أعطيت لحبك فرصة فخدعتني

الفصل الثلاثون

كنا قفلنا الفصل اللي فات علي أما حازم شاف تليفون حنين وميدالية المفاتيح وقولنا ياتري ايه اللي هيحصل يلا بينا نكمل ..قراءة ممتعة ♥️✨
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
وبعد أن ذهبت حنين الي الحمام رن هاتفها ليلتقطه حازم وقبل أن يأخذه فكان انتهي الرنين كاد يتركه لكن ماجعله يمسك به من جديد أنه رأي خلفية الهاتف صورة لشخص ما فأمسك بالهاتف يركز فيه بصدمة وقبل أن يضعه لاحظ ميدالية بها المفاتيح ليري ميدالية باسم شخص يدعي كمال فظل ينظر حوله بصدمة لايعرف ماذا يفعل حتي جاءت حنين مبتسمة في تلك اللحظة متحدثة: يلا بينا
حازم بجمود وكان قد وضع الهاتف والمفاتيح بجيب بنطاله: يلا خدي شنطتك وحاجتك ومستنيكي في العربية ..وتركها وذهب
حنين وهي تلملم اشيائها لتقول: الله اومال فين الموبايل والمفاتيح انا كنت حطاهم هنا ..أما أخرج كدة أسأل حازم معاه ولا ايه
حنين بقلق: حازم هو انت معاك موبايلي ومفاتيحي عشان مش لاقياهم جوة ولا معايا وانا كنت سيباهم علي الطرابيزة
حازم ويرفع الهاتف أمام وجهها بعنف: اقدر أفهم ايه دة ؟ وأمسك بالميدالية: ومين دة؟ اكيد هو دة اللي اسمه موجود صح؟ اقدر أفهم بقي مين دة؟
حنين بصدمة غير قادرة علي الرد: ح.. حازم ا.. اسمعني ا..لكنه قاطعها بحدة: اسمع ايه ؟! انتي واحدة كدابة مالهاش أمان ازاي فعلا مخدتش بالي من تصرفاتك معايا ؟؟ كان لازم اخد بالي لكن انا كنت غبي عشان كنت بحبك واقول يمكن الموضوع جيه بسرعة غصب عنها واديها وقتها إنما طلعتي كدابة وخاينة ..اتفضلي انزلي انا مش عاوز اشوفك ولا اعرفك تاني لأن مايشرفنيش اني اكون مع واحدة رخيصة زيك انا اختياري كان غلط ..واتفضلي حاجتك معاكي اهي
حنين ببكاء غير مصدقة مايقول وغير قادرة علي الرد وتجمع كلماتها ..حيث افزعها صوته وهو يتحدث بزعيق: قولتلك انزلي يلا
فنزلت حنين بهدوء غير مصدقة مصدومة من حديثه معها وكلامه الجارح لها أما هو فقاد السيارة بسرعة الي أن اختفي عن واقع انظارها تاركها في صدمتها وتخبط أفكارها ودموعها التي لا تتوقف
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
مريم: كريم انا عاوزة ابقي اروح لماما سماح عشان بقالي كتير مش بروحلهم وزعلانين مني جدا
كريم وهو يتناول الطعام: بس كدة عنيا حاضر ..ليكي عليا يوم اجازتي نروح نقضيه كله معاهم ونتغدي معاهم كمان
مريم بفرحة: بجد ياكريم ؟!
كريم بابتسامة: اه طبعا بجد ياقلب كريم
مريم بسعادة: ربنا يخليك ليا يارب ولا يحرمني منك ابدا
كريم: انا لو اعرف انك هتفرحي اوي كدة كنت عملت كدة من بدري بقي وعشان الدعوات الحلوة دي كمان
مريم بابتسامة: انا دايما بدعيلك ودايما بكون فرحانة وانا معاك
كريم: ربنا يخليكي ليا
مريم: ويخليك ليا يارب
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
حنين وهي تدخل بهدوء وتجلس بجانب والدتها التي كانت تشاهد التلفاز غير منتبهة لوجودها لتتحدث بكسرة والدموع تنساب من عينيها ببطئ: هو انا وحشة ياماما ؟؟
كوثر وتنتبه لوجودها وتعتدل لتنظر إليها تأخذها بأحضانها: ايه دة مالك فيكي ايه ياحبيبتي حصل ايه ؟؟
حنين بدموع متساقطة ببطئ: ح..ح..حازم سابني ..سابني ياماما
كوثر بصدمة: ايه !! امتي دة حصل وليه ؟؟
حنين: كنا بنتغدي دخلت الحمام دقيقتين لقيت تليفوني كان رن وشاف صورة كمال عندي وشاف الميدالية اللي عليها اسمه ..مدنيش فرصة اشرحله وابررله واحكيله مسمعش مني وصدق اللي شافه من غير مايفهم تعرفي اللي مزعلني ايه ؟؟ مش أنه شافه انا كدة كدة كنت هحكيله انا اللي مزعلني وكاسرني أنه ازاي باعني بالسهولة دي ؟؟ عشان صورة وميدالية ؟؟ طب اسألني كان نفسي اشوف في عينيه أنه باقي عليا أنه مستني يسمع مني اي حاجة تخليه يفضل موجود إنما هو معملش كدة هو مسك في أول فرصة جاتله وقالي أنه مش عاوزني وندمان علي اختياره ليا وأنه ميشرفوش يكون مع واحدة زيي .. انا مشرفوش ياماما ؟؟
كوثر بحزن علي ابنتها: هو برضو ياحبيبتي غصب عنه هو اتلغبط ماهو صعب برضو إنه يلاقي خطيبته حاطة صورة واحد تاني وشايلة ميدالية باسم واحد تاني غيره حطي نفسك مكانه لو انتي اللي كنتي في الموقف دة كنتي هتتصرفي ازاي ؟؟ متزعليش منه هو غصب عنه ورد فعله دة طبيعي لانه بيحبك ماعرفش يتحكم في أعصابه فرد فعله طلع منه سريع وأما يهدي هتلاقيه جايلك عشان يفهم منك كل حاجة ..ف مواقف يابنتي مش بنقدر نتمالك نفسنا فيها فبتطلع فيها ردود أفعالنا سريعة بسبب قيمة الحاجة دي عندنا بنكون في صدمة وقتها مش مستوعبين اللي حصل لأننا عمرنا ماخطر علي بالنا إنها تحصل بنكون محطناش احتمال أنها ممكن تحصل عشان كدة بتكون مصدومين ورد فعلنا سريع مش محسوب من الصدمة
حنين: جايز يكون معاكي حق ياماما وانا مش زعلانة منه ومقدرة حالته أنه غصب عنه بس مكنتش متخيلة ولا متوقعة ردة فعله قاسية اوي كدة لدرجة أنه يجرحني
كوثر: انتي برضو ياحنين غلطانة المفروض بقي في حياتك حد تاني تنسي اي حاجة تخص كمال وتمسحي اي حاجة تخصه مش خارجة معاه وسايبة كل حاجة حسستيه أنه ولا حاجة عندك ..حطي نفسك مكانه برضو ..انتي جرحتيه
حنين: ازاي جيه في باله اني بخونه ؟؟ يعني أنا لو كدة هسيب كل حاجة اكشف بيها نفسي انا غبية كدة ؟؟ وبتقوليلي انسي كمال ؟؟ طلبتي مني اصعب طلب ..انا فعلا غلطانة اني مخدتش بالي من حاجة زي كدة بس انا فعلا نسيت اشيل الميدالية والصورة انا فعلا غصب عني أنا مش وحشة عشان اظلم حد معايا أو اعلقه بيا واكون بفكر في حد تاني او اجرح مشاعره كدة .. وكمال كدة كدة الله يرحمه مابقاش موجود خلاص وصدقيني بحاول علي اد مااقدر اني مفكرش فيه عشان ماتبقاش خيانة لحازم حتي لو ميت اسمها خيانة برضو بس غصب عني اعمل ايه؟؟
كل حاجة بتفكرني بيه حتي معاملة حازم معايا بتفكرني بيه كل موقف بيفكرني بيه غصب عني بجد مش بايدي وبالعكس انا حاسة اني كدة بخون كمال مش حازم لأن كمال انا لحد دلوقتي بقالي ٣ سنين اهو مش قادرة اتخطاه من حياتي
كوثر: لا طبعا ياحبيبتي مش خيانة لكمال لأن كمال دلوقتي مابقاش موجود خلاص بقي في مكان احسن من هنا بكتير فانتي من حقك تشوفي حياتك وتكملي حياتك مع حد يكون بيحبك وبتحبيه عشان اكيد مش هتفضلي عمرك كله قافلة علي نفسك كدة وتخسري حد يكون بيحبك بجد
حنين: وأما اروحله اقوله ايه ؟؟ اقوله انا حبيت حد غيرك واتجوزته ؟؟
كوثر: بعيد الشر عليكي ياحبيبتي ربنا يبارك في عمرك وهي متتحسبش كدة خالص لأن دي سُنة الحياة ولازم هتقابلي حد وتحبيه ومش معني كدة يبقي نسيتي كمال لا بالعكس بيفضل جواكي وفاكراه لأن صعب حد ينسي حد كان بيحبه .. بس بتكوني كملتي حياتك ودة حقك انك تعيشي حياتك بعد ماعشتي حزنك واي حد كدة لان دي طبيعة الحياة مينفعش نوقف حياتنا
حنين: طيب وأما اتجوز حد وأحبه واكون معاه بس بفكر في كمال مش كدة خيانة ؟؟ انا خايفة اظلم حد معايا خايفة احب حد لمجرد أنه بيفكرني بيه وبيرجعلي شعور الحب من تاني خايفة احب حبه ليا خايفة مقدرش احب حد زي ماحبني أو لو حبيته فهكون بحبه عشان كمال عشان بيفكرني بيه خايفة مشاعري ماتبقاش ليه فاهماني ياماما ؟؟
كوثر: فاهماكي يابنتي فاهماكي ..بس هتفضلي كدة لحد امتي ؟؟
حنين: معرفش ياماما بس ادعيلي
حاتم مقاطعًا: ها بتقولوا ايه بقي
كوثر: مفيش ياحبيبي حنين كانت تعبانة شوية بس ..أما أقوم احضرلكم الغدا بقي
حاتم ويجلس بجانب حنين ويكوب وجهها: مالك ياحبيبتي فيكي ايه مش عاجباني الفترة دي ايه اللي حصل ؟؟ ومال عنيكي كدة كنتي بتعيطي ؟؟ متخانقة مع حازم ؟؟
حنين: لالا ليه بتقول كدة ؟؟ ومفيش ياحبيبي انا كويسة ماتقلقش عليا دة إرهاق بس
حاتم: لا مش كويسة ياحنين وفيكي حاجة وانا مش هغصب عليكي عشان مضغطش عليكي وتكوني فوقتي شوية هسيبك تيجي انتي بنفسك وتحكيلي زي مابتعملي دايما وهستناكي تعملي كدة
حنين: اكيد هاجي واعمل كدة بس انا فعلا مش قادرة اتكلم ولا احكي حاجة خالص دلوقتي ماعنديش طاقة حقيقي
حاتم: خلاص ياحبيبتي ماتتكلميش دلوقتي اول أما تبقي كويسة تعالي واحكيلي ونفكر مع بعض نعمل ايه
حنين: حاضر ربنا يخليك ليا يارب
حاتم: ويخليكي ليا ..يلا قومي نتغدي وخشي نامي ريحي شوية كدة وأما تصحي إن شاء الله وتبقي كويسة نتكلم
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
يدخل حازم بعصبية لمكتب ادهم ليجده يتحدث بالهاتف ليأشر له ادهم بالجلوس متعجبا حالته فجلس حازم بعصبية غير متمالك أعصابه يقوم بهز قدميه بسرعة ويظهر علي وجهه ملامح الغضب لينهي ادهم مكالمته في هذا الوقت ليتحدث بهدوء: اي يابني م..وقبل ان يكمل جملته يجد حازم ينفجر بصياح: بعد دة كله تطلع بتخوني وبتحب واحد تاني ؟؟ ليه طيب وافقت عليا وليه ماقالتش ؟؟ تخوني انا ؟؟ وقال ايه حطالي صورته خلفية تليفونها وميدالية مفاتيحها اسمه البجاحة بيها وصلت لكدة وهي معايا كمان ؟؟
ادهم ويجلس أمامه: بالراحة بس كدة مش فاهم منك ولا كلمة مين دي اللي خانتك انا مش فاهم حاجة ايه اللي حصل ؟؟ وصورة ايه واسم ايه .. اهدي كدة وفهمني
حازم بعصبية: حاضر هديت اهو ..حنين طلعت بتخوني بتحب واحد تاني ا..ادهم مقاطعا: لا طبعا انت اكيد بتهزر ليه هتعمل كدة يعني ؟؟ حنين مش كدة ياحازم اكيد فيه سوء تفاهم وانت فاهم غلط
حازم بعصبية: سوء تفاهم ايه وزفت ايه ؟؟ اه معلش نسيت انها بنت عمتك ولازم تقول كدة وتدافعلها وعشان اخت ا..ادهم مقاطعًا بحدة: حازم انا ساكت عشان مقدر حالتك لكن هتزود اكتر من كدة هنزعل من بعض
حازم: ماتشوف انت بتقول ايه بقولك شوفت صورته علي تليفونها وميدالية مفاتيحها موجود فيها اسم كمال بتحب واحد اسمه كمال اللي مجنني طب ليه وافقت عليا ؟؟ وانت تقولي سوء تفاهم ؟؟
ادهم: اهدي بس انت فاهم غلط ك..قاطعه رنين هاتفه: طيب ماشي مع السلامة انا جاي حالا .. وينظر لحازم: معلش ياحازم انا لازم امشي حالا ولينا قاعدة مع بعض .. وفكر في موضوع حنين تاني ومتظلمهاش حنين مظلومة اسمع منها ..وابقي طمني عملت ايه .. يلا سلام
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
ثريا بصدمة: رامي !!!
رامي: اقدر ادخل ؟؟
ثريا بإدراك: ا..اه طبعا اتفضل
رامي: عاملة ايه ياثريا ؟؟
ثريا: اهو عايشة نحمد ربنا ..ايه فكرك بيا دلوقتي؟؟
رامي: جاي اصلح اللي بينا واسمعك
ثريا: ياه لسة فاكر تسمعني دلوقتي غريبة ؟؟ ايه اللي حصل غيرك ؟؟
رامي: اللي حصل إن العيال مالهمش ذنب في اللي حصل وأنهم يتربوا بعيد عن حد فينا
ثريا: قول بقي انك راجع ترجعني عشانهم مش عشاني يعني راجع تعيش معايا عشان في بينا عيال وحرام يتبهدلوا إنما لو مفيش ولا كنت سألت فيا مش كدة ؟؟
رامي: ثريا انا جاي احل مش جاي نتخانق ونعمل مشاكل مالوش لازمة الكلام دة
ثريا: صح عندك حق مالوش لازمة الكلام دة دلوقتي ..اتهان في بيتي ومن جوزي وأبو عيالي في غيبتي واسكت ومالوش لازمة .. اتوجع واعيش جرحي لوحدي ايام وليالي من غير احساس ومالوش لازمة
رامي: ايه الكلام دة انا مش فاهم منك حاجة
ثريا: انا افهمك انت مش جاي عاوز تفهم ؟؟ اليوم اللي كنت عازم اهلك فيه وقاعدين سمعتك بتتكلم عن صافي وحبك ليها يوم احتاجت فلوس وباخد من المحفظة الاقي صورتها ابقي نايمة جنبك تسيبني وتقوم تتكلم في التليفون بعيد عني عشان مسمعكش .. طريقتك اللي بقت متغيرة معايا وطول الوقت وانا حاسة انك بعيد عني مع انك معايا لكن قلبك وعقلك مع حد تاني تفكيرك مش معايا كل دة وانا بكتم جوايا وبسكت وبعدي عشان احافظ علي البيت وعلي عيالنا اللي جاي ترجعني عشانهم ..اللي وجعني وخلاني اني لازم ابعدهم عنك عشان احافظ على بيتي وعيالي وجوزي إن مفيش حد منهم قال كلمة حق كويسة فيا مفيش حد منهم غلطك وقالك حافظ علي مراتك وعيالك بالعكس كانوا بيقولولك انت اللي اتسرعت وخدت القرار وصممت مع انهم ماشافوش مني غير كل خير قولت لازم اعمل اي حاجة احمي بيها بيتي وعيالي وعشان ماتضعش مني يمكن طريقتي كانت غلط بس مالقتش غيرها بس انت الغلطان الغلط الأكبر انك خونتني حتي لو ماكنش فعل كفاية بتفكر في غيري كفاية انك معايا وقلبك ومشاعرك وتفكيرك مع واحدة تانية ..ليقاطعها رامي: ثريا ممكن ت..لتقاطعه قائلة بحزن: لو سمحت سيبني اكمل كلامي وبعدين اتكلم
رامي بقلة حيلة: اتفضلي
ثريا: انت الجاني يارامي وانا المجني عليه انت اللي حكمت علينا باللي احنا وصلنا ليه دلوقتي انت السبب في كل حاجة حصلت انت اللي اختارت اننا نفضل بعيد كدة مفكرتش في مستقبل عيالك ولا حياتهم من غير ام أو أب مفكرتش في حاجة غير نفسك ومشاعرك وكل دة ليه عشان انانيتك وحبك لنفسك وبس .. فلو حد فينا غلطان هيكون انت مش انا لانك لولاك ماكنش وصل بيا التفكير لكدة اهلك كنت بعتبرهم اهلي وماشوفوش مني اي حاجة وحشة وماهانش عليهم يدافعوا عني في غيابي ويقولولك عيب بس هو انا هعتب عليهم هما والمفروض اللي يدافع عني في غيابي هو جوزي وهو اللي بيغلط فيا في غيابي ؟؟ أما جوزي بيتكلم كدة يبقي هما المفروض يقولوا ايه ؟؟ الحق مش عليهم فعلا ..أما يشوفوا جوزي بيتكلم وندمان علي حبه القديم وهو معايا تفتكر ييجي في بالهم ايه ؟؟ اني ست فاشلة معرفتش اعوضك عنها اني معرفتش اخليك تحبني ولا يمكن مش مرتاح معايا ومنكدة عليك عيشتك عشان كدة فكرت في غيري قولي كدة كانوا هيفكروا في ايه ؟؟ ولا كانوا هيدافعوا عني ازاي بقي بعد دة كله ؟؟
رامي ولم يجد مايقوله: وليه مجتيش قولتيلي ؟؟ مهما كان فدة ميديكش الحق في انك تتصرفي زي ماتصرفتي كدة كنتي تعالي عاتبيني يمكن كنت في نزوة تعالي فوقيني منها مش تتصرفي كدة من غير ماتعرفيني السبب
ثريا: اجي اعاتبك ؟؟ اقولك ايه ؟؟ انت لو عاوز تحافظ علي مشاعري هتحافظ عليها من غير مااقول مش محتاج ولا مستني مني اني اقول إنما انت معملتش كدة يبقي تفتكر لو قولت كان هيفرق معاك ؟؟ وبعدين بعد دة كله جاي برضو تغلطني مش شايف نفسك انك السبب في كل اللي حصل ؟؟
رامي: حقك عليا انا غلطت فعلا وغلطت أما مكنتش قريب منك واني ماسمعتش منك السبب اللي وصلك لكدة وأنه انا السبب .. ممكن تقبلي اعتذاري ونرجع نعيش حياتنا من جديد .. نبتدي بداية جديدة ننسي فيها كل اللي راح
ثريا: اللي حصل صعب أنه يتنسي بين يوم وليلة زي مانت فاكر كدة وبعدين مانا جيتلك عشان نرجع ورفضتني برضو اشمعنا دلوقتي ؟؟
رامي: عشان مكنتش لسة هديت من اللي حصل وأما قعدت وهديت اديني جيتلك اهو عشان اصلح اللي اتكسر
ثريا: اللي اتكسر عمره مابيتصلح يارامي .. وعلي العموم سيبني افكر
رامي: تفكري ؟؟ ا ..ثريا مقاطعة له: اه افكر ..من حقي افكر إذا كنت هقدر ارجع اعيش معاك من تاني ولا لا .. هقدر اتخطي الحاجز اللي بقي موجود بينا دة ولا لا
رامي: تمام ماشي براحتك ياثريا فكري براحتك ..سلام
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
سميحة: حمد لله علي سلامتك ياحبيبي ايه اخرك كدة وتليفونك مقفول قلقتني عليك
أدهم وهو يقبل رأسها: ماتقلقيش ياحبيبتي انا بخير والتليفون كان فصل شحن مني بس حقك عليا اني قلقتك عليا كدة وسهرتك لحد دلوقتي تستنيني
سميحة: ايه اللي بتقوله دة ياادهم انت حتة مني وعمري مااعرف انام طول مانا قلبي قلقان عليك
أدهم: ربنا يخليكي ليا ياماما
سميحة: ويخليك ليا ياحبيبي ..يلا تعالي عشان احضرلك العشا تتعشي وتنام
أدهم: لا ماليش نفس انا جعان نوم بس عاوز انام
سميحة: اتعشي الاول وبعد كدة نام براحتك إنما مش هتنام من غير اكل ..ولم تعطيه فرصة للرد وأخذته خلفها للمطبخ تضع أمامه اطباق الطعام ليتناول الطعام وهو شارد بأفكاره لتقاطعه من شروده هذا بقولها بحزن: مالك ياحبيبي سرحان في ايه ؟؟
أدهم: مفيش ياماما انا شبعت الحمد لله تسلم ايدك ..انا طالع انام بقي عشان مش قادر
سميحة بحزن: ربنا يريح قلبك يابني
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
حسين: مالك ياسهير في ايه ؟؟
سهير: مفيش حاجة
حسين: لا في حاجة ماتقولي ياسهير علطول في ايه
سهير: ياسمينا فسخت خطوبتها من ادهم
حسين بهدوء: لاحول ولا قوة الا بالله ..قدر الله وماشاء فعل ..امتي دة حصل ؟؟
سهير ببعض العصبية: هو دة كل اللي هامك امتي دة حصل ؟؟ مش فارق معاك إن بنتك عملت حاجة زي كدة من ورانا ولا كأننا موجودين ؟؟
حسين: عاوزاني اعملها ايه يعني اقوم اديها قلمين وهي في السن دة ؟؟ وانا معرفش أسبابها ايه .. مش يمكن تكون هي اللي صح ؟؟ ولا يمكن يكون هو اللي قالها مش عاوزك وسابها ويبقي مش هي اللي عملت كدة وتقلل من نفسها ولا ايه يعني؟؟ المواضيع ماتتاخدش كدة إنما بتتاخد بهدوء نتكلم معاها بهدوء عشان نفهم منها عشان منوصلش ليها احساس الخوف والتوتر في أنها تخاف أنها تحكيلنا مش بالقسوة ياسهير ولا عمرها كانت بالقسوة إنما باللين ..وتركها وذهب لغرفة ياسمينا ليطرق الباب بهدوء طرقات خفيفة لتمسح دموعها سريعا وترد من الداخل: ادخل
حسين وهو يدخل ويجلس بجانبها علي وجهه ابتسامة: اقدر أفهم بقي بنوتي الحلوة قافلة علي نفسها ليه كدة وقاعدة لوحدها ؟؟
ياسمينا: مفيش يابابا تعبانة شوية بس ومتضايقة
حسين: متضايقة وبابا موجود معقولة ؟؟ فاكرة زمان أما كنتي تكوني متضايقة أو زعلانة من حاجة كنتي تيجي تحكيلي ؟؟ يلا بقي احكيلي مالك وايه اللي مضايقك كدة ومخليكي حابسة نفسك كدة في اوضتك ؟؟
ياسمينا: مفيش يابابا هي ماما محكتلكش ؟؟
حسين: ماما ؟! انا مالي ومال ماما دلوقتي؟ انا دلوقتي قاعد مع بنوتي الحلوة وعاوز اسمع منها هي وتحكيلي زي زمان
ياسمينا بابتسامة من معاملة والدها لها وقصت عليه كل ماحدث منذ البداية وهي تقول: هي دي كل الحكاية يابابا والله كان غصب عني ماكنتش فاكرة الموضوع هيوصل لكدة وماكنش قصدي اعمل حاجة زي كدة من وراكم زي أما ماما بتقول بس انا والله كنت متلغبطة وكان غصب عني مكنتش عارفة اعمل ايه
حسين: قدر الله وماشاء فعل يابنتي وانا مش هعاتبك علي اللي حصل لأن كل شيء قسمة ونصيب ولا هعاتبك علي الماضي لأنه بقي ماضي خلاص ولا هيرجع ولا هيتصلح اللي حصل حصل خلاص بس هقولك اتعلمي منه اتعلمي من اخطاء الماضي عشان المستقبل ماتجيش تقعي في نفس الأخطاء دي تاني وكل حاجة حصلت فهي ترتيب ولحكمة من ربنا اكيد هتعرفوها بعد كدة ..بس انا عاوز أسألك سؤال بصراحة وتردي عليه
ياسمينا: اه طبعا اتفضل يابابا
حسين: انتي بتحبي ادهم ؟؟
ياسمينا: بعد اللي حكيته دة كله ولسة بتسأل السؤال دة يابابا؟؟ انا لو مش بحبه كنت عملت دة كله ليه ؟؟ ولا انت شايف ايه يابابا ؟؟
حسين: معرفش انا بسألك انتي لأن انتي اللي عارفة اكيد
ياسمينا بخجل: أيوة يابابا بحبه وعملت كل دة عشانه وعشان بحبه
حسين: وأما بتحبيه ليه ماروحتيش صارحتيه بالحقيقة من الاول ؟؟
ياسمينا: عشان خوفت عليه يعملوا فيه حاجة أو أنه يتأذي بسببي
حسين: طيب مانتي روحتي عشان تصارحيه بعد كدة ماهي هي
ياسمينا: عشان لقيت نفسي مش هقدر ابقي بعيد اكتر من كدة
حسين: وماخوفتيش عليه ليتأذي بسببك ؟؟
ياسمينا: انت عاوز تقول ايه يابابا ؟؟
حسين: عاوز اقولك انك ممكن تكوني خوفتي عليه وحاولتي تحميه لكن طريقتك كانت غلط وأما النتيجة في الاخر واحدة وانك كدة كدة هتحكيله طب ليه من الاول بقي كل دة ؟؟ انتي صعبتي الحكاية علي نفسك ولفيتي من طريق طويل عشان توصلي لنفس الطريق مع انك كان قدامك الطريق المختصر اللي يوصلك علطول .. إنما انتي فكرتي كدة انك بتحميه بطريقتك إنما مخدتيش بالك انك وانتي بتحميه بتخسريه وأما أدركتي دة بعدين حاولتي تصلحي اللي بوظتيه لكن ماعرفتيش لأن مفيش حاجة بترجع زي ماكانت ..وأمسك بزجاجة بلاستيك بجانبه وضغط عليها بقوة واعطاها لها: تقدري ترجعيها زي ماكانت سليمة ؟؟ فنظرت له ياسمينا وهي لاتفهم شيء واخذتها منه وظلت تحاول حتي اعادتها كما كانت في السابق ولكن ليس بنفس الشكل الذي كانت عليه واعطتها له فأخذها وهو ينظر للزجاجة: هل هي كانت كدة في الاول ؟؟ وأمسك بزجاجة أخري سليمة: شوفي الفرق بينهم كدة هل دي زي دي ؟؟ بصي كدة مع انك رجعتيها زي ماكانت إلا إن لسة في تكسيرات في شكلها وتطبيق بسيط إنما توحي أنها رجعت لكن للاسف مرجعتش زي ماكانت الاول سليمة لسة اثر التطبيقة عليها موجود وبقي شكلها بهتان ازاي ؟؟ وهو دة الإنسان يابنتي أما بيتحط في ضغط من حد بيحبه او بيتخذل منه بيتكسر كدة وأما بيرجع بيكون لسة اثار الزعل موجودة جواه وبقت علامة أنه مرجعش زي ماكان الاول وعشان كدة ادهم مش غلطان لانك انتي اللي وصلتيه لكدة انتي ضغطتي عليه اوي زي الازازة دي بالظبط وأما جيتي تحاولي ترجعيها تاني لشكلها رجعت لكن لسة في تكسيرات فيها وهو كدة برضو ممكن يرجع لكن هيفضل في كسر جواه انتي السبب فيه .. فهمتي يابنتي اللي عاوز اوصلهولك ؟؟
ياسمينا ببكاء: طب وانا اعمل ايه دلوقتي يابابا انا تعبت بجد مبقتش عارفة اعمل ايه كل حاجة غلط في حياتي انا بجد تعبت
حسين وهو يأخذها بين أحضانه: اهدي اهدي ياحبيبتي مفيش حد في الدنيا دي مابيغلطش كلنا بنغلط وكلنا بنتعلم من غلطنا دة مفيش حد ملاك ولا في حد بيتعلم ببلاش
ياسمينا: بس انا تعبت يابابا تعبت من الفراق وتعبت من كسرة القلب تعبت من اني أتفهم غلط تعبت من عدم التقدير هي دي كلمة شكرا بتاعتهم أنهم بيسيبوني في نهاية الطريق بعد أما مصلحتهم خلصت معايا اللي كان محتاج حب واديته سابني لانه خد اللي عاوزه واللي محتاج حنية خدها وساب برضة واديني لسة متعلمتش اومال هتعلم امتي ؟؟ انا بتجرح وبس
حسين: كل واحد بيغلط لازم بيتحمل نتيجة غلطه انتي اللي اختارتي الطريق دة وانتي متأكدة انك هتتعبي وتعاني فيه ورغم ذلك اختارتي انك تمشي فيه ماترجعيش تلومي حد علي اختيارك محدش ليه ذنب غيرك ..وبعدين انتي لسة مامرتيش بحاجة لكلامك دة وكل واحد فينا بيغلط وانتي غلطتي ولسة هتغلطي عشان تتعلمي لكن خلي بالك تكرري نفس الغلط تاني
ياسمينا بحزن: عندك حق يابابا انا اللي اختارت واديني ندمانة اهو ومحدش اتاذي غيري
حسين: اللي حصل حصل خلاص يابنتي المهم تكوني عرفتي غلطك واعترفتي بيه وتتعلمي منه
ياسمينا: اتعلمت منه فعلا وندمانة اهو ..الحمد لله
حسين: يلا بقي كفاية حبسة وقومي اقعدي معانا
ياسمينا: معلش يابابا انا فعلا تعبانة ومش قادرة اعمل حاجة
حسين: وانا مقولتش تعملي حاجة انا بقولك قومي اخرجي برة اوضتك دي كفاية حبسة وعياط طول الوقت مالوش فايدة لازم تكملي حياتك وتشوفي هتعملي ايه وتحاولي من جديد إنما انتي كل اللي عملتيه حبستي وقفلتي علي نفسك ونازلة ليل نهار عياط هل دة هيحل الموضوع ؟؟ ولا هل دة غير حاجة ؟؟ بالعكس دة كدة الموضوع بيتعقد اكتر لانك قاعدة مابتحاوليش تدوري علي حل
ياسمينا: عشان تعبت يابابا مبقتش قادرة كل حاجة بحاول انجح فيها الاقي نفسي بفشل انا تعبت من كل حاجة
حسين: ولسة ياما هتقابلي ولو كل مشكلة قابلتيها وقولتي كدة يبقي عمرك ماهتنجحي في حاجة ..يلا قومي اخرجي وكفاية زعل لحد كدة قومي
ياسمينا بقلة حيلة: حاضر ..حاضر يابابا
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
حازم: ها خير عاوزة تقولي ايه ؟؟
حنين: حازم لو سمحت انت لازم تسمعني
حازم ببرود: انا سامعك اهو سامع هتقولي ايه وهسمع كدبك اهو يلا
حنين بوجع: اللي انت شوفته دة كان خطيبي و..قاطعها حازم بحدة: اكملك انا وعاوزة ترجعيله مش قادرة تنسيه صح ؟؟ مغصوبة عليا فعشان تطفشيني عملتي كدة صح ؟؟ لا كان في طريقة اسهل كنتي ممكن تقوليلي انك مش عاوزاني أو مش عاوزة تكملي معايا كان عادي مفيش اي مشكلة مكنتش هغصبك .. روحي ارجعيله بقي ..ولا يمكن كنتو متفقين مع بعض علي كدة اه ماهو اللي زيك الواحد يتوقع منها أي حاجة ..اللي تقبل علي نفسها انها تكون مع اتنين ماتستاهلش أنها تتحب لأنها بتكون ارخص من التراب اللي بتمشي عليه وآخرها يتداس عليها بالجزم ..بس هو انتي هتجبيه من برة صحيح اختك كانت كدة طبيعي تكوني زيها انا اللي غبي مخدتش بالي بس الحمد لله كل حاجة بانت بدري
حنين بانفعال وبكاء هستيري: ارجعله ازاي وهو ميت ؟؟ ارجع لواحد ميت ازاي ؟؟ كفاية بقي تجريح بالكلام حرام عليك وانا مش رخيصة ياحازم بيه عشان اكون مع اتنين في وقت واحد انا هعرفك الحقيقة عشان اريح ضميري وبعد كدة مش هتشوفني عشان مقبلش انك تبقي مع واحدة انت شايفها كدة وانا مقبلش علي نفسي ابقي مع حد انا في نظره رخيصة ..وانت بتتكلم ومتعرفش حاجة وهو لو موجود انا كنت فكرت اني اتخطبلك ؟؟ ولو هو موجود وسيبنا بعض وانا لسة بحبه وعاوزة ارجعله كنت هوافق عليك ؟؟ انت شايفني قاسية ووحشة اوي كدة ؟؟ بس الحق مش عليك الحق عليا اني حبيتك ووثقت فيك اني كنت ناوية احكيلك عشان اكون معاك علي نور ..وعلي العموم الصورة انا نسيت اشيلها إنما مش عشان انا مش عاوزاك انا مش كدة انا لو مش عاوزاك من البداية كنت قولتلك وعرفتك إنما انا قررت اديك فرصة وادي نفسي فرصة من تاني وادي قلبي فرصة يرجع يحب من تاني بعد تعب ٣ سنين وانا قافلة علي قلبي وأما انت جيت قولت تستاهل افتح قلبي من تاني عشانك .. وقولت انك هتعرف تعوضني لكن يظهر كنت غلطانة اني في يوم فكرت في كدة وعلي العموم حقك عليا انا اللي غلطانة ..وخلعت دبلته وتركتها أمامه وهي تنهض: كل اللي بينا انتهي وحاجتك هتوصلك .. واه صحيح انا اختي مش زي مانت قولت لأننا ولاد ناس ومتربيين وانا مش هرد عليك عشان تربيتي متسمحليش اغلط في حد بس هقولك حاجة واحدة اللي بيتهم حد بحاجة غالبا بيكون هو اللي كدة وفاكر الناس كلها زيه ..عن اذنك .. وذهبت دون أن تعطيه فرصة للرد عليها تركته في صدمته من أثر كلماتها التي لاتدل الا علي كم الالم والوجع الذي أحياه بداخلها
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
سوزان: حبيبي الجميل قاعد سرحان في ايه كدة ؟؟
صافي بابتسامة: ولا حاجة سرحت في جمال السماء والقمر بس
سوزان بشك: صافي فيكي ايه بتحاولي تداريه ؟؟ احكيلي متخبيش عني
صافي: احكيلك ايه بس ياسوزان مفيش حاجة صدقيني
سوزان: من ساعة أما شوفتي رامي وانتي اتغيرتي
صافي: رامي راجع بيفتح في جراح انا قفلتها ومش عاوزة الجرح يفتح تاني ومش عارفة اعمل ايه ..تعرفي أما طلب مني يتجوزني كان نفسي افرح واوافق زي اي بنت حبيبها بيقولها أنهم خلاص هيتجوزوا .. بس للاسف التوقيت غلط لانه مابقاش ينفع خلاص احساس وحش وصعب اوي إن الشخص اللي بتحبيه ونفسك كنتي تبقي معاه وأما تجيلك الفرصة لكدة متبقاش من حقك ومش عارفة تحققي حلمك وكأن الدنيا حالفة تعذب فيكي
سوزان وتحتضنها: اهدي اهدي بتعيطي ليه بس دة بقي ماضي خلاص ياحبيبتي وانتي قفلتي الباب دة من زمان
صافي ببكاء: وهو رجع فتحه للأسف ..تعرفي احنا سيبنا بعض ليه ؟؟ هقولك انا احنا ليه مكملناش ..مرة حصلت بينا مشكلة زي اي اتنين بتحصل بينهم مشاكل وزعلنا مش مهم مين الغلطان كنا احنا الاتنين غلطانين لأن كل واحد فهم غلط ومداش فرصة للكلام وحصلت المشكلة وكل واحد فينا سكت علي أمل إن التاني هو اللي يتكلم وللاسف محدش اتكلم قررت بعدها بكام يوم اتكلم انا وأسأل عليه وأشوف ازاي هونت عليه يسيبني كدة وكلمته فعلا لكن حسيت اني بكلم حد تاني انا معرفوش وحسيت وقتها أنه بقي عنده البديل هو انا كنت حاسة من بدري بس اتأكدت بقي ..وصمتت قليلا ..لتحثها سوزان بحنية علي التحدث براحة: كملي ..كملي ياحبيبتي انا سامعاكي
صافي بتنهيدة: كل حاجة كانت بتدل أنه بيكلم حد غيري من أول خناقتنا ومن قبلها كمان لحد اما كلمته أسأل عليه ..لاول مرة اهون عليه يسيبني زعلانة كدة ولا يحاول يراضيني بكلمتين ومن قبلها وهو بقي في حاجة متغيرة حتي لو مش مبين دة بس اما تكوني بتحبي حد بتحسي بأقل حاجة وأقل تغيير وانا حسيت وتجاهلت لحد اما حصل المشكلة بينا ووضحت كل حاجة إهماله ليا ولزعلي أنه يكون اونلاين كتير جدا في اليوم وبالساعات اونلاين طول الليل ومش بيكلمني ولا بيسأل عليا ولا سهران معايا كعادته بقيت بتجنن كل أما اتخيل أنه سهران مع واحدة غيري وبيقولها نفس الكلام اللي كان بيقولوا ليا .. احساس الغيرة اتمكن مني ومبقتش عارفة اسكته ولا عارفة اعمل ايه لكن قررت لازم اكون هادية ومنفعلش ولا أبين حاجة وبقيت بسأل عليه وانا مش عارفة اكدب احساسي وفضلت علي الحال دة شوية لحد اما قللت كلام ومبقتش اتكلم خالص بسبب طريقته وتقفيله في الكلام معايا ..لحد اما جيه يوم لقيته داخل هو اللي بيكلمني ويقولي وحشتيني
#فلاش_باك
تجلس صافي ماسكة بهاتفها لتأتيها رسالة عبر الواتساب لتدخل لتتصنم من اثر المفاجأة لاتعرف ماذا تفعل وكانت الرسالة: وحشتيني انا عارف انك زعلانة مني حقك عليا وانا عاوز اصالحك لاني اكتشفت اني مقدرش اعيش من غيرك ممكن نتقابل نتكلم محتاج اتكلم معاكي ياريت توافقي لو لسة ليا خاطر عندك ..بقالنا كتير متخاصمين ولأول مرة نقعد الفترة دي كلها منتكلمش
#باك
سوزان: وقابلتيه ؟؟
صافي بضحكة مليئة بالدموع: قابلته
فلاش_باك
صافي: نعم قولت عاوز تقابلني ؟؟
رامي: وحشتيني ياصافي
صافي بضحك: لا بجد ؟؟ قديمة العب غيرها
رامي: انا عارف اني جيت عليكي بس انا بحبك ومش عاوز اخسرك
صافي: وهو انت مش واخد بالك انك خسرتني ولا ايه ؟؟
رامي: ايه الكلام اللي بتقوليه دة ياصافي احنا حصل بينا مشكلة وزعلنا عادي
صافي: لا دة بالنسبالك انت لكن انت خسرتني وخسرتني من بدري اوي كمان ..وبسخرية: اه صحيح معلش نسيت انك مكنتش واخد بالك عشان كنت مشغول وكان عندك البديل اللي معوضك إنما دلوقتي ياعيني راجعلي عشان مابقاش في حد يعوضك
رامي: ايه الكلام اللي بتقوليه دة
صافي: الكلام اللي بقوله دة الحقيقة ..الحقيقة اللي كنت فاكر اني مش عارفاها .. الحقيقة اللي فضلت مخبيها عني وهونت عليك المدة دي كلها عشان مش فاضيلي ومع واحدة تانية اوعي تفتكر اني نايمة علي وداني ولا حاجة لا انا بس كنت سايباك تعمل اللي يريحك واحسسك انك فعلا مغفلني وانك صح تعرف ليه ؟؟ عشان كنت متأكدة انك هتلف وترجعلي لكن جيت متأخر علي المعاد واهو جيه وقت المواجهة وانا اللي بقولك اني مش عاوزاك وارجعلها عشان انا مش وقت فراغ لحد ولا مجرد سد خانة ..ومش انا اللي اتخان يارامي ولا اتقارن بحد ولا انا اللي اتبدل واكون في الاحتياطي .. وانا لو كملت معاك يبقي انا ماعنديش كرامة بس للاسف انا عندي كرامة اوي ومش هقبل بأي إهانة لكرامتي .. سلام
رامي وهو يمسك بها: صافي استني بس نتكلم وافهمك كل حاجة
صافي وتنزع يدها من قبضته بعنف: مابقاش ينفع ولا بقي يفرق اسمع حاجة انت خسرتني من بدري مش من دلوقتي من يوم أما هونت عليك تسيبني زعلانة المدة دي كلها ولا كان فارق معاك حالتي .. كنت خلاص اتعودت علي غيابك وانك مش ف حياتي فمتجيش بقي دلوقتي عاوز ترجع ليا بمزاجك ..وتركته وذهبت في صدمته لايعرف ماذا يفعل
#باك
صافي: كل اللي زعلني وقتها إن مجرد خلاف بينا بدل ما يحاول يصلحه راح استسهل وعرف واحدة غيري وبقي معاها ونسيني ولا كأني كنت في حياته ماهنش عليه يراضيني بكلمتين زي ماكان بيعمل استغل الفرصة وبقي مع غيري وانا اقول ازاي كان قادر يبعد عني الفترة دي كلها عشان كان معاه البديل
سوزان بحزن: طيب انتي ايه خلاكي متأكدة كدة مش يمكن مكنش فيه حد ؟!
صافي: رد فعله خلاني أتأكد هدوئه وصدمته اللي شوفتهم في عينيه وأنه مابقاش عارف يرد يقول ايه خلوني أتأكد ..كنت مستنية اشوف في عينيه اي حاجة تخليني اكدب نفسي كان نفسي يكدبني ويقولي اي حاجة حتي لو بالكدب لكنه معملش كدة
سوزان: يمكن ياحبيبتي عشان كان ندمان علي اللي عمله
صافي بضحك: ندمان اه ندمان صح ..ياسوزان بعد اما حصلت بينا المشكلة دي ودخلت كلمته طلبت اني أقابله ونزلنا ومسكت فونه من غير أما هو يعرف وشوفت وعرفت كل حاجة ورغم ذلك بقيت بتعامل عادي لاني كنت عاوزة أتأكد بس ومكنش ينفع اتغير عشان ميشكش اني عرفت لانه مكنش ينفع أنه يعرف لاني كنت هكون ضيعت حقي كدة واديته الفرصة في أنه ينجح أنه يقلب الطرابيزة عليا ..ومش هيكون معايا السلاح اللي اقف بيه قدامه وادافع عن نفسي .. لحد بقي أما هو دخل كلمني تاني بعد ماكنت انا سكتت بعد أما فضلت انا اللي بسأل عليه ومفيش فايدة قررت انسحب بهدوء
سوزان: مريتي بكل دة لوحدك وكاتمة جواكي بس صدقيني ربنا اكيد شايلك خير كبير اوي وهيعوضك عن كل وجع حسيتي بيه
صافي: احكي ايه بس ياسوزان ..اقولك حاجة بستغرب اوي أما يكون واحد بيحب واحدة ويروح يعرف عليها واحدة تانية ويكلمها ولا كأن في حياته حد ومع الوقت بيهمل حبيبته أو اللي كانت حبيبته والله اعلم إن كان حابها فعلاً ولا لا بس معتقدش أنه كان بيحبها لأن الراجل اللي بيحب مبيشوفش غير اللي بيحبها ولو حواليه بنات الدنيا كلهم بس دة الراجل ..ببقي في صدمة اللي هو انت ازاي بتعمل كدة !! ازاي قدرت تعمل فيها كدة وازاي كل مشاعرك وكلامك واحساسك اللي كان ليها بقي لحد تاني بنفس كل حاجة بكل السهولة دي !! وبستغباهم جدا أما يكون فاكر نفسه كدة جامد وأنه بيعمل كدة من غير ماتعرف لا هي بتكون عارفة ومتأكدة وسكوتها بيكون اصعب عقاب ليه عشان متأكدة هاييجي ويرجع ليها لكن ساعتها هي اللي هترفض الرجوع دة وبستغبي جدا البنت اللي مجرد ماتعرف تقلب الدنيا وتتخانق اللي هو ليه عملتيله اللي هو عاوزه ؟؟ ليه ضيعتي حقك ؟! ماهو عمل كدة عشان يحسسك انك مش فارقة معاه وعشان كمان يحس أنه علي حق ضميره مايأنبوش عليكي وتقومي انتي اللي تحسسيه أنه فارق معاكي وأنه نجح في أنه يتأكد من وجوده عندك ؟؟ وريحتيله ضميره كمان وأنه معاه حق وانك مكنتيش تناسبيه .. بتكون ضيعت حقها واخر فرصة ليها تاخد بيها حقها وتحسسه بالندم لأن كل ماكانت هادية في رد فعلها معاه هيندم أنه ضيعها من ايده إنما أما تزعق وتغلط ولا هيحس بندم وهيحس أنه علي حق أنه كان لازم يعمل كدة عشان يكشفها وأنها واحدة مش كويسة وهتبقي حجته أنه اختبار عشان يشوف رد فعلها وفشلت في الاختبار وبقت هي الغلطانة وهو ملاك الرواية .. التجاهل والصمت افضل حل تاخدي بيه حقك وتخليه يحس بالندم لانك هتحسسيه انك متعرفيش ونايمة علي ودانك ويوم أما يخسر وميكملش هيرجعلك وساعتها انتي اللي هترفضي وتتكشف كل الاوراق بقي وساعتها بس هيحس اد ايه هو كان غبي لانه هيكون ضيعك وأما رجع عشان عرف قيمتك مالاقكيش ..وهيعيش بتأنيب ضميره ليكي وعلي اللي عمله فيكي طول عمره
سوزان: معاكي حق فعلا .. بيكون مالهمش سبب ومش بيقدروا أنهم يواجهوا عشان عارفين انهم غلط وأنه مفيش سبب لكدة بتبقي بمثابة فرص ليهم يعني رامي شاف اللي كلمها عليكي دي فرصة مينفعش يضيعها لازم يستغلها أما بيكلموا حد علي حبيبتهم مش بيكون عشان هو ناوي يسيبها لا بس بيكون بيتسلي مش عاوز يضيع فرصة زي ماقولتلك يعني يكون بيكلم كذا واحدة لكنه حاطط في دماغه هي دي اللي يكمل معاها وعشان كدة بيفضل معاها مش بيسبها لمجرد أنه عرف حد تاني بيكون مش عاوز يضيعها من بين ايديه والدليل علي كدة أنه بيبعد عنها إنما مش بيسيبها ولا بيطلب منها كدة لانه طول ماهو بعيد في امل للرجوع في أي وقت فاهمة الفرق ؟؟
صافي: وليه كدة ماهو كدة بيضيعها مفيش واحدة تقبل علي نفسها كدة ولا تقبل إن حبيبها يكون بيكلم غيرها ويقولها كلام الحب اللي المفروض من حقها هي ويسهر معاها ومهملها مفيش واحدة تقبل ولا تتحمل كدة لانه بيحسسها أنها مالهاش لازمة في حياته وإحساس الإهانة دة وحش اوي
سوزان: عندك حق وربنا يهدي الجميع يارب ويعوض قلبك بكل خير
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
في صباح اليوم التالي
كان يجلس بمكتبه منغمس بتلك الاوراق التي توجد أمامه حتي سمع صوت طرق علي الباب فأذن بالدخول دون أن يرفع نظره عن الاوراق لكن لفت انتباهه الصوت الذي يحدثه قائلا: ازيك يا ادهم يابني .. ليرفع نظره وينهض من مكانه مرحبًا: اهلا اهلا ازي حضرتك ياعمي اتفضل
حسين: يزيد فضلك يابني انا بس جاي عاوز اتكلم معاك كلمتين لو وقتك يسمح
ادهم: اه طبعا بس تشرب ايه الاول
حسين: ربنا يخليك يابني مالوش لزوم
ادهم: لا والله أبدًا مينفعش لازم تشرب حاجة
حسين: معلش عشان انا عندي شغل ومستعجل انا جاي اتكلم معاك كلمتين وبس
أدهم: اتفضل انا سامع حضرتك
حسين: بص يابني انا عرفت اللي حصل بينك وبين ياسمينا ..لينظر له ادهم يكاد يتحدث ليقاطعه بقوله: قبل ماتتكلم هي حكتلي كل حاجة وانا مش هنا عشان اغلطك ولا حاجة لا بالعكس لأن في الاخر كل شيء قسمة ونصيب انا بس جاي اقولك زي ماقولتلها انا غلطتها بس في غيابك عشان تحس بقيمة الغلط اللي عملته مع انك ممكن تكون انت الغلطان برضو بس ماكنش ينفع احملك في نظرها انك غلطان عشان لو عملت كدة هي مش هتشوف غلطها ولا هتعترف بيه وهتحملك الغلط كله وهتاخد تصرفها بدافع غلطك ويبقي مبرر ليها .. ودلوقتي بعمل معاك زي ماعملت معاها بعرفك غلطك برضو بس في غيابها عشان كل واحد فيكم بيبص علي غلط التاني بس وشايف نفسه مش غلطان من وجهة نظره وانتو الاتنين غلطانين لكن مينفعش أبين لكل واحد فيكم أنه التاني اللي غلطان عشان يبقي محلتش المشكلة هي هتشوفك غلطان وانت هتشوفها غلطانة ومش هتشوفوا غلط نفسكم طب واللي بعد كدة ايه ؟؟ هي غلطت أما اتصرفت من دماغها بالطريقة دي وانت غلطت أما ماعرفتش تحتويها وأما ماعرفتش تخليها تحكيلك من غير خوف انك ماعرفتش تطمنها حتي لو بكلمة تحسسها انك باقي عليها مش فارق معاك غيرها ولا في سبب في الدنيا يبعدكم
أدهم: بس ياعمي انا حاولت معاها بدل المرة الف وهي رفضت تحكي اي حاجة بقيت هتجنن ومش فاهم حاجة ولا فاهم هي ليه بتعمل كدة ولا هي ليه فكرت في كدة حاولت معاها اخليها تتكلم رفضت وبقت تبعد عني وتتهرب مني واختارت اننا نبعد ومنكملش أقلل من نفسي ايه اكتر من كدة
حسين: وأما جت قررت تحكيلك انت اللي رفضت تسمعها صح ؟؟ مستغلتش الفرصة .. بص يابني انا مش بقولك انك تقلل من نفسك انا بقولك الطريقة كانت غلط من الاول هي طريقتها غلط في تصرفها وفكرت أنها بكدة تقدر تحميك وانت طريقتك غلط أما حاولت تخليها تتكلم غصب عنها كنت تستني عليها يومين اسبوع كنت هتلاقيها جيالك زي أما جاتلك لكن انت مصبرتش ومدتهاش فرصة خليتها تفتكر بتسرعك دة وخوفك إن فعلا ممكن يكون في حاجة وخايف انها تكون عرفتها وأما جت وقررت انها تحكيلك اللي حصل رفضت انك تسمعها وقسيت عليها بالكلام معرفتش تستغل الفرصة صح انك تسمعها وفي نفس الوقت تعاتبها وتعرفها غلطها بطريقتك اللي تخليها تحس بيه وتحس انها غلطت وتحس بالندم ..ولو كنت عاوز تعاقبها كنت هتعاقبها برضو بس وهي معاك مش وانتو بعيد .. إنما أنت اختارت طريقة عقاب غلط وقاسية اوي ضيعتها من ايديك وبيها بنيت حاجز بينكم هيفضل موجود ومع كل مشكلة هيظهر من جديد ..تفتكر لو رجعتوا هتحكيلك حاجة ؟! طبيعي تغلط تاني وتالت وعاشر كمان بس وقتها هتخاف أنها تحكيلك عشان هتخاف من عقابك ومن ردة فعلك اللي هتكون قاسية هتضطر أنها تخبي عنك أو تكدب عليك عشان تحافظ عليك ومتخسركش لانك من البداية طريقتك كانت غلط في العقاب معرفتش تحتويها
أدهم: والله ياعمي انا مكسوف منك لأن فعلا كل كلامك صح وانت بكلامك دة احرجتني وحسستني انها مش هي بس اللي غلطت
حسين: انا مش جاي اقولك كدة عشان احرجك ولا حاجة انا جاي اقولك كدة عشان اخليك تشوف الموضوع كامل عشان انا عارف كل واحد فيكم شايف التاني اللي غلطان وانا مكنش ينفع امشي علي المنوال دة اصور لبنتي أنها مش غلطانة وانت اللي غلطان ولا اصورلك العكس لا كان لازم أبين لكل واحد فيكم غلطه ومغلطش الطرف التاني في نظره عشان ميشوفش نفسه لاني لو قولت لياسمينا انك اللي غلطان ومغلطهاش عمرها ماكانت هتشوف ولا هتحس بغلطها وكانت هترمي اللوم كله عليك مكنش ينفع اظهرلها غلطك عشان تشوف وتحس بغلطها وانت كمان عملت معاك زيها خليتك تشوف غلطك من غير أما ابينلك غلطها عشان لو عملت كدة فأنت مش هتشوف نفسك غلطان وبكدة كل واحد هيتنازل عن كبريائه وتتكلموا لانكم عرفتوا غلطكم وأنكم انتو الاتنين غلطتوا في حق بعض ..كان لازم اخلي كل واحد فيكم يشوف غلطه لوحده بعيد عن غلط التاني فهمتني يابني ؟؟
أدهم: عندك حق فعلا وانت بكلامك ليا دة انا شوفت غلطي وعرفته ولولا كلامك معايا أنا عمري ماكنت هشوف غلطي ..وانك بينتها في نظري أنها مش لوحدها اللي غلطانة
حسين: انا معملتش حاجة يابني تشكرني عليها انا عملت كدة عشان دة اللي كان لازم يتعمل عشان كل واحد فيكم بيرمي علي التاني وشايف من وجهة نظره موقفه هو الصح وانا عشان أبين ليكم إن كل واحد فيكم غلطان كان لازم اعمل كدة أبرأ الشخص التاني في عينيه عشان يقدر يشوف غلطه وكدة كل واحد فيكم عرف هو غلطان في ايه ولو اتكلمتوا هتعرفوا انكم تتكلموا بهدوء
أدهم: ربنا يخليك لينا وكتر الف خيرك علي كل حاجة عملتها وكل كلمة قولتها انت معاك حق فيها
حسين: دة واجبي وربنا يقدم اللي فيه الخير ..عطلتك بقي معلش
أدهم: عطلتني ايه بس لا خالص انت نورتني والله وبرضو هتمشي من غير ماتشرب حاجة دي تيجي ؟!
حسين: معلش بقي تتعوض مرة تانية إن شاء الله عشان اسيبك تشوف شغلك وانا كمان الحق شغلي
أدهم: هستني الزيارة دي تتكرر تاني عشان دي كدة يعتبر مش محسوبة
حسين بابتسامة: إن شاء الله..يلا بقي معطلكش مع السلامة ..وسلملي علي ابوك
أدهم بابتسامة: الله يسلمك حاضر يوصل ..مع السلامة ياعمي
حسين: علي فكرة انا قولتلك الكلمتين دول عشان انت الراجل ودماغك كبيرة وهتفهم كلامي دة وعشان هتعرف تحتوي المواقف بعدين إنما مكنش ينفع اقوله لياسمينا عشان مكنتش هتفهم الكلام دة واكيد انت فاهم اقصد ايه
ادهم بابتسامة: فاهمك ياعمي ومعاك حق فعلا
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
وفاء: استفادتي ايه انتي بقي دلوقتي ؟؟
حنان: استفادت كتير والخطوة اللي كانت بعيدة بدأت أنها تقرب
وفاء: علي فكرة انتي ماشية في طريق غلط ونهايته وحشة
حنان: بقولك ايه مش ناقصة تقطيمك ليا بتاع كل يوم دة خلي نصايحك لنفسك ياختي كنتي نفعتي بيها نفسك ياموكوسة بدل قعدتك دي عملتلك ايه طيبتك دي بقي ها ؟؟ خليته يرميكي ولا يفكر حتي أنه يرجعلك ..وراح لواحدة تانية وباعك بكل سهولة عمله ايه بقي حبك ها ؟؟
وفاء بحزن: عندك حق تقولي كدة واكتر من كدة ماهو الغلط مش عليكي الغلط عليا اني حكيت سري لواحدة زيك كنت فاكراها صحبتي مجاش في بالي إن ييجي عليا يوم واتعاير منها بس محدش بيتعلم ببلاش برضو شكرا علي الدرس اللي علمتهولي وعمري ماهنساه ..سلام
حنان بندم: وفاء انا اسفة مقصدش و.. قاطعتها وفاء بحدة: اللي جواكي بان وخلاص وانا مش عاوزة اعرفك تاني وخلي بالك انا مش هسمحلك تدمري حياة حد بسبب غلك دة ..وتركتها وذهبت قبل أن تسمع ردها
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
آمال: مالك ياحنين بقالك كام يوم حابسة نفسك كدة حصل ايه مضايقك !!
حنين: مفيش انا تمام متقلقيش عليا
آمال: لا ياحنين انتي فيكي حاجة احكيلي متخانقة مع حازم !!
حنين ودمعت عيناها وانفجرت باكية لتهدئها امال قائلة: اهدي اهدي واحكيلي ايه اللي حصل طيب ؟!
حنين ببكاء: بيشك فيا ياآمال مش واثق فيا
آمال: دة اتجنن دة ولا ايه ازاي اصلا !!
حنين: شاف صورة كمال خلفية التليفون عندي والميدالية اسم كمال افتكر اني بخونه وانا والله العظيم مجاش في بالي اني اشيلهم نسيت خالص إنما مستحيل اعمل كدة انا لو مش عاوزاه مش هظلمه معايا قالي كلام محدش يستحمله حقيقي واتهمني بأني خاينة
آمال: طب اهدي اهدي هو غصب عنه برضو حطي نفسك مكانه
حنين: انا عارفة بس هو مدنيش فرصة أفهمه حاجة حتي أما طلبت أقابله كان رافض يسمعني وسمعني كلام مستحملتوش
آمال: طب اهدي اهدي وكل حاجة خير إن شاء الله بس لازم تهدي مينفعش كدة ..وقاطعها صوت رن الجرس لتنهض آمال تخرج لتصطدم بكوثر وهي تقول: حنين ياحبيبتي حازم برة وعاوز يقابلك ويتكلم معاكي
آمال: اخرجي ياحبيبتي شوفيه عاوز ايه واقعدي واتكلمي معاه
حنين: انا مش عاوزة ولا اقعد ولا اتكلم مع حد
كوثر باعتراض: حنين ع..قاطعتها آمال: سيبيها ياماما ..والتفتت الي حنين: لازم تقعدي معاه عشان جالك لحد بيتك وقدرك ودة معناه حاجة واحدة أنه لسة بيحبك وشاريكي وأنه اكيد عرف غلطه وجاي يصلحه اديله فرصة ياحنين كلنا بنحتاج لفرص عشان يوم أما ييجي عليكي يوم وتغلطي تلاقي اللي يديلك فرصة يلا قومي البسي واطلعي قابليه عقبال مانقدمله حاجة يشربها ..يلا ياماما ..وخرجت وتركتها وهي تفكر بكلماتها فهي حقا محقة لااحد يخطأ وأن المخطئ الحقيقي هي وليس هو فهو معه حق
بعد بعض الوقت
كوثر: منور ياحبيبي ..اتفضل
حازم: تسلم ايدك يا طنط هي حنين مش عاوزة تقابلني ولا ايه !!
آمال: لا هي بس بتلبس وطالعة حالا هقوم استعجلها كدة ..وقاطعها دخول حنين بهدوء عليهما وهي تسلم عليه: ازيك ياحازم
كوثر: تعالي ياآمال عايزاكي
حازم: انا عارف انك زعلانة مني وجاي اقولك حقك عليا بس كان غصب عني والله ومقصدش اي كلمة من اللي قولتها ولا اقصد اني اجرحك لاني بحبك
حنين: مكنتش مستنية منك انك تشك فيا كنت مستنية منك تسمعني انت مدتنيش فرصة اتكلم حتي حكمت من دماغك من غير أما تسمع أو تفهم يعني أنا لو في حياتي غيرك هكشف نفسي اوي كدة !! دة انا ابقي غبية ..فاكر ياحازم أما سالتني ليه الحزن اللي في عينيكي دة !! رديت عليك ساعتها وقولتلك كل حاجة وليها وقت بتطلع فيه وكنت ناوية احكيلك لكنك استعجلت اوي وجيت عليا انا مش هبرأ نفسي واقولك اني مش غلطانة لا طبعا أنا غلطانة عشان خليت الصورة والميدالية لكن والله انا نسيت اشيلهم ومش في نيتي اي حاجة وهو كدة كدة الله يرحمه هو اكيد في مكان احسن من هنا كتير واكيد مش هتغير من واحد ميت وعاوزة اقولك اني مش وحشة اوي كدة
حازم: انا اسف وحقك عليا انا كنت غلطان بس والله العظيم غصب عني حطي نفسك مكاني
حنين: انا عارفة ومقدرة والا ماكنش زماني قاعدة معاك دلوقتي وكفاية مجيتك لحد هنا دي حاجة كبيرة اوي عندي
حازم بابتسامة: عشان تعرفي بس ..ها خلاص صافي يالبن !!
حنين وهي تبتسم بخجل دون رد ليقول: قولي حليب ياقشطة يلا
حنين بابتسامة: خلاص مفيش حاجة ومش زعلانة
حازم وهو يمسك اصبعها: متتقلعش من ايدك تاني مهما حصل بينا فاهمة !!
حنين: فاهمة
٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
سماح بسعادة وترحيب شديد: مريم وحشتيني اوي اوي بقي كدة ياكريم تاخدها مننا كدة ؟؟
كريم: انا اقدر برضو ياطنط وبعدين مانا جيبهالك اهو
هند بسعادة وصدمة: مريم !! واسرعت تحتضنها لتوقفها سماح: براحة بلاش حركاتك دي اختك حامل
هند وهي تقترب من مريم: عارفة ياماما..وتحتضن مريم بحب: وحشتيني اوي اوي يامريم وحشتيني اوي
مريم بدموع: وانتي اكتر اوي بجد ياهند وحشتوني كلكم
سماح: تحبي بقي تاكلي ايه ؟؟ انا عارفة بتموتي في المكرونة البشاميل مش كدة ؟؟
مريم وهي تحتضنها: انا مش عاوزاكي تتعبي نفسك عشان خاطري خليكي قاعدة معايا انتي وحشاني اوي ياماما واحشني حضنك
سماح وتحتضنها: وانتي كمان ياحبيبتي وحشتيني اوي يانور عيني ..ليقاطعهم صوت جرس الباب لتهتف مريم بحماس: دة اكيد بابا صح ؟! انا هقوم افتحله وافاجئه..وذهبت لتفتح الباب لتصطدم بست يبدو عليها الكبر لتتحول ابتسامة مريم من ابتسامة حماسية الي ابتسامة استفاهمية وهي تقول: اتفضلي مين حضرتك ؟؟
المرأة: مدام سماح موجودة ؟؟
مريم: اه موجودة انا بنتها اقولها مين ؟؟ لتأتي سماح وهي تقول: مين يامريم
مريم وهي تهتف: معرفش ياماما دي واحدة بتقول انها عاوزاكي
سماح وهي تذهب: طيب ادخلي انتي شوفي كريم كان عاوزك ..اومأت لها مريم وذهبت لتذهب سماح لتري من وهي تقول: ا..وصمتت عندما رأتها: انتي عاوزة ايه ؟؟ جاية ليه ؟؟ ..لتقاطعها المرأة بلهفة: هي دي مريم ؟؟
سماح بخوف: مريم مين ؟؟ انتي تعرفيها ؟؟ دي بنتي
المرأة: لا دي مريم بنت اخويا أيوة هي وتنادي عليها: مريم مريم
سماح: ارجوكي مينفعش اللي بتعمليه دة اتفضلي دلوقتي وايه هيجيب بنت اخوكي عندي ؟؟
المرأة: عشان خاطري خليني بس اتكلم معاها
سماح: تتكلمي معاها ليه ؟؟ اتفضلي
لتأتي مريم: ايه ياماما في حاجة ولا ايه ؟؟
سماح بابتسامة: لا ياحبيبتي مفيش حاجة ادخلي انتي ارتاحي شوية
المرأة: لا قوللها انا مين
مريم: في ايه ياماما ومين دي ؟؟
كريم: في حاجة ولا ايه ؟؟
سماح: لا مفيش حاجة خد مراتك وادخلوا وانا جاية وراكم
المرأة بلهفة: مريم ..انا عمتك يامريم
مريم: ........
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
وقفلنا الفصل علي مصارحة المرآة لمريم
-تفتكروا رد فعل مريم ممكن يكون عامل ازاي ؟؟
-ياتري في امل لرجوع ياسمينا وادهم ؟؟
-ياتري حنين وحازم هيرجعوا ؟؟ وهيقابلوا مشاكل كتير قدام بسبب المشكلة اللي حصلت ولا تفتكروا الموضوع انتهي كدة خلاص ؟؟

كل دة هنعرفه الأحداث القادمة إن شاء الله اشوفكم في الفصل الحادي والثلاثون إن شاء الله قريبا بإذن الله وسامحوني لو بتأخر اوي عليكم بس الفصل الجديد إن شاء الله مش هتأخر فيه ودة وعد مني ♥️♥️
مستنية رأيكم اللي بيشجعني ويخليني اكمل ♥️
#صباح_وحيد ♥️