أحببتهُ مشوهًا و لكِن «قيد التعديل»

الفصل الرابع..

نكمل روايتنا(أحبتتهُ مشوهًا ولكِن)بقلم سلسبيل كوبك..
الفصل ال4..
أخر حاجة وقفنا عندها في الفصل ال3..
سلطان ساب غضب و دخل الفيلا و كان طالع أوضته بس لمح خيال شخص...
سلطان:مين هنا؟
سلطان:دادة أسماء..
سلطان طلع ببطء على السلالم و هو بيبص حواليه و لمح خيال حد بيجري بسرعة في الممر..
سلطان(بخفوت):عشق!
سلطان طلع لأوضة عشق و فتح بابها باندفاع، عشق اتخضت و بصتله..
عشق(بتوتر):حد يفتح الباب كدة؟
عشق:و كمان أنت ازاي تدخل أوضتي من غير ما تخبط!!!
سلطان:أنتي كنتي بره من شوية؟
عشق:أنا!! لا استأذنت من دادة أسماء و طلعت..
عشق(بحدة):و كمان رد عليا ازاي دخلت عليا كدة من غير ما تخبط..
سلطان:تعرفي تسكتي شوية..
سلطان طلع تليفونه و أتصل بـِ عاطف..
سلطان نزل على السلالم و وراه عشق..
سلطان(بصوت عالي):دادة أسماء دادة أسماء..
قامت دادة أسماء من نومها و خرجت بره أوضتها بسرعة و وقفت قدام سلطان..
أسماء:في إيه يا ابني أعملك تأكل؟
سلطان:لا..
الخط اتفتح..
سلطان:عاطف ابعتلي كام حارس تحت أوضتي و الأوضة اللي في الغرب..
سلطان:يسلموا ورديات لغاية الصبح..
سلطان قفل مع عاطف و بص لدادة أسماء و عشق اللي بتبصله باستغراب..
سلطان:دادة نامي النهاردة في أوضة عشق..
أسماء:اشمعنا في حاجة!
سلطان:بعد أذنك اسمعي الكلام..
عشق:أنا عايزة أفهم اللي بيحصل و ليه كل ده؟!
سلطان:مبحبش حد يسألني ليه..
عشق:شايفة يا دادة..
أسماء:خلاص معلش يا حبيبتي..
أسماء:ممكن تفهمنا بس يا سلطان...
سلطان:مش مضطر أودي لحد مبررات متنسوش أن ده بيتي..
سلطان:يلا يا دادة..
أسماء:طيب يا ابني..
أسماء:معلش يا عشق هنام معاكي النهاردة..
عشق:و لا يهمك يا طنط لما نشوف أخرتها..
أسماء طلعت لأوضة عشق و عشق بصت لسلطان..
سلطان:اطلعي على أوضتك.
عشق:أنت بتؤمرني!
سلطان:تخيلي..
سلطان(بحدة):يلا..
عشق اتضايقت و سابته و دخلت الأوضة..
أسماء:هنام على الأرض و أنتي هتن..
عشق:أبدا يا دادة نامي فوق و أنا على الأرض..
أسماء:ازاي بس ا!
عشق:أبدا نامي على السرير و أنا على الارض أو على الكنبة دي مش هتحصل حاجة يلا متزعلنيش منك..
عشق أصرت على دادة أسماء تنام على السرير و راحت نامت هي على الكنبة..
بعد فترة، عشق تليفونها رن قفلته بسرعة و قامت خرجت بره أول ما فتحت الباب اتخضت لما لقت سلطان قاعد قدام باب الأوضة.
عشق:في حد يخض حد كدة!!
عشق:أنت قاعد هنا ليه!
سلطان:حبيت أغير جو عندك مانع بيتي و أقعد في أي حتة على مزاجي.
عشق(بغيظ):كل شوية بيتي بيتي بيتي في إيه!!
عشق:أنت بتذلني يا عم؟!
سلطان:خرجتي من أوضتك ليه؟
عشق(بضيق):هشرب خير الشرب هنا بفلوس و لا هتذلني عليه..
سلطان:دادة أسماء نامت؟
عشق:أيوه..
عشق سابت سلطان و نزلت لتحت و سلطان نزل وراها، عشق فتحت التلاجة و كانت بتجيب ماية و أول ما قفلتها لقت سلطان قدامها و الازازة وقعت منها...
عشق:أنت جاي ورايا ليه؟ عايز مني ايه؟.
سلطان(بهدوء):أشربي يلا علشان تطلعي فوق..
عشق:مش عايزة ماية..
عشق زقت سلطان و طلعت تجري على أوضتها و سلطان استغرب تصرفها و وطى مسك إزازة الماية و طلع لفوق خبط على الباب..
بصت عشق لدادة أسماء و راحت فتحت الباب جزء بسيط جدا و طلعت نص وشها لسلطان..
عشق:عايز إيه؟.
سلطان:خدي الماية و يا ريت متخرجيش إلا الصبح..
عشق(بتوتر):طيب شكرا...
عشق مت إيديها خدت إزازة الماية بسرعة من سلطان و قفلت الباب في وشه..
سلطان قعد جمب الأوضة في الارض و هو بيفكر في الشخص اللي لمحه النهاردة..
_في الصباح الباكر..
صحيت أسماء من نومها لقت عشق لسة نايمة فخرجت بره لقت سلطان نايم في الأرض قدام الأوضة استغربت جدا و نزلت لمستواه..
أسماء:سلطان سلطان يا سلطان..
سلطان(بنوم):نعم..
أسماء:قوم يا ابني قوم..
فتح سلطان عينه ببطء و بص لأسماء و قام اتعدل في قعدته..
سلطان(بنوم):نعم يا دادة..
أسماء:إيه اللي منيمك هنا قدام الأوضة بالشكل ده..
سلطان:حماية حماية يا دادة..
أسماء:و هي الحماية وصلت أنك تنام قدام أوضتها و لا دي حجة..
سلطان(باستغراب):حجة!
أسماء:اه حجة..
سلطان:و لو كانت حجة كنت هخليكي تنامي معاها..
أسماء:ما ممكن أبقى أنا الحجة..
سلطان:دادة أنا مش بفكر حقيقي في الموضوع ده صدقيني و مش فاضي للحوارات دي..
سلطان:مش عندي طاقة أحب عندي طاقة قد كدة علشان الشغل و أهلي و بس..
سلطان:صباح الخير يا دادة..
سلطان قام وقف و دخل أوضته و قلع قميصه و دخل الحمام خد دوش و هو بيفكر في عائلته..
-الحقوني، صورة نيران، دم على الإيدين..
فتح سلطان عينه بسرعة و هو بيحاول يمحي الذكريات دي من تفكيره..
سلطان اتنهد و خرج لبره الحمام و غير هدومه و لبس هدوم رياضية و جهز شنطة للنادي و خرج بره أوضته نزل لتحت..
أسماء:مش هتفطر الأول؟
سلطان:هفطر..
أسماء:بقولك يا سلطان..
سلطان:نعم يا دادة..
أسماء:خد عشق معاك تغير جو هي عايزة تخرج..
سلطان:هي عشق دي بنت أختي يا دادة...
أسماء:مش قبلت تبقى في حمايتك و ضيافتك زعلان ليه بقى..
سلطان:ضيافتي و حمايتي لكن مش كمان اخرجها ناقص تقوليلي اشتري ليها حاجة حلوة..
عشق:مستغنين عن خدماتك..
سلطان:أحسن..
عشق رجعت شعرها لورا و جت قعدت على الكرسي اللي قدام سلطان..
عشق:مش عايزاك تخرجني أنا هخرج مع نفسي..
سلطان:قبل ما تمشي بلغيني..
عشق:مش معايا رقمك و مش هبلغك هه..
سلطان:براحتك مفيش خروج بره الفيلا و لو حصلت أقفل عليكي باب الفيلا.
عشق(بغيظ):دادة يا دادة..
أسماء:افطروا يلا..
سلطان:يلا يا دادة المكان بقى يخنق..
عشق بصت لسلطان و سابته و طلعت أوضتها..
سلطان:مش هتأكلي؟
عشق(بحدة):مش هأكل..
سلطان:وفرتي أنا برضو بتعب علشان أجيب الجنيه..
عشق بصت لسلطان بحزن و طلعت أوضتها رزعت الباب وراها..
أسماء:كدة يا سلطان تزعلها حرام و الله..
سلطان(بهدوء):سيبيها يا دادة..
سلطان:أخبار حسام إيه؟
أسماء:بخير يا سلطان بخير..
سلطان:مراته حملت تاني؟
أسماء:اه و إن شاء الله هتولد قريب..
سلطان:أبقي فكريني نروحله قريب..
أسماء:حاضر يا حبيبي..
سلطان:طيب يا حبيبتي..
سلطان خلص أكله و بص للدور التاني و اتنهد..
سلطان طلع تليفونه و أتصل بـِ عاطف..
الخط اتفتح..
سلطان:جهزوا عربيتي هتحرك كمان نص ساعة..
سلطان:تحبي تيجي معايا؟
أسماء:لا ورايا مطبخ..
أسماء دخلت المطبخ و سلطان طلع لأوضة عشق و خبط الباب..
عشق فتحت الباب و بصتله بضيق..
عشق:أفندم؟
سلطان بص لعشق و فهم من ملامحها أنها كانت بتعيط اتنهد بعمق و بص بعيد عنها..
سلطان:قدامك ربع ساعة تجهزي علشان نمشي..
عشق:نمشي فين؟ هتطردني!
سلطان:لا يلا بينا هنروح النادي..
عشق:شكرا مش عايزة أنا مش بنت أختك..
سلطان(برفعة حاجب):قد كلامك ده؟
عشق:مش ده كلامك أنت..
سلطان(بتنهيدة):بلاش نكد يلا البسي..
سلطان:اعتبريها واحد قصاد واحد..
سلطان:فاكرة لما حاولتي لمدة خمس أيام تعتذري..
سلطان:اعتبريها واحدة قصاد واحدة البسي علشان نروح النادي.
سلطان ساب عشق و مشي و بعدها رجع خطوة لورا و شاور لعشق..
سلطان:ربع ساعة لو منزلتيش همشي..
سلطان نزل لتحت و هو منتظر عشق..
عشق(بصوت عالي):مش نازلة هه..
سلطان قعد منتظر عشق و بص في ساعته و لقى أن الربع ساعة عدت رفع رأسه ناحية أوضتها و اتنهد..
سلطان:همشي أنا يا داداة..
أسماء:طيب يا حبيبي..
سلطان خرج بره الفيلا و ركب عربيته و لسة هيتحرك بالعربية لقى عشق بتفتح الباب و بتركب جمبه..
سلطان:أومال إيه مش نازلة و حوارتك اللي عملتيها دي!
عشق(ببرود):أنا حرة..
سلطان:لا قلة أدب يبقى تنزلي بكرامتك أحسن ما ارميكي بنفسي..
عشق(بسخرية):وريني كدة!
سلطان:اللهم طولك يا روح أنا اللي غلطان مش أنتي و الله..
سلطان ساق ناحية النادي اللي هو مشترك فيه.
سلطان:أنزلي يلا..
عشق فتحت بابها و نزلت، سلطان نزل و ودى المفاتيح لعامل الجراج و مشي مع عشق للنادي.
عشق:متعود تيجي هنا؟
سلطان:يعني بمزاجي و كمان يوم الأجازة ميتعوضش الصراحة فبعمل حاجة بحبها فيه.
عشق:تمام..
سلطان:أنا هجري خليكي قاعدة هنا عقبال ما أجري نص ساعة كدة..
عشق:لا هجري معاك..
عشق:و نعمل سباق كمان..
سلطان(برفعة حاجب):متأكدة؟
عشق:اه..
عشق:اللي هيتعب قبل التاني هو الخسران و الكسبان هيطلب منه طلب..
سلطان:معنديش مانع جاهزة للخسارة؟
عشق:يلا يا شاطر..
سلطان:يلا..
حجز سلطان ترابيزة و ساب حاجته فيها و أستعد هو و عشق للجري..
عشق بدأت تجري و قدامها سلطان اللي سابقاها بكذا خطوة و الاتنين جريوا لمدة نص ساعة سلطان كمل جري و عشق وقعت على الأرض رجليها مقدرتش تستحمل حتى تقف.
عشق:الله يخرببيتك آه يا رجلي آه..
عشق:يا رب ليه كدة يا رب ليه الذل ده يا رب.
سلطان قعد قدام عشق في الأرض و هو بينهج..
سلطان:تأكدتي أنك الخسرانة..
عشق:أحسن ما صحتي تروح أنت كان قصدك تموتني مش كدة؟
سلطان:ده كله علشان جريتي نص ساعة فيها إيه يعني!!
عشق:أنت ليك عين تتكلم اصلا و كمان بتقول فيها إيه..
عشق:ده أنت يوم..
موظف:سلطان بيه حضرتك بخير؟
سلطان:أه متقلقش..
موظف:تمام يا فندم افتكرت حضرتك تعبت و لا حاجة..
سلطان:تسلم يا مصطفى..
سلطان:نزل على ترابيزتي اتنين عصير فراولة.
عشق:عايزة جوافة..
سلطان:يلا روح يا مصطفى..
عشق:أنت يا بني آدم انت بقولك عايزة جوافة..
سلطان:و أنا طلبت فراولة قومي بقى..
عشق:طب مش قايمة..
سلطان:عنك ما قومتي خليكي..
سلطان قام وقف و مشي ناحية الترابيزة، عشق عاندت و قعدت مكانها و هي بتبصله بغيظ و هو بيشرب العصير اللي وصل ليه بعد خمس دقايق..
تليفون سلطان رن، الخط اتفتح..
إيهاب:أنت فين؟
سلطان:في النادي مع عشق..
إيهاب:يا حبيبتي يا عشق..
سلطان:مش هسلم منك هي اللي زنت عليا و قالت عايزة تيجي أعمل إيه يعني و كمان في فرق سن كتير ما بينا بعاملها زي قمر و حياء.
إيهاب:لا و الله؟
إيهاب:و كمان مطلبتش منك تبرير يا عم سلطان هه يا بتاع عشق أنت..
إيهاب:ناويت تروح الحفلة؟
سلطان:شكلي كدة هروح..
إيهاب:طيب لو هتروح أمن نفسك و بلغني بالعنوان و خليك على تواصل معايا لو حصلت أي حاجة..
سلطان:ليه كل ده؟
إيهاب:علشان ممكن تحصل حاجة تاني محدش ضامن و ده حفاظا على سلامتك..
إيهاب:هتقضي باقي اليوم فين؟
سلطان:هو كفاية النادي و الحفلة..
إيهاب:أبقى بلغني لو في جديد..
إيهاب:و اه نسيت أقولك بالنسبة للواد اللي..
سلطان:عشق..
سلطان ساب تليفونه و جري على عشق اللي أغمى عليها في الأرض.
سلطان نزل لمستوى عشق و رفع رأسها ليه..
سلطان:عشق يا عشق يا نهار أبيض..
سلطان:شوفتي عنادك يا زفتة أنتي..
سلطان(بصوت عالي):مصطفى يا مصطفى..
جه مصطفى و واحد من الامن لسلطان..
سلطان:ماية بسرعة أفوقها..
مصطفى:حاضر..
موظف الأمن:هو حصلها إيه؟
سلطان:حضرتك شايف إيه يعني!!!!
مصطفى:أتفضل يا سلطان بيه..
فتح سلطان الإزازة و رشها على عشق اللي قامت منفوضة من مكانها..
سلطان:خلاص روحوا أنتوا..
سلطان:كويسة؟
عشق:حرام عليك حد يفوق حد كدة!
سلطان شال شعر عشق اللي لزق على وشها أثر الماية و ساعدها أنها تقف..
سلطان:تقدري تمشي؟
عشق:حد قالك اتشليت!
سلطان:لسانك ده محتاج يتقص يا عشق و أنا خلقي ضيق..
عشق:خلقك ضيق على نفسك..
سلطان:يا بت هسيبك تقعي..
عشق:رخم..
قعد سلطان عشق على كرسي و لف قعد قدامها.
سلطان:متخيلة نفسك هتستحملي الشمس و أنك كنتي بتجري لمدة كبيرة و مشربتيش ماية و لا أي سوائل تعوض..
عشق:مطلبتش جوافة ليه؟
سلطان:يعني أنتي زعلانة علشان عصير الجوافة قد إيه تافهة..
سلطان:يلا ربع ساعة و هنرجع ده أنا غلطان و عايز ضرب الجذم إني جبتك معايا..
عشق:أنت اللي ضايقتني..
سلطان بص على تليفونه لقى إيهاب أتصل بيه كتير، سلطان اتصل بإيهاب و طلب من مصطفى عصير جوافة لعشق.
سلطان:إيه يا ابني انت فاضي؟
إيهاب:أنا غلطان إني قلقت!!
إيهاب:حصلت حاجة؟؟ مالها عشق؟؟
إيهاب:هي كويسة! و أنت كويس! طمني يا بني..
سلطان:بخير الحمدلله كان فيه شوية عناد على تفاهه..
إيهاب:اه هي وصلت لكدة طيب...
إيهاب:خلي بالك من نفسك يا صاحبي يلا..
سلطان:تمام و أنت كمان..
سلطان قفل مع إيهاب و بص لعشق اللي كانت مركزة مع الخيل اللي بيتحرك قدامها..
سلطان:بتحبيهم؟
عشق:أه جُمال أوي نفسي أركبهم..
سلطان(باندهاش):عمرك ما ركبتيهم في النادي!!
عشق:مكنتش ببقى فاضية حتى علشان اروح النادي كنت بذاكر و أجتهد علشان ابقى مهندسة..
سلطان:بجد! مهندسة إيه؟
عشق:شايف الخيل لطيف ازاي..
سلطان:تعالي معايا..
عشق:على فين؟
سلطان:للخيل اللطيف..
عشق مشيت مع سلطان و هي مبسوطة و مش مصدقة، سلطان أتكلم مع الراجل الخاص بالخيول..
سلطان:يلا اركبي..
عشق(بصدمة):أنا!!!
سلطان:لا أمي...
عشق:بس مبعرفش أركبه..
سلطان:يا خيبتك..
سلطان:حطي رجلك هنا..
عشق عملت زي ما سلطان قالها و ساعدها أنها تركب الخيل..
سلطان:ها حلو كدة يلا انزلي..
عشق بصت لسطان بصدمة و سلطان غصب عنه ضحك و مشي بالخيل و عشق كانت مبسوطة و خايفة..
سلطان:زهقتي عايزة تنزلي؟..
عشق:أنا خايفة ليأخدني و يجري..
سلطان:طب ما يأخدك و يجري ما ممكن يوديكي حتة أحسن و أفضل بكتير..
بصت عشق لسلطان و بعدها بصت للخيل..
عشق:طب و المكان اللي أنا فيه حاليا؟
سلطان:ممكن يبقى مش مكانك..
عشق:طب لو وداني لحتة وحشة؟
سلطان:ساعتها هيجيلك اللي يرجعك منها..
عشق:حتى لو أنا إيه!
سلطان:حتى لو أنتي إيه..
عشق(بضحك):قلبناها فلسفة..
سلطان:يلا أنزلي لازم أتحرك ورايا حفلة الساعة 7..
عشق:حفلة فين؟
سلطان مسك إيد عشق و ساعدها تنزل من على الخيل و خد شنطته و مشي مع عشق..
سلطان:مع واحد شريك ليا كدة..
عشق:اه فهمت..
سلطان:هتموتي و تقولي خدني معاك..
عشق:أبدا هقعد في البيت عادي..
سلطان:هتشرفينا؟
عشق:ده أنت رخم.
سلطان:متشكر على المعلومة..
سلطان:علشان أكون عملت معاكي بأصلي زي ما بدأت اليوم معاكي هنهيه بيكي يلا..
سلطان ركب العربية و عشق وقفت قدام العربية و هي بتبصله، سلطان طلع رأسه من الشباك..
سلطان:في إيه يا بنتي يلا اطلعي..
عشق:عايزة أتمشي شوية و لوحدي..
عشق:عن أذنك..
عشق لفت و بدأت تمشي من غير جهة معينة و بدون وعي دموعها نزلت على خدها في نفس اللي لحظة اللي شدها سلطان ناحيته من دراعها..
سلطان استغرب تصرف عشق و عشق بصت في الأرض و هي بتحاول تمنع دموعها..
سلطان:ارفعي رأسك..
سلطان:طب بتعيطي ليه طيب؟
سلطان:أنا عملتلك حاجة؟
عشق(بعياط):عايزة أبقى لوحدي لو سمحت..
سلطان:ما هو لازم يبقى في سبب و كمان مش هسيبك تمشي لوحدك طالما جيتي معايا يبقى تمشي معايا..
سلطان رفع إيده بتردد و مسح دموع عشق و مشاها معاه ناحية عربيته، عشق رفعت رأسها و بصت لسلطان اللي كان ضهره ليها و إيده في إيديها..
سلطان فتح باب العربية لعشق..
سلطان:بطلي رخامة سلطان الصاوي بنفسه فتحلك باب العربية..
عشق ركبت العربية و سلطان قفل الباب و لف ركب مكانه و بدأ يسوق و هو بيحاول يلاقي تفسير لبكاء عشق..
تليفون سلطان رن، الخط اتفتح..
سلطان:أزيك يا باشا؟
أنور:إيه أخبار الشغل يا سلطان؟
سلطان:كله بخير في حاجة؟
أنور:بطمن عليك عرفت أنك فتحت فرع جديد بمشاركة اللي اسمه عصام ده..
سلطان:أه و النهاردة في حفلة بالمناسبة دي..
أنور:عموما خلي بالك هرجع أقولك مش كل اللي عايز يشاركك يبقى طمعان بس بالمشاركة أو بفلوسك..
أنور:ساعات بيبقى طمعان في روحك..
سلطان اتنهد و تفادى حادثة كان هيعملها..
سلطان:تمام يا باشا..
أنور:كلمت رحمة؟
سلطان:الفترة دي مشغول شوية لما أفضى هتصل بيها و احتمال على أخر الشهر أجي ليكم..
أنور:نداء كلمت رحمة و بلغتني باللي حصل و أن عشق عندك..
سلطان:أه..
أنور:أسماء معاكم؟.
سلطان:أنت بتشك في أخلاق ابنك يا باشا و لا إيه؟!..
أنور:خلي بالك من نفسك يا سلطان..
أنور قفل مع سلطان اللي ألقى نظرة على عشق اللي كانت بتبص على الشارع بشرود..
سلطان كان هيتكلم بس أتراجع عن الفكرة و بعد فترة بسيطة كان وقف بعربيته قدام الفيلا..
سلطان:الساعة 6 تكوني جاهزة..
عشق:هشوف و أرد عليك..
عشق سابت سلطان و نزلت دخلت للفيلا علطول قابلت في وشها أسماء..
أسماء:انبسطتي؟
عشق(بابتسامة):الحمدلله.
عشق سابت أسماء و طلعت أوضتها، سلطان دخل من باب الفيلا و سلم على أسماء..
أسماء:ها يا حبيبي تحب أحضرلك غداء..
سلطان:مفيش داعي كلها ساعة و هخرج هبقى أتعشي بليل مع عشق..
أسماء(باستغراب):ناوي تأخدها معاك؟
سلطان:شبطت زي الأطفال..
سلطان ساب أسماء و طلع يجري لأوضته..
***********************
-في مكان تاني...
_عند قمر..
قمر كانت خارجة من كليتها منهارة من العياط، كانت بتعدي الشارع فمأخدتش بالها من العربية اللي كانت جاية بسرعة كبيرة ناحية..
في لحظة قمر محستش باللي شالها و وقع على الأرض بيها..
قمر مكنتش مستوعبة اللي حصل و بصت حواليها و على الشخص اللي تحتها مغمي عليه أثر اصطدام رأسه بالأرض..
قمر قامت بفزع من مكانها و هي بتبصله و مسحت دموعها بسرعة، الناس بدأت تتلم حوالين الشاب المرمي في الاض..
قمر(بالانجليزية):أسفة مأخدتش بالي..
قمر(بالانجليزية):حد معاه ماية!
قمر نزلت لمستوى الشاب و بدأت ترش على وش ماية علشان يفوق و لكنه مفاقش..
قمر(بتوتر،بالانجليزية):أعمل إيه طيب؟
شاب(بالانجليزية):المفروض ننقله المستشفى..
قمر(بالانجليزية):صح بس أنقله معايا عربيتي هناك مش بعيدة..
ساعدوا قمر ينقلوا الشاب المستشفى بعربيتها. سابوها و مشيوا، قمر بصتله بخوف و ركبت عربيتها بسرعة و ساقت لأقرب مستشفى موجودة..
قمر وقفت قدام المستشفى و نزلت طلبت مساعدة من الممرضين و جابوا نقالة نقلوا بيها المريض..
قمر(بالانجليزية):هو حصله إيه؟؟ مات!!
ممرضة(بالانجليزية):هنعمل أشعة للمخ تقدري تنتظري بره..
انتظرت قمر لغاية ما خرجوا المريض و نقلوه أوضة عادية و الدكتور بدأ يتكلم مع قمر..
الدكتور(بالانجليزية):مفيش داعي للقلق هو بخير مجرد خبطة مأثرتش على المخ..
الدكتور(بالانجليزية):ماريا هتوديه حقنة هيفوق بعدها بطلي عياط بقى...
قمر(بالانجليزية، بدموع):شكرا ليك و لكني أفتكرته مات بسببي..
الدكتور ابتسم لقمر و سابها و مشي، بعد فترة استدعت الممرضة قمر...
ممرضة(بالانجليزية):المريض فاق تقدري تشوفيه..
قمر(بتوتر،بالانجليزية):شكرا...
دخلت قمر أوضة المريض بخطوات مترددة..
قمر(بخفوت،بالانجليزية):شكرا ليك و أسفة...
مريض(بالانجليزية):مفيش داعي عملت واجبي..
قمر(بالانجليزية):بس هو إيه اللي حصل؟!
مريض(بالانجليزية):مفيش أنا رايح شغلي و فجأة لقيت بنت متهورة ماشية و مش واخدة بالها من العربيات اللي جاية و أنها المفروض تنتظر أن الإشارة تتفتح للي بيعدوا الطريق مشي، فحبيت أبان بطل قدامها فانقذتها..
قمر(بالانجليزية):بطل!
مريض(بضحك،بالانجليزية):بهزر أصل أنا من مصر و المصري معروف بجدعنته بقى..
قمر:مكنش في داعي تعمل اللي عملته عرضت حياتك للخطر..
مريض:لا أحنا نتعرف بقى طلعنا ولاد بلد واحدة.
مريض:أنا دكتور عيسى..
قمر:و دكتور في إيه حضرتك؟
عيسى:عندك عروسة يا قمر؟
قمر(بصدمة):و أنت عرفت منين إني اسمي قمر!!
عيسى:بجد و الله؟.
عيسى:تصدقي اسم على مسمى..
قمر(بتوتر):طب انا اطمنت عليك و دفعت فواتير المستشفى اقدر أمشي..
عيسى مسك إيد قمر و هي بصتله بتوتر و احراج..
عيسى:ممكن تبلغيني المبلغ كام لأني مش هسمح أنك تدفعي..
قمر:بس أنا دفعت خلاص و عن أذنك بقى...
قمر سابت عيسى و طلعت تجري بره أوضته و بره المستشفى كلها..
"عيسى الأدهم:-دكتور عنده 30 سنة من مصر و لكنه سافر لأمريكا بغرض الشغل، شاب طويل نسبيا، بشرته باللون الأبيض، عيونه باللون الأخضر، معندهوش دقن و شاب بسيط جدا"..
عيسى استفسر عن المبلغ اللي دفعته قمر و بعد فترة خرج من المستشفى و رجع لبيته..
_في بيت عائلة الصاوي..
حياء:ماما لو سمحت اتناقشنا في الموضوع ده كذا مرة جواز مش هتجوز لو كان ابن رئيس حتى..
رحمة:يا حياء مينفعش يا بنتي هتفضلي لحد إمتى مش متجوزة!
حياء:أرجوكي يا أمي دي حريتي الشخصية..
رحمة:محدش بينفع معاكي غير سلطان..
حياء:عن أذنك يا أمي..
قمر:أنا جيت يا أهل البيت..
رحمة:يا رب رزقتني ببنتين أستغفر الله العظيم.
رحمة سابتهم و دخلت المطبخ و حياء بصت لقمر..
حياء:أتأخرتي ليه؟
قمر:هحكيلك..
حياء:طيب غيري هدومك و كُلي و أبقي تعالي..
قمر:أعوذ بالله حرام عليكي يا شيخة أنا قدام قاضي..
حياء(بهدوء):نفذي الكلام يا قمر..
حياء سابت قمر و دخلت أوضتها، قمر دخلت أوضتها غيرت هدومها و خرجت بدأت تأكل..
**********************
-في مكان تاني...
_عند سلطان..
سلطان كان واقف منتظر عشق زي ما قالها و بيبص في ساعته كل خمس دقايق..
أسماء:طب اطلع ليها؟
سلطان:أنا خمس دقايق و همشي هي بقى براحتها حضرتك عارفة مش بحب التأخير و عملت ده علشان حضرتك بس كدة..
سلطان رفع رأسه ناحية السلم لقى عشق نازلة فتح عينيه من الصدمة لما لقاها لابسة لبس مش متناسق نهائي و لا لبس يليق بحفلة..
عشق(بضيق):مش لاقية حاجة مناسبة و مش متعودة ألبس فساتين..
سلطان:ده أنتي تلبسي بدلة أرحم من القرف اللي لابساه ده..
عشق(بضيق):أنت رخم..
سلطان:لا انا عندي مرارة واحدة الحقيني يا دادة..
"عشق كانت لابسة بنطلون و فوقه فستان سواريه مفتوح من عند الرجل اليمين كلها و فوق الفستان تي شيرت بكم"..
عشق(بضيق):أنا بحب ألبس بنطلون و تي شيرت و بس كدة..
أسماء:بس دي حفلة يا حبيبتي..
عشق(بضيق):خلاص مش لازم أروح..
سلطان:قدامك عشر دقايق تكوني لبستي لبس ترتاحي فيه و تحصليني على العربية...
عشق:قصدك ألبس تي شيرت و بنطلون عادي!
سلطان:بكره المنافقين علشان كدة طالما مش بترتاحي في الفساتين ألبسي اللي يريحك و متتعمديش تظهري بشخصية أنتي مش عايزاها لأنك ساعتها هتبقي منافقة..
سلطان خرج بره الفيلا و لعب مع غضب شوية عقبال ما عشق تنزل..
عشق طلعت تجري على أوضتها و هي مبسوطة..
"عشق لبست بنطلون جينز غامق و فوقه تي شيرت بكم باللون الأسود و لبست كوتشي أبيض عالي و عدلت شعرها و لبست اكسسورات بسيطة جدا"..
عشق:شكلي حلو يا دادة؟
أسماء:قمر يا حبيبتي يلا بقي أخرتي سلطان و هو مبيحبش يروح أي مكان متأخر..
عشق:حاضر..
عشق باست دادة اسماء على خدها و جريت على تحت و وقفت بسرعة أول ما لقت سلطان قدامها...
سلطان:عم فتحي يلا..
سلطان:عاطف سيب هنا عبد المنعم و رجالته حماية لدادة أسماء و الفيلا..
سلطان:عينك دي و لا عدسات؟
عشق:أنت شايف إيه؟
بص سلطان لعيون عشق و بعدها بص ناحية العربية بسرعة و جري ناحيتها ركب معزمش حتى على عشق..
عشق ركبت جمب سلطان في الكرسي الخلفي..
سلطان:هي خالتو مكلمتكيش لحد دلوقتي؟
عشق:لا حاسة أن الموضوع خطير تفتكر صاحب بابا عايز يقولها إيه؟
سلطان:لو عايزاني أعرف هحاول..
عشق:مش شرط شكلي كدة مش هكمل في مصر..
سلطان:و الله هتريحي..
عشق:شكرا..
بعد فترة وقفوا قدام مدخل الحفلة..
فتحي:ها يا باشا تحب إيه؟
سلطان:لا خليك معلش يا فتحي، انزلي يا عشق.
سلطان و عشق نزلوا و وراهم حراسة..
عشق:اشمعنا معاك في كل حتة حراسة؟
سلطان:الحراس وظفيتهم إيه يا ترى؟
عشق(بضيق):الحماية عارفة ده بس حماية من إيه؟!
سلطان:بعدين..
سلطان مسك إيد عشق و دخل للحفلة و هو بيوسع الازدحام اللي الموجود علشان يعرف يعدي عشق..
سلطان:تعالي هنا...
سلطان اختار ترابيزة بعيدة عن الكل و وقف عليها هو و عشق و بعد فترة لمحه أيمن..
أيمن:سلطان بيه..
سلطان:خليكي هنا يا عشق، عاطف خليك معاها..
سلطان مشي مع أيمن اللي بص لعشق باستغراب و مشي مع سلطان..
سلطان:فين عصام؟
أيمن:أهو يا فندم..
عصام:تشرفت بوجودك في قصري المتواضع..
سلطان:شكرا..
عصام:حسين شوف ضيوف سلطان بيه يشربوا إيه..
حسين:أوامرك يا بيه..
سلطان وقف مع عصام بيتكلموا في الشغل، عشق حست بالملل من أجواء الحفلة..
عشق كانت هتمشي بس عاطف وقف قدامها..
عاطف:حضرتك راحة فين؟
عشق:هروح الحمام..
عاطف:اتفضلي معايا..
عشق:أبدا أنت مجنون هو كمان حصلت تيجي معايا الحمام و لما يجي سلطان قوله إني اللي رفضت..
عشق سابت عاطف و بدأت تسأل فين الحمام و دخلته بدأت تغسل وشها كذا مرة..
عشق خرجت و تاهت فين ترابيزتها..
حسين:تشربي إيه؟
عشق:افندم؟
حسين:تحبي تشربي إيه أنتي في حفلة عصام بيه..
عشق:شكرا مش عايزة..
حسين:تحبي تيجي نتكلم كلمتين لوحدنا...
عشق:تعرف أنك واحد قليل الأدب..
حسين:حاجة زي كدة..
حسين مسك ايد عشق و لكنها شدت ايديها منه و ضربته قلم على وشه و سابته و مشيت..
حسين بص ناحيتها بخبث و مشي ناحية بنت كانت بترقص و بتشرب ويسكي..
حسين(بهمس):عايزك في كلمة..
عشق كانت رايحة ناحية الترابيزة بتاعتها لكن لقت بنت وقفتها..
عشق:حضرتك بتناديني هنا؟
بنت:هو في جميلة غيرك هنا!
عشق:شكرا على مجاملتك..
بنت:قوليلي اسمك إيه؟
عشق:عن اذنك.
بمجرد ما عشق كانت هتمشي، البنت زقتها في حمام السباحة اللي كان جمبها..
عشق(بصريخ):سلطان..
.
.
.
_يتبع::::::::::::::::::
******************