كنا قفلنا الفصل اللي فات علي أما ياسمينا راحت لادهم واغمي عليها فاقدة للوعي ..يلا بينا نكمل نشوف ايه اللي هيحصل !! قراءة ممتعة
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
ياسمينا وهي تتجه نحو الشركة بتعب شديد وتصعد لعند مكتب أدهم وتطرق الباب طرقات خفيفة غير منتبهة لمناداة هدير عليها ثم تدخل بكل هدوء وتعب شديد حيث تحدث هدير نفسها بحزن علي حالتها: فعلا وجع القلب قادر يهد الإنسان ربنا يهون عليكي يارب
ياسمينا وهي تتجه لمكتب أدهم لتكون مقابلة له وتقف دون كلام حيث يرفع هو بصره ليراها
أدهم: ايه جابك هنا !! وازاي تدخلي عليا كدة من غير اذني !! مش في حاجة اسمها ذوق انك قبل ماتدخلي علي حد تخبطي عليه !!
ياسمينا بتعب وتمسك بهاتفها: مين دي يا ادهم !!
أدهم وينظر للهاتف ثم ينظر الي وجهها المرهق لكنه تجاهل هذا وتحدث ببرود: اظن مابقاش شيء يخصك في حاجة ومش هيهمك لو عرفتي ..وبعدين انتي بتراقبيني !!
ياسمينا وبدأت تشعر بالدوار يتملك رأسها: جايز يكون عندك حق انت صح انا اللي استاهل
أدهم ببرود: وعلي العموم عشان اريحك برضو هقولك هي مين ..دي تبقي خطيبتي
ياسمينا بصدمة والدوار قد تملك رأسها: خ..خ...خط..خطيبتك !! وسقطت ياسمينا فجأة ودخلت في حالة اغماء فاقدة للوعي
أدهم بسرعة وبخوف: ياسمينا ..ياسمينا فوقي فوقي وبزعيق: هدير ...هدير
هدير وهي تدلف بسرعة: أيوة يا..ولم تكمل حين رأت ياسمينا فاقدة للوعي لتقول بخضة: مالها آنسة ياسمينا !!
أدهم بعصبية: انتي لسة هتقفي وتسالي مالها روحي اطلبي الإسعاف بسرعة وابعتيلي حازم بسرعة
هدير بتوتر: ح..حاضر
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
رامي: ايه ياصافي ساكتة ليه ماردتيش يعني !!
صافي: عاوزني ارد اقولك ايه !!
رامي: قولي اي حاجة
صافي: لو رديت ردي هيزعلك ومش هيعجبك
رامي: انا عمري ماازعل منك وانتي عارفة كدة كويس
صافي: انساني يارامي انساني وارجع لمراتك وولادك هما محتاجينك اكتر مني ولادك في حاجة ليك ولحضنك اكتر مني ارجع وخد عيالك في حضنك هما محتاجين دة دلوقتي وارجع لمراتك ماتظلمهاش ولو مش عشانها عشان عيالكم ماذنبهمش حاجة يتربوا بعيد عن حد فيكم ماذنبهمش حاجة يدفعوا تمن غلطتك ويتربوا مع مرات ابوهم ويتحرموا من امهم وهي موجودة حرام يتربوا بعيد عن حد فيكم ومهما كانت نسبة حبك ليا فدة مش هيعوضهم عن حنان أمهم محدش هيحبهم اكتر من امهم مهما كان فمابالك بقي انك عاوز تجبلهم واحدة غير امهم وغير كدة كانت حبيبتك الأولي تفتكر اني هقدر اتعامل معاهم !! تفتكر كل أما ابص في وشهم هحس بايه !! هبصلهم واتحسر علي نفسي واقول المفروض كانوا يبقوا عيالي انا !! هيبقي صعب عليا اوي اني اربي عيالك من واحدة غيري
رامي: هو صعب ارجع امهم الحياة بينا بقت صعبة ومستحيلة
صافي: ليه بتقول كدة !! حتي لو غلطت فعادي كلنا بشر وبنغلط وانت اول واحد غلطت انت مش ملاك ومحدش فينا ملاك كلنا بنغلط وبنرجع احنا مش كاملين ومحدش فينا كامل أما تبقي انت كامل ابقي دور علي حد كامل واكيد هتلاقي لو انت كامل فعلا إنما مفيش حد فينا كامل
رامي: انتي ماتعرفيش هي عملت ايه ولو عرفتي مش هتدافعي ليها كدة
صافي: ايا كان ايه هو اللي عملته فأكيد تصرفها دة كان ناتج كنوع من رد الفعل علي حاجة حصلت منك فبدل أما تبعد عنها وتتهمها كنت تقرب منها وتحتويها وتفهم منها السبب اللي وصلها أنها تعمل كدة واكيد كنت هتلاقي السبب وتحاول تصلحه لكن انت اختارت الطريق الأسهل لتحقيق هدف في دماغك وسيبتها مش عشان غلطت لكنك سيبتها عشان تحقق حلم كان حلمك زمان لكن اسفة مش انا اللي ابني سعادتي علي تعاسة حد ولا انا اللي اظلم اطفال مالهمش اي ذنب في اختيار ابوهم من البداية
رامي: جايز يكون كلامك صح بس مهما كان السبب ايه ميوصلهاش تعمل اللي عملته دة ..دي ياصافي بعدتني عن اهلي وطردت اخويا أما جالي واخويا عمل حادثة واتحجز في المستشفي وأما كلموني ماقالتليش وكانت هتخليني محضرش فرح اخويا ووقعت بيني وبين اهلي وكانت السبب في اني ابعد عنهم وكل دة من ورايا وأما كانوا بيكلموني كانت بتقفل في وشهم وتطردهم هي وصلت لكدة !! هي غلطت وتتحمل نتيجة غلطها
صافي: لاحول ولا قوة الا بالله ..ليه ماحاولتش تفهم منها السبب أللي خلاها تعمل كدة !! مستحيل تفكر تعمل كدة الا لو حصل حاجة اضطرتها أنها تلجأ لكدة فكان واجبك أما اكتشفت دة كنت قعدت معاها وفهمت منها إنما أنت أما صدقت وكأنك كنت بتتلكك ولو كان في حاجة مزعلاها منك فهي دلوقتي اتاكدت منها بتصرفك دة ..وقبل ماتحكم عليها انها هي الغلطانة ابقي شوف نفسك انت غلطت في ايه الاول عشان يكون دة رد فعلها اللي عملته ماكنش الا رد فعل علي حاجة انت عملتها ومش معني كدة اني بقول إن هي مش غلطانة لا طبعا هي غلطانة أنها فكرت واتصرفت بالطريقة دي وانت كمان غلطان انك مقعدتش وتفهم منها ايه اللي حصل وليه رد فعلها دة ماهو لكل فعل رد فعل فراجع نفسك وافعالك وانت تعرف رد فعلها دة ليه وعشان ايه ..عن اذنك
٭٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
ملك وهي تجري ويتبعها احمد: ياسمينا فين ومالها !! اختي مالها !!
احمد: اهدي شوية ياملك عشان نفهم من أدهم ايه اللي حصل ونطمن عليها
أدهم: ماتقلقيش ياسمينا هتبقي كويسة إن شاء الله ..ليقاطعهم خروج الدكتور ليذهب إليه أدهم سريعا وتتبعه ملك ليتحدث بقلق: طمني يادكتور
ملك ببكاء: لو سمحت يادكتور قولي اختي مالها
احمد: اهدي اهدي ياملك ادي فرصة للدكتور يتكلم ..ويوجه حديثه للدكتور: اتفضل يادكتور
الدكتور: هي كويسة ماتقلقوش دة بس شوية إرهاق وزعل وقلة اكل ومناعتها ضعيفة جدا ياريت تبعدوها عن أي ضغوطات نفسية أو أي زعل وياريت تخلوها تهتم بأكلها اكتر لأنها يعتبر مش بتاكل ومناعتها ضعفت جدا ودة طبعا هيكون ليه اثر بعد كدة عليها وعلي صحتها
أدهم بحزن: شكرا لحضرتك يادكتور
ملك وهي تدلف للغرفة: ياسمينا حبيبتي مالك حصل ايه
ياسمينا بتعب: انا كويسة ماتقلقيش ..مين قالك !!
ملك: أدهم ياحبيبتي اللي كلمني وقالي وجيتلك علطول انا وأحمد
أدهم بجمود: حمد لله علي سلامتك
ياسمينا وهي تراه لتبكي بهستيريا: خرجيه برة ياملك مش عاوزة اشوفه مش عاوزة اشوفه خليه يطلع برة
ملك وهي تربت عليها متعجبة حالتها: طب اهدي اهدي هيخرج خلاص اهدي ..ووجهت نظرها لأدهم: معلش يا..ولكنها لم تكمل عندما رأته يخرج من الغرفة بملامح منصدمة من ردة فعلها تلك عندما رأته ..لتكمل ملك: اهدي خرج خلاص اهدي
ياسمينا وبدأت تهدأ: مش عاوزة اشوفه ياملك مش عاوزة اشوفه
ملك: طب اهدي اهدي وفهميني في ايه
ياسمينا وتبدأ بالبكاء: مش قادرة اتكلم
ملك: طب خلاص خلاص اهدي ماتتكلميش بس اهدي كدة غلط عليكي ياحبيبتي الدكتور قال لازم تبعد عن أي انفعال
بينما بالخارج كان يقف مسندًا رأسه علي الحائط بحزن مغمض عينيه يفكر لما صرخت بتلك الطريقة عندما رأته !! هل كل هذا بسبب أنه أخبرها أنه قام بخطبة فتاة اخري !! هل غبية هي !! فهي تعلم أنه يحبها هي وحتي إن أخبرها بهذا لم يكن بحقيقة فربما أراد معاقبتها وتلقينها درسا لم تنساه ولكنه يبدو أنه أخطأ عندما اراد عقابها بتلك الطريقة فهو قد خسرها وكاد يفتقدها الان الي الابد ولم يعد يراها مرة أخري ..فقاطعه من شروده هذا صوت ملك وهي تحدثه: أدهم هو ايه اللي حصل بالظبط !!
احمد: خلاص ياملك مش وقته دلوقتي أما نطمن عليها الاول نبقي نشوف المواضيع دي بعدين
لينظر له أدهم بامتنان يشكره لإنقاذه من ذلك المآزق
ملك بضيق: تمام ماشي انا بس عاوزة اطمن علي اختي مش اكتر عاوزة اعرف ايه حصل وصلها لكدة !! عاوزة افهم في ايه بالظبط بقالها فترة مش مظبوطة وانا معرفش فيها ايه متغير مش دي اختي اللي كانت ضحكتها مابتختفيش من علي وشها بقت مطفية بهتانة
أدهم: انا عندي استعداد احكيلك كل حاجة لو هتسمعيني
ملك: بص يا ادهم انا مش هقولك اختي مابتغلطش لا بتغلط ويمكن تكون كمان هي الغلطانة بس اما هي تغلط انت تصلح إنما مش انتو الاتنين تقفوا لبعض علي الواحدة هي غلطت فتقوم انت تعاقبها من نفسك من غير حتي ماتعرفها وهي نفس الكلام أما أنت تغلط ماتقولكش طيب وبعدين !! ماهو كدة محدش فيكم هيعرف غلطه لأن كل واحد فيكم بيعاقب التاني من غير علمه بغلطه ومن غير حتي عتاب يبقي كأن العقاب مالوش لازمة ولا هتتعلموا منه لأنكم انتو مش عارفين أنه عقاب ولا علي ايه فمش هتعرفوا غلطكم .. الحب مش قسوة ولا خناق الحب حنية واحتواء واني أما اغلط تعرفني غلطي براحة وتفهمني ولو اتقرر تاني تعرفني وتعاقبني عليه بس وانا معاك مش بعيد إنما مش عقاب عشان غلطت من غير مااعرف أنه عقاب ولا علي ايه ماطبيعي اقرره تاني وتالت ورابع كمان ومش هاييجي في بالي أنه عقاب لكن هاييجي في بالي اني وجودي مابقاش فارق وفي النهاية هكون برضو ماعرفتش الغلط فين ولا أنه عقاب عشانه ..انا معرفش ايه اللي حصل بينكم بس اتمني تكون فهمت كلامي
احمد: خلاص ياملك مش وقته الكلام دة أما نطمن عليها نبقي نقعد ونتكلم ونفهم في ايه
أدهم: سيبها يااحمد دي برضو أختها ومعاها حق في كل الكلام اللي قالته ..بس ياملك انا عملت كدة وهي رفضت تديني مبرر للي عملته واختارت اننا نبعد من غير أما افهم السبب ليه ولا عشان ايه مين بقي الغلطان دلوقتي !! انا برضو !! انا اتذليت ليها بدل المرة مليون عشان تفهمني حاجة وقالتهالي انا مش عايزاك ورفضت تقولي سبب وسابتني في حيرتي ومابقتش ترد عليا المفروض اني اعمل ايه اكتر من كدة !! اركع تحت رجليها !! وبعد دة كله كمان جاية تشيليني ذنبها !! لو حد ظلم التاني هتكون هي اللي ظلمتني مش انا ..عن اذنكم
احمد: عاجبك كدة كان دة وقته يعني !!
ملك: غصب عني ..غصب عني يااحمد دي اختي ومش قادرة اشوفها كدة ومعملهاش حاجة
احمد: انا معاكي بس مش عشان اختك يبقي مش هتكون غلطانة ونوقع اللوم كله عليه قبل أما نسمع منه زي ماسمعنا منها ولا ايه !!
ملك: انت فعلا معاك حق انا اتسرعت بس غصب عني ..انا هروح اعتذرله عن اسلوبي دة وسوء التفاهم
وذهبت ملك وأحمد خلفها لمكان أدهم الذي يجلس به فوجدوه يجلس علي احدي الكراسي بممر المشفي مسندا رأسه للخلف مغمضا عينيه لتهم ملك بالتحدث بإحراج: أدهم انا اسفة انا مقصدش والله انا بس انفعلت شوية غصب عني أما شوفتها كدة وانهيارها اول أما شافتك
أدهم ويفتح عينيه بالم وينظر لهما ببرود: ولا يهمك حصل خير
احمد: أدهم ملك ماتقصدش هي بس انفعلت مش اكتر
أدهم: مفيش حاجة عادي ..عن اذنكم
ملك: رايح فين !!
أدهم ويلتف لها بتعب: همشي بيتهيألي عملت اللي عليا وهي بقت كويسة وجودي مابقاش ليه لازمة خصوصا لو هي اللي رافضة وجودي وانا مش بجبر نفسي علي حد مهما كنت بحبه حتي لو كانت هي ومش عاوزاني همشي ومش هجبر نفسي عليها عشان ماتبقاش بتتعامل معايا تحت ضغط ولأن كرامتي متسمحليش اني افضل موجود بعد أما رفضتني ..عن اذنكم
ملك:انا مش عارفة ايه اللي بيحصلنا دة بجد انا تعبت يااحمد
احمد: انا مش فاهم ايه اللي حصل يخلي ياسمينا ترفضه كدة !! والله هتخسر أدهم ومش هتلاقي حد يحبها زيه ولا هتلاقي حنيته واهتمامه في حد تاني مش هتلاقي حد يحسسها بالأمان والحماية زيه ..عارفة أدهم أما بيحب بيدي كل حاجة كل حاجة حرفيا مش بيبخل باي حاجة ولا بمشاعره ولا بحنيته ولا بأي حاجة حقيقي هتخسره وترجع تندم في وقت مينفعش فيه الندم
ملك: انا معرفش ياسمينا مالها فيها ايه الفترة دي وبتتصرف بعصبية من غير ماتحسب الموقف ودة غلط وهيخسرها كتير وانا مش عاوزاها تخسر أدهم لأنها حبيته بجد وكفاية وجع قلب بقي
احمد: إن شاء الله خير ياحبيبتي ومفيش حاجة
ملك: يارب يااحمد يارب
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
وفي صباح اليوم التالي
سميحة: أدهم أدهم حبيبي يلا اصحي
أدهم بنوم: النهاردة إجازة ياماما مفيش شغل
سميحة: هتفضل نايم لأمتي ياحبيبي احنا بقينا الساعة ٣ العصر
أدهم بنوم: وايه يعني ياماما مانا طول الاسبوع مبعرفش انام اعوض بقي في يوم الإجازة
سميحة: طب مش المفروض يوم اجازتك دة تنزل تقضيه مع خطيبتك وتفسحها !!
أدهم وقد انقبض قلبه عندما جاءت سيرتها ولم يرد علي والدته
سميحة: ادهم انت مش بترد عليا ليه في ايه !!
أدهم: مفيش ياماما انا تمام انا هقوم افوق كدة واجي علطول
سميحة: لا في حاجة ياادهم مخبيها عني مالك وليه اما جت سيرة ياسمينا ملامحك اتغيرت كدة وتتهرب !!
أدهم بتنهيدة: عشان انا وياسمينا سيبنا بعض وماتسألنيش ليه لاني انا نفسي مش عارف ليه هي طلبت كدة ودي رغبتها
سميحة بصدمة: امتي دة حصل وازاي !! ومنكم لنفسكم كدة تقرروا مالكوش أهل !!
أدهم: هي عاوزة كدة وقالتلي مش عاوزة تكمل أجبرها ولا اعمل ايه !!
سميحة: وايه السبب ؟!
أدهم ببعض العصبية: معرفش ابقي اسأليها بقي بس انا عن نفسي الموضوع منتهي واتقفل ومش عاوز افتحه تاني ..عن اذنك ياماما
سميحة: أدهم انا بكلمك ولسة مخلصتش كلامي
أدهم ويلتف لها: وانا معنديش كلام تاني اقوله والإجابة عندها صدقيني مش عندي وانا مابقاش فارقلي اعرف ليه كدة كدة مش هيغير حاجة وهي اللي اختارت ..عن اذنك بقي ياماما
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
ملك: حمد لله علي سلامتك ياحبيبتي نورتي بيتك
سهير ببكاء: اختك مالها ياملك وايه اللي حصلها !!
ملك وتحتضنها: اهدي ياماما ياسمينا كويسة وزي الفل ماتقلقيش هي بس كان عندها شوية إرهاق والدكتور قال مش بتاكل ولازم تهتموا بيها
سهير وتقترب من ياسمينا: الف سلامة عليكي ياحبيبتي حصل ايه بس !!
ياسمينا بتعب: ماتقلقيش ياماما انا كويسة انا بس تعبت شوية ودة شوية إرهاق بس
سهير ببكاء: سلامتك ياحبيبتي يارب مشوفش فيكي حاجة وحشة
احمد: حمد لله على سلامتك ياسمينا
ياسمينا: الله يسلمك يااحمد تسلم يارب تعبتك معايا
احمد: مفيش حاجة ماتقوليش كدة انتي اختي ..وقاطعه دق جرس الباب
ملك: مين اللي هاييجي دلوقتي انا هروح اشوف مين
احمد: عن اذنك ياماما وانا هروح اصلي
ملك وهي تفتح لتتفاجئ بوجود سميحة والدة ادهم
سميحة بابتسامة: ازيك ياملك
ملك مبادلة الابتسامة: اهلا اهلا ازي حضرتك ياطنط اتفضلي
سميحة وهي تدخل: تسلمي ياحبيبتي انا اسفة طبعا اني جيت من غير ميعاد بس انا كنت محتاجة اقعد واتكلم مع ياسمينا شوية لو ينفع
ملك: لا طبعا ماتقوليش كدة ياطنط دة بيتك وتنوري اي وقت
سميحة: تسلمي ياحبيبتي وربنا يخليكي يارب ..اقدر أقابل ياسمينا ولا مش موجودة !!
ملك: اه طبعا تعالي اتفضلي معايا ياطنط هي في أوضتها بس معلش تعبانة شوية
سميحة: مالها !! الف سلامة عليها
ملك: الله يسلم حضرتك إرهاق بس ..تعالي اتفضلي
سهير: مين ياملك !!
ملك: دي طنط سميحة ياماما مامة أدهم جاية عاوزة تقعد مع ياسمينا شوية
سهير بترحيب: اهلا اهلا وانا اقول البيت نور ليه
سميحة مبادلة للترحيب: منور بناسه ..وتتجه بنظرها لياسمينا: الف سلامة عليكي ياحبيبتي ملك قالتلي انك تعبانة شوية مالك !!
ياسمينا: الله يسلم حضرتك ياطنط
سهير: اتفضلي خدي راحتك دة بيتك التاني وانا هروح اعمل الغدا واعملي حسابك تتغدي معانا بقي
سميحة: يدوم يارب ربنا يخليكي يارب
سهير: ربنا يخليكي عن اذنك ..يلا ياملك
"وبعد خروجهم وظلوا بمفردهم تحدثت سميحة قائلة: وبعدين بقي ياسمينا مش هتقوليلي مالك في ايه !!
ياسمينا: اقول ايه ياطنط !! انا كويسة ماتقلقيش
سميحة: انا أدهم قالي انكم سيبتوا بعض ومش فاهمة ليه وايه اللي حصل !! وأما سألتوا عن السبب قالي أسألك انتي
ياسمينا: بس انا مش حابة اتكلم في الموضوع دة
سميحة: حبيبتي انا عاوزاكي تحكيلي حصل ايه وصلكم لكدة ايه السبب اللي يخليكم تاخدوا قرار زي دة كدة مع نفسكم !!
ياسمينا: أقول حضرتك ايه بس ياطنط اقولك اني عملت اللي عملته من حبي وخوفي عليه وفاكرة اني كدة بحميه وبحافظ عليه واكتشفت بعد كدة اني بضيعه وفعلا ضيعته من بين ايديا بسبب تسرعي وأما فهمت دة وروحتله رفضني هو حقه طبعا بس كنت مستنية منه يقبلني ويفهمني الصح من الغلط ويقبل اعتذاري ويقدر حبي وخوفي لكن هو فاجئني بعكس كدة خالص
سميحة: بصي يابنتي هقولك علي حاجة مهما كان اللي حصل بينكم دة خلاص بقي ماضي ومينفعش نقلب فيه انا بس عاوزة اقولك ماتخسريش أدهم هو اه ممكن يكون بعد عنك شوية وكدة بس اوعي انتي تبعدي اوعي تحسسيه انك بعتي ا..قاطعتها ياسمينا بابتسامة حزينة مصاحبها دموع ببطيء: هو بعدني ياطنط بعدني عن حياته نهائي أما روحتله ومتحملتش بعده اكتر من كدة روحتله وحكيتله اللي حصل واني كنت خايفة اخسره مقدرش دة كله وقالي مابقاش يفرق معايا اعرف اللي حصل ماهانش عليه يطمني بكلمة يحسسني اني لسة فارقة حتي لو غلطت يعاقبني بس وانا معاه وجمبه مش بعيد عنه يعرفني اني غلطت مش يسيبني يقدر اني عملت دة كله عشانه وعشان بحبه إنما هو ماشافش دة كله ومسكلي في الغلطة حضرتك عاوزة تعرفي ايه هي !! انا هقولك ..جالي مكالمة تليفون فيها تهديد اني لو مبعدتش عن أدهم هيتأذي وإن وجودي معاه بيأذيه ولو عرفته أو قولتله اي حاجة هيحرموني منه ويأذوه أو ..أو..قاطعتها سميحة بحنية: كملي ياحبيبتي كملي انا سامعاكي اهدي كدة واتكلمي علطول ماتخافيش
ياسمينا بصعوبة: أو هيخلوه هو اللي يسيبني بعد أما يعرف اني اعرف واحد تاني غيره وهيبعتوله صور وانا قاعدة معاه واني كدة بخونه وفي الوقت دة هيكون كرهني فالاحسن اني انا اللي ابعد عشان هيفضل لسة فاكرني وجواه حبة حب ليا حتي لو صغيرين إنما لو معملتش كدة فهيكون بقي بيكرهني ومش طايق يبص في وشي وانا خوفت ..خوفت يكرهني ويسيبني انا بقيت في حيرة مش عارفة ولا اقوله ولا عارفة اني ابعد عنه وأما منفذتش كلامهم هددوني تاني بس المرة دي بقي بمكالمتهم معايا واني انا اللي قولتلهم يعملوا كدة فخدت القرار اني ابعد عشان مخسروش بس براقبه من بعيد وبطمن عليه واما تعبت في بعده ولقيت نفسي مش قادرة اسكت اكتر من كدة ولا اتحمل روحتله عشان افهمه الحقيقة مادنيش فرصة اتكلم ولا أنه يسمع مني اتحايلت عليه يسمعني وجعني بكلامه وفي الاخر اتفاجئ بصورته مع واحدة وأما سألته مين دي قالي ميخصكيش بس هقولك عشان اريحك وقالي أنها خطيبته حسيت ساعتها اني قلبي اتقسم نصين ومحستش بنفسي غير وانا في المستشفي واديكي حضرتك قاعدة معايا اهو دلوقتي
سميحة وهي تحتضنها: ياحبيبتي ليه شايلة كل دة لوحدك وساكتة ليه مجتيش حكتيلي وكنت أنا اتكلمت معاه ليه فضلتي ساكتة كل دة !! أدهم مش وحش ياياسمينا ولا بقي بيكرهك زي مانتي فاهمة هو كل الحكاية ومافيها أنه حس منك انك مش عاوزاه ومن غير حتي ماتديله سبب واضح يبررله خليتي دماغه تودي وتجيب وعقله يصورله حاجات كتير وكان أولها انك محبيتهوش لانك أما قررتي تحميه كانت طريقتك غلط ومش معني كدة اني بدافعله وعشان ابني هقولك أنه مش غلطان لا هو برضو غلطان كل واحد ليه دور في الحكاية غلطان فيها انتي غلطتي أما اتصرفتي منك لنفسك وموضحتلوش حاجة كل اللي وضحتيه ليه انك مش عاوزاه وطريقتك اكدتله دة فردة فعله طبيعية جدا وهو غلطان أنه مسمعش منك أما حاولتي تبرري بس دة كان مجرد نتيجة رد فعل لفعلك الخطأ الأكبر عليكي انتي
ياسمينا بدموع: انا عارفة اني غلطت بس كنت اعمل ايه انا خوفت ..خوفت يعملوا اي حاجة من تهديداتهم ويبعدوه عني وانا معرفش مين اللي بيعمل كدة وليه ..وفي الاخر اتكسرت النتيجة واحدة واتكسرت أعظم كسرة ممكن اتكسرها اما قالي خبر خطوبته قوليله برافو لانه نجح في أنه يكسرني بالطريقة الصح بجد انا بحييه
سميحة: ياسمينا اهدي أدهم بيحبك و...قاطعتها ياسمينا بسخرية: بي..ايه !! بيحبني !! والله ضحكتيني ياطنط قال بيحبني هو لو فعلا بيحبني زي ماحضرتك بتقولي كان راح لغيري سهل كدة !! لو بيحبني كان حطلي الف مبرر من عنده حتي لو انا قولت لا وحاول معايا كان حطلي مبرر يقدر يحافظ بيه علي حبي عشان أما اجي أقرر احكيله الحقيقة يسمعني مش يطردني ويقولي إن بقي في حياته غيري وأنه نسيني اللي بيحب صعب ينسي سهل كدة وانا دلوقتي اتاكدت أنه عمره ماحبني
سميحة: ياسمينا اهدي أدهم مخطبش ولا بتاع ومفيش الكلام دة هو بيقولك كدة عشان يعرفك غلطك بيعاقبك بس بطريقته بيخليكي تحسي نفس الاحساس اللي خلتيه يحس بيه أما قولتيله انك مش عاوزاه ومن غير ماتعرفيه السبب بيحسسك اد ايه هي صعبة وأنه كان معاه حق أنه ميسمعش منك حاجة كان عاوز يشوف ردة فعلك علي نفس الموقف هل هتقبلي ولا هتدي فرصة انك تسمعي وتحاولي معاه زي ماهو عمل علي الاقل هو حاول معاكي وانتي اللي رفضتي المحاولة إنما انتي بقي ردة فعلك كانت عبارة عن ايه !! قوليلي عملتي ايه !! صدقتي أنه يحب غيرك بكل سهولة ودة معناه انك محبتهوش لانك مافهمتيش أدهم ودماغه لحد دلوقتي ..بصي ياياسمينا أدهم ابني وانا حافظاه أما بيحب بيدي وبيدي اوي كمان وعلي اد ماهو بيكون بيدي بيبقي مستني ياخد نفس القدر اللي بيدي بيه بيبقي مستني تقدير مستني حب مستني اهتمام أدهم بيحبك وبيحبك اوي كمان واوعي تخسريه حاولي تكسبيه وحاولي ترجعيه ليكي لانك لو خسرتيه مش هتلاقي حد يحبك زيه وهتندمي انك في يوم ضيعتيه وخسرتي حبه حافظي عليه وحافظي علي حبه لأن حبه نوع مختلف مش هتقابلي حد بيحب بطريقته حتي لو رفضك اول مرة اوعي تسكتي حاولي تاني لانك لو سكتي هتكوني قتلتي حبك جواه بسكوتك أنه مش فارق معاكي حاولي معاه زي ماهو حاول معاكي ..فكري في كلامي وخدي قرارك ..والف سلامة عليكي ياحبيبتي
وتركتها وخرجت في تخبط أفكارها لتقابلها سهير قائلة: علي فين ياسميحة هانم لسة بدري
سميحة بابتسامة: بدري من عمرك انا جيت بس اطمن علي ياسمينا عشان كان بقالي كتير مابشوفهاش
سهير: والله مينفعش كدة ياسميحة هانم الغدا جاهز
سميحة بابتسامة: معلش تتعوض مرة تانية بقي عشان ادهم وباباه في البيت الحق اروح بس
ملك: مينفعش كدة والله ياطنط
سميحة: اجيلك قريب إن شاء الله وانتي شايلة ابنك او بنتك كدة عاوزين نسمع خبر حلو قريب بقي كدة
ملك بابتسامة: إن شاء الله ياطنط ربنا يخليكي يارب
سميحة وهي تسلم عليهم: ربنا يسعدك ياحبيبتي .. مش عاوزين حاجة
سهير وتبادلها السلام: سلامتك ياحبيبتي مع السلامة
ملك وهي تغلق الباب خلفها وتذهب لعند والدتها: مالك ياماما في ايه !!
سهير وترفع رأسها: ماليش يابنتي هيكون مالي بس
ملك: قوليلي ياماما ايه اللي مضايقك بس ومزعلك
سهير: حال اختك اللي مضايقتي معرفش فيها ايه مش مظبوطة كدة
ملك: بصراحة كدة ياماما ياسمينا فسخت الخطوبة هي وادهم
سهير وتضرب يديها علي صدرها: بتقولي ايه !! فسخت الخطوبة !! منها لنفسها كدة !! يالهوي يالهوي منظرنا ايه قدام الست دلوقتي ..حاسبي كدة أما افهم ايه اللي حصل ..وذهبت لغرفة ياسمينا تفتح الباب بقوة: انتي ازاي تفسخي خطوبتك من ورانا !! ايه مالكيش أهل !! ولا كبرتي علينا وبقيتي شايفة نفسك وفاكرة محدش هيقدر يقفلك ؟!
ياسمينا بخضة: هي جت كدة من غير ترتيب فجأة كدة
سهير وصفعتها: كدابة ..انا ماعرفتش اربي اخرتها تكدبي عليا !! يعني ايه جت فجأة !! كنتو قاعدين كدة عادي وقولتوا يلا نفسخ الخطوبة !! قرار زي دة عشان يتاخد ليه اسباب
ملك: خلاص خلاص ياماما عشان خاطري
ياسمينا ببكاء: عشان تعبت ..تعبت ياماما ..تعبت من كتر مابحاول تعبت من كتر مابحكي ومش برتاح فقررت اسكت احسن لقيت الراحة في السكوت لقيت الكلام مش بيفيد ولا بقيت الاقي فيه اللي يريحني بقيت الكلمة اللي بسمعها من اي حد هي معلش وكانت بتتعبني اكتر معلش علي ايه بالظبط !! علي تعبي ولا علي وجع قلبي ولا علي طيبتي !! معلش علي ايه !! لو مش هتقدروا تهونوا عليا ليه من الاول خلتوني احكي !! ماطبيعي تقولوا معلش عشان محدش حاسس باللي فيا فبتقولوها وفاكرين أنها علاج للوجع اللي جوانا ..وبعدين احكي ايه وليه والكل هيغلطني من غير حتي مايسمع أسبابي وعملت كدة ليه دة حتي الشخص اللي حبيته بجد أما قررت احكيله رفض أنه يسمعني ومقدرش وجعي اللي جوايا الشخص اللي المفروض يكون مستني يسمع مني اي مبرر يسامحني بيه لكنه عمل العكس اجي اتكلم اقول ايه !! حد هيفهم اللي جوايا يعني !! حتي لو حد فهم حد هيحس بيه !! كله هيزعل عشاني يومين تلاتة شهر وبعد كدة !! هعيش وجعي لوحدي لأن مفيش حد بيعيش وجع حد لفترة طويلة مفيش حد بيستحمل حد لفترة طويلة كله بيزعل في وقتها ويبين أنه زعلان عليكي لكن بعد كدة ايه اللي بيحصل !! كله بينسي والوجع بيفضل لصاحبه بيعيش مع صاحبه بس مالوش دعوة باللي حواليه لأن الوجع يخصه هو وبس ومهما اتكلم واشتكي محدش هيحس بنفس إحساسه
سهير: وانتي عرفتي منين اني هعمل معاكي كدة !! انتي قررتي نيابة عني !! ودة برضة مش مبرر للي عملتيه
ياسمينا: محبتش اتكلم لاني كنت فاكرة الموضوع هيتحل مكنش عندي طاقة اني احكي حاجة ولأن محدش هيفكر بدماغي لا ..حابة تعرفي اللي حصل ياماما احكيلك بس مش هتغلطيني !! هل هتفكري بنفس دماغي !! لا مش هتعملي كدة هتفضلي تنصحيني وتغلطيني لأن كل واحد بيحكم من وجهة نظره وطباعه وعاوز أو فاكر الكل لازم يبقي زيه ودة مستحيل ليه اما حد بييجي يشكيلنا ماننزلش لمستوي تفكيره !! ونفكر بمنطقه عشان نقدر نفهم هو ليه عمل كدة !! كلكم شايفني غلطانة وغلط لكن محدش حط نفسه مكاني يتصرف ازاي لو ج...خلاص خلاص ياماما .. وصمتت لم تكمل كلامها وظلت تبكي بشدة
سهير: جايز يكون كلامك صح بس مش معايا لو مع حد تاني لاني انا امك عارفة يعني ايه !! يعني وجعك يوجعني وجرحك يجرحني وأما تغلطي واقولك انك غلط مش عيب دة الصح اني بعلمك الصح من الغلط ودي وظيفتي انك تغلطي وانا اصلحلك لاني مريت بكل دة فاتعلمت إنما انتي لسة بتتعلمي ولسة بتبتدي حياة جديدة فطبيعي تكوني مش عارفة حاجات كتير وطبيعي تغلطي دوري بقي اني أعلمك واعرفك دة غلط ودة صح ودة يتعمل ودة مايتعملش كل واحد فينا يابنتي ليه دورين بيلعبهم في الحياة الدور الأول أنه يتعلم كل حاجة والدور التاني أنه يعلم اللي حواليه اللي اتعلمه دة وهي دي الحياة انتي بتتعلمي دلوقتي عشان بكرة تعلمي عيالك وهكذا بقي إنما مفيش حد بيتعلم لوحده لازم بعلمك وبأهلك عشان تقدري انك تواجهي الحياة الصعبة إنما مينفعش اخرجك للمجتمع من غير أما أعلمك واسيبك تتعلمي لوحدك لازم علي الاقل اعرفك وبعد كدة اسيبك تجربي بقي لوحدك زي الطفل اللي في المدرسة مينفعش ندخله علي الامتحان علطول لازم الاول بنديله الحاجة اللي تخليه قادر أنه يدخل بيها الامتحان لازم بديه المنهج واشرحه ليه وافهمه بيتكلم عن ايه وبعد كدة ادخله علي الامتحان بقي يتدرب إنما مش بديه الكتاب واسيبه لوحده واجي افاجئه بامتحان وهي دي الحياة لازم بعلمك وبدربك كويس الاول وبعد كدة اسيبك تجربي بقي عشان تشوفي هل اتعلمتي فعلا ولا لا لازم اخليكي تواجهي لكن لازم بجهزك للمواجهة الاول ..واللي عملتيه غلط مهما كان اللي حصل بينكم ماكنش ينفع تاخدوا قرار زي دة من نفسكم كان لازم ترجعوا لينا علي الاقل تعرفونا وتفهمونا الموضوع يمكن انتو شايفينه بنظرة تانية إنما تقرروا كدة مع نفسكم وكأن مالكوش أهل فدة غلط واكيد الموضوع ماكنش مستاهل لكنكم كبرتوه علي الفاضي ولأنه كبر وصل للمرحلة دي وممكن يكون علي سبب مش مستاهل دة كله ولو كنتو قعدتوا وفكرتوا بالعقل شوية كنتو هتوصلوا لحل أو لو كنتو لجأتوا لينا تقولوا ايه اللي حصل كنا نقدر نساعدكم وننبهكم لكنكم اختصرتوا الطريق الاقصر ومع كل مرة هتحصل بينكم مشكلة هتختاروا الطريق الاقصر يبقي هتخسروا كتير في حياتكم بعد كدة ومع كل مشكلة بتحصل بينكم مابتحاولوش تلاقولها حل بيقلل محبتكم في قلوب بعض وبيخليكم ماتستحملوش بعض ولا تعدوا لبعض لأن مابقاش حاجة جواكم تخليكم تعدوا لبعض بتقتلوا كل حاجة جواكم لبعض ممكن أنها تكون سبب في أنها تقربكم وتحافظ وتقوي حبكم لبعض المشاكل هي سبب في تقوية العلاقة بينكم وهي اللي بتثبتلكم اد ايه انتو غاليين عند بعض لأن كل مشكلة بتحصل هي بتقويكم وبتقوي علاقتكم مش بتكسركم لكنكم انتو عملتوا العكس وخليتوا المشاكل هي اللي تتحكم فيكم وفي علاقتكم وهي اللي تحددلكم حياتكم وترسمهالكم ايا كان ايه اللي حصل فدة مش سبب للي عملتوه يمكن من وجهة نظركم أنه سبب لانكم ممكن تكونوا فاهمين غلط او باصين للموضوع من نظرة تانية ومنظور مختلف فكان لازم تشاركوا حد حد وتشوفوا رأيه في الموضوع ووجهة نظره لكنكم اختارتوا الطريق الأسهل ..فكري في كلامي وشوفي ناوية تعملي ايه ..وتركتها وذهبت وأغلقت الباب من خلفها
ملك: للأسف كلام ماما كله صح ومعاها حق في كل كلمة قالتها انتي غلطانة وقبل أما تتكلمي وتعترضي انا ماليش دعوة باللي حصل انا بتكلم علي القرار اللي خدتيه مع نفسك كدة مش متخيلة لحد الان ازاي قدرتي تاخدي قرار زي دة من نفسك كدة ولا كأن ليكي أهل ترجعي ليهم حتي ربنا يهديكي للطريق الخير ليكي ..وتركتها ملك أيضا وحدها وخرجت
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
أدهم: ايه ياماما كنتي فين !!
سميحة وتنظر له وتعيد نظرها وتجلس: كنت في مشوار
أدهم بتعجب: مانا عارف انك كنتي في مشوار واخد بالي إن حضرتك جاية من برة مشوار ايه دة !!
سميحة: مشوار وخلاص ياادهم قولي اتغديت !!
أدهم ويجلس بجانبها: في ايه ياماما مش عاوزة تقوليلي كنتي فين ليه !!
سميحة: لاني لو قولتلك هتزعل
أدهم: لا قولي ياماما عشان انا بدأت اقلق إن حصل حاجة
سميحة: كنت عند ياسمينا
أدهم بصدمة: ياسمينا !! ليه !!
سميحة: من أمتي ياادهم واحنا بنفتري !! انا ربيتك علي الظلم !! كدة ياادهم كدة تبقي تعبانة بسببك وماتقوليش !! ليه ياادهم ليه عملتوا كدة !! وليه مرجعتوش لينا !! معتبرينا مش موجودين !!
أدهم: وتروحلها ليه ياماما !! ليه تقللي مننا كدة وتروحي ولا كنتي روحتي ولا جيتي ياماما والموضوع انتهي وهي اللي عاوزة كدة خلاص
سميحة: روحتلها عشان دي الأصول مش الأصول انك تسيب البنت من غير علمنا ولا علم أهلها هي دي الأصول من وجهة نظرك !! ازاي قدرت تعمل كدة !! ازاي قرار زي دة يتاخد كدة عادي ولا كانك عملت حاجة !!
أدهم: هي اللي طلبت كدة وهي اللي عاوزة كدة اقولها ايه !! لا خليكي معايا بالعافية غصب عنك !!
سميحة: وايه يخليها تطلب حاجة زي كدة !!
أدهم: ماسألتهاش ليه ماكنتي معاها كنتي اساليها عملتي ليه كدة يمكن كنتي تلاقي إجابة عندها تقولهالي انا كمان إنما أنا للأسف ماعنديش إجابة
سميحة: انا فعلا سألتها وحكيتلي علي كل حاجة انت مادتهاش فرصة أما قررت انها تصارحك بالحقيقة
أدهم: واديها فرصة ليه !! عشان تكدب عليا !! مادام هي باعتني سهل كدة يبقي ماحبتنيش يبقي ليه عاوزة ترجع من تاني !! لو كانت عاوزاني كانت صارحتني من البداية مش بعدها يعني في الاخر برضو حكت طب ماكان من الاول مادام النتيجة واحدة في النهاية لكن هي استغلت الفرصة اللي تقدر أنها متكملش معايا بيها وانا مش هخليها تكمل غصب عنها
سميحة: يابني ماتظلمهاش هي عملت كدة عشانك عشان خافت عليك وخافت أنها تخسرك ودة اكيد حد عاوز يوقع بينكم مادتيش الفرصة في أنه ينجح في خطته
أدهم: هي للأسف اللي ادتله الفرصة أما خبت عني الحقيقة عشان خايفة عليا وخافت منهم حسستهم بخوفها فاستغلوا دة
سميحة: طب معلش ياادهم عشان خاطري انا دي بتحبك
أدهم: بتحبني ايه دي ماكنتش طايقة تشوفني وصوتت في المستشفي عشان أخرج
سميحة: ليه عملت كدة !!
أدهم: عشان كنت قولتلها اني خطبت وشكلي هعملها قريب
سميحة بعصبية: انت ايه ماعندكش دم !! ماتخلي عندك دم شوية وقدر الإنسانة اللي حبيتك وضحت بحبها وسعادتها عشان تحافظ عليك قبلت أنها تبعد عنك وجت علي حساب نفسها وحساب قلبها عشان ماتبقاش سبب اذي ليك خافت عليك تخسرك فقررت تبعد عنك وانت مش مقدر حاجة زي كدة لانك لو بتحبها نص الحب اللي هي بتحبهولك كنت حطتلها بدل المبرر تلاتة لكن انت مسكت في الغلطة ومسكت في الزعل وسايب جوهر الموضوع ولا علي بالك هي عملت ايه عشانك وجت علي نفسها ازاي ..براحتك ياادهم بس انا بقولك لو فضلت كدة انت هتخسر ياسمينا هتخسر اكتر إنسانة حبيتك من كل قلبها لان مش اي حد ييجي علي نفسه وعلي حساب وجع قلبه الا لو كان بيحب بجد هتخسرها وهتندم في يوم انك ضيعتها وبراحتك اعمل اللي يريحك
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
سوزان: صافي ب...وصمتت لم تكمل جملتها عندما رأتها تبكي: ايه دة مالك في ايه !!
صافي وهي تمسح دموعها وتبتسم: مفيش انا تمام مالي بس ياسوزي ..قوليلي كنتي عاوزاني ولا ايه !!
سوزان وتجلس بجانبها: لا فيه انتي كنتي بتعيطي !!
صافي وتمسح عينها: لا بعيط ايه بس دي حاجة كانت دخلت في عنيا بس مخلية عنيا وجعاني بس
سوزان وتمسك يديها وتمسح علي وجهها: هتخبي عليا !!
صافي: اخبي عليكي ايه بس ياسوزان انا كويسة ياحبيبتي ماتقلقيش ..المهم فين سما ومروان مش سامعة ليهم صوت اقوم اشوفهم
سوزان وتمسكها: انتي اتضايقتي أما شوفتي رامي !!
صافي: ليه بتقولي كدة !!
سوزان: عشان باين في عينيكي ..لسة ماقدرتيش تنسي !!
صافي بدموع: انسي !! انسي ايه ياسوزان انسي حبنا ولا انسي ايامنا ولا انسي مواقفنا وذكرياتنا !! قوليلي كدة انسي ايه !! يمكن بظهر اني ناسية لكن الحقيقة اني بتناسي وفي فرق كبير بين اني انسي وبين اني اتناسي أما شوفته وقعدنا جيه قدامي شريط ذكرياتي كله معاه كان نفسي اقوله أنه وحشني اوي بس مقدرتش لانه مابقاش ينفع خلاص
سوزان وتحتضنها: اهدي ..اهدي ..كل حاجة من عند ربنا خير وكل حاجة لحكمة واحنا منعرفش حكمة ربنا من اللي حصل دة ايه لكن الأكيد أنه خير لينا لأن ربنا مابيعملش حاجة وحشة ولا بيبعد عننا حاجة هي خير لينا
صافي: ونعم بالله ..رامي عاوز يتجوزني ياسوزان ..وتبتسم بوجع: ماتستغربيش اوي كدة هو اللي قالي جاي يرجعلي بعد أما اتجوز وخلف
سوزان: طيب وانتي عملتي ايه ولا قولتيله ايه !!
صافي: تفتكري ممكن يكون رد فعلي كان ايه !! المفروض اني اوافق واقوله خلاص يابيبي حصل خير ايه يعني اتجوزت وارجع واعيش معاه !! ولا كأن حاجة حصلت ولا تفتكري ارفض وارجع احاول اقفل الجرح اللي فتحه واللي بقالي سنين بحاول اقفله !! انا رفضت ...رفضت ياسوزان رفضت اني ابني سعادتي علي تعاسة واحدة تانية مالهاش ذنب وعلي تعاسة عيال صغيرين مش فاهمين حاجة ولا ذنبهم حاجة يتربوا بعيد عن حد فيهم ..مش هقدر ..مش هقدر اعيش معاه واربي عياله من واحدة غيري كل أما ابص في وشهم هحس بايه !! مش هقدر كل مايقولي كلمة حلوة ولا يعملي حاجة أنه اكيد كان بيعملها كدة مش هقدر احس إن احساسه مش ليا من البداية وان حد خده قبلي مش هقدر مش هقدر حتي لو كنت بحبه فمش هقدر
سوزان: طب خلاص خلاص اهدي محدش هيقدر يجبرك تعملي حاجة غصب عنك ولا حتي هو ..انا اسفة اني فكرتك واسفة اني فتحت الموضوع معاكي
صافي: اسفة علي ايه !! انتي مالكيش ذنب في حاجة هو اللي فتحلي الجرح مش انتي جاي يعرض عليا يتجوزني دلوقتي فتحلي جرح بحاول اقفله من يوم جوازه ومن يوم اما سابني وأما يادوبك ابتدي يقفل ولسة باقي حتة صغيرة مفتوحة جيه وفتحه منها تاني وكأنه اتكتب عليا يفضل قلبي مجروح منه
سوزان: وجع الحب صعب والاصعب جرحه الجرح بيعلم حتي لو اتقفل بيسيب علامة جوانا بنوهم نفسنا اننا نسينا لكننا مقدرناش في يوم اننا ننسي ..ربنا يهون علي قلبك ويعوضك بالخير
صافي: يارب يارب
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
حازم: حنين هو انا ممكن أسألك سؤال بصراحة
حنين بابتسامة لطيفة: اه طبعا اتفضل
حازم: هو انا ليه دايما حاسس منك انك بتحاولي تبعدي مش عاوزة تدي نفسك فرصة ودايما شايف في عيونك الخوف والقلق مختلط معاهم الحزن ليه كل دة فيكي ايه !!
حنين بلمعان عينيها بالدموع وابتسامة لطيفة لكي تخفيها: ياه كل دة في عنيا بس دة انت مركز اوي معايا كدة بقي
حازم: بجد والله من غير هزار حاولي تتكلمي معايا
حنين: ساعات بيكون في حاجات مينفعش أنها تتحكي بيكون الاحسن والافضل أنها تفضل مستخبية كدة لأنها لو طلعت هتدمر حاجات كتيرة فينا وتفتح في خياطة الجروح اللي أما صدقنا أنها اتقفلت واكيد هاييجي الوقت اللي احكيلك فيه علي كل حاجة بس الحكاية إن لكل حكاية وليها وقتها وحكاياتي لسة وقتها مجاش بس
حازم: انا مش عاوز اضغط عليكي في حاجة انك تحكي عاوزك تيجي انتي واللي تحكيلي من نفسك وهستناكي تعملي كدة
حنين بابتسامة: تمام حاضر اوعدك اكيد هاجي واحكيلك كل حاجة عاوز تعرفها
حازم بابتسامة: اتفقنا
حنين: انا هقوم ادخل التواليت بس
حازم: اه طبعا اتفضلي
" وبعد أن ذهبت حنين كان يتجول حازم في هاتفه إلا أنه قاطعه صوت رنين هاتف حنين وكاد ينظر ليري من المتصل إلا أنه قد قطع الاتصال وكاد ينقل بصره إلا أنه رأي صورة شخص توجد علي خلفية الهاتف جعلته يمسك به ليري من صاحب تلك الصورة إلا أنه فقد وقع نظره علي المفاتيح الخاصة بها ليري ميدالية مكتوب عليها اسم كمال لينظر بصدمة وقد أتت في تلك اللحظة وهي تقول: يلا بينا
حازم وهو يرفعهما في وجهها بكل قسوة علي ملامحه: اقدر افهم ايه دة !!
حنين: ......
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
وقفلنا الفصل التاسع والعشرون علي صدمة حازم
- تفتكروا رد فعل حنين ممكن يكون ايه !!
- ياتري حازم هيعمل ايه مع حنين !!
- ياتري هل حكاية ادهم وياسمينا انتهت علي كدة !!
ولسة أسئلة كتير جدا جدا هنعرف اجاباتها الأحداث الجاية إن شاء الله والأحداث الجاية تكون شيقة وممتعة بالنسبة ليكم إن شاء الله وتعجبكم ♥️♥️
وبعتذرلكم جدا جدا على التأخير بس والله غصب عني حقكم عليا بجد ♥️♥️
الي اللقاء في الفصل الثلاثون قريبا إن شاء الله ♥️
#بقلم_صباح_وحيد ♥️🔥
أنت تقرأ
أعطيت لحبك فرصة فخدعتني
Romansaترفض فكرة الارتباط ولا تؤمن بها كثيرًا لأنها تعلم من يحبها حقًا فسوف يأتي إليها أمام أهلها..ولكن هل هو يجعلها تغير رأيها من تلك الفكرة !! أحبها وتقرب منها لكن هل هي أيضًا سوف تبادله هذا الحب ام تكون ع موقفها وترفض ذلك الارتباط الذي تعلم نهايته وإنه...
