل الكلام دة مع انها حاجة مش مستاهلة ومابقاش ليها لازمة دلوقتي ليه مصرة تدخلي نفسك في مرحلة انتي مش قدها !!
ياسمينا سكتت ماعرفتش ترد عليها تقول ايه لأنها حست إن كلامها كله صح وهي مزودة الموضوع فعلاً
أمل: سكتي يعني !! مش عارفة تردي طبعا تقولي ايه
ياسمينا: خ.. وقاطعها صوت رنين هاتفها لتقول أمل: ماتردي علي موبايلك
ياسمينا: لا مش عاوزة أرد
أمل وهي تمسك بالهاتف: دة أدهم
ياسمينا: وفيها ايه ؟!
أمل: لا انتي بقي اللي هتقوليلي فيها ايه
ياسمينا بتوتر: اقولك !! اقولك ايه !!
أمل: متخانقة معاه !! وليه !!
ياسمينا: لالا مش متخانقين وهنتخانق ليه بس
أمل: للأسف حتي مش عارفة تكدبي لانك عمرك ماكدبتي ولا فكرتي تكدبي
ياسمينا: وهكدب ليه بس ياامل !!
أمل: ممكن عشان تكوني شايفة نفسك الغلطانة بس مش عاوزة تسمعيها من حد ولا حد يفضل يقطم فيكي ويغلطك بس من جواكي عارفة انك الغلطانة ايا كانت ايه المشكلة انا معرفش بس مادام كدة يبقي انتي الغلطانة وعشان كدة مش عاوزة تحكي
ياسمينا: انا هحكيلك علي كل حاجة بس مش دلوقتي عشان انا تعبانة بجد ومش قادرة اتكلم في الموضوع
امل: وانا مش هضغط عليكي بس وقت ماتحبي تتكلمي انا موجودة
ياسمينا: ربنا يخليكي ليا يارب
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
حازم: هو انا ممكن أسألك سؤال ياحنين !!
حنين: اه طبعا اتفضل
حازم: هو انتي ليه دايما اغلب الوقت ساكتة وسرحانة !! انتي متضايقة من حاجة !! ولا حاسة نفسك اتسرعتي في قرار الخطوبة مني وندمانة !!
حنين: لالا طبعا ايه اللي بتقوله دة ليه بتقول كدة !!
حازم: عشان انتي محسساني بكدة طول الوقت ساكتة وسرحانة وكمان ماتنسيش انك رفضتيني في الأول
حنين: بص ياحازم انا أما رفضت مش رفضت عشانك انت مش لشخصك يعني أنا رفضت لسبب تاني خالص مالوش علاقة بيك نهائي وبعيد عنك تمامًا
حازم: اقدر طيب اعرف السبب ايه دة يمكن اقدر اساعدك فيه لانه اكيد هو السبب في اللي انتي فيه دلوقتي معايا
حنين: تخرجني منه !! انا حاولت كتير لكن محاولاتي كلها كانت بالفشل
حازم: انسي اي حاجة ياحبيبتي وانا معاكي وماتفكريش في أي حاجة ممكن أنها تضايقك أو تزعلك انا هنا معاكي عشان اسعدك وارسملك الضحكة علي وشك وبس
حنين: ربنا يخليك يارب انت شخص طيب اوي ياحازم
"وقاطعهما صوت رنين هاتف حازم"
حازم: دة أدهم ..أيوة ياادهم
أدهم: انت مشيت روحت فين يابني !!
حازم: انا مع حنين ..في حاجة ولا ايه !!
أدهم: اه خلص وتعالالي عاوزك ورانا شغل
حازم: حاضر هنتغدي واجيلك
أدهم: ابقي سلملي علي حنين
حازم: الله يسلمك يوصل ..واغلق الهاتف وهو ينظر لحنين: أدهم بيسلم عليكي
حنين: الله يسلمه في حاجة ولا ايه !!
حازم: لا عشان اتأخرت علي الشغل بس وادهم عاوزني باين
حنين: اه ربنا معاك يارب
حازم بإبتسامة: مش هنتغدي بقي ولا ايه !!
حنين بإبتسامة: هنتغدي يلا
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
ملك بسعادة: حمد لله علي سلامتك ياحبيبي
احمد بإبتسامة: الله يسلمك ياحبيبة قلبي ..بس لسة مش اوي
ملك: بس كنا فين وبقينا فين الحمد لله بدأت تبقي احسن اهو الحمد لله
أحمد: انا كويس بوجودك جمبي ومعايا
ملك: وانا العمر كله جمبك ومعاك
أحمد: ربنا يقدرني واسعدك واعملك اكبر فرح يليق بيكي ويعبر عن حبي ليكي
ملك: وجودك معايا وكويس بألف فرح عندي انت فرحي الحقيقي وشفاك هو فرحتي الحقيقية
أحمد: ربنا يخليكي ليا يا احلي نعم ربنا عليا
ملك: ويخليك ليا يارب يارفيق الروح
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
حازم: ماتهدي ياادهم في ايه انت عمرك ماكنت كدة
أدهم: انا تتجاهلني !! اموت واعرف مين ورا الموضوع دة كله
حازم: اهدي بس وخير إن شاء الله
أدهم ويمسك بهاتفه ويحاول الاتصال ولكن دون جدوى فيخبط بعصبية علي المكتب: برضو مابتردش عليا بقالي يومين مش بترد
حازم: طيب اهدي عشان نشوف هنعمل ايه
أدهم: انا عرفت انا هعمل ايه .. "وطلع بعصبية وحازم يجري ورائه وهو ينادي عليه: أدهم أدهم استني بس لكن أدهم كان لايري أمامه ولا يسمع أحد حتي كان لايسمع نداء حازم وذهب في طريقه"
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
سوسن: خير ياسامية مالك في ايه !!
سامية بدموع: تعالي اتفضلي الاول ياسوسن ..ازيك يارامي ياحبيبي تعالوا اتفضلوا
رامي: الحمد لله ياخالتي انتي عاملة ايه
سامية: الحمد لله ياحبيبي
سوسن: مالك ياسامية بتعيطي ليه ماتفهميني في ايه !!
سامية بدموع: صافي ياسوسن صافي
سوسن بقلق: مالها صافي !!
سامية ببكاء: صافي عندها كانسر ياسوسن
سوسن بصدمة: من امتي وازاي !!
سامية: دة بتاع ربنا مش ازاي والحمد لله علي كل شيء ربنا يجيبه
سوسن: طيب وبتاخد علاج ولا ايه !! وهي عاملة ايه دلوقتي !!
سامية: اه أما كشفت الدكتور أداها علاج وقالها تاخده لمدة ٣ شهور وبعد مايعدي ال٣ شهور تروح تاني تعمل تحاليل واشاعات ويشوفوا إذا كان حميدي تعمل عملية ولا خبيث وهيحتاج لعملية استئصال الجزء المصاب ولا هتحتاج لكيماوي
سوسن: بإذن الله يطلع حميدي وتطلع حاجة بسيطة وتخف وتبقي زي الفل وترجع احسن من الاول كمان
سامية: يارب يارب ادعيلها ياسوسن
رامي: ألف سلامة عليها وربنا يتم شفاها علي خير يارب
سامية: الله يسلمك ..اللهم آمين يارب
رامي: اومال هي فين !! ندخل نطمن عليها
سامية: في اوضتها ياحبيبي خبط وادخلها شوفها صاحية ولا نايمة
رامي: تمام أنا هدخلها كدة مش هاتيجي ياماما !!
سوسن: لا روح انا عاوزة اقعد مع خالتك وهدخلها مع خالتك
رامي: تمام عن اذنكم ..وذهب رامي وقلبه يدق بسرعة إلي أن وصل إلي باب غرفتها وتردد كثيرًا قبل أن يطرق الباب لكنه طرق في النهاية فأذنت صافي بالدخول فدخل داخل الغرفة
رامي: ازيك ياصافي
صافي بصدمة: رامي !!!!
رامي: ألف سلامة عليكي ياحبيبتي
صافي: ......
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
ياسمينا بصدمة: أدهم !!!
أدهم: مش هتقوليلي اتفضل ولا ايه !!
ياسمينا: لا اتفضل طبعا
أدهم وهو يدخل ويجلس: مابترديش علي تليفونك قولت يمكن مش سامعاه ولا مش واخدة بالها قولت اجي اطمن عليكي بنفسي
ياسمينا: ايه جابك ياادهم !!
أدهم: مانا قولتلك جاي اطمن عليكي
ياسمينا: طيب شكرا واطمنت !!
أدهم: انتي ليه بتكلميني كدة وليه مش بتردي عليا فهميني في ايه !!
ياسمينا: أدهم انا كنت عاوزة اقولك علي حاجة
أدهم: ايه !!
ياسمينا بتوتر وتردد: ا..احنا...ا ..احنا لازم ننفصل
أدهم: ......
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
وقفلنا الفصل الرابع والعشرين علي إن ياسمينا طلبت من أدهم أنهم ينفصلوا
-ياتري رد فعل أدهم هيكون ايه !!
-ياتري هل كدة انتهت قصة حب أدهم وياسمينا !!
-ياتري ياسمينا صح في قرارها دة ولا لا !!
-ياتري حنين ممكن تحب حازم فعلاً !!
-ياتري رامي ممكن يسامح ثريا ولا لا !!
-تفتكروا ثريا تكون ندمت فعلاً !!
تفتكروا في حاجة بين رامي وصافي !!

وأسئلة كتير جدا بتدور في دماغنا وبندورلها علي اجابات وهنعرف إجاباتها في الأحداث الجاية إن شاء الله 💜✨
ماتنسوش تقولوا توقعاتكم ورأيكم وتعملوا تصويت وفولو علي الواتباد وتدخلوا جروب الفيس 💜✨

الي اللقاء في الفصل السادس والعشرون بإذن الله 💜✨
#بقلم_صباح_وحيد 💜✨